Génesis 1:1-31
-
Dios cielota kay pachatawan kamasqanmanta (1, 2)
-
Soqta p’unchaypi Dios kay pachata alistasqanmanta (3-31)
-
Ñaupaq kaq p’unchaypi k’anchayta rijurichin, p’unchayta tutatawan t’aqan (3-5)
-
Iskay kaq p’unchaypi ch’usaqta ruwan (6-8)
-
Kinsa kaq p’unchaypi ch’aki jallp’ata rijurichin, imaymana clase plantakunatapas wiñachin (9-13)
-
Tawa kaq p’unchaypi cielopi k’anchaqkunata rijurichin (14-19)
-
Pisqa kaq p’unchaypi imaymana clase challwakunata phalaq animalkunatawan ruwan (20-23)
-
Soqta kaq p’unchaypi imaymana clase animalkunata runatawan ruwan (24-31)
-
1 Qallariypin Diosqa cielota kay pachatawan kamarqan.+
2 Kay pachaqa mana imayoq ch’usaqmi kasharqan, laqhayaqpas* chinkay-chinkay unutan+ pakaykusharqan. Diospa kallpantaqmi*+ unu patapi muyusharqan+ kayneqman jaqayneqman.
3 Jinan Diosqa nirqan: “K’anchay kachun”, nispa. Chaymi k’anchayqa karqan.+
4 Chaymantataq Diosqa rikurqan k’anchay allin kasqanta, chaymi chay k’anchayta laqhayaqmanta t’aqayta qallarirqan.
5 Jinaspan Diosqa k’anchayta suticharqan p’unchay nispa, laqhayaqtataq tuta+ nispa. Jinan ch’isiyaykurqanpas illarimurqanpas. Chaymi karqan ñaupaq kaq p’unchay.
6 Chaymantataq Diosqa nirqan: “Unukuna iskayman t’aqakuchun,+ chaykunaq chaupinpitaq ch’usaq kachun”,+ nispa.
7 Jinan Diosqa chay ch’usaqta ruwayta qallarirqan, chhaynapi chay ch’usaqpa pachanpipas jawanpipas unu kananpaq.+ Chhaynapunitaqmi karqanpas.
8 Chay ch’usaqtan Diosqa cielo nispa suticharqan. Jinan ch’isiyaykurqanpas illarimurqanpas. Chaymi karqan iskay kaq p’unchay.
9 Chaymantataq Diosqa nirqan: “Cieloq pachanpi kaq unukuna juj jawallapi juñusqa kachun, chhaynapi ch’aki rijurinanpaq”,+ nispa. Chhaynapunitaqmi karqanpas.
10 Chay ch’aki kaq partetan Diosqa suticharqan jallp’a+ nispa, juñusqa unukunatataq lamar-qocha+ nispa. Llapa chay ruwasqantan Diosqa allinpaq qhawarirqan.+
11 Jinan Diosqa nirqan: “Jallp’a wiñachichun q’achuta, mujuyoq plantakunata, ruruyoq sach’akunatapas, ima clasemantachus kasqankuman jina, chaykuna ruruta mujuta ima qochun”, nispa. Chhaynapunitaq karqanpas.
12 Jallp’aqa wiñachiytan qallarirqan q’achuta, mujuyoq plantakunata,+ ruruta mujutawan qoq sach’akunatapas, ima clasemantachus kasqankuman jina. Chaytan Diosqa allinpaq qhawarirqan.
13 Jinan ch’isiyaykurqanpas illarimurqanpas. Chaymi karqan kinsa kaq p’unchay.
14 Chaymantataq Diosqa nirqan: “Cielopi k’anchaqkuna rikukuchun,+ chhaynapi p’unchaytawan tutatawan t’aqanapaq.+ Chay k’anchaqkunan señal kanqa ima tiempochus* kasqanta yachanapaq, p’unchaykunata watakunatapas yupanapaqwan.+
15 Chaykunan cielomantapacha jallp’a pachata k’anchanqaku”, nispa. Chhaynapunitaq karqanpas.
16 Diosmi iskay jatun k’anchaqkunata rijurichiyta qallarirqan, aswan jatun kaqtan rijurichirqan p’unchaypi k’anchananpaq,+ juch’uy kaqtataq tutapi k’anchananpaq. Rijurichillarqantaqmi ch’askakunatapas.+
17 Chhaynapin Diosqa cielopi k’anchaqkunata rijurichirqan jallp’a pachata k’anchanankupaq,
18 p’unchaypipas tutapipas k’anchay kananpaq, jinallataq p’unchaypas tutapas t’aqasqa kananpaqwan.+ Chaytan Diosqa allinpaq qhawarirqan.
