Hage 2:1-23
2 Lamalki aganira 21ki barra, Yihowa qaali masaalaanchu Hage widoonni togo yaanni day:
2 “Yihudu gashshaancho Selaatiyaali beetto Zerubaabeeli, Yehotsedeeqi beetto kakkalaanote biilo Iyyaasunna gatino manna ballo togo yite xaꞌmi:
3 ‘Kiꞌne giddo konni miniha* albi ayirrinye lainohu ayeti? Xa kayinni laꞌinanni woyte hiittooti? Albiha hendiro mullare diꞌꞌikkino?’
4 “‘Xa kayinni Zerubaabeeli, jawaati’ yaanno Yihowa; ‘Yehotsedeeqi beetto kakkalaanote biilo Iyyaasu, atino jawaati.’
“‘Kiꞌne gobbate heedhinanni manni baaluno, jawaattine loosse’ yaanno Yihowa.
“‘Ani kiꞌne ledo noommona’ yaanno olantote Mootichi Yihowa.
5 ‘Gibitsete gobbanni fultini yannara eoommoꞌne qaale qaagge; ayyaaniꞌyano mereeroꞌne heeꞌranno.* Waajjitinoonte.’”
6 “Olantote Mootichi Yihowa togo yaannona: ‘Shiima yanna gedensaanni, galagale gordo, baatto, baaranna moola baatto shafeemmo.’
7 “‘Daga baalano shafeemmo; daga baalate mereero noohu ayirradu* coyno daanno; qoleno konne mine ayirrinyu woꞌmanno gede asseemmo’ yaanno olantote Mootichi Yihowa.
8 “‘Birru aneho; culkuno aneho’ yaanno olantote Mootichi Yihowa.
9 “‘Kuni mini albillitte afiꞌranno ayirrinyi albiha rooranno’ yaanno olantote Mootichi Yihowa.
“‘Konni dargira keere eemmo’ yaanno olantote Mootichi Yihowa.”
10 Daariyoosi moohihunni layinki diro, honsikki aganira 24ki barra, Yihowa qaali masaalaanchu Hagewa togo yaanni day:
11 “Olantote Mootichi Yihowa togo yaanno: ‘Ballo kakkalaano seeru daafira togo yite xaꞌmi:
12 “Mittu manchi uddanosi erammera qullaawa maala haaꞌre heeꞌre, uddanosinni tima woy woxi woy woyne woy zayte woy wole aye gari sagale kisiro, hatti sagale qullaawa ikkitanno?”’”
Kakkalaanono, “Diꞌꞌikkitanno!” yite qoltu.
13 Hakkiinni Hage togo yee xaꞌmi: “Reeshsha* kise battaawinohu mittu manchi kuri coyibba giddo mitto kisiro, kisi coy battaawanno?”
Kakkalaanono, “Ee, battaawanno” yite qoltu.
14 Hageno togo yii: “‘Kuni mannino hattooti; tini dagano albaꞌyaanni hattooti’ yaanno Yihowa; ‘angansa loosi baaluno hattooti; hakko shiqishshanno coy baalu battaawinoho.’
15 “‘Xa kayinni konni barrinni hanaffine, ballo konne coye wodanche:* Yihowaha qullaawa mine gatamarrara albaanni,
16 hakkawaro coy hiittooti? Mittu manchi 20 safaraasincho afiꞌreemmo yee gide duunnoonniwa mari woyte 10 safaraasincho calla afiꞌri; qoleno mittu manchi 50 keenaasincho woyne afiꞌreemmo yee woynete kooffichiwa day woyte 20 calla afiꞌrino;
17 Kiꞌne yaano angaꞌne looso baala giirte mooshshitanno bubbenni, bulaasotenninna kaadetenni ganummo; ikkirono kiꞌne giddo mittuno anewa higinohu dino’ yaanno Yihowa.
18 “‘Techo barra yaano honsikki aganira 24ki barra Yihowaha qullaawa mine sanfoonni; ballo konni barrinni kayissine konne coye wodanche:*
19 Gootaaru* giddo xaano gatino wixi no? Woynete haqqe, balase, roomaanenna ejedhete haqqe xaa geeshsha guma dilaaltino. Konni barrinni kayse maassiꞌreemmoꞌne.’”
20 Aganu eihunni 24ki barra, Yihowa qaali layinkimeeshsho Hagewa togo yaanni day:
21 “Yihudu gashshaanchira Zerubaabeelira togo yii: ‘Gordonna baatto shafeemmo.
22 Gashshootubbate zuufaane galcheemmo; dagate gashshootubba wolqano huneemmo; saragallanna aanasi ofoltinore galcheemmo; faradunna insa guluffinori mittu mittunku rodiinsa bisenni reytanno.’”
23 “‘Selaatiyaali beetto soqqamaanchoꞌya Zerubaabeeli,’ yaanno Yihowa, ‘Hakko barra haaꞌreemmohe’ yaanno olantote Mootichi Yihowa; ‘qoleno maattamu cuuicho gede asseemmohe; korkaatuno doodhoommohu ateeti’ yaanno olantote Mootichi Yihowa.”
Lekkaalliidi Qaagiishshuwa
^ Woy “qullaawu miniha.”
^ “Gibitsete gobbanni fultini yannaranna ayyaaniꞌya mereeroꞌne noo yannara eoommoꞌne qaale qaagge” yaano ikkara dandaanno.
^ Woy “muxxe.”
^ Woy “Reytino lubbo.” Qaallate Tiro lai.
^ Woy “seekkitine hedde.”
^ Woy “seekkitine hedde.”
^ Woy “Gide duuꞌninanni bale.”
