Mi a lanta na Puerto Limón, un haf cu ta keda na e costa oost di Costa Rica. Mi mayornan tabatin ocho yiu, y ami ta esun di shete. Mi tata a fayece ora mi tabatin ocho aña. Despues di esey, mi mama a lanta nos su so.

Baseball semper tabata parti di mi bida. For di tempo mi tabata mucha, mi tabata gusta e deporte ey. Como teenager, mi a join un team amateur di baseball. Tempo mi tabatin 20 y pico aña, un agente a puntra mi si mi kier a hunga baseball pa un team profesional na Nicaragua. Pero, como cu e tempo ey mi mama su salud no tabata bon y ami tabata cuid’e, mi no kier a bay biba na Nicaragua. Pues mi a nenga e oferta ey. Mas despues, un otro agente a invita mi pa [bin] hunga den e seleccion di baseball di Costa Rica cu tabata consisti di hungadonan amateur. E biaha aki si mi a acepta e oferta. Mi tabata parti di e seleccion nacional di 1949 te 1952, y mi a hunga varios wega na Cuba, Mexico y Nicaragua. Mi tabata infielder, y mi tabata hunga bon. Mi a yega di hunga 17 wega consecutivo sin haci ni un eror. Anto mi tabata gusta tende con e hendenan tabata grita mi nomber.

Lamentablemente, mi tabata hiba un bida inmoral. Aunke cu mi tabatin solamente un enamorada, semper mi tabatin otro mucha muher. Mi tabata bebe hopi tambe. Un dia mi tabata asina burachi cu ora mi a lanta su manece, mi no por a corda con mi a yega cas. Tambe mi tabata bet riba wega di domino y cumpra catochi y briyechi.

Mientras mi tabata hiba mi bida inmoral, mi mama a bira un testigo di Jehova. El a purba di yuda mi haya interes den loke e tabata kere, pero na prome instante, e no a logra pasobra mi tabata ocupa cu baseball. Si durante ora di come mi tabata riba veld ta train, mi no tabata haya hamber. Mi tabata concentra riba e wega so. Mi tabata stima baseball mas cu tur cos.

Sinembargo, ora mi tabatin 29 aña, mi a purba di catch un bala durante un wega y a sufri un lesion grave. Despues cu  mi a recupera, mi a stop di hunga baseball profesional. Pero, mi a keda envolvi cu baseball y tabata train hungadonan di un team amateur banda di mi cas.

Na 1957, mi a acepta un invitacion pa bay un congreso di testigonan di Jehova den un stadion caminda antes mi tabata hunga baseball. Ora mi tabata sinta den e auditorio, mi a mira e diferencia entre e conducta respetuoso di e Testigonan y e hendenan cu tabata haci bochincha ora tabatin wega di baseball. Loke mi a mira na e congreso ey a motiva mi pa tuma un curso di Bijbel cerca e Testigonan y pa asisti na nan reunionnan.

Hopi di e siñansanan di Bijbel cu mi a siña a impresiona mi. Por ehempel, Hesus a profetisa cu den e ultimo dianan, su discipelnan lo predica e bon noticia di e Reino rond mundo. (Mateo 24:14) Tambe mi a siña cu cristiannan berdadero no ta predica pa gana placa. Hesus a bisa: “Boso a ricibi pornada, duna pornada.”—Mateo 10:8.

Durante mi curso di Bijbel, mi tabata compara loke Bijbel ta bisa cu loke mi tabata mira den e testigonan di Jehova. Mi tabata admira nan esfuerso incansabel pa plama e bon noticia di e Reino di Dios rond mundo. Mi a mira den nan e spirito generoso cu Hesus a manda cristiannan demostra. Pues ora mi a lesa Marco 10:21 y mira Hesus su invitacion pa “Bin sigui mi”, mi kier a bira un Testigo.

Sinembargo, a tuma mi un poco tempo pa mi dal pasonan mas decisivo. Por ehempel, pa hopi aña mi tabata cumpra mi number di “suerte” tur siman den e loteria nacional. Pero, mi a siña den Bijbel cu Dios ta condena sirbidornan di e dios di “Fortuna”, of Suerte, y tambe hende golos. (Isaias 65:11; Colosensenan 3:5) Pesey mi a dicidi di stop di gamble. E prome diadomingo despues cu mi a stop di cumpra catochi, mi number di “suerte” a sali. Hende tabata haci bofon di mi pasobra mi no a hunga number e siman ey, y nan tabata pone hopi presion riba mi pa mi bolbe hunga. Pero mi no a haci esey. Nunca mas mi a gamble.

E mesun dia cu mi a batisa na un congreso di testigonan di Jehova mi “personalidad nobo” como un cristian a ser poni na prueba. (Efesionan 4:24) E anochi ey, ora mi a regresa na e hotel caminda mi tabata keda, mi a haya mi ex enamorada para pafo di mi camber ta warda mi. El a bisa mi: “Ban mira Sammy, laga nos pasa un rato contento!” Pero di biaha mi a contest’e: “No!” Mi a cord’e cu awor mi ta biba segun e normanan moral di Bijbel. (1 Corintionan 6:18) Sorprendi el a bisa: “Kico?” Despues el a haci manera loke Bijbel ta bisa tocante inmoralidad sexual tabata algo insignificante y a insisti pa nos bolbe cuminsa cu nos relacion. Pero, mi a djis drenta den mi camber y a lock e porta. Awe, mi ta contento cu mi por bisa cu desde cu mi a bira un Testigo na 1958, mi a tene mi mes fielmente na e cambionan cu mi a haci den mi bida.

Mi ta sinti comosifuera mi por skirbi un buki di tur e beneficionan cu mi a haya debi cu mi a sigui e guia di Bijbel. Algun beneficio cu mi tin aworaki ta un bida yen di proposito, berdadero felicidad y hopi amigo berdadero.

Ainda mi ta gusta baseball, pero mi a ahusta mi punto di bista. Mi a haya prestigio y placa cu baseball, pero e cosnan ey no a dura. Sinembargo, mi relacion cu Dios y e hermandad cu mi ta forma parti di dje ta keda pa semper. Bijbel ta bisa: “Mundo ta pasa bay y tambe su deseonan, ma esun cu ta haci e boluntad di Dios ta keda pa semper.” (1 Juan 2:17) Awor mi ta stima Jehova Dios y su pueblo mas cu tur cos!