19 Jinan ch’isiyaykurqanpas illarimurqanpas. Chaymi karqan tawa kaq p’unchay.
20 Chaymantataq Diosqa nirqan: “Unupas kausaqkunawan* junt’a kachun, phalaq animalkunapas jallp’a pachaq altonpi phalachun”,+ nispa.
21 Jinan Diosqa kamarqan lamar-qochapi kausaq jatun animalkunata, jinallataq unupi kausaq tukuy animalkunatapas* ima clasemantachus kasqankuman jina. Kamallarqantaqmi rafrayoq phalaq animalkunatapas ima clasemantachus kasqankuman jina. Chaytan Diosqa allinpaq qhawarirqan.
22 Chaymantataq Diosqa chay kamasqankunaman bendicionninta churaykurqan, nirqanmi: “Askhata miraychis, askhaman tukuychis, lamar-qochamanpas junt’aykuychis.+ Phalaq animalkunapas jallp’a pachapi askhata mirachunku”, nispa.
23 Jinan ch’isiyaykurqanpas illarimurqanpas. Chaymi karqan pisqa kaq p’unchay.
24 Chaymantataq Diosqa nirqan: “Jallp’a pachapi imaymana clase animalkuna* kachun: uywana animalkuna, suchuq animalkuna,* imaymana clase salqa animalkunapas”,+ nispa. Chhaynapunitaq karqanpas.
25 Diosmi ruwayta qallarirqan imaymana clase salqa animalkunata, imaymana clase uywana animalkunata, imaymana clase suchuq animalkunatapas. Chaytan Diosqa allinpaq qhawarirqan.
26 Chaymantan Diosqa nirqan: “Runata ruwasunchis+ imaynachus kasqanchisman jina,+ chhaynapi noqanchis jina kanankupaq.+ Paykuna kamachichunku lamar-qochapi challwakunata, phalaq animalkunata, uywana animalkunata, lliu suchuq animalkunatapas,+ kay jallp’atapas paykuna cuidachunku”, nispa.
27 Chaymi Diosqa runata kamarqan imaynachus pay kasqanman jina. Arí, imaynachus pay kasqanman jinan runataqa kamarqan. Qharita warmitawanmi kamarqan.+
28 Chaymantataq Diosqa paykunaman bendicionninta churaykurqan, nirqanmi: “Askha wawakunayoq kaychis, askhaman tukuychis, pachantinman junt’aykuychis,+ chaypi munayniyoq kaychis.+ Kamachiychistaq+ lamar-qochapi challwakunata, phalaq animalkunata, jinallataq jallp’a pachapi tukuy kausaq animalkunatapas”, nispa.
29 Diosqa nillarqantaqmi: “Jallp’a pachapi kaq mujuyoq lliu plantakunatan qoykichis, qollaykichistaqmi rurunpi mujuyoq sach’akunatapas. Chaykunan mijunaykichis kanqa.+
30 Jallp’api kaq llapan salqa animalkunaman, phalaq animalkunaman, jallp’api puriq tukuy kausayniyoqkunamantaq* ichaqa llapan q’omer q’achukunata mijunankupaq qoni”,+ nispa. Chhaynapunitaq karqanpas.
31 Chaymantataq Diosqa tukuy ima ruwasqanta rikuspa ancha allinpaq qhawarirqan.+ Jinan ch’isiyaykurqanpas illarimurqanpas. Chaymi karqan soqta kaq p’unchay.
Uraypi willakuykuna
^ Laqhayaqtaqa “tutayaq” nillankutaqmi.
^ Chaypiqa “Diospa espirituntaqmi” nillanmantaqmi. Qhaway Explicasqa simikuna nisqapi “Espíritu” nisqata.
^ Chaypiqa watapi kaq tiempokunamantan rimashan, chaykunan kanman: tarpuy tiempo, cosechay tiempo, ch’akiriy tiempo, chiri tiempo, jujkunapas.
^ Chaypiqa “kausaq almakunawan” nillanmantaqmi.
^ Chaypiqa “almakunatapas” nillanmantaqmi.
^ Chaypiqa “kausaq almakuna” nillanmantaqmi.
^ Yaqachus jina chaypiqa mach’aqwaykunamanta, qaraywakunamanta, juk’ucha jina animalkunamanta, juch’uy kuruchakunamanta ima rimashan.
^ Chaypiqa “almayoqkunamantaq” nillanmantaqmi.
