Μετάβαση στο περιεχόμενο

Μετάβαση στον πίνακα περιεχομένων

 ΜΑΘΗΜΑΣ 11

Τι Ασουνέν ι Ιεχωβάσκι Φωνή

Τι Ασουνέν ι Ιεχωβάσκι Φωνή

«Ακαβά ισί μο Τσσαβό . . . Τι ασουνέν-λες».​—ΜΑΤΘ. 17:5.

ΥΜΝΟΣ 120 Τι Ασουνέν, τι Πακιάν ντα κα Ευλογίντιβεν

ΣΟ ΚΑ ΝΤΙΚΧΑΣ *

1, 2. (α) Σαρ κερέλας λάφι ο Ιεχωβά ι τζενέντζαρ, ντα σαρ κερέλα-λες ανταβά αντιβές; (β) Σο κα ντικχάς ανταλέ μαθημάστε;

Ο ΙΕΧΩΒΑ χαιρίνελα τι κερέλ αμέντζαρ λάφι. Κο πουρανέ μπρεσά, βακερέλας πο σκέψεις κο τζενέ αντράλ κατά προφήτες, κατά άγγελοι ντα πι Τσσαβέσταρ, κατά Χριστός Ιησούς. (Αμώς 3:7· Γαλ. 3:​19· Αποκ. 1:1) Αντιβές κερέλα αμέντζαρ λάφι αντράλ πι Λαφίσταρ, κατά Αγία Γραφή. Ντινάς-λα αμέντε για τι σικλιάς σαρ σκεφτίνελα ντα τι αγαβάς λέσκε ντρομά.

2 Κάνα ο Ιησούς ισινέ κι πφουβ, ο Ιεχωβά κερντάς λάφι κατά ουρανός τριν φαρ. Κα ντικχάς σο βακερντάς ο Ιεχωβά, σο μπορίνασα τι σικλιάς λέσκε λαφίνταρ ντα σόσκε ισί λατσσέ αμένγκε.

«ΤΟΥΙ ΙΣΙΝΑΝ ΜΟ ΤΣΣΑΒΟ ΣΟ ΜΑΝΓΚΑΒΑ-ΤΟΥΤ ΜΠΟΥΤ»

3. Σο βακερντάς ο Ιεχωβά κάνα μπολντιλό ο Ιησούς σαρ διαβάνασα κο Μάρκος 1:​9-11, ντα καλά σημαντικές αλήθειες σικάντιλε ανταλέ λαφίνταρ;

3 Κο εδάφια Μάρκος 1:​9-11 αρακχάσα ι πρώτη φαρ σο κερντάς λάφι ο Ιεχωβά κατά ουρανός. (Διαβάνεν) Ο Ιεχωβά βακερντάς: «Τούι ισινάν μο Τσσαβό σο μανγκάβα-τουτ μπουτ· ισινόμ ευχαριστιμέ τούσαρ». Καζόμ συγκινισάλο ο Ιησούς κάνα ασουντάς ι φωνή πι Νταντέσκι τι βακερέλ λέσκε ότι μανγκέλας-λες ντα τθερέλας λέσκε εμπιστοσύνη! Ο λάφια ι Ιεχωβάσκε σικαντέ τριν σημαντικές αλήθειες. Πρώτον, ο Ιησούς ισί λέσκο Τσσαβό. Δεύτερον, ο Ιεχωβά μανγκέλα πι Τσσαβές. Ντα τρίτον, ο Ιεχωβά ισί ευχαριστιμέ πι Τσσαβέσαρ. Για τι ντικχάς σαρέ ανταλά αλήθειες.

4. Κάνα μπολντιλό ο Ιησούς, σόσκε βακερντάς λέσκε ο Ιεχωβά «τούι ισινάν μο Τσσαβό»;

4 «Τούι ισινάν μο Τσσαβό». Σόσκε βακερντάς ο Ιεχωβά  ανταλά λάφια; Κάνα ισινέ κο ουρανός, ο Ιησούς ισινέ πνευματικός τσσαβό ι Ντεβλέσκο. Όμως κάνα μπολντιλό αβιλό χρισμέ με άγιος πνεύμας. Αζομάν, ο Ντεβέλ σικαντάς ότι οτθάρ μπερί ο Ιησούς, σαρ χρισμέ Τσσαβό λέσκο, τθερέλας ι ελπίδα τι βουρτίνελ κο ουρανός για τι διορίντιβελ κατά Ντεβέλ σαρ Βασιλιάς ντα Αρχιερέας. (Λουκ. 1:​31-33· Εβρ. 1:8, 9· 2:​17) Άκ’ σόσκε κάνα μπολντιλό ο Ιησούς λέσκο Ντατ βακερντάς: «Τούι ισινάν μο Τσσαβό».​—Λουκ. 3:22.

