PASCAL sutiyoq runam Costa de Marfil nisqan nacionpi wakchakunapa kasqanpi uywasqa karqa, chaymi payqa munarqa qollqeyoq kayta. Takanakuypi peleaytam gustaq, chaymi maylaw nacionpi reqsichikuspan qollqe ganayta piensaq. Hinaptinmi 25 watanpi kaspan piensarurqa Europa lawpi allinta ganananpaq kasqanpi. Ichaqa chaylaw nacionkunaman yaykunanpaqmi documentonkuna mana karqachu, chaywanpas tantearurqam imaynanpatapas Europa lawman rinanpaq.

1998 kaq watapim Pascalqa 27 watanpi viajayta qallaykurqa. Ghana, Togo hinaspa Benín nacionninkunata pasaspanmi chayarurqa Níger nacionpi Birni Nkonni nisqanku llaqtaman. Ichaqa Europaman chayananpaqqa Mediterraneo lamar qochapa patanmanmi chayanan karqa, chayman chayananpaqqa sasa purina mana imayoq Sahara nisqanku sitiontaraqmi carropi rinan karqa, chayninta lamar qochaman chayaruspanñataqmi Europaman barcopi rinan karqa. Ichaqa Níger nacionman yacharuptinmi iskay asunto sucederurqa.

Puntataqa qollqenmi tukururqa. Chaymantañataqmi Noé sutiyoq precursorta reqsirurqa, paymi Bibliamanta yachachiyta qallaykurqa. Chayqa Pascalpa sonqonman yaykuruptinmi imayna piensayninta cambiaruspam manaña viajarqañachu. Qollqe maskananmantaqa Dios serviytam munarqa, chaymi bautizakururqa 1999 kaq watapa diciembre killanpi. Jehova Diosta anchata agradecekusqanraykum 2001 kaq watapi precursor kayta qallaykurqa Níger nacionpi. Diosta servinanpaq tanteakusqanmantaqa, ¿imaynataq sientekun? Paymi nin: “Ima ruwaymantapas Diosta tukuy sonqoywan servisqaymi kusichiwan”.

AFRICAPIM TUKUY SONQONKUWAN DIOSTA SERVINKU

Anne-Rakel

Manam Pascallachu Diosta chaylawpi servispanqa kusikuyta tarin. Wakin iñiqmasinchikkunapas Europa lawmantam astakurunku Diosta servinankupaq, paykunaqa África lawpim yanapakuchkanku Diospa Gobiernonmanta willakuqkunapa mana ancha kasqankupi. Europa lawmantam 65 iñiqmasinchikkuna astakurunku Benín, Burkina Faso, Níger hinaspa Togo nacionkunaman. * Paykunamanta wakinmi kanku 17 watankumanta 70 watankukama. ¿Imataq kallpancharqa chaylawkunaman astakunankupaq hinaspa imaynataq tarikunku?

Dinamarca nacionmanta kaq Anne-Rakelmi willakun: “Tayta-mamaymi Senegal nacionpi misionero karqaku. Paykunaqa misionero kasqankumantam kusisqallaña rimaqku, chaymi ñoqapas chayna kusisqa kayta munarqani”, nispa. Payqa 20 wata masniyoqllam rirqa Togo nacionpi señaswan rimaq congregacionpi yanapakunanpaq, 15 watañam chaypi kachkan. Chayna  tanteakusqanqa, ¿imaynatam hukkunatapas kallpancharqa? Paymi nin: “Watakuna pasaytam sullka ñañay chaynataq turiypas Togoman astakamurqaku”.

Albert-Fayette hinaspa Aurele

Franciamanta 70 watanpiña kaq Aurelem willakun: “5 wata ñawpaqtaraqmi jubilakururqani chaymi tanteakunay karqa Franciapi hawkalla kawsakuspay Paraisota suyanaypaq otaq Diosta astawan servinaypaq”, nispa. Payqa tanteakurqa Diosta servinanpaqmi. Chaymi Beninpi yaqa kimsa wataña Albert-Fayette señoranpiwan Diosta servichkanku. Aurelem nin: “Diosta servinaykupaq kayman hamusqaykuqa ancha allinniykupaqmi”. Chaymantapas asirispanmi nin: “Predicasqayku law lamar qochapa wakin patankunaqa Paraisomanmi rikchakun”.

