Pregunta di Lector

Con bin Samson por a mishi cu cadaver di bestia cu el a mata y toch keda un Nazareo?

Den Israel di antiguedad, un persona por a haci un voto boluntariamente y bira un Nazareo pa un cierto periodo di tempo. * Un di e restriccionnan cu un persona cu a haci e voto aki mester a tene cuenta cu ne tawata: “Tur e dianan di su separacion na SEÑOR e no mag yega serca di un morto. E no mester haci su mes impuro pa su tata ni pa su mama, pa su ruman homber ni pa su ruman mohe ora nan muri.” Pero kico si un hende “muri repentinamente banda di dje”? Den un caso asina ora e hay’e accidentalmente ta mishi cu un cadaver, esaki lo a contamina su posicion como Nazareo. Pesei e lei a stipula: “E dianan prome lo keda anula.” E mester pasa door di un ceremonia di purificacion y cuminsa su periodo di Nazareo di nobo.—Numbernan 6:6- 12.

Sinembargo, Samson tawata Nazareo den un otro sentido. Prome cu Samson a nace, e angel di Yehova a bisa su mama: “Mira, lo bo consebi y duna lus na un yiu homber, y nabaha lo no pasa riba su cabes, pasobra e mucha lo ta un Nazareo pa Dios for di den bariga di su mama; y e lo cuminsa libra Israel for di man di e Filisteonan.” (Huesnan 13:5) Samson no a haci un voto como Nazareo. Ta Dios mes a nombr’e como Nazareo, y e mester a keda un Nazareo henter su bida. E restriccion relaciona cu mishimento cu cadaver no por a aplica den su caso. Si tawata asina y accidentalmente el a mishi cu un cadaver, con lo e por a cuminsa di nobo cu un periodo di Nazareo pa bida largo cu a cuminsa for di ora cu el a nace? Aparentemente anto, e rekisitonan pa Nazareonan pa bida largo den cierto sentido tawata diferente for di esnan pa hendenan cu boluntariamente a bira Nazareo.

Considera Yehova su mandamentonan pa e tres Nazareonan di bida largo cu Bijbel ta menciona, esta, Samson, Samuel y Huan Bautista. Manera nos a mira anteriormente, Samson no tawatin mag di corta su cabei. Ana a haci e siguiente voto relaciona cu Samuel, e yiu cu e tawata bai haya: “Lo mi dun’e na SEÑOR tur e dianan di su bida, y nunca nabaha lo no pasa riba su cabes.” (1 Samuel 1:11) Den caso di Huan Bautista, e angel di Yehova a bisa: “E lo no bebe biña ni bebida sterki.” (Lucas 1:15) Ademas, “Huan aki tawata bisti cu un paña traha di lana  di camel, y tawatin un faha di cuero na su sintura; y su cuminda tawata tiracochi y miel di mondi.” (Mateo 3:4) Ningun di e tres personanan aki no a haya e mandato pa no bini den cercania di un cadaver.

Aunke Samson tawata un Nazareo, e tawata entre e huesnan cu Yehova a lanta pa salba e Israelitanan for di man di esnan cu tawata plunder nan. (Huesnan 2:16) Y cumpliendo cu e asignacion aki, el a bin den contacto cu cadaver. Tawatin un biaha cu Samson a dal 30 Filisteo mata y a kita nan paña for di nan. Despues el a sigui mata e enemigo “sin misericordia den un gran matansa.” Tambe el a cohe un cacumbein di burico cu no a seca ainda y a mata mil homber cu ne. (Huesnan 14:19; 15:8, 15) Samson a haci tur e cosnan aki cu Yehova su aprobacion y apoyo. Y e Scritura ta referi na dje como un homber di fe ehemplar.—Hebreonan 11:32; 12:1.

E declaracion cu ta bisa cu Samson a scheur un leon “manera hende ta scheur un yiu di cabrito” na dos, ta indica cu hende den su tempo tawatin e custumber di scheur lamchi di cabrito for di otro?

No tin ningun evidencia cu ta mustra cu den tempo di e huesnan di Israel tawata normal pa hende scheur lamchi di cabrito for di otro. Huesnan 14:6 ta bisa: “Y e spirito di SEÑOR a bin riba [Samson] cu poder, asina cu el a scheur e leon [“na dos”, NW] manera hende ta scheur un yiu di cabrito, aunke cu e no tawatin nada den su man.” Probablemente e comentario aki ta un ilustracion.

E expresion ‘el a scheur e na dos’ por tin dos nificacion. Sea Samson a scheur e cacumbein di e leon for di otro, of di un of otro manera el a scheur e leon na pida pida. Si ta e prome opcion tawata e caso, hende tambe por haci esei cu un lamchi di cabrito. Den e caso aki, e ilustracion ta indica cu Samson por a mata un leon cu su mannan cu mesun facilidad cu lo el a mata un lamchi di cabrito. Sinembargo, kico si Samson a mata e leon door di scheur e na pida pida? E ora ei nos lo tin cu compronde cu e comentario aki ta un metafora. E punto cu nos mester saca for di e metafora aki ta cu e spirito di Yehova a duna Samson poder pa efectua un tarea cu ta rekeri forsa fisico extraordinario. Den tur dos opcion e comparacion na Huesnan 14:6 ta mustra cu debi na e forsa cu Yehova a duna Samson, un leon poderoso no tawata mas feros p’e cu un lamchi di cabrito lo tawata pa un persona cu forsa normal.

[Nota]