Khuyapayakuq kayqa juj runa imapi tarikusqanta yachaspa noqanchispas chhaynapi tarikushasunman jina sientekuymi. Umamanta yachaq doctor Rick Hanson nin: “Khuyapayakuqñan nacenchis”, nispa.

KAYPI PIENSAY: ¿Imaraykun noqanchis khuyapayakuq kanchis animalkunataq mana? Biblian explican Dios payman rijch’akuqta kamawasqanchista (Génesis 1:26). Chayraykun noqanchisqa Dios jina sumaq kayninkunapi payman rijch’akunchis. Sichus pitapas khuyapayanchis chayqa, rikuchishanchis Jehová Diosninchis khuyapayakuq kasqantan (Proverbios 14:31).

Diosninchisqa khuyapayakuq kasqanraykun manapuni munanchu mayqellanpas sufrinanchista. Egipto llaqtapi israelitakuna esclavo kaspa ñak’arisqankumanta, jinallataq 40 wata ch’inneq pampapi purisqankumantan Biblia nin: ‘Munakuspaymi khuyakuspaymi paykunata kacharichirani’, nispa (Isaías 63:9). Diosninchisqa manan imaynapi llaqtan tarikusqallantachu yacharan aswanpas khuyapayaranmi. Chaymi nin: “Yachanitaqmi ñak’arishasqankutapas”, nispa (Éxodo 3:7). Nillantaq: “Pipas qankunata tupaykuqqa ñawi ruruytan tupaykun”, nispa (Zacarías 2:8). Chayrayku pipas ñak’arichiwaqtinchisqa Diostapas ñak’arichishankuman jinan.

Noqanchisña mayninpi juchachakusunman “manan Diosqa khuyapayawanmanñachu” nispa chaypas Biblian niwanchis: “Diosqa sonqonchismanta aswan jatun kasqanta, chaymantapas payqa yachashanmi tukuy imatapas”, nispa (1 Juan 3:19, 20). Diosqa allintan reqsiwanchis noqanchis kikinchismantapas. Payqa allintan yachan ima pasawasqanchista, piensasqanchista, sientekusqanchista, chayta yachaspan Diosqa paytapas pasashanman jina sientekun.

 Biblia asegurawanchis:

• “Wajakamuwaqtiykichismi, noqa kutichimusaykichis, yanapaykunaypaq qaparimuqtiykichismi: Uyarisaykichismi, nispa nimusaykichis” (ISAÍAS 58:9)

• “Noqaqa yachanin qankunapaq yuyaykusqayta, allinniykichispaqmi yuyaykushani, manan mana allinniykichispaqchu. Suyasqaykichis kausaytan ima sumaqta qhepaman qosaykichis. Noqa Señor Diosmi chayta nini. Chay p’unchaypin qankuna wajakuwankichis, qayllaykamuwaspan mañakuwankichis, noqataq uyarisaykichis” (JEREMÍAS 29:11, 12)

• “Weqeykunata qara p’uyñuykiman juñuranki. ¿Manachu chaykunaqa qelqaykipi qelqasqa kashan?” (SALMOS 56:8)

¿Atisunmanchu problemakuna atipayta Dios khuyapayakuq kasqanta yachaspa? Mariamanta yachasun.

Paymi nin: “18 watanpi kashaq wawaymi iskay watata cáncer onqoywan karan, chaymantataq wañukapuran, chayta rikuymi noqapaqqa nishu sasa karan. Niqmi kani: ‘Imaraykutaq khayna sasa kausayri’, nispa Jehová Diospaqmi phiñasqa kasharani, mana imatapas ruwasqanrayku.

“Jehová Diosqa manapas munakuwanmanchu jinan sientekuq kani. Soqta wata chhaynapi tarikusqay pasaytan juj munakuq amigayman willarani. Payqa unaytan tukuy yuyaywan uyariwaran, jinaspa 1 Juan 3:19, 20 textota yuyarichiwaran, chaypi nishan ‘Diosqa sonqonchismanta aswan jatun kasqanta, chaymantapas payqa yachashanmi tukuy imatapas’ nispa. Jinaspa explicawaran Jehová Diosqa allintapuni sufrisqanchista yachasqanta.

“Chay pasaytapas Diospaqqa phiñasqaraqmi kasharani. Chayllapin leerani Salmos 94:19 textota, chaypin nin: ‘Sonqoyta llakikuna ñit’iykushaqtinmi, qanqa sonqochaykuwanki kusirichiwanki’, nispa. Chay simikunatapunin uyariyta munasharani. Chaymantañan Jehová Dioswanqa tukuy sonqoywan rimarani, jinaspataq thaj sientekurani”, nispa.

¡Anchatan kusikunchis Jehová Dios entiendewasqanchista, imapi tarikuqtinchispas paypas chayta pasashanman jinata sientesqanta yachayqa! Ichaqa, ¿imaraykun khaynata ñak’arinchis? ¿Dioschu juchanchismanta castigawashanchis? ¿Jayk’aqllapas tukukunqachu ñak’ariykuna? Kay tapuykunataqa qatimuq temakunapin kutichikunqa.