Estadísticanan Spantoso di AIDS!
Estadísticanan Spantoso di AIDS!
DJE CORESPONSAL DI SPIERTA! NA SUR ÁFRICA
THEMBEKA ta un hobencita di 12 aña cu ta biba den un pueblito den cunucu n’e parti sur di África. Su mayornan a muri di AIDS, i é a keda encargá cu cuido di su tres ruman muhernan mas chikitu di dies, seis i cuater aña. Un reportero a informá: “E hobencitanan no tin entrada i ta dependé completamente di bondad di bisiña . . . un kipashi, un par di batata.” Nan a pone un potret dje cuater hobencitanan huérfano riba promé página di un korant di Sur África cu a informá dje di 13 Conferencia Anual di Aids, tené na juli 2000 na Durban, Sur África.
Miyones di huérfano di AIDS ta confrontá un situacion similar cu di Thembeka i su rumannan chikitu. E conferencia a considerá métodonan pa trata cu e creciente crísis di AIDS, manera educacion riba prevencion di AIDS mediante uso di condon; e uso di tratamentu mas barata contra AIDS, cu awor ta disponibel; i mas fondo pa desaroyá vacuna contra AIDS. Tambe a considerá con vulnerabel hende muher ta, foral hobencitanan.
Lamentablemente, hombernan ta busca hopi huérfano di AIDS, pasobra nan ta kere cu tene sex cu un bírgen lo cura malesanan transmití sexualmente. Ademas, hopi homber lo no casa cu un mucha muher a ménos cu e haña un yu promé. P’esei nan ta mira uso di condon como un barera tantu pa matrimonio como pa maternidad.
Desafortunadamente, hopi hobencita no sa dje riesgonan di AIDS. E korant di Sur África Sowetan a comentá riba un raport cu a ser presentá na e conferencia dje Fondo di Nacionnan Uní pa Mucha (UNICEF): “Unicef su encuestanan a descubrí cu 51 porciento di hobencita entre 15 pa 19 aña na Sur África no tabata sa cu un persona cu ta parce salú por ta infectá cu HIV i por transmitié na nan.”
Un otro factor den e plamamentu di AIDS ta e abusu sexual di hende muher. Ranjeni Munusamy, kende a asistí na e conferencia, a informá den Sunday Times di Johannesburg, Sur África: “Violencia contra hende muher, e forma di poder masculino mas perturbador, ta keda un barera principal pa prevení i atendé HIV. Su hopi formanan—violacion, incesto, maltrato di esposa i abusu sexual—ta nificá cu hopi bes sex ta ser forsá, loke riba su mes ta un factor di riesgo pa infeccion di HIV.”
Estadísticanan publicá na e conferencia tabata spantoso, manera e tabèl adhunto ta demostrá. Ta ser calculá cu tur dia e cantidad di 7.000 hende hóben i 1.000 baby ta ser infectá cu HIV. Den un solo aña, 1999, mas o ménos 860.000 mucha cu ta biba na África, parti zuid di Sahara, a perde nan maestronan di scol debí na AIDS.
Segun un encuesta publicá dor di Conseho di Investigacion Médico di Sur África, 4,2 miyon hende na Sur África ta infectá cu HIV, loke ta representá 1 di cada 10 ciudadano. E situacion den paisnan bisiña ta pió. The Natal Witness a informá di un cálculo duná dor dje Departamento Mericano di Censo: “E poblacionnan di algun pais africano asotá pa Aids, pronto lo cuminsá mengua segun cu miyones di hende ta muri dje malesa, i pa fin dje década, expectativa di duracion di bida lo baha drásticamente te na rond di 30 aña.”
E tragedia di AIDS ta mas evidencia cu humanidad ta bibando den e “tempu crítico, duru pa trata cuné,” cu Bijbel a profetisá lo tuma lugá “den e último dianan.” (2 Timoteo 3:1-5) Amantenan dje Palabra di Dios, Bijbel, ta anticipá un solucion completo i permanente p’e problema di AIDS i pa tur otro problema cu ta plaga humanidad. Pronto, e Reino di Dios lo tuma e administracion di asuntunan di tera over. Den e mundu nobo di husticia, pobresa i opresion lo ta cosnan di pasado. (Salmo 72:12-14; 2 Pedro 3:13) En bes di eseinan, e habitantenan di tera lo ser restorá na salú perfecto, i niun di nan hamas lo bisa: “Mi ta malu.”—Isaías 33:24.
[Komentario na página 14]
Mundialmente tin un 13.000.000 huérfano di AIDS
[Tabèl/Mapa na página 15]
(Pa e teksto den su formato kompleto, wak e publikashon)
CANTIDAD DI ADULTO (EDAD 15 PA 49) CU HIV/AIDS, FIN DI 1999
Nort América 890.000
Caribe 350.000
Latinoamérica 1.200.000
West Europa 520.000
Nort África i Medio Oriente 210.000
Oost Europa i Europa Central 410.000
Zuid i Zuidoost Asia 5.400.000
Oost Asia i Pacífico 530.000
Australia i Nueva Zelandia 15.000
África parti Zuid di Sahara 23.400.000
[Rekonosementu]
Fuente: UNAIDS
[Grafik/Plachi na página 15]
(Pa e teksto den su formato kompleto, wak e publikashon)
PORCENTAHE DI ADULTO (EDAD 15 pa 49) CU HIV/AIDS DEN 16 PAIS AFRICANO, FIN DI 1999
1 Botswana 35,8%
2 Swazilandia 25,2
3 Zimbabwe 25,0
4 Lesoto 23,5
5 Zambia 20,0
6 Sur África 20,0
7 Namibia 19,5
8 Malawi 16,0
9 Kenya 14,0
10 Rep. Centr. Afr. 14,0
11 Mozambique 13,2
12 Djibouti 11,7
13 Burundi 11,3
14 Ruanda 11,2
15 Côte d’Ivoire 10,7
16 Etiopia 10,6
[Rekonosementu]
Fuente: UNAIDS
[Plachi]
Thembeka cu su ruman muhernan
[Rekonosementu]
Potret: Brett Eloff