1, 2. ¿Imatan Jesús ruwarqan 14 nisán tutapi? (Kay paginapi dibujota qhaway.)

JERUSALENPIN hunt’a killa kasharqan 33 wata 14 nisán p’unchaypi. Chay p’unchaypin Jesusqa apostolninkunawan pascua fiestata ruwarqan. Chay fiestatan Israel runakuna ruwaqku Egipto llaqtamanta kacharichisqa kasqankuta yuyarinankupaq. Hinan Jesusqa 11 apostolninkunawan huk cenata ruwallarqantaq. Chaypin kamachirqan wañupusqan p’unchayta yuyarinankupaq, chay kikin p’unchaypin wañupunan karqan (Mat. 26:1, 2).

² Diosmanta mañakusqan qhepamanmi apostolninkunaman t’antata haywarqan. Chaypin nirqan: “Hap’iychis, mikhuychis”, nispa. Vino copata hap’ispataq Diosmanta mañakurqan, hinamantaq nirqan: “Llapaykichis kay vasomanta ukyaychis”, nispa (Mat. 26:26, 27). Chay cenata ruwasqankuqa mana qonqanapaqmi karqan imaymanakunata Jesuspa yachachisqanrayku.

3. ¿Ima tapuykunatan kay estudiopi kutichikunqa?

 ³ Chhaynapin Jesusqa kamachirqan wañupusqanta yuyarinankupaq, chaytan nikullantaq “Señorpa cenan” nispa (1 Cor. 11:20). Ichaqa, ¿imaraykun Jesuspa wañupusqanta yuyarinanchis? ¿Imatan representan t’antapas vinopas? ¿Imakunatan chay p’unchaypaq ruwashananchisña? ¿Pikunan t’antata mikhunanku vinotapas ukyananku? ¿Imaynan sientekunku cristianokuna Diospa qosqan suyakuywan?

4. ¿Iman karqan Jesuspa wañupusqanrayku?

⁴ Adanpa huchallikusqanraykun llapallanchis huchayoq kanchis wañunchispas (Rom. 5:12). Manan pi runapas chaykunamanta kacharichiyta atiwanchischu (Sal. 49:6-9). Jesusmi ichaqa atirqan, paymi ch’uya kawsayninta ñoqanchisrayku Diosman qorqan. Chayraykun huchamanta wañuymantawan kacharichisqa kayta atinchis, wiñaypaqtaq kawsayta atinchis (Rom. 6:23; 1 Cor. 15:21, 22).

5. a) ¿Imaynapin yachanchis Jehová Diospas Jesuspas munakuwasqanchista? b) ¿Imaraykun rinanchis Jesuspa wañupusqanta yuyarinapaq huñunakuyman?

⁵ Munakuwasqanchisraykun Diosqa churinta ñoqanchisrayku wañunanpaq qorqan (Juan 3:16). Churipas munakuwasqanchisraykun kawsayninta qorqan. Manaraq kay pachaman hamushaspan Jesusqa runakunata munakurqanña (Prov. 8:30, 31). Chaymi agradecekusqanchista rikuchisun Jesuspa wañupusqanta yuyarinapaq huñunakuyman rispa. Chay hinapin kasukusun kamachiwasqanchista, paymi nirqan: “Kaytan ruwankichis [...] ñoqata yuyariwanaykichispaq”, nispa (1 Cor. 11:23-25).

6. ¿Imakunatan representan t’antapas vinopas?

⁶ Apostolninkunawan mikhushaspan Jesusqa t’antata hap’ispa nirqan: “Kaymi cuerpoy”, nispa. Vinoyoq vasota hap’ispataq nillarqantaq: “Kayqa Dioswan rimanakuyta cheqaqchaq yawarniymi”, nispa (Mar. 14:22-24). Chay nisqanmantan wakin runakunaqa creenku Jesusqa milagrota ruwaspa t’antata aychanman tukuchisqanta, vinotataq yawarninman tukuchisqanta. Ichaqa manan chhaynachu karqan. Aswanmi Jesusqa nisharqan t’antaqa cuerponta representasqanta vinotaq yawarninta. Jesusqa apostolninkunaq ñawpaqenpin kasharqan paykunataq mana levadurayoq t’antata mikhusharqanku.

7. ¿Imatan representan mana levadurayoq t’anta?

