Mrɛlɛbulɛ 12:1-28
12 Sonla mɔɔ kulo ɛdenrɛdenrɛlɛ la kulo nrɛlɛbɛ,+Noko mɔɔ kyi ahwibɛnyunlu la ɛndwenle.*+
2 Sonlakpalɛ nyia Gyihova anyunlu ɛlolɛ,Noko Ɔbua sonla mɔɔ bɔ amumuyɛ adwenle la fɔlɛ.+
3 Sonla ɛnrɛhola ɛnrɛlua amumuyɛyɛlɛ zo ɛnrɛbɔ ɔ nwo bane,+Noko tenlenema abo ɛnrɛdu ɛlɛ.
4 Yelɛ kpalɛ le abotile maa ɔ hu,+Noko yelɛ mɔɔ bɔ anyiemgba ɛbɛla la le kɛ ewule mɔɔ kpɔlɔ ɔ hu mbowule la.+
5 Tenlenema adwenle le fɔɔnwo,Noko amumuyɛma adehilelɛ le mɛlɛbɛla.
6 Amumuyɛma edwɛkɛ le kɛ kpɔvolɛ mɔɔ kɔ nzia kɛ ɔku sonla* la,+Noko tenlenema anloa die bɛ ngoane.+
7 Saa bɛsɛkye amumuyɛma a, bɛnle ɛkɛ bieko,Noko tenlenema awuke bahɔ zo agyinla.+
8 Bɛye sonla mɔɔ buke ɔ nloa nrɛlɛbɛ nu la ayɛlɛ,+Noko bɛmbu sonla mɔɔ ye ahonle le mɛlɛbɛla la.+
9 Sonla mɔɔ bɛmbu ye bie noko ɔlɛ sonvolɛ la le kpalɛTɛla sonla mɔɔ memaa ɔ nwo zo noko ɔ nloa anu aleɛ* ɛbɔ ye la.+
10 Tenlenenli nea ye nyɛmoa* boɛ,+Noko amumuyɛma anwunvɔnezelɛ bɔbɔ le atisesebɛyɛlɛ.
11 Sonla mɔɔ yɛ ye azɛlɛ zo gyima* la bali aleɛ ɔ ko ayi,+Noko mɔɔ di ninyɛne mgbane mgbane nzi la ɛnlɛ adwenle.*
12 Amumuyɛnli anye bolo mɔɔ ɛtanevolɛma gyɛne ɛnyia ye la,Noko tenlenema ndinli so ma.
13 Amumuyɛnli ɛdendɛlɛ ɛtane sua ye ɛhane,+Noko tenlenenli fi anwongyelelɛ nu.
14 Sonla anloa anu edwɛkɛ maa ɔnyia debie kpalɛ na ɔ kunlu dwo ɔ nwo,+Na ɔ sa anloa gyima bamaa yeanyia ahatualɛ.
15 Koasea adenle tenrɛ wɔ ɔ nye zo,+Noko nrɛlɛbɛvolɛ tie folɛdulɛ.+
16 Koasea da ye ɛyavalɛ ali ndɛndɛ,*+Noko mɔɔ anye gyi ɔ ti anwo la bu ɔ nye gua* aholoba ɛbɔlɛ zo.
17 Dasevolɛ nɔhavo ka nɔhalɛ,Noko mɔɔ di dasewia la bɔ adalɛ.
18 Ɛdendɛlɛ mgbane mgbane le kɛ konle dadeɛ mɔɔ wowɔ la,Noko nrɛlɛbɛvolɛ atafinlima yɛ ayile.+
19 Ɛnloanlɛ mɔɔ ka nɔhalɛ la badɛnla ɛkɛ dahuu,+Noko adalɛ ɛtafinlimalɛ ɛdeɛ, ɔbadɛnla ɛkɛ mekɛ ekyi bie ala.+
20 Mɛlɛbɛla wɔ bɛdabɛ mɔɔ bɛbɔ adwenle ɛtane la ahonle nu,Noko bɛdabɛ mɔɔ bɛkpondɛ anzodwolɛ* la anye die.+
21 Esiane ɛnrɛdo tenlenenli,+Noko munzule bayi amumuyɛma tɛkɛɛ.+
22 Adalɛ ɛnloanlɛ le Gyihova kyibadeɛ,+Noko bɛdabɛ mɔɔ bɛdi nɔhalɛ la maa ɔ nye die.
23 Sonla mɔɔ anye gyi ɔ ti anwo la fea mɔɔ ɔze ye la azo,Noko koasea ahonle bɔ ye ngoaseade ne nolo.+
24 Menli mɔɔ bɔ mɔdenle yɛ gyima la asa bali tumi,+Noko mgbovonlema asa bayɛ akɛlɛ gyima.+
25 Sonla ahonle nu adwenleadwenle maa ahonle ne yɛ bɛtɛɛ,*+Noko edwɛkɛ kpalɛ maa ahonle ne di fɛlɛko.+
26 Tenlenenli kɔneɛnlea ye adidileka ne mɔ,Noko amumuyɛma ndenle maa bɛminli.
27 Mgbovonle sonla ɛnnriandi ɛngye nane,+Noko gyima nwo mɔdenlebɔlɛ le sonla agyadeɛ mɔɔ sonle bolɛ.
28 Tenleneyɛlɛ adenle kɔwie ngoane nu;+Ewule ɛnle ye adenle nu.
Ɔbodwɛkɛ
^ Anzɛɛ “ɛnlɛ adwenle.”
^ Hibulu aneɛ nu, “kɔ mogyahanlɛ nwo nzia.”
^ Hibulu aneɛ nu, “paano.”
^ Anzɛɛ “ye ayɛmoa ɛkɛla.”
^ Anzɛɛ “so ