Imbaaqoomi 3:1-19
3 Masaalaanchu Imbaaqoomi wiꞌlishshanni huucciꞌrino huuccatto:
2 Yihowa, atere kullanna macciishshoommo.
Yihowa, loosikki waajjishinoe.
Dirrate mereero* loosokki loosi!
Dirrate mereero* loosikki egennamanno gede assi.
Bao dagganno yannara maaro qaagi.
3 Maganu Teemaaninni,Qullaawuno Faaraani Ilaalinni day. (Seela)*
Gaacheenisi gordo diwino;Guweenyisino baatto woꞌmino.
4 Isi barri xawaabbi gede waraꞌa yee xawanno.
Angasinni lame caange fultu;Jawaantesino hakko dahaabbe no.
5 Fayya albasiinni hadhu;Giirtanno iibbabbono hoodesi hadhu.
6 Isi uurri; baattono shafi.
Caaqqi yee lae daga hembeelsi.
Hegere ilaalla cancanantu;Biꞌre birqiiqi tulluwano ubbe kumbuultu.
Biꞌre hundi dooggano isite.
7 Kushaani dunkaanna giddo qarru leellinoe.
Miidiyaami dunkaani hocci huxiꞌri.
8 Yihowa, hanqikki buwinohu laggateeti?Addinta hanqoottohu laggateetinso?
Jawu hanqikki buwinohu baarahooti?
Faradokki guluffe hadaraasoottona;Saragallikkino qeelle* adhino.
9 Digaanikki ogoro hoolloonni; isino qixxaawino.
Siqquwa* xaarre worroonni.* (Seela)
Baatto laggatenni badootto.
10 Ilaalla ate laꞌuti xisseennansa fittifattu.
Biite xeeni fee adhe sai.
Diime taxidhe luultu.
Angaseno iima qolte kayissu.
11 Arrishshonna aganu gotti yiino dargansa uurri.
Maxxikki xawaabbu gede ikke kaate fuli.
Urdekki banqote gede bilicci yitu.
12 Baattote aana hanqunni gaaditto.
Dagano hanqunni kaditto.*
13 Mannakki gatisate, buudhoottohano gatisattora fulitto.
Bushu manchi mini massagaancho* cancanitto.
Minuno safotenni guunxote* geeshsha reqecci yii. (Seela)
14 Ane billaallissara hanqite kaꞌu woyte,Umisi bagadinni* olamaasinesi umo qasootto.
Insa qarraataamo goꞌlite egemmite lowo geeshsha hagiidhitino.
15 Baaru giddoonni, qoleno hembeelamanni noohu lowo way mereeroonni,Faradokki guluffe saootto.
16 Ani macciishshummo; godowiꞌyano shafami;Huurotenni kainohunni suumeꞌya huxidhu.
Miqqaꞌya dukukkitu;Woroonni lekkaꞌya huxidhu.
Ikkollana shettote barra sammi yee agadheemmo;Kuni barri siꞌannonke dagara daannona.
17 Balasete haqqicho laala hooggurono,Woynete haqqera gumu hoogirono,Ejersu haqqi laala hoogirono,Gate gidu hoogirono,Hoshsha gooꞌraanunni baꞌurono,Hadiro lalu hoogirono,
18 Anera kayinni Yihowanni tashshi yaannoe;Gatisaanchiꞌya Maganunni hagiidheemmo.
19 Woꞌmunkura Aliidi Mootichi Yihowa jawaanteꞌyaati;Isi lekkaꞌya geedimunnite gede assanno;Gotti yiino dargano haꞌrisannoe.
Lekkaalliidi Qaagiishshuwa
^ “Dirinkera” yaano ikkara dandaanno.
^ “Dirinkera” yaano ikkara dandaanno.
^ Qaallate Tiro lai.
^ Woy “gato.”
^ “Maxxa” yaano ikkara dandaanno.
^ “Gaꞌre xaartino xaaro xawinsoonni” yaano ikkara dandaanno.
^ Noo gedeenni tirriro, “gidu gede assite ganitto.”
^ Noo gedeenni tirriro, “umo.”
^ Noo gedeenni tirriro, “goowu.”
^ Noo gedeenni tirriro, “Zanguwasinni.”
