Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuya ɛhye mɔ a:

Duzu ati a Gyihova maanle tete Yizilayɛma hɔle konle a?

Gyihova le ɛlɔlɛ. Noko ɔdwu mekɛ ne bie na awie mɔ ɛlɛyɛ ye menli ne amumuyɛ anzɛɛ bɛlɛsisi bɛ a, ɔmaa bɛ nee bɛ ko. Nyamenle angomekye a si menli mɔɔ ɔwɔ kɛ bɛkɔ konle ne nee mekɛ ne anwo kpɔkɛ a.​—w15 11/1, m. 4-5.

Duzu ninyɛne titili a awovolɛ bahola ayɛ atete bɛ mra ngakula mbɛlɛra nee mgbavolɛ a?

Ɔhyia kɛ awovolɛ nyia ɛlɔlɛ maa bɛ mra na bɛfa bɛ neazo bɛkilehile bɛ mɛlɛbɛnwoaze. Eza ɔwɔ kɛ awovolɛ da nwunu ali na bɛbɔ mɔdenle bɛte bɛ mra ngakula mbɛlɛra nee mgbavolɛ edwɛkɛ bo.​—w15 11/15, m. 10-12.

Duzu ati a ɔnle kɛ yɛbu pope ne kɛ ɔdi Pita agya ɛ?

Mateyu 16:17, 18 ɛnga kɛ ɛzoanvolɛ Pita a bayɛ Kilisiene asafo ne ati a. Baebolo ne maa ɔda ali kɛ, kɛ anrɛɛ Pita bayɛ asafo ne ati la, Gyisɛse a le asafo ne bolɛ mɔɔ anwo hyia kpalɛ a. (1 Pita 2:4-8)​—w15 12/1, m. 12-14.

Ninyɛne boni mɔ a ɔwɔ kɛ yɛdimoa yɛsuzu nwo na yɛadendɛ a?

Saa yɛ tafinlima ne baboa awie mɔ a, ɔwɔ kɛ yɛkakye (1) mekɛ mɔɔ ɔwɔ kɛ yɛtendɛ (Nol. 3:7), (2) edwɛkɛ mɔɔ ɔwɔ kɛ yɛka (Mrɛ. 12:18), yɛɛ (3) kɛzi ɔwɔ kɛ yɛka ye la (Mrɛ. 25:15).​—w15 12/15, m. 18-21.

Ndenle mɔɔ ɔngile nɔhalɛlilɛ la boni mɔ a Kilisienema kpo a?

Nɔhalɛ Kilisienema kpo adalɛbɔlɛ nee awie mɔ mɔɔ bɛsɛkye bɛ duma la. Bɛnga adalɛ edwɛkɛ mɔɔ boda awie mɔ la, yɛɛ bɛnli awie mɔ ndunlumi anzɛɛ bɛnwua bɛ.​—wp16.1, m. 5.

“Sɛlɛvolɛ mgbanyinli” ne mɔ mɔɔ bɛhanle bɛ nwo edwɛkɛ wɔ Baebolo ne anu la a le nwane mɔ?

Ɔda ali kɛ edwɛkɛ “Sɛlɛvolɛ mgbanyinli” gyi ɛkɛ maa ɛsɔfolilɛ ne anu amra menli titili bie mɔ mɔɔ ɛsɔfo mgbanyinli dɛba ne mɔ mɔɔ ɛnee bɛwie bɛ gyimalilɛ bɔbɔ boka nwolɛ la.​—wp16.1, m. 10.

Kɛzi ɔwɔ kɛ yɛ nee awie mɔɔ di Ngakyelɛlilɛ aleɛ ne bie la di ɛ?

Kilisienema ɛmmemaa menli mɔɔ bɛdi aleɛ ne bie la zo. Awie mɔɔ bɛkpokpa ye nɔhalɛ nu la ɛnrɛhulo kɛ bɛbamemaa ye zo anzɛɛ ɔnrɛha ɔnrɛhile awie biala kɛ bɛkpokpa ye.(Mat. 23:8-12)​—w16.01, m. 21-22.

Duzu a yɛsukoa yɛfi kɛzi Ebileham rayɛle Nyamenle agɔnwo la anu a?

Bie a Ebileham zukoale Nyamenle anwo nrɛlɛbɛ vile Hyɛm ɛkɛ. Eza Ebileham nwunle kɛzi Nyamenle nee ye abusua ne lile la. Yɛbahola yɛabɔ mɔdenle yɛayɛ mɔɔ ɔyɛle la bie.​—w16.02, m. 4-6.

Kɛzi ɔyɛle mɔɔ bɛhyehyɛle Baebolo ne anu adile nee ngyehyɛnu ɛ?

Stephen Langton, ɛvoya 13 ne anu ɛsɔfo bie a hyehyɛle Baebolo ne anu yɛle ye adile a. Dwuu kɛlɛhɛlɛvolɛma a limoale hyehyɛle Hibulu Baebolo ne anu a, na abɔlɔba kpanyinli Robert Estienne noko yɛle Kilisiene Giliki Ngɛlɛlera ne noko zɔhane ala wɔ ɛvoya 16 ne anu.​—wp16.2, m. 14-15.

Seetan sɔ Gyisɛse anlea la, asoo ɔvale ye ɔhɔle ɛzonlenlɛ sua kpalɛ nu?

Yɛngola yɛnzi ye pi. Mateyu 4:5 nee Luku 4:9 bahola ahile kɛ Gyisɛse nwunle ɛhye wɔ ɛnyelɛzodeɛnwunlɛ nu anzɛɛ ɔhɔgyinlanle ɛzonlenlɛ sua ne ɛleka twɔɔnwo bie azo.​—w16.03, m. 31-32.

Ndenle boni mɔ azo a yɛ ɛzonlenlɛ gyima ne le kɛ ɛbɔlɛ a?

Ɛbɔlɛ ɛndɔ gidigidi, ɔmaa ahonle tɔ azule nu yɛɛ ɔhyia ɔmaa ngoane. Ɛbɔlɛ le nyilalɛ mɔɔ vi Nyamenle ɛkɛ a. (Mɛla 33:13) Mɔdenle mɔɔ Nyamenle menli bɔ wɔ edwɛkɛhanlɛ gyima ne anu la le kɛ ɛbɔlɛ la.​—w16.04, m. 32.