Ο ισαριπέ ντα η ενθάρρυνση κερένα αμένγκε λατσσιπέ (Ντικχ ι παράγραφος 5) *

5. Σαρ μπορίνασα τι μοιάζας κο Ιεχωβά κάνα σικαβάσα αγάπη ντα ντάσα ενθάρρυνση;

5 «Μανγκάβα-τουτ μπουτ». Ο παράδειγμας σο ντινάς ο Ιεχωβά κάνα σικαντάς αγάπη ντα ντινάς ενθάρρυνση ανέλα αμαρέ γκοντιάτε τι ρόντας ευκαιρίες για τι ενθαρρύνας ι γιαβερέν. (Ιωάν. 5:​20) Κάνα κάποιος σο πφαμπάσα λέσκε σικαβέλα αμένγκε αγάπη ντα ισαρέλα-αμέν ι λατσσιμάσκε σο κεράσα, ανταβά κερέλα αμένγκε λατσσιπέ. Ο ίδιος αβέλα-πες ι πφραλέντζαρ κι κχανγκιρί ντα αμαρέ φαμιλιάσαρ. Τθερένα ανάγκη τι μανγκάς-λεν ντα τι ενθαρρύνας-λεν. Κάνα ισαράσα ι γιαβερέν, κεράσα λένγκι πίστη πιο ζουρανί ντα βοηθίνασα-λεν τι υπηρετίνεν αφοσιωμέ ι Ιεχωβάς. Ειδικά ο νταντά ντα ο νταγιά πρέπει τι ενθαρρύνεν πουμαρέ τσσαβέν. Κάνα ισαρένα-λεν αντράλ πουμαρέ γκίσταρ ντα σικαβένα λένγκε αγάπη, κερένα λένγκε λατσσιπέ.

6. Σόσκε μπορίνασα τι αβάς σίγουροι ι Ιησού Χριστόσκε;

6 «Ισινόμ ευχαριστιμέ τούσαρ». Ανταλά λάφια σικαβένα ότι ο Ιεχωβά ισινέ σίγουρος ότι ο Ιησούς κα κερέλας λέσκο θέλημας. Αφού ο Ιεχωβά ισί αζόμ σίγουρος πι Τσσαβέσκε, αμέν-ντα μπορίνασα τι αβάς ντιπ σίγουροι ότι ο Ιησούς κα κερέλ τι νικιόν μπαγιά σαρέ ο υποσχέσεις ι Ιεχωβάσκε. (2 Κορ. 1:​20) Κάνα σκεφτίνασα ο παράδειγμας ι Ιησούσκο, ισινάμ ατζέ πιο  αποφασισμέ τι σικλιάς λέσταρ ντα τι ακολουθίνας λέσκε βήματα. Σαρ ισινέ σίγουρος πι Τσσαβέσκε, ο Ιεχωβά ισί σίγουρος πι υπηρετόνγκε-ντα, ότι σαρ ομάδα κα συνεχίνεν τι σικλιόν λέσκε Τσσαβέσταρ.​—1 Πέτρ. 2:21.

«ΤΙ ΑΣΟΥΝΕΝ-ΛΕΣ»

7. Κάνα κερντάς λάφι ο Ιεχωβά κατά ουρανός σαρ βακερέλα κο Ματθαίος 17:​1-5, ντα σο βακερντάς;

