Salmos 38:1-22
Davidpa takin, runakuna yuyarinanpaq.
38 Diosníy Jehová, amayá phiñasqa kashaspaqa anyawaychu,amayá colerasqa kashaspaqa wanachiwaychu.*+
2 Flechaykikunaqa ukhukaman jaykuruwan,makiykipas sinchitan ñit’ishawan.+
3 Phiñakuyniykiwanmi llapa cuerpoy onqosqa kashan.
Juchay jawan tulluykunapiqa mana thaj kay kanchu.+
4 Juchaykunan sinchita ñit’ishawan,+nishu llasapunin kashan, sasa apaymi kashan.
5 Mana yuyayniyoq kasqayraykun k’iriykuna asnashan,q’eyachakuspan millaytaraq asnashan.
6 May llakisqan kashani, manañan kallpaypas kanñachu.
P’unchay ch’isiyaqmi sinchi llakisqa kayman jaqayman purishani.
7 Ukhuypas sinchitan raurarishan,llapa cuerpoymi onqosqa kashan.+
8 Cuerpoypas ñut’un kashan, manan kuyuriytapas atiniñachu,sonqoypas maytan nanashan, qapariy ganasllañan jap’iwan.
9 Jehová Diosníy, qanqa llapantan yachanki imakunachus munasqayta,qanqa allintan yachanki imakunamantachus llakikusqayta.
10 Sonqoyqa phataruytaraqmi munashan,manan kallpaypas kanñachu,ñawiypas tutayapushanñan.+
11 Imachus pasawasqanraykun amigoykunapas t’aqakapuwanku,noqawan confianza kaqkunapas karullamantan qhawamuwanku.
12 Wañuchiyta munawaqkunan trampakunata churawanku,ñak’arinayta munaqkunan chinkachiwanankumanta rimashanku,+imaynatachus engañawanankumantan p’unchay ch’isiyaq rimanku.
13 Ichaqa, roqt’upas kayman jinan mana uyarinichu,+qalluy watasqapas kayman jinan mana simiyta kicharinichu.+
14 Mana uyariq runaman jinan tukupuni,manan imanispapas defiendekuyta atinichu.
15 Jehová Diosníy, noqaqa qanpin suyakurqani,+qantaq, Diosníy Jehová, uyariwarqanki.+
16 Noqan nirqani: “Amayá noqamantaqa kusikuchunkuchu,amayá chakiyña llusk’aqtinpas jatunchakuspaqa asipayawachunkuchu”, nispa.
17 Noqaqa yaqañan kumpakusharqani,nanayniypas mana aguantaymi kasharqan.+
18 Juchayqa sinchitapunin ñit’ishawarqan,+chaymi noqaqa llapa pantasqayta willakurqani.+
19 Cheqniwaqniy runakunaqa atiyniyoqmi, kallpasapan kanku;askhañan kanku yanqapas qasi cheqnikuwaqniykunaqa.
20 Allin kaqmantan mana allin kaqwan kutichiwanku,allin kaqta ruwashaqtiymi paykunaqa noqa contra jatarinku.
21 Diosníy Jehová, amayá saqerpariwaychu,Diosnilláy, amayá karullamantaqa qhawamuwaychu.+
22 Diosníy, usqhaylla jamuy,salvaqniy Jehová Dios, yanapaykuway.+
