28 УРОКИ
Сикав, кай синян благодарно е жертваке, която керде о Йехова тай о Исусес за туке
Сар чувствинес тут, кана то амал дел тут йекх шукар подаръки? Сигурно синян бут щастливо тай мангес те сикавес, кай синян благодарно е подаръкиеске. О Йехова тай о Исусес дине амен о най-баро тай о най-шукар подаръки. Саво си кавка подаръки тай сар ащи те сикавас, кай синям благодарна за леске?
1. Сар ащи те сикавас, кай синям благодарна е жертваке, която керде о Дел тай о Христос за аменге?
И Библия пхенел, кай „секой, ковато верувинел ко Исусес“ ащи те живинел вечно. (Йоан 3:16) Сар ащи те сикавас амари вяра кариг о Исусес? Амаре решения тай о букя, колато керас, требе те сикавен, кай иси амен вяра. (Яков 2:17) Кана сикавас амари вяра е букиенца, колато керас тай пхенас, барярас амаро амалипе е Исусеса тай лескере Дадеса, е Йеховаса. (Четине Йоан 14:21.)
2. Саво специално диес помагинел аменге те сикавас, кай синям благодарна е жертваке, която керде о Йехова тай о Исусес?
И рат англал те мерел, о Исусес пхенгяс пе ученикиенге со авер ащи те керен, за те сикавен, кай си благодарна лескере жертваке. Ов пхенгяс ленге, кай требе те киден пес, за те ден пес годи лескере меримнаске. Анди Библия калке важноне събраниеске пхенел пес „и Вечеря е Господариескери“. Леске пхенас също и Господно вечеря или о Възпоменание е Исусескере меримнаске. (1 Коринтяни 11:20) О Исусес мангелас лескере апостоля тай саворе истинска християня те ден пес годи, кай ов диняс по животос аменге. Ов пхенгяс: „Керен кавка сар възпоменание манге.“ (Лука 22:19) Кана жас ко Възпоменание, сикавес, кай синян благодарно, кай о Йехова тай о Исусес сикавде зомкха бари любов кариг аменде.
РОДЕ ПО-ХОРЕСТЕ
Дикх со авер ащи те керес, за те сикавес, кай синян благодарно, кай о Йехова тай о Исусес сикавде зомкха бари любов. Ахальов соске си важно о Възпоменание е Исусескере меримнаске.
3. Со те керас, за те сикавас, кай синям благодарна?
Представине туке, кай декхой спасинел то животос. Дали ка бистерес со кергяс кавка мануш за туке? Или ка мислинес сар те сикавес леске, кай синян благодарно?
Аме ащи те живинас вечно, соскето о Йехова сикавгяс милост кариг аменде. Четинен 1 Йоан 4:8-10 тай хоратинен калке въпросиенге:
-
Соске е Исусескери жертва си специално подаръки?
-
Сар чувствинес тут, като жанес со керде о Йехова тай о Исусес за туке?
Сар ащи те сикавас, кай синям благодарна е жертваке, която керде о Йехова тай о Исусес за аменге? Четинен 2 Коринтяни 5:15 тай 1 Йоан 4:11; 5:3. Палал секоне стихиесте хоратинен калке въпросиеске:
-
Според о стихи, со ащи те керас, за те сикавас, кай синям благодарна?
4. Ов сар о Исусес
Ащи те сикавас, кай синям благодарна, като дикхас те овас сар о Исусес. Четинен 1 Петър 2:21 тай хоратинен калке въпросиеске:
-
Саве букя ащи те керес, за те сикавес, кай мангес те овес сар о Исусес?
О Исусес дехелас е Девлескоро Слово, проповединелас тай помагинелас е манушенге
5. Жа ко Възпоменание е Исусескере меримнаске
Четинен Лука 22:14, 19, 20, кате пишинел сар керде и първо Господно вечеря. После хоратинен калке въпросиенге:
-
Сар керде и първо Господно вечеря?
-
Со си о маро тай со си и мол? (Дикх о 19 тай о 20 стихи.)
О Исусес мангелас лескере ученикя те керен и Господно вечеря йекх дром андо бреш, кана си и годишнина лескере меримнастар. Аке соске е Йеховаскере Свидетеля киден пес секо бреш, за те ден пес годи е Исусескере меримнаске, сарто ов пхенгяс. Дикхен о КЛИПИ, ковато сикавел кизом си важно кавка диес. После хоратинен калке въпросиеске:
-
Со керел пес ко Възпоменание?
О маро сикавел е Исусескоро манушикано съвършено телос, а и мол сикавел лескоро рат
СО СИКЛИЛЯМ
Аме сикавас, кай синям благодарна е жертваке, която кергяс о Исусес аменге, като сикавас вяра кариг лесте тай като жас ко Възпоменание лескере меримнаске.
О най-важна букя таро уроки
-
Сар сикавас амари вяра кариг о Исусес?
-
Сар ка сикавес, кай синян благодарно е жертваке, която керде о Йехова тай о Исусес за туке?
-
Соске си важно те жас ко Възпоменание е Исусескере меримнаске?
АХАЛЬОВ ПО-БУТ
Со мангас те керас, като мислинас, кай о Исусес диняс по животос аменге?
Ахальов со си и вяра тай сар ащи те сикавас амари вяра.
Проявявай вяра в обещанията на Йехова („Стражева кула“ октомври 2016)
Четине сар променисайло о животос йекхе жувлякоро, кана ахалили е Исусекере жертваке.
Библията променя живота на хората („Стражева кула“ 1 август 2011)
Ахальов соске само десаве мануша хан таро маро тай пиен тари мол ко Възпоменание.