7 Διαβάνεν Ματθαίος 17:​1-5. Η δεύτερη φαρ σο κερντάς λάφι ο Ιεχωβά κατά ουρανός ισινέ κάνα ο Ιησούς «αλλαντάς μορφή». Ο Ιησούς λιντάς ι Πετρός, ι Ιακωβός ντα ι Ιωαννής εκχέ βουτσσέ βεσέστε. Οτθέ ο απόστολοι ντικχλέ εκ εντυπωσιακή φαντασία. Ο μούι ντα ο σέα ι Ιησούσκε λένας-πες. Ντούι μουρσά, σο συμβολίνενας ι Μωυσής ντα ι Ηλιάς, κερένας λάφι ι Ιησούσαρ ι μεριμάσκε ντα για την ανάσταση σο ισινέ ανγκλά-λέστε. Παρόλο σο “λιντάας λίντρα” ι τρινέ αποστολόν, κάνα ντικχλέ οντιά εντυπωσιακή φαντασία ισινέ ντιπ τζανγκαντέ. (Λουκ. 9:​29-32) Σοράν, εκ φωτεινός σύννεφος ιτσσαρντάς-λεν ντα ασουντέ εκ φωνή κατά ουρανός, σο ισινέ η φωνή ι Ντεβλέσκι! Σαρ αβιλό-πες κο μπολντιπέ κι Ιησούσκο, ο Ιεχωβά σικαντάς αγάπη πι Τσσαβέσκε ντα ντινάς-λες ενθάρρυνση ακαλέ λαφίντζαρ: «Ακαβά ισί μο Τσσαβό σο μανγκάβα-λες μπουτ, ισινόμ ευχαριστιμέ λέσαρ. Αλλά ανταγιά φαρ βακερντάς κάτι γιαβέρ-ντα: «Τι ασουνέν-λες».

8. Σαρ επηρεαντάς η φαντασία ι Ιησούς ντα ι μαθητέν;

8 Οντιά φαντασία σικαντάς ι δόξα ντα ι ζορ σο κα τθερέλας ο Ιησούς σαρ Βασιλιάς κι Ντεβλέσκι Βασιλεία. Σίγουρα, ο Χριστός λιντάς ενθάρρυνση ντα ζορ ι βασανένγκε ντα ι μπέτι μεριμάσκε σο κα τθερέλας. Επίσης, η φαντασία κερντάς πιο ζουρανί ι πίστη ι μαθητένγκι ντα προετοιμαντάς-λεν ι δυσκολιένγκε ντα ι μπαρέ μπουτιάκε σο κα τθερένας. Περίπου 30 μπρεσά πιο σοράν, ο απόστολος Πέτρος κερντάς λάφι ανταλέ φαντασιάκε, ντα αντικάς σικαντάς ότι τθερέλας-λα ατζέ τζουβντί πι γκοντιάτε.​—2 Πέτρ. 1:​16-18.

9. Καλά συμβουλές ντινάς ο Ιησούς πι μαθητέντε;

9 «Τι ασουνέν-λες». Ο Ιεχωβά σικαντάς ξεκάθαρα ότι μανγκέλα τι ασουνάς ο λάφια λέσκε Τσσαβέσκε ντα τι ντας-λεν καν. Σο βακερντάς ο Ιησούς κάνα ισινέ κι πφουβ; Βακερντάς μπουτ πράγματα σο ισινέ σημαντικά! Για παράδειγμας, σικλιαρέλας με αγάπη πι μαθητέν σαρ τι βακερέν ο λατσσέ αμπέρια ντα βακερέλας λένγκε συνέχεια τι αβέν τζανγκαντέ. (Ματθ. 24:​42· 28:​19, 20) Βακερντάς λένγκε επίσης τι κερέν μπαρό αγώνας ντα μα τι τσσίντεν-πες παλάλ. (Λουκ. 13:​24) Ο Ιησούς βακερντάς καζόμ σημαντικός ισί τι μανγκέν ο μαθητές λέσκε ο εκ ι γιαβερές, τι ατσσόν ενωμέ ντα τι κερέν λέσκε εντολές. (Ιωάν. 15:​10, 12, 13) Καζόμ λατσσέ συμβουλές ντινάς πι μαθητέντε! Ισί αζόμ σημαντικές αντιβές καζόμ ισινέ αζομάν σο ντινάς-λεν.

10, 11. Σαρ μπορίνασα τι σικαβάς ότι ασουνάσα ι Ιησούς;

10 Ο Ιησούς βακερντάς: «Κον ακολουθίνελα ι αλήθεια ασουνέλα μι φωνή». (Ιωάν. 18:​37) Σικαβάσα ότι ασουνάσα λέσκι φωνή κάνα “νταϊντίνασα ο εκ ι γιαβερές ντα συγχωρίνασα ο εκ ι γιαβερές αντράλ αμαρέ γκίσταρ”. (Κολ. 3:​13· Λουκ. 17:3, 4) Επίσης, σικαβάσα ότι ασουνάσα λέσκι φωνή κάνα βακεράσα ο λατσσέ αμπέρια αντράλ αμαρέ γκίσταρ «εμ λατσσέ εμ δύσκολε ντιβεσέντε».​—2 Τιμ. 4:2.