⁷ Pascua fiestapi mikhusqankumantan mana levadurayoq t’anta puchurqan, chaytan Jesusqa hap’irqan apostolninkunawan mikhunanpaq (Éx. 12:8). Mayninpin levadurata Bibliapi rikch’anachikun huchawan (Mat. 16:6, 11, 12; Luc. 12:1). Chaymi mana levadurayoq t’antaqa kusapuni karqan Jesuspa ch’uya cuerponta representananpaq (Heb. 7:26). Chayraykun Jesuspa wañupusqan p’unchayta  yuyarinapaqqa mana levadurayoq t’antata utilizakun.

8. ¿Imatan vino representan?

⁸ Jesuspa vino utilizasqanqa yawarninta otaq kawsaynintan representarqan. Chay hinallataqmi Jesuspa wañupusqanta yuyarinapaq utilizasqanchis vinopas. Gólgota cheqaspin Jesusqa yawarninta hich’arqan ‘askha runaq huchankuna pampachasqa kananpaq’ (Mat. 26:28; 27:33). Sichus Jesuspa sacrificionta valorniyoqpaq hap’isun chayqa, sapa watanmi chay p’unchaypaq tukuy imata ruwasun.

9. a) ¿Imapin yanapawanchis Jesuspa wañupusqanta yuyarina p’unchaypaq textokunata leesqanchis? b) ¿Imaynatan qhawarinki Jesuspa kacharichiwasqanchista?

⁹ Jesuspa wañupusqanta yuyarinapaqqa, chay p’unchaykunapi sucedesqanta willaq textokunatan ñawpaqmantaña leespa yuyaymanananchis. Chaymi tarikun Diospa Siminta sapa p’unchay t’aqwisun folletonchispi. Chaymi yanapawasun Jesuspa sacrificion allinninchispaq kasqanpi piensanapaq. Huk cristianan qelqarqan: “Watan-watanmi Jesuspa wañupusqanta yuyarinapaq p’unchayta ima hinallaña suyakuyku. Yuyashaniraqmi taytay wañupuqtin Jesuspa sacrificionmanta mayta agradecekusqayta. [...]. Manaraq taytay wañupushaqtinqa allintan yacharqani Jesuspa sacrificionmanta, ichaqa chhayna llakipi tarikuqtiyñan Jesuspa sacrificionqa sonqoyman chayawarqan, chaymi anchatapuni sonqochawarqan”, nispa. Jesuspa wañupusqanta yuyarina p’unchaypaq preparakuspaqa, huchamanta wañuymantawan kacharichisqa kanapaq Jesuspa ruwasqanpin yuyaymanananchis.

10. ¿Imatawanmi ruwananchis Jesuspa wañupusqanta yuyarinapaq?

¹⁰ Chaymantapas chay p’unchaykunapi astawan predicaspan preparakusun Jesuspa wañupusqanta yuyarinapaq.  Chaypaqmi chay killakunapi precursor auxiliar kasunman. Lliw runatan invitamunanchis Jesuspa wañupusqan p’unchayta yuyarinapaq huñunakuyman. Anchatan kusikusun Jehová Diosmanta, Jesusmanta, hamuq tiempopi bendicionkuna chaskinanchismantawan willaspa (Sal. 148:12, 13).

11. ¿Imaraykun Biblia nin wakin Corinto cristianokuna mana respetoyoq kasqankuta?

¹¹ Hinaspapas Corinto cristianokunaman Pabloq qelqasqanpin yuyaymanananchis. Chaypin nirqan: “Pipas mana manchakuywan hawan-ukhunta chay t’antata mikhun, Señorpa vasonmantapas ukyan chayqa, Señorpa cuerponmanta yawarninmantawanmi huchachasqa kanqa”, nispa (leey 1 Corintios 11:27-34). Chaymi akllasqa cristianoqa manaraq chaykunamanta participashaspa ‘sonqonta allinta t’aqwikunan’ imaynachus kawsaynin kashasqanta qhawarinanpaq, mana hinaqa “pay kikin huchachasqa kananpaqmi mikhunpas ukyanpas”. Pabloq tiemponpiqa askha cristianokunan mana allinta ruwasharqanku. Wakinqa manaraq participashaspan otaq chay ratopipas nishuta mikhuqku ukyaqku, chayraykun Jesuspa wañupusqanta yuyarina huñunakuypi mana tukuy yuyaychu kasharqanku. Chaywanmi rikuchisharqanku mana respetoyoq kasqankuta, chaytan Jehová Diosqa mana allinpaq qhawarirqan.

