Saulo Su Predicacion Ta Lanta Hostilidad

E HUDIUNAN na Damasco no por a compronde con un defensor ferviente di creencianan tradicional por a bira un apostata. Ata Saulo, e homber cu a persigui y tormenta hende cu a invoca e nomber di Hesus na Herusalem. El a bin Damasco pa persigui e disipelnan einan. Pero awor e mes tawata predica cu e mesun criminal desprecia cu nan a colga na staca pa motibo di blasfemia, ta e Mesias! Ta loco Saulo a bira?—Echonan 9:1, 2, 20- 22.

Kisas tawatin un splicacion. Muy probablemente ta e otro hendenan cu a biaha den e mesun caravana cu Saulo a conta loke a pasa na caminda. Ora nan tawata yegando Damasco, diripiente un lus skerpi a lusa riba nan y nan tur a cai na suela. Tawatin zonido di un stem tambe. Ni un hende no a sufri daño, cu excepcion di Saulo. E tawata drumi riba e caminda. Ora cu finalmente el a lanta, e otro biaheronan mester a gui’e pa e por a yega Damasco pasobra e no por a mira nada.—Echonan 9:3- 8; 26:13, 14.

Un Enemigo di Hesus Ta Bira Su Promotor

Kico a sosode cu Saulo riba caminda pa Damasco? Ta su biahe largo of podise e solo cayente di merdia a hacie malo? Determina pa haya splicacionnan natural, skepticonan moderno ta sugeri varios posibilidad manera, delirio, halusinacion, un crisis psicologico severo causa door di Saulo su remordimento di consenshi, un atake di nervio, y asta epilepsia cu supuestamente Saulo tawata sufri di dje.

Loke realmente a sosode ta cu Cristo Hesus a aparece na Saulo den un lus cu a hacie ciego, y a combenc’e cu E ta e Mesias. Algun obra artistico cu ta describi e episodio aki ta mustra con Saulo ta cai for di un cabai. Aunke esei por ta un posibilidad, Bijbel ta bisa simplemente cu el “a cai abou na suela.” (Echonan 22:6- 11) Sea cual sea e manera cu el a cai, loke el a sufri fisicamente no tawata nada na comparacion cu e caida bergonsoso cu el a sufri for di e posicion cu e tawatin anteriormente. Awor e mester a reconoce cu loke e siguidonan di Hesus tawata predica tawata berdad. E unico salida cu a keda Saulo ta di join nan. Saulo a cambia di un enemigo cruel di e mensahe di Hesus pa bira un di su promotornan di mas fiel. Despues cu Saulo a haya su bista bek y a batisa, el “a sigui haya mas y mas poder, y tawata confundi e Hudiunan cu tawata biba na Damasco door di proba cu e Hesus aki ta e Cristo.”—Echonan 9:22.

Complot pa Asesinato Ta Fracasa

Unda Saulo, cu despues a ser yama Pablo, a bai despues cu el a comberti? Den su carta na e Galationan el a bisa: “Mi a bai Arabia, y a bolbe atrobe na Damasco.” (Galationan 1:17) E palabra “Arabia” por referi na un biahe pa cualkier parti di e peninsula di Arabia. Algun experto di Bijbel ta sugeri cu kisas Pablo a bai den e Desierto di Siria of otro caminda den e reino Nabateo di Aretas IV. Tin hopi chens cu Saulo a bai un luga keto pa e medita despues di su bautismo, mescos  cu Hesus a bai den desierto despues cu el a batisa.—Lucas 4:1.

Ora Saulo a bolbe Damasco, “e Hudiunan a traha complot pa mat’e.” (Echonan 9:23) E gobernado cu a sirbi como representante di Rei Aretas na Damasco, a laga vigila e stad cu e intencion pa captura Saulo. (2 Corintionan 11:32) Pero na mesun tempo cu e enemigonan a traha complot pa mata Saulo, Hesus su disipelnan a plania un manera pa scap’e.

Entre e personanan cu a yuda Saulo scapa tawatin Ananias y e disipelnan cu tawata hunto cu Saulo un poco despues cu el a comberti. * (Echonan 9:17- 19) Podise tawatin algun hende cu a bira creyente debi na Pablo su predicacion na Damasco cu tambe a yuda, pasobra Echonan 9:25 ta bisa: “Su disipelnan a coh’e den anochi y a bah’e den un macutu door di un habri den muraya.” E expresion “su disipelnan” kisas ta referi na e personanan cu Saulo a siña. En todo caso, e exito cu e tawatin den su ministerio probablemente a intensifica e odio cu e hendenan tawatin contra dje.

Un Les pa Nos

Ora nos analisa algun di e susesonan rondo di e combertimento y bautismo di Saulo, nos ta mira bon cla cu e no tawata precupa demasiado cu loke otro hende tawata pensa di dje; ni e no a stop di predica pa motibo di oposicion severo. Loke tawata mas importante pa Saulo tawata e asignacion di predica cu el a ricibi.—Echonan 22:14, 15.

Ta resientemente bo a cuminsa mira e importancia di predica e bon nobo? Si ta asina, bo sa cu tur cristian berdadero mester ta un predicado di Reino. Bo no mester keda sorprendi si de bes en cuando hende ta reacciona na un manera hostil of agresivo pa motibo di bo ministerio. (Mateo 24:9; Lucas 21:12; 1 Pedro 2:20) E manera cu Saulo a reacciona ora el a hay’e cu oposicion ta un ehempel pa nos. Cristiannan cu ta wanta bou di prueba sin entrega lo tin Dios su aprobacion. Hesus a bisa su disipelnan: “Tur hende lo odia boso pa causa di mi nomber.” Pero, el a duna nan e siguransa: “Door di boso perseverancia boso lo gana boso alma.”—Lucas 21:17- 19.

[Nota]

[Plachi na pagina 28]

Saulo “a cai abou na suela” ora Hesus a aparece na dje

[Plachi na pagina 29]

Saulo a scapa di un complot pa asesin’e na Damasco