11 Ο Ιησούς βακερντάς: «Μο μπρακέ ασουνένα μι φωνή». (Ιωάν. 10:​27) Ο μαθητές ι Χριστόσκε σικαβένα ότι ασουνένα-λες όχι σάντε κάνα ντένα προσοχή κο λάφια σο βακερέλα, αλλά κάνα κερένα-λεν  πουμαρέ ζωγιάτε. Να μουκχένα ο «ανησυχίες ι ζωγιάκε» τι ταρτίνεν λένγκι προσοχή. (Λουκ. 21:​34) Λένγκε ισί μπουτ σημαντικός τι ντεν καν κο εντολές κι Ιησούσκε, ατζέ-ντα κάνα ισί μπουτ δύσκολος. Μπουτ πφραλά νακχένα μπαρέ δοκιμασίες, σαρ ισί ο διωγμός, ο μπαρό τσοροριπέ ντα ο φυσικές καταστροφές. Σο-ντα τι νακχένα, ατσσόνα πιστοί κο Ιεχωβά. Ανταλέ τζενένγκε ο Ιησούς βακερέλα: «Κον τθερέλα μο εντολές ντα κερέλα-λεν, βοβ ισί σο μανγκέλα-μαν. Ντα κον μανγκέλα-μαν κα μανγκέλ-λες μο Ντατ».​—Ιωάν. 14:21.

Ο έργος βοηθίνελα-αμέν τι συνεχίνας τι ασουνάς ι φωνή ι Ιησούσκι (Ντικχ ι παράγραφος 12) *

12. Καβά ισί εκ γιαβέρ τρόπος σο σικαβάσα ότι ασουνάσα ι Ιησούς;

12 Ντικχέν ατζέκ εκ τρόπος σο σικαβάσα ότι ασουνάσα ι Ιησούς: Τι συνεργαζίντιβας οντουλέντζαρ σο τσσουντάς υπεύθυνους. (Εβρ. 13:7, 17) Ο τελευταία μπρεσά, η οργάνωση ι Ντεβλέσκι κερντάς μπουτ αλλαγές, σαρ ισί ο νεβέ εργαλεία ντα ο τρόποι σο κεράσα ο έργος, η συνάθροιση σο κεράσα αντρέ κι εβδομάδα ντα ο τρόπος σο χτίνασα, λατσσαράσα ντα περιποιήνασα ο Αίθουσες Βασιλείας. Καζόμ εκτιμίνασα ι καθοδηγία σο ντιντιόλα αμαρέ λατσσιμάσκε ντα σικαβέλα ι αγάπη σο τθερέλα η οργάνωση ι Ντεβλέσκι! Μπορίνασα τι αβάς σίγουροι ότι ο Ιεχωβά κα ευλογίνελ ο προσπάθειες σο κεράσα για τι ντας καν οντουλέντε σο βακερέλα η οργάνωση.

13. Σόσκε ισί λατσσό αμένγκε τι ασουνάς ι Ιησούς;

13 Κεράσα αμένγκε λατσσιπέ κάνα ασουνάσα σαρέ οντουλά σο σικλιαρντάς ο Ιησούς. Βοβ ντινάς πο λάφι πι μαθητέντε ότι λέσκε λάφια κα λοκχιαρένας λένγκο γκι. «Κα λοκχιόν τουμαρέ γκιά», βακερντάς. «Επειδή μο ζυγός ισί λατσσό ντα μο φορτίος ισί λοκχό». (Ματθ. 11:​28-30) Ο Λάφι ι Ντεβλέσκο, σο τθερέλα ο σταρ Ευαγγέλια-ντα σο βακερένα για τη ζωή ντα για το έργος ι Ιησούσκο, λοκχιαρέλα αμαρό γκι, ντέλα-αμέν πνευματική ζορ ντα κερέλα-αμέν γκοντιαβέρ. (Ψαλμ. 19:7· 23:3) Ο Ιησούς βακερντάς: «Ευτυχισμέ ισί οντουλά σο ασουνένα ο λάφια ι Ντεβλέσκε ντα κερένα-λεν!»​—Λουκ. 11:28.