12. a) ¿Imawanmi Pablo rikch’anachirqan Señorpa cenanta? b) ¿Imatan Pablo nirqan akllasqa cristianokunata? c) ¿Imatan ruwanan akllasqa cristiano hatun huchapi urmaspa?

¹² Apóstol Pablon Señorpa cenanta rikch’anachirqan invitadokunayoq mikhuywan. Chaymi participaqkunata nirqan: “Manan Señorpa vasonmantawan supaykunaq vasonmantawanqa ukyayta atinkichischu, manallataqmi Señorpa mesanmanta supaykunaq mesanmantawanqa mikhuyta atinkichischu”, nispa (1 Cor. 10:16-21). Sichus akllasqa cristiano hatun huchaman urman chayqa, umallikunaman willakuspan yanapachikunan (leey Santiago 5:14-16). Huchanmanta pesapakuspa allinta kawsapun chayqa, participananmi t’antamanta vinomantapas (Luc. 3:8).

13. ¿Imaraykun Diosmanta mañakunanchis Jesuspa wañupusqanta yuyarinapaq preparakushaspa?

¹³ Jesuspa wañupusqanta yuyarinapaq preparakushaspaqa, allinmi kanman Diosmanta mañakuy yuyaymanaypas. Chaykunan yanapawasun suyakuyninchismanta mana iskayananchispaq. Pipas iskayashan akllasqa cristiano kasqanmanta chayqa, manan t’antatapas mikhunanchu nitaq vinotapas ukyananchu. Mana chayqa manan respetashanmanchu Jesuspa sacrificionta. Chhaynaqa, ¿imaynapin yachasunman t’antata mikhunanchista vinotapas ukyananchista?

14. ¿Imatan ruwanku Jesuspa wañupusqanta yuyarina p’unchaypi mosoq rimanakuypi kaqkuna?

¹⁴ Jesuspa wañupusqan p’unchaypi t’antata mikhuqkuna vinota ukyaqkunapas manan iskayankuchu mosoq rimanakuypi kasqankumanta. Jesusmi vinomanta nirqan: “Kay vinoyoq vasoqa  yawarniywan cheqaqchasqa mosoq rimanakuymi”, nispa (1 Cor. 11:25). Profeta Jeremiaswanmi Diosqa willachirqanña Israel llaqtawan rimanakusqan rantipi huk mosoq rimanakuyta ruwananpaq (leey Jeremías 31:31-34). Hinan Jehová Diosqa huk mosoq rimanakuyta ruwarqan akllasqa cristianokunawan (Gál. 6:15, 16). Chay rimanakuymi valorniyoq kapurqan Cristoq yawarninwan (Luc. 22:20). Chay rimanakuypi allipunachiqqa Jesusmi. Chhaynapin mosoq rimanakuypi kaqkunaqa hanaq pachapi kawsanqaku (Heb. 8:6; 9:15).

15. a) ¿Pikunan Diospa gobiernonpaq rimanakuypi kashanku? b) ¿Imatan akllasqa cristianokuna qhepaman ruwanqaku?

¹⁵ Akllasqa cristianokunaqa yachallankutaqmi Diospa gobiernonpaq rimanakuypi kasqankuta (leey Lucas 12:32). Chay rimanakuytan Jesús ruwarqan paywan kuska ‘ñak’ariyninkunapi’ kaqkunawan (Filip. 3:10). Chayraykun hunt’aq sonqo akllasqa cristianokunaqa Jesuswan kuska hanaq pachamanta kamachikamunqaku (Apo. 22:5). Chaymi kay cristianokunaqa Jesuspa wañupusqan yuyarina p’unchaypi t’antamanta vinomantawan participanku.

