Pregunta di Lektor

Por papia di union di fe ora kumpra un edifisio for di un otro grupo religioso i kombertié den un Salòn di Reino?

Por lo general Testigunan di Yehova ta evitá di atendé kosnan asina ku otro religionnan. Pero tòg, un transakshon asina lo no ta un akto di union di fe. Nos por mir’é komo simplemente un dil komersial ku ta tuma lugá un solo biaha. E kongregashon lokal di Testigunan di Yehova no ta kolaborando ku un otro grupo religioso pa konstruí un lugá di adorashon pa nan tur dos usa.

Den bista di Yehova, ki ora por papia di un akto di union di fe? Tuma nota di e instrukshon ku apòstel Pablo a duna: “No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat? Òf ki harmonia Kristu tin ku Belial, òf kiko un kreyente tin komun ku un inkrédulo? Òf ki kombenio e tèmpel di Dios tin ku ídolo? . . . ‘P’esei, sali for di meimei di nan i separá boso mes, SEÑOR ta bisa. I no mishi ku loke ta impuru; i lo mi risibí boso.’” (2 Korintionan 6:14-17) Kiko Pablo tabata kier men ku e palabranan “kompañerismo” i “komunion”?

E kompañerismo ku Pablo ta menshoná tin di haber klaramente ku partisipashon den adorashon i aktividatnan spiritual huntu ku hende ku ta adorá imágen i hende inkrédulo. El a spièrta e korintionan pa no ‘tuma parti na e mesa di demoño.’ (1 Korintionan 10:20, 21) Di manera ku un akto di union di fe ta ora un religion ta partisipá den adorashon òf tene komunion spiritual ku otro organisashonnan religioso. (Éksodo 20:5; 23:13; 34:12) Ora kumpra un edifisio ku un organisashon religioso tabata usa, ta hasi esaki simplemente pa haña e struktura básiko nesesario pa un Salòn di Reino. Promé ku us’é komo Salòn di Reino, ta saka tur opheto ku por tabatin konekshon ku adorashon falsu. Ora kaba di prepará e edifisio, ta dedik’é na Yehova ku e propósito eksklusivo di ador’é. No tin komunion ni kompañerismo entre adorashon berdadero i adorashon falsu.

Ora di atendé e detayenan relashoná ku un kompra asina, mester mantené e kontakto ku e otro partido na un mínimo i limit’é estriktamente n’e aspektonan dje kompra. Ta bon pa miembronan dje kongregashon kristian kòrda riba e spièrtamentu di Pablo pa no uni den un “yugo desigual ku inkrédulonan.” Ounke nos no ta sinti nos superior ku esnan ku tin otro fe, nos ta evitá di partisipá ku nan den aktividatnan sosial òf djòin nan den nan adorashon. *

Awor, un kongregashon por hür un edifisio ku ta pertenesé na un organisashon religioso? Generalmente, asuntu di hürmentu ta pone ku e rumannan mester ta den kontakto regular ku miembronan di otro religion, loke ta algu ku mester evitá. Asta pa hür un edifisio asina pa un solo okashon, e kuerpo di ansiano mester hasi nan mes e siguiente preguntanan: Lo tin imágen i símbolo religioso paden òf pafó dje edifisio? Kiko e komunidat lo bisa dje echo ku nos ta usa e lugá ei? Usamentu dje lugá ei lo pone un òf mas persona den e kongregashon trompeká? (Mateo 18:6; 1 Korintionan 8:7-13) E ansianonan tin ku evaluá e faktornan aki i despues disidí kiko ta mihó pa hasi. Tambe nan mester tene kuenta ku nan konsenshi i ku konsenshi di e kongregashon ora nan ta determiná si mester kumpra i kombertí un edifisio asina den un Salòn di Reino.

[Nota]

[Plachi na página 27]

E edifisio aki tabata un snoa; a kumpr’é i kombertié den un Salòn di Reino