“ΚΑ ΔΟΞΑΝΑΒ ΜΟ ΝΑΒ”

14, 15. (α) Καγιά ισινέ η τρίτη φαρ σο ο Ιεχωβά κερντάς λάφι κατά ουρανός σαρ ντικχάσα κο Ιωάννης 12:​27, 28; (β) Σόσκε ο λάφια ι Ιεχωβάσκε πρέπει τι λοκχιαρντέ ι Ιησούσκο γκι ντα τι ντινέ-λες ζορ;

14 Διαβάνεν Ιωάννης 12:​27, 28. Κο Ευαγγέλιος σο γραφιντάς ο Ιωάννης ισί η τρίτη φαρ σο κερντάς λάφι ο Ιεχωβά κατά ουρανός. Χάνικ ντιβεσά πριν τι μερέλ, ο Ιησούς ισινέ κι Ιερουσαλήμ για τι κερέλ πο τελευταίος Πάσχας. Βακερντάς:  «Ισινόμ αναστατωμέ». Σοράν προσευχίντιλο ακαλέ λαφίντζαρ: «Ντάντε, δόξανε το ναβ». Λέσκο ντατ βακερντάς κατά ουρανός: «Δοξαντόμ-λες ντα κα δοξάναβ-λες πάλι».

15 Ο Ιησούς ισινέ αναστατωμέ επειδή τθερέλας ι μπαρί ευθύνη τι ατσσόλ πιστός κο Ιεχωβά. Τζανέλας ότι κα τσσίντελας μπουτ ντουκχ ντα κα μερέλας μπέτι τροπόσαρ. (Ματθ. 26:​38) Πιο μπουτ σαρέ κατά γιαβερά πράγματα, μανγκέλας τι δοξάνελ πι Νταντέσκο ναβ. Κατηγοριντέ-λες ότι βακερντάς λάφια σο προσβαλιντέ ι Ντεβλές, ντα ανησυχίνελας μα τι ανέλ λατζ κι Ντεβλέσκο ναβ ο μεριπέ λέσκο. Καζόμ μπουτ πρέπει τι λοκχιαρντέ λέσκο γκι ο λάφια ι Ιεχωβάσκε! Κερντέ-λες τι αβέλ σίγουρος ότι ο ναβ ι Ιεχωβάσκο κα δοξάντιβελας. Ο λάφια λέσκε Νταντέσκε σίγουρα λοκχιαρντέ λέσκο γκι ντα ντινέ-λες ζορ οντουλένγκε σο κα τσσίντελας. Παρόλο σο οντιά φαρ ο Ιησούς μάλλον ισινέ ο μόνος σο αγαντάς σο βακερντάς λέσκο Ντατ, ο Ιεχωβά κανονιντάς τι γραφίντιβεν Λέσκε λάφια σαρέ αμένγκε.​—Ιωάν. 12:​29, 30.

Ο Ιεχωβά κα δοξάνελ πο ναβ ντα κα ελευθερώνελ πι λαός (Ντικχ ι παράγραφος 16) *

16. Σόσκε μπορεί μπάζιμα τι ανησυχίνασα μα τι λατζάντιβελ ι Ντεβλέσκο ναβ;

16 Σαρ ο Ιησούς, αντικάς αμέν-ντα μπορεί τι ανησυχίνασα μα τι λατζάντιβελ ι Ιεχωβάσκο ναβ. Μπορεί τι αδικίνενα-αμέν σαρ ι Ιησούς-ντα. Ή μπορεί τι χολιάνασα κάνα ασουνάσα ο ψεύτικα λάφια ι τζενένγκε σο τζάνα αμέντζαρ κόντρα. Μπορεί τι σκεφτίνασα ι λατζ σο ανένα ανταλά λάφια κι Ντεβλέσκο ναβ ντα κι οργάνωση λέσκι.  Αλλά ο λάφια ι Ιεχωβάσκε λοκχιαρένα αμαρό γκι. Να χρειαζίντιβελα τι ανησυχίνας μπουτ. Μπορίνασα τι αβάς σίγουροι ότι “η ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβάσα κα αρακχαβέλ αμαρό γκι ντα αμαρί γκοντί αντράλ κατά Ιησούς Χριστός”. (Φιλιπ. 4:6, 7) Ο Ιεχωβά κα δοξάνελ πο ναβ σο-ντα τι αβέλ-πες. Αντράλ πι Βασιλειάταρ, κα νασκιαρέλ σαρέ ο μπέτι πράγματα σο ανέλα ο Μπενγκ ντα ανταβά ντουνιάς Λέσκε πιστέ υπηρετόντε.​—Ψαλμ. 94:​22, 23· Ησ. 65:17.

ΤΙ ΑΣΟΥΝΕΝ Ι ΙΕΧΩΒΑΣΚΙ ΦΩΝΗ ΑΝΤΙΒΕΣ

17. Σαρ κερέλα αμέντζαρ λάφι ο Ιεχωβά αντιβές σαρ βακερέλα κο Ησαΐας 30:21;

17 Ο Ιεχωβά κερέλα αμέντζαρ λάφι αντιβές-ντα. (Διαβάνεν Ησαΐας 30:​21) Ισί μπαγιά ότι να ασουνάσα-λες τι κερέλ αμέντζαρ λάφι κατά ουρανός. Αλλά σικλιαρέλα-αμέν αντράλ πι Λαφίσταρ, κατά Αγία Γραφή. Ντα ο πνεύμας ι Ιεχωβάσκο κερέλα ι “πιστέ υπηρετής” τι ντελ-αμέν αμαρό χαμπέ. (Λουκ. 12:​42) Σο μπερεκέτι πνευματικός χαμπέ λάσα αντράλ κατά τυπωμέ ντα κατά ηλεκτρονικές εκδόσεις, κατά βίντεα ντα κατά ηχογραφήσεις!

18. Σαρ ο λάφια ι Ιεχωβάσκε μπαριαρένα τουμαρί πίστη ντα ντένα-τουμέν θάρρος;

18 Τι ντας-αμέν γκοντί ο λάφια σο βακερντάς ο Ιεχωβά κάνα λέσκο Τσσαβό ισινέ κι πφουβ! Μακάρι ο λάφια ι ίδιε ι Ντεβλέσκε, σαρ ισί γραμμέ κι Γραφή, τι ντεν-αμέν ι σιγουριά ότι ο Ιεχωβά τθερέλα σαρέ ο πράγματα πι βαστέστε ντα ότι κα νασκιαρέλ σαρέ ο μπέτι πράγματα σο ανέλα αμένγκε ο Μπενγκ ντα λέσκο πφιρνό ντουνιάς. Επίσης, τι αβάς αποφασισμέ τι ασουνάς λατσσές ι φωνή ι Ιεχωβάσκι. Άμα κεράσα-λες ανταβά, κα νταϊντίνας σο-ντα προβλήματα μπορεί τι τθεράς ακανά ή κο μέλλον. Η Γραφή βακερέλα αμένγκε: «Τθερένα ανάγκη ι υπομονή για τι μπορίνεν, αφού κα κερέν ι Ντεβλέσκο θέλημας, τι λεν οντουλά σο βακερντάας ο Ντεβέλ ότι κα ντελ-τουμέν».​—Εβρ. 10:36.

ΥΜΝΟΣ 22 «Ο Ιεχωβά Ισί Μο Τσομπάνης»

^ παρ. 5 Κάνα ο Ιησούς ισινέ κι πφουβ, ο Ιεχωβά κερντάς λάφι κατά ουρανός τριν φαρ. Εκ ανταλένταρ, βακερντάς κο μαθητές τι ντεν καν λέσκε Τσσαβέστε. Αντιβές, ο Ιεχωβά κερέλα αμέντζαρ λάφι αντράλ κατά Αγία Γραφή, σο τθερέλα αντρέ ο λάφια ι Ιησούσκε, ντα αντράλ κατά οργάνωση. Ανταλέ μαθημάστε κα ντικχάς σόσκε ισί λατσσό αμένγκε τι ασουνάς ι Ιεχωβάς ντα ι Ιησούς.

^ παρ. 52 ΣΟ ΣΙΚΑΒΕΝΑ Ο ΦΩΤΟΓΡΑΦΙΕΣ: Εκ πρεσβύτερος ντικχέλα εκχέ διακονικός σο σουλαβέλα ι Αίθουσα Βασιλείας ντα κερέλα πι υπηρεσία κο έντυπα. Ο πρεσβύτερος ισαρέλα-λες αντράλ πι γκίσταρ.

^ παρ. 54 ΣΟ ΣΙΚΑΒΕΛΑ Η ΦΩΤΟΓΡΑΦΙΑ: Εκ ζευγάρι κι Σιέρα Λεόνε ντέλα ι πρόσκληση ι συναθροισιένγκε εκχέ ψαράστε.

^ παρ. 56 ΣΟ ΣΙΚΑΒΕΛΑ Η ΦΩΤΟΓΡΑΦΙΑ: Μάρτυρες εκχέ τθεμέστε σο αμαρό έργος ισί απαγορευμέ κερένα συνάθροιση εκχέ κχερέστε, νανέ επίσημα ιριαντέ για μα τι ταρτίνεν ι προσοχή.