Hage 1:1-15
1 Moote Daariyoosi moohihunni layinki diro, leekki aganira, umi barra, Yihowa qaali masaalaanchu Hage* widoonni, Yihudu gashshaanchiwa Selaatiyaali beetti Zerubaabeeliwa hattono kakkalaanote biiliwa Yehotsedeeqi beetti Iyyaasuwa togo yaanni day:
2 “Olantote Mootichi Yihowa togo yaanno: ‘Kuni manni, “Yihowa mine* minnanni* yanna diꞌꞌiillitino” yaanno.’”
3 Yihowa qaali masaalaanchu Hage widoonni galagale togo yaanni day:
4 “Tini yanna kuni mini diigame heeꞌreenna, kiꞌne biiffino minnara heedhinanni yannaati?
5 Xaano olantote Mootichi Yihowa togo yaanno: ‘Doogoꞌne hiittootero laydhe.*
6 Lowo wixa wixidhinoonni; kayinni mixxitinannihu shiimaho. Ittinanni kayinni diduubbinanni. Agginanni kayinni kassi diyitinanni. Diphitinanni kayinni iibbannosihu dino. Qaxarame loosannohu damoozasi xulluwa batidhino ogorira wodhanno.’”
7 “Olantote Mootichi Yihowa togo yaanno: ‘Doogoꞌne hiittootero laydhe.’*
8 “‘Ilaala fultine darroonni haqqe abbe. Ani isinni hagiidheemmo gedenna ayirreemmo gede mineꞌya minne’ yaanno Yihowa.”
9 “‘Lowore hexxitinoonni; afidhinoonniri kayinni shiimaho; minira haadhine dagginita, ani ufuufe billaallisummo. Kuni ikkinohu mayraati?’ yaanno olantote Mootichi Yihowa. ‘Ane mini diigame heeꞌreenna, kiꞌne mittu mittunku umiꞌne mine biifisiꞌrate dodantinanni daafiraati.
10 Hakko daafira kiꞌnera iimaanni noo gordi loju dirrannota hoꞌlino; baattono gide fushsha gibbino.
11 Anino baattote, ilaallate, gideho, haaro woynera, zaytete, baattote aana fulannorira, mannunna saadate aana, hattono angaꞌne daafurte loossinori baalu aana moolle woshshummo.’”
12 Selaatiyaali beetti Zerubaabeeli, Yehotsedeeqi beetti kakkalaanote biili Iyyaasunna gatino manni baalunku Maganinsa Yihowa huuronna masaalaanchu Hage coyiꞌrino qaale macciishshi; korkaatuno iso Maganinsa Yihowa soynosi; mannuno Yihowa waajji.
13 Hakkiinni Yihowa sokkaanchi Hage, Yihowa uynosi loosi garinni, “‘Ani kiꞌne ledo noommo’ yaanno Yihowa” yee mannaho sokka kuli.
14 Konnira Yihowa Yihudu gashshaanchi Selaatiyaali beetti Zerubaabeeli wodana, Yehotsedeeqi beetti kakkalaanote biili Iyyaasu wodananna gatino manni baalunku wodana kakkaysi; insano dagge Maganinsa olantote Mootichi Yihowa mine mina hanaffu.
15 Kuni ikkinohu Moote Daariyoosi moohihunni layinki diro, leekki aganira 24ki barraati.
