Kichay leenaykipaq

Índice nisqaman riy

“Qankunaqa [...] astawanraqmi valenkichis” (MATEO 10:31)

¿Rikusunkimanchu Dios?

¿Rikusunkimanchu Dios?

¿IMATAN KAMASQANKUNA YACHACHIWANCHIS?

Primera hora wawaq nacesqanqa wawapaqqa nishu jatun cambion. ¿Imarayku? Chay ratopin wawaq mamanpa sentimientonwan jujllachakun, chaytaq wiñasqanpi poqosqanpi ima yanapanqa. *

¿Iman juj mamata yanapan chayllaraq naceq wawanta munakunanpaq? Jeannette Crenshaw profesoran juj revistapi explican: “Juj warmi onqokusqan pasaytaqa juj hormonan cuerponpi rijurin, chay hormonan yanapan wawanta munakunanpaq ñuñuchinanpaq ima”, nispa. Juj hormonapas rijurillantaqmi chaymi yanapan wawanwan entiendenakunankupaq, jinallataq wawaq sentimientonwan mamanpa sentimientonwan astawanraq jujllachakunanpaq. ¿Imaraykun chaykuna allinpuni?

Jehová Diosmi kamaran warmikunataqa wawanta munakunankupaq jinapuni. * Rey Davidmi Diosman agradecekuran mamanpa wijsanmanta orqosqanmanta jinaspa mamanpa marq’ayninpi seguro sientekusqanmantawan. Payqa yacharanmi Jehová Dios wijsapi kasqanmantapacha cuidasqanta. Chaymi niran: “Wijsamantapachañan qanqa Diosniy kanki”, nispa (Salmos 22:9, 10).

KAYPI PIENSAY: Warmitapas wawanta munakunanpaq jinataq kamaran chayqa, ¿manachu kamaqninchis kashaspa Dios sapankanchispi interesakunman? (Hechos 17:29.)

¿IMA NINMI BIBLIA DIOS SAPANKANCHISTA CUIDAWASQANCHISMANTA?

Señor Jesucristoqa allintan reqsin kamaqninchistaqa, chaymi niran: “¿Manachu iskay pichinkukunata pisi valorniyoq qolqellapaq vendekun? Chaywanpas manan jujllapas pampamanqa urmanmanchu Yayaykichis mana yachashaqtinqa. Qankunaqqa chujchaykichispas llapallanmi yupasqa kashan. Chayrayku, ama manchakuychischu, qankunaqa askha pichinkukunamantapas astawanraqmi valenkichis”, nispa (Mateo 10:29-31).

Pisi runakunallan pichinkukunataqa qhawarinku, pampapi wañusqa wijch’ukuqtinqa manan pipas qhawarinchu. Kamaqninchis Diosmi ichaqa sapanka jujninkuta qhawashan. Pichinkukunaqa askhaña kanku chaypas manan jayk’aqpas runakuna jina valorniyoqqa Diospaqqa kanqakuchu. Chayqa astawanraqmi asegurawanchis sapanka jujninchista Dios qhawamuwashasqanchista.

Jehová Diosqa munakuwanchispunin chayraykun sumaqta cuidawanchis

 Biblian asegurawanchis:

  • “Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq” (2 CRÓNICAS 16:9)

  • “Señor Diosqa chanin runakunatan qhawashan, wajakusqankutapas makillan uyarishan” (SALMOS 34:15)

  • “Anchatapunin munakuwanki, chaymi q’ochukuspa kusikusaq. Qanmi muchusqaykunata rikuranki, llakikusqaykunatapas yacharanki” (SALMOS 31:7)

“DIOSQA ‘MANAN MUNAKUWANCHU’ NISPAN PIENSAQ KANI”

Dios munakuwasqanchista sumaqta cuidawasqanchista yachay, ¿yanapawanchischu vidanchispi? Arí. Inglaterra nacionmanta Juana * nin:

“Sapa kutillan piensaq kani Diosqa mana munakuwananpaq, mañakusqaytapas mana uyariwananpaq, castigawananpaq, mana valeqpaq jina qhawariwananpaqmi piensaq kani, chhaynaqa manan noqapiqa interesakunmanchu niqmi kani”, nispa.

Kunanqa Juanaqa yachanmi Jehová Dios payta munakusqanta. ¿Imaraykun chhaynata piensan? Paymi nin: “Manan yanqallamantachu chhaynataqa piensani. Unayñan Jesuspa sacrificakusqanmanta juj discursota uyarirani, chaypin repararani Jehová Dios munakuwasqanta. Paymanta mañakuqtiy uyarimuwasqanta reparaspan waqaq kani ‘Diosqa munakuwanpunin’ nispa. Bibliata estudiaspa reunionkunaman rispa iman Jehová Diostaqa astawanraq reqsini, astawanraqmi yachani pay munakuwasqanchistapas. ¡Kunanmi ichaqa yachani Jehová Dios munakuwasqanchista sapanka jujninchista cuiday munawasqanchistapas!”, nispa.

¡Chay simikunaqa anchatan kallpachawanchis! Ichaqa, ¿imaynatan yachawaq imayna sientekusqaykita Dios yachasqanta? Qatimuq temakunapin chaymanta yachasun.

^ párr. 3 Wakin mamakunataqa onqokusqanku pasaytan sinchi llakikuy jap’in, chaytaq jark’an wawanta munakunanta. Chaywanqa manan llakikunankuchu. Estados Unidospi Instituto Nacional de la Salud Mental nisqanman jinaqa “mamakunaq onqokusqanku pasayta sinchi llakikuy jap’isqanqa, cuerponkuq sentimientonkuq cambiasqanraykun. [...] Chayqa manan ima ruwasqankuraykuchu nitaq mana ruwasqankuraykupaschu”. Sichus astawan chaymanta yachayta munanki chayqa “¿Qué es la depresión posparto?” nisqa temata tarinki 2003 watamanta 8 junio ¡Despertad! revistapi.

^ párr. 5 Biblian yachachin Diospa sutin Jehová kasqanta (Romanos 10:13).

^ párr. 15 Kay articulopi, qatimuq articulokunapipas wakin sutikuna cambiasqa kashan.