16. Pisillapi willay Romanos 8:15-17 textomanta.

¹⁶ Hinaspapas akllasqa cristianokunaqa manan iskayankuchu Diospa churin kasqankuta, chaymi Jesuspa wañupusqanta yuyarina p’unchaypi t’antata mikhunku vinotapas ukyanku (leey Romanos 8:15-17). Pablon nirqan paykunaqa Diosta “¡Yayalláy!” nispa waqyakusqankuta. Chaytaqa arameo rimaypin Pabloqa nisharqan, chayqa munakuywan respetowan “papay” ninanmi. Jehová Dioswan hukllachasqa kasqankuraykun akllasqa cristianokunaqa chay hinata Diosta ninku. Diospa santo espiritunmi paykunata entiendechin Diospa wawankunapuni kasqankuta, manan kay pachapi kawsayta mana munasqankuraykullachu chay hina suyakuyniyoqqa kanku. Aswanpas paykunaqa manan iskayankuchu Cristowan kuska Diospa gobiernonpi kamachikamunankuta. Kunanqa pisillañan kay pachapi akllasqa cristianokunaqa kashanku (1 Juan 2:20; Apo. 14:1). Paykunaqa Dioswan sinchi hukllachasqa kaspan ninku: “¡Yayalláy!”, nispa.

17. a) ¿Maypin akllasqa cristianokuna tiyanqaku? b) ¿Imaynapin yachanku akllasqa kasqankuta?

¹⁷ Akllasqa cristianokunamanta kaspaqa, Diosmanta mañakuspaykichá hanaq pachapi tiyanaykimanta rimanki. Bibliatapas qanpaq hina kasqantachá qhawarinki. Hanaq pachapi Jesús novianwan casarakusqanmanta leespaykiqa, qanmanta rimashasqantachá yuyaykunki hinaspa chay p’unchay chayamunantaña munashanki (Juan 3:27-29; 2 Cor. 11:2; Apo. 21:2, 9-14). Wawankuna munakusqanmanta Diospa nisqanta Bibliapi leespan ninki: “Ñoqatan niwashan”, nispa. Akllasqa cristianokunapaq kamachikuykunata leeqtiykitaq, santo espíritu kallpachasunki chaykunata kasukunaykipaq. Chhaynatan Diospa santo espiritunqa willasunki hanaq pachapi tiyanaykipaq akllasqa kasqaykita.

18. a) ¿Maypin wak ovejakuna tiyanqaku? b) ¿Imaynan sientekunki suyakuyniykimanta?

¹⁸ ‘Wak ovejakunamanta’ kaspataq kay pacha paraíso kaqtin chaypi wiñay tiyanaykipaq suyakushanki (Apo. 7:9; Juan 10:16). ¿Imaynan sientekunki chay suyakuymanta? Ancha kusisqachá. Bibliapi  paraisomanta leespaqa chaypichá yuyaymananki. Maytachá munashanki chay p’unchay chayamuqtin familiaykiwan amigoykikunawan kuska kusisqa kawsakuyta. Maytachá munashallankitaq yarqay, ñak’ariy, onqoy, wañuypas chinkapunanta (Sal. 37:10, 11, 29; 67:6; 72:7, 16; Is. 33:24). Munakusqayki runakuna kawsarimpuqtin paykunawan tupaykuytachá munashanki (Juan 5:28, 29). Chay hina suyakuymantaqa, ¡maytaraqchá Jehová Diosta gracias nishanki! Manaña t’antamanta vinomantapas Jesuspa wañupusqan yuyarina p’unchaypi participankichu chaypas, agradecekuspaykichá chay huñunakuyman rinki.

19, 20. a) ¿Imatan ruwanayki suyakusqayki hunt’akunanpaq? b) ¿Imaraykun rinayki Jesuspa wañupusqanta yuyarinapaq huñunakuyman?

¹⁹ Hanaq pachapiña otaq kay pachapiña kawsanayki kaqtinpas, iñinaykipunin Jehová Diospi, Jesucristopi, sacrificio ruwasqanpipas; chay hinallapin suyakuyniykiqa hunt’akunqa. Jesuspa wañupusqanta yuyarina p’unchaypi huñunakuyman rispaqa, suyakuyniykipin yuyaymananayki, Jesuspa sacrificio ruwasqan ancha importantepuni kasqanpipas. Chay huñunakuymi 2015 watapi aparikunqa 3 abril killapi, inti chinkaykuy qhepata. Pachantinpi testigokunan yuyarinqaku Jesuspa wañupusqan p’unchayta huñunakuna wasikunapi otaq hukkunapipas.

²⁰ Chay huñunakuyman rinki chayqa, astawanmi Jesuspa sacrificionmanta gracias ninki. Chay p’unchaypi discurso qokusqanta tukuy yuyaywan uyarisqanchismi yanapawasun runakuna munakuyta, chay hinapi Jehová Diospa munakuyninmanta promesankunamantawan willananchispaq (Mat. 22:34-40). ¡Amapuni faltakamunkichu!