1. ¿Imakunatam achka mozo-sipas cristianokuna ruwachkanku?

LLAPALLAN nacionkunamanta wara-waranqantin runakunam Jehova Diosta reqsichkanku (Apoc. 7:9, 10). Achka mozo-sipaskunam runakuna salvakunankupaq Bibliamanta yachachichkanku (Apoc. 22:17). Wakinkuqa runakuna kusisqa kawsanankupaqmi Bibliamanta yachachinku, wakinkuñataqmi huk rimaykunapi Diosmanta willakunku (Sal. 110:3; Is. 52:7). Diospa llaqtanpi kayta ruwayqa kusikunapaqmá. Mozo-sipas, ¿imaynatam chay ruwaypi astawan yanapakuwaq?

2. ¿Mozo-sipaskuna imayna servinankutam Jehova Diosqa munan? (Qawariy kay paginapi dibujota.)

² Kunan allinta tanteasqaykim hamuq tiempopipas Diosta astawan servinaykipaq yanapasunki. Yuyariy Timoteomanta. Payqa allintam tantearqa, yaqapaschá iskay chunca watanpi kachkaspan misionero karqa (Hech. 16:1-3). Chaymanta iskay-kimsa killallamantam apostol Pabloqa Tesalonica llaqtapi iñiqmasinkuta kallpanchananpaq Timoteota kamachirqa (Hech. 17:5-15; 1 Tes. 3:1, 2, 6). ¡Mayna kusisqachá Timoteoqa tarikurqa chay ruwaykunata chaskisqanmanta!

3. a) ¿Mayqentaq llapanmanta aswan allin tanteasqaykiqa? b) ¿Haykapim chayta ruwawaq?

³ Mozo-sipaskunaqa ancha allin kaqkunatam tanteananku. Ichaqa llapanmanta aswan allinqa Jehova Diosta serviymi. ¿Haykapitaq chayta tanteanayki? Jehova Diosmi nin: “Mozollaraq kachkaspaykiyá unanchaqnikimanta yuyariy”, nispa (Ecl. 12:1). ¿Imaynatam Jehova Diosta ‘yuyariwaq’? Tukuy sonqoykiwan servispam (Deut. 10:12). Chay tanteasqaykimantam hamuq punchawkunapi kawsakuynikiqa kanqa (Sal. 71:5).

4. ¿Imakuna tanteasqaykimantam kanqa Diosta serviynikiqa?

⁴ Manamá Jehova Diosta servinaykipaq tanteasqallaykimantachu kanqa hamuq tiempopi kawsakuynikiqa. Casarakuyta munaspaykiqa tanteanaykitaqmi kanqa piwan casarakunaykipaq otaq imayna vida pasanaykipaqpas. Kaykuna tanteay ancha allin kaptinpas, allinmi kanman tukuy sonqoykiwan Diosta servinaykipaq tanteaynikiqa (Deut. 30:19, 20). ¿Imanasqa? Chaykunata imayna tanteasqaykimantam kanqa Jehova Diosta serviynikiqa chaynallataqmi Jehova Diosta servinaykipaq tanteasqayki yanapasunki casarakunaykipaq hinaspa llamkanaykipaq tanteaypipas (tupachiy Lucas 14:16-20). Chayrayku allin kaqkunata puntata tanteay (Filip. 1:10).

5, 6. ¿Imatam yachachwan Yuichiro iñiqmasinchikpa tanteasqanmanta? (Qawaytaq “Warma kasqaypi tanteasqaymanta” niqtapas.)

⁵ Diosta servinaykipaq tantearuspaqa, tapukunaykim: ¿Ima ruwanaytam Diosqa munan?, nispa. Hinaspa tanteay imayna servinaykimantapas. Japón nacionmanta huk iñiqmasinchikmi kaynata qellqarqa: “14 wataypi kachkaspaymi congregacionpi huk ancianowan Diosmanta willakuq lloqsirqani, paymi manaña kusikuywan willakusqayta qawaspan sumaqllata niwarqa: ‘Yuichiro, wasikiman rispayá yuyaymanay Jehova Dios qamrayku tukuy ima ruwasqanmanta’, nispa. Chaynatamá ruwarqani. Achka punchawkunam Diosta mañakuspa yuyaymanarqani. Pisi-pisimantam Jehova Dios serviyta astawan munarqani. Misionero iñiqmasinchikkuna Diosta imayna servisqankumanta leespaymi paykuna hina ruwayta munarqani”.

⁶ Kay iñiqmasinchikqa nintaqmi: “Diosta huklaw nacionpi servinaypaqmi tantearurqani. Chaymi estudiarqani ingles rimayta. Estudiayta tukuruspayñataqmi iskay-kimsa punchawkunalla llamkarqani ingles rimayta yachachispay, chaynapim precursor kayta atirqani. 20 wataypi kachkaspayñataqmi mongol rimayta yacharqani hinaspam chay rimaypi huk grupota watukurqani. Iskay watamantañataqmi 2007 watapi Mongolia nacionta rirqani. Chaypi precursorkunawan Diosmanta willakuq lloqsispaymi qawarqani Diosmanta yachay munaq runakuna achkallaña kasqanta, hinaptinmi nacionniyman kutirqani Mongolia nacionman astakamunaypaq. 2008 watapa abril killanmantam precursor hina servichkani kay nacionpi. Kaypi vida pasayqa sasam, ichaqa achkam Diosmanta yachachkanku, chaypaqmi ñoqa yanapakuchkani. Kay ruwasqaymantaqa manamá pesakunichu”, nispa.

7. a) ¿Imatam sapakama tanteananchik? b) ¿Imatam Moisesmanta yachachwan?

⁷ Sapakamam Jehova Diospa testigonkunaqa tanteananchik vidanchikwan ima ruwanamanta (Jos. 24:15). Casarakunaykipaq otaq mana casarakunaykipaqpas kikikim tanteakunayki hinaspa  imapi llamkanaykipaqpas. Mozo-sipaskuna, wakiqnikichikqa wakcha llaqtachakunapim yachankichik wakiqnikichikñataq apu llaqtakunapi. Manam llapaykichikchu chaynalla kankichik imayna kaynikichikpi, ruwaynikichikpi hinaspa iñiynikichikpipas. Yaqapaschá rikchakuwaqchik Egipto nacionpi Hebreo mozo-sipaskunaman. Moisespaqa tukuy imanmi palaciopi kapurqa, wakinkum ichaqa sirviente karqaku (Ex. 1:13, 14; Hech. 7:21, 22). Qamkuna hinam paykunapas sapakama tantearqaku Diosta tukuy sonqonkuwan servinankupaq (Ex. 19:4-6). Moisesqa allintamá tantearqa (leey Hebreos 11:24-27).

8. ¿Imataq mozo-sipaskunata yanapanqa vidankuwan ima ruwanankupaqpas?

⁸ Jehova Diosqa mozo-sipas kasqaykipim allinta tanteanaykipaq yanapasunki. Chaypaqmi kan Bibliapi consejokuna (Sal. 32:8). Chay consejokunata kasukunaykipaqmi yanapasunkiman Diosta serviq tayta-mamayki hinaspa congregacionpi ancianokunapas (Prov. 1:8, 9). Qawasun Bibliapi kimsa consejokunata hamuq punchawkunapi tanteasqayki yanapasunaykipaq.

9. a) ¿Imata ruwanapaqmi Jehova Diosqa saqewanchik? b) ¿Imakunatam qawachinqaku Diospa Gobiernonta puntapi churaqkunaqa?

⁹ Puntataqa Diospa Gobiernontawan allin ruwaytayá maskay (leey Mateo 6:19-21, 24-26, 31-34). Jehova Diosqa kikinchik tanteakunapaqmi saqewanchik. Payqa manamá niwanchikchu mozo-sipas kasqanchikpi haykata predicanapaqqa. Ichaqa Jesusmi niwarqanchik Diospa Gobiernonta puntapi churanapaq. Chayta ruwaspaykiqa Dios kuyasqaykita, hukkunapi piensasqaykita hinaspa suyakuyniyoq kasqaykitam qawachinki. Casarakunaykipaq hinaspa llamkanaykipaq tanteasqayki, ¿qawachinqachu Jehova Diospa Gobiernontawan allin ruwayta puntapi churasqaykita?

10. ¿Imata ruwaspanmi Jesusqa kusisqa tarikurqa hinaspa imam qamtapas kusichisunkiman?

¹⁰ Hukkunata yanapaspaykim kusisqa tarikunki (leey Hechos 20:20, 21, 24, 35). Jesusmi chayta qawachirqa Taytanpa munayninta kusikuywan ruwaspan. Kusikurqataqmi Diosmanta yachay munaq runakunata tarispanpas (Luc. 10:21; Juan 4:34). Qampas yaqapaschá kusisqa tarikurqanki Diosta reqsinankupaq runakunata yanapaspayki. Ancha allin kaqkunata tanteanaykipaq Jesuspa nisqanta kasukuspaykiqa kusisqam kanki hinaspapas Jehova Diostam kusichinki (Prov. 27:11).

11. ¿Imanasqataq Barucqa manaña kusikuywanchu Diosta servirqa hinaspa imatam Jehova Diosqa nirqa?

¹¹ Jehova Diosta servispaykim aswan kusisqaqa tarikunki (Prov. 16:20). Chayna kasqanmantam Jeremiaspa yanapaqnin Baruc qonqarurqa. Manañam kusikuywanchu Diosta servirqa, chaymi Jehova Dios kaynata nirqa: “¿Kikikipaqchum maskachkanki admirakuypaq kaqkunata? Chaykunataqa amañayá maskaychu. Llapallan runakunamanmi desgraciakunata kachamusaq. Qanmi ichaqa maymanña rispaykipas kawsayllapas-kawsankiraq”, nispa (Jer. 45:3, 5). ¿Imataq Baructa kusichinman karqa? ¿Admirakuypaq kaqkunata kikinpaq maskaychu, icha Diosman sonqo kaspa Jerusalen llaqtata puchukachiptin salvakuychu? (Sant. 1:12.)

12. ¿Imataq Ramiro iñiqmasinchikta yanaparqa kusisqa kawsananpaq?

¹² Ramiro sutiyoq iñiqmasinchikmi  nin: “Riti orqopa puntanpi wakcha llaqtachamantam kani. Piwi kaq wawqeymi universidadpi estudianaypaq yanapawayta munarqa. Chayqa allinmá karqa, ichaqa chayllaraqmi bautizakururqani hinaspapas huk llaqtachapi Diosmanta willakunaykupaqmi huk precursor iñiqmasinchik niwarqa. Chayman rispaymi chukchakuna rutuyta yacharuspay llamkarqani. Achka runakunam kusikuywan Biblia estudiayta munarqaku. Chaymi huk rimaypi congregacion rikuriruptin, chaypi yanapakurqani. Tukuy tiempoywan chunka wataña Diosta servispaymi niyman, manam imapas anchataqa kusichiwanmanchu rimayninkupi runakunaman Diosmanta yachachisqaymanta”, nispa.

13. ¿Imanasqataq mozo-sipas kasqaykipi Diosta serviyqa ancha allin?

¹³ Mozo-sipasllaraq kaspaykiyá Jehova Diosta serviy (leey Eclesiastes 12:1). Amayá piensaychu: “Allin llamkayta tariruspayñam Diostaqa astawan servisaq”, nispaqa. Kunanmanta chay ruwaynikim allinqa, manaraq familiayki kachkaptin hinaspa manaraq imawanpas onqochkaspayki, chaynapi achka ruwayniyoq kanaykipaq. Mozo-sipas, ¿ima ruwaytam munawaq Jehova Diosta astawan servinaykipaq? ¿Precursor kayta? ¿Huk rimayniyoq runakunaman Diosmanta willayta? ¿Congregacionnikipi astawan yanapakuyta? Mayqentaña ruwayta munaspaykipas tapukuy: ¿Imapitaq llamkasaq? ¿Imatam estudiasaq?, nispa.

14. ¿Imamantam mozo-sipaskuna cuidakunanku vida pasanankupaq tanteaspankuqa?

¹⁴ Bibliapi kimsa consejokuna qawasqanchikmi yanapasunki ima llamkaytapas allinta akllanaykipaq. Profesorkunaqa  reqsinkupaschá ima llamkaymantapas. Autoridadkunapaq llamkaqkunapas nisunkimanpaschá ima llamkaypipas achka qollqeta chaskinaykipaq. Chaykunamanta yachayniki allin kaptinpas cuidakunaykim. Jehova Dios mana kuyaqkunaqa mana allin kaqkunatam sonqoykipi sapicharachinman (1 Juan 2:15-17). Kay pachapi mana allinkunata sonqoyki munapayaruspanqa chayllam engañarusunkiman (leey Proverbios 14:15; Jer. 17:9).

15, 16. ¿Pikunataq allinta yanapasunkiman ima llamkaytapas allinta akllanaykipaq?

¹⁵ Imapi llamkanaykipaq akllaspaykiqa, yanapakuytam necesitanki (Prov. 1:5). ¿Pitaq yanapasunkiman Bibliapa nisqanman hina? Kasukuy Jehova Dios kuyaqkunata, kuyasuqnikita hinaspa reqsisuqnikikunatapas. Paykunam reqsisusqaykiman hina yanapasunki. Yaqapaschá consejonkunaqa yanapasunki aswan allinta tanteanaykipaq. ¡Mayna allinmi tayta-mamayki Jehova Diosta kuyaptinkuqa! Congregacionpi ancianokunapas iñiyninkupi allin takyasqam kanku, paykunapas yanapasunkimanmi. Rimaytaq precursorkunawan hinaspa congregacionta watukuq ancianokunawanpas. ¿Imanasqataq tukuy tiemponkuwan Diosta servinankupaq tantearurqaku? ¿Imaynatam precursor kayta qallaykurqaku, hinaspa imaynatam vidata pasaqku? ¿Ima bendicionkunatam chaskirqaku? (Prov. 15:22.)

¹⁶ Allinta reqsisuqnikikunaqa yachaywanmi consejasunki. Piensariy: ichapas mozo-sipasyasqayki tiempopi colegiopi estudiayta manaña munawaqchu hinaspa precursor kaytaña munawaq, ichaqa kaytam ruwachkawaq estudiayta qellapakusqaykirayku. Kuyasuqnikikunaqa musyanqakuchá imanasqa chay ruway munasqaykita, hinaspam yanapasunki mana chaylla estudioykita saqerunaykipaq nitaq amirunaykipaqpas, chaymi yanapasunki tukuy sonqoykiwan Diosta servinaykipaqpas (Sal. 141:5; Prov. 6:6-10).

17. ¿Imayna llamkaytam mana chaskinachu?

¹⁷ Diosta lliw serviqkunam sasachakuypi tarikunchik, kaykunam Diosmanta karuncharuwachwan (1 Cor. 15:33; Col. 2:8). Ichaqa wakin llamkaykunam astawan iñiyninchikpi sasachawachwan. ¿Reqsinkichu pitapas ima llamkaytapas chaskisqanrayku iñiyninpi chiriyarusqanta? (1 Tim. 1:19.) Chaynaqa Jehova Dioswan amistadniki mana yanqachakunanpaqmi imatapas allinta tanteanayki (Prov. 22:3).

18, 19. ¿Imatam mozo-sipaskuna ruwanmanku Diosta astawan serviyta mana munaspankuqa?

¹⁸ Jehova Diosta sonqomanta serviyta munaspaykiqa mozollaraq kachkaspayki chayta ruway. Imatapas allinta tanteay, chaynapi Diosta kay tiempopi servinaykipaq (Sal. 148:12 ,13).

¹⁹ Diosta astawan serviyta mana munaspaykiqa, ¿imatam ruwawaq? Chayna kaptinqa hinalla kallpanchakuy iñiynikipi allinta takyanaykipaq. Diospa yanapakuyninta chaskinanpaq ima ruwasqanmantam apostol Pablo nirqa: “Imamantapas hukmanta piensaptikichikqa Diosninchikmi entiendechisunkichik. Ichaqa sapakamapa kawsasqanchikqa Diospa palabran yachasqanchikman hinayá kachun”, nispa (Filip. 3:15, 16). Ama qonqaychu Jehova Dios kuyasusqaykita. Yuyaymanay consejonkunapi. Paymi pimantapas aswan allinta yanapasunki mozo-sipas kaynikipi allinta tanteanaykipaq.