Franciamanta Clodomir hinaspa Lysiane casarasqa iñiqmasinchikkunapas Beninpim 16 wataña kachkanku. Qallariypiqa saqesqanku familiankumanta chaynataq amistadninkunamantam anchata extrañarqaku, piensarqakum mana costumbranankupaq kasqanpi. Chayna sientekuyninkuta atiparuspankum kunanqa kusisqa tarikunku. Clodomirmi nin: “16 watañam kaypi kachkaniku sapa watam kallpanchakuniku pillatapas bautismoman chayanankama yanapanaykupaq”.

Clodomirwan Lysianem kachkanku bautismokama yanapasqanku wakin iñiqmasinchikkunawan

Johanna hinaspa Sébastien

Franciamanta Sébastien hinaspa Johanna casarasqa iñiqmasinchikkunam 2010 watapi Beninman astakurqaku. Sébastienmi nin: “Kasqay congregacionpiqa tukuymi ruwanapaq kachkan. Jehova Diosta kaypi serviyqa paymanta astawan yachanapaq escuelapi kay hinam”. ¿Imaynataq kanku predicasqanku lawpi runakunaqa? Johannam willakun: “Runakunaqa yakunayachikuchkaq hinam Diosmanta yachayta munanku. Mana predicaspa puriptiykupas ñankunapi harkawaspankum Diosmanta tapuwanku otaq Bibliamanta qellqakunata mañakuwanku”, nispa. ¿Imaynatam chayman astakusqankuqa casado vidankupi yanaparqa? Sébastienmi nin: “Astawanmi huk sonqolla kawsanaykupaq yanaparuwanku. Anchatam kusikuni wakinpiqa señoraywan tukuy punchaw predicaspay”.

Eric hinaspa Katy casarasqa iñiqmasinchikkunapas Beninpa norte lawninpim precursor kanku. 10 wata ñawpaqtaqa Franciapim karqaku, chaypi kaspankum leeyta qallaykurqaku predicaqkunapa mana ancha kasqanku sitiokunamanta. Chaymantapas tapukurqakum tukuy tiemponkuwan Dios serviqkunata. Chaykunawanmi kallpanchakurqaku huklaw nacionman astakunankupaq, chaytam ruwarqaku 2005 kaq watapi. Ericmi nin: “2 wata ñawpaqtaqa Tanguiéta llaqtapim Diosmanta willakuqkuna isqonlla karqaniku, kunanqa kimsa chunkañam kaniku. Domingonkunapim 50 otaq 80 huñunakuniku. Chayna yapakusqanta qawaspaykum anchata kusikuniku”.

Katy hinaspa Eric

 SASACHAKUYKUNATAM ATIPANKU

Benjamin

¿Ima sasachakuykunatam atipanku yanapakunankupaq huklaw nacionman riqkunaqa? Anne-Rakelpa turin Benjaminmi 33 watanpi tarikun. 2000 kaq watapim Dinamarcapi reqsirurqa Togopi kaq huk misionerota. Benjaminmi nin: “Chay misioneromanmi willakurqani precursor kay munasqaymanta, payñataqmi niwarqa ‘¿munawaqchu Togopi precursor kayta?’”. Willakuntaqmi: “Chay watapiqa manaraqmi iskay chunka wataypiraqchu karqani, ichaqa iskay paniykunam Togopiña tarikurqaku chayqa yanapawarqam”. Chaymi allinta tanteakuruspan chaylawman astakurqa. Ichaqa manam huk palabrallatapas francés rimayta yacharqachu. Chaymantapas ninmi: “Soqta killam llumpayta sasachakurqani, manam piwanpas allintaqa parlayta atirqanichu”. Tiempo pasasqanman hinam ichaqa allinta rimayta yacharurqa, kunanqa Beninpim Betel wasipi llamkan qellqakunata apachiypi chaynataq computadorawan llamkaypi.

Marie-Agnès hinaspa Michell

Rimamusqanchik Ericwan Katyqa Beninman manaraq richkaspankum Franciapi karqa huk idioma rimaq congregacionpi. ¿Chay congregacionpi hinachu Africapi serviyninkupas karqa? Katym nin: “Manam allin wasitaqa tarirqanikuchu. Achka killakunam karqaniku mana luzniyoq chaynataq mana yakuyoq wasipi”. Ericpas ninmi: “Takikunatam tutakama vecinokuna llumpay volumenpi uyariqku. Pacienciakuspam costumbranaypaq kallpanchakuni”. Ichaqa iskayninkum ninku: “Predicaqkunapa mana ancha kasqanpi Diosta serviyqa ancha kusikuypaqmi”.

Michel hinaspa Marie-Agnès Franciamanta kaq casarasqa iñiqmasinchikkunapas yaqa 60 watankupiñam Beninman astakurunku, chaypim pichqa wataña kachkanku. Chayman riytaqa manchapakurqakum. Michelmi willakun: “Wakinmi niwarqaku chaylawman astakuruspaqa llumpayta sasachakunaykupaq kasqanmanta. Chayna niwasqankuwanmi manchapakurqaniku, ichaqa Jehova Diospim confiarqaniku. Chaymi astawan servinaykupaq astakurqaniku manam haykapipas Diosqa saqewarqakuchu”.

ALLINTAM TANTEANANKU

Predicaqkunapa mana ancha kasqanpi yanapakuqkunaqa manaraq richkaspam allinta tanteakunanku. Chaypaqqa yachanankum costumbrayta, kapuqllankuwan kawsayta chaynataq Jehova Diospi confiaytapas (Luc. 14:28-30).

Rimamusqanchik Sébastienmi willakun: “Manaraq astakuchkaspaykum señoray Johannawan qollqeta huñurqaniku iskay wata. Chaymantapas tanteakurqanikum kusikuykunapi mana gastanaykupaq chaynataq  mana necesitasqaykutaqa mana rantinaykupaq”. Diosta hinalla servinankupaqmi sapa wata Europa lawman rinku wakin killakunapi llamkapakuq, wakin killakunapiñataqmi Beninpi precursor kanku.

Marie-Thérèse

Marie-Thérèse hinam iskay chunka masnin soltera iñiqmasinchikkunapas África lawman astakurunku. Marie-Thérèseqa Franciapim carrota manejaypi llamkapakurqa, ichaqa 2006 kaq watapim llamkayninmanta permisakurqa huk watapaq, hinaspam Nigerman astakurqa. Payqa chayllam cuentata qokururqa imayna kawsakuy munasqanmanta. Ninmi: “Franciaman kutiruspaymi jefeyta nirqani mayomanta agostokama llamkayniyta cambiawananpaq, chay nisqayta jefey aceptawasqanwanmi chay killakunapi carrota manejaspay llamkapakuni, septiembremanta abrilkamam Nigerpi precursora kani”.

Saphira

Diospa munayninta imamantapas puntata ruwaqkunaqa manam iskayrayanankuchu ima necesitasqankutapas Jehova Dios qonanmantaqa (Mat. 6:33). Franciamanta yaqa 30 watanpiña soltera kaq Saphiram precursora kachkan Beninpi. Payta ima pasasqanpiyá reparasun, 2011 kaq watapim Franciaman kutirqa qollqeta huñuspan Africapi hinalla yanapakunanpaq. Paymi willakurqa: “Llamkapakuyniymi viernes punchawta tukururqa. Ichaqa iskay semanaraqmi Franciapi kanay karqa. Chay semanakunataqa hinalla llamkapakuyta munarqani, chaymi Jehova Diosta mañakurqani. Chaymanta ratollamanmi llamkapakuqkunata maskaq oficinamanta telefonontakama qayamuwarqaku huk llamkapakuqta iskay semana remplazanaypaq”. Saphiraqa lunestam rirqa remplazananpaq kaq imakuna ruwasqanta yachachinanpaq. Payqa nintaqmi: “Anchatam admirakurqani chay remplazanaypaq kaqqa iñiqmasiy kasqanmanta, payqa chunka punchawtam necesitarqa Precursorkunapaq Escuelaman rinanpaq. Paypa jefensi nisqa remplazaqninta maskaptinqa chunka punchawta permisananpaq. Chaysi paypas Jehova Diospa yanapayninta mañakusqa, ¡Diosqa mañakusqaykutam uyariwarqaku!”.

DIOSTA SERVIYQA KUSICHIKUNMI

África lawpi yanapakunankupaq riqkunaqa wakinmi chaypi qepakunankupaqña tanteakurunku, wakinñataqmi nacionninkuman kutikunku. Chayna kutikuqkunaqa ancha kusikuywanmi yuyarinku África lawpi yanapakusqankuta. Paykunaqa yacharunkum Diosta serviypi cheqap kusikuy kasqanmanta.

^ par. 6 Beninpi kaq Betel wasim cuentallikun francés rimaq tawa nacionkunamanta.