Alamete doyicho loosinkera roore anga woxe afiˈneemmohu, Yihowa Farciˈraasine ikkino manni uminsa hasattonni fushshanno fushshonniiti. a Gambooshshinke bayicho, woxe fushsha hasiˈranno mannira fushshote saaxine worranni; qoleno woxe fushsha dandiinannita wole doogga webisayitenke aana Fushshote qoolira kulloonni. Woxe fushshanno manchi alamete doyicho loosinkera woy songote hajora, woy lamunkura woxe fushsha dandaanno doogga qixxeessinoonni.

 Yihowa Farciˈraasine loosse afidhanno woxi giddonni kageeshsha fushshe woy asaraate uyiyye diyinanninsa. (2 Qorontoosi 9:7) Gambooshshinkewa mutsuwaate gamba diassineemmo; qoleno ammaˈnote soqqamaasinenke manna cuuate, madaarshaho, sargete, woy wole ammaˈnote ledo xaadooshshe afidhino soqqanshora woxe diadhitanno. (Maatewoosi 10:7, 8) Keeke ganne hiratenni, baazaare qixxeessine, biingote godoˈlenni, muuziiqunna sirbunni ayirrinsanni ayyaana qixxeessine, sagale worre hirranni, kaartu godoˈlenni, woy wole togoo doogganni woxe gamba assate diwoˈnaalleemmo; qoleno manna woxe tuggenke diyineemmo. Woxe fushshitinori ayeootiro woleho dikullanni. (Maatewoosi 6:2-4) Woxe afiˈrate yine, webisayitenke aanano ikko borronke aana mannu egensiishsha fushshanno gede diassineemmo.

 Mitte mittenti Yihowa Farciˈraasine songo, songote gambooshshiwa aganu aganunku woxu shallago rippoorte shiqishshanno; qoleno togoo gambooshshenke mannu baalunku daa dandaanno. Fulino woxe garunni amandoonnita buuxate, mitte mittente songota woxu shallago ganyine laˈanni (woy odiite assinanni).—2 Qorontoosi 8:20, 21.

•   Fushshote saaxine: Gambooshshu Addaraashera, Jajjabbu Gambooshshi Addaraashera woy wole gambooshshinke basera woxe woy cheeke fushshote saaxinera wora dandiinanni.

•   Interneetete widoonni woxe fushsha: Duucha gobbara, “Yihowa Farciˈraasine Loosira Woxe Fushshi” yaanno qoola horoonsidhe woxe kirediti-kaardetenni, debiiti-kaardetenni fushsha, baanki traansifere assa, woy wole togoo doogonni fushsha dandaatto. b Yihowa Farciˈraasine giddo mitootu, tenne doogga giddo mite horoonsidhe aganu aganunku fushshitanno woxe balaxxe wodhitanno.—1 Qorontoosi 16:2.

•   Balanxe hende uyinanni woxe: Woxe fushshate mito woyite balanxe qixxaawanna alba qolle heda, hattono higgete egenno noonsare amaaˈla hasiissanno. Konni garinni alba qolle hedanna qixxaawa, mite gobbara giwiru widoonni kaaˈlo afidhino. Mitootu, xaanni woy reyitu gedensaanni woxe kaaˈlote loosira uyinanni gede dhaaˈma dandiitanno gara huwatansa kaaˈlitinonsa. Konni woroonni kulloonnire horoonsidhe woxe fushsha hasiˈrattoha ikkiro, ballo heeˈratto gobbara noota Yihowa Farciˈraasineta sinu biiro hasaawisi:

  •   baankete mine noo woxe

  •   inshuraansenna xurata

  •   bayichunni bayicho adhine haˈnannikki jajja

  •   akisoonenna boonda

  •   dhaansa

 Heeˈratto gobbara woxe fushsha dandiinanni doogga ledde afate, “Yihowa Farciˈraasine Loosira Woxe Fushshi” yaanno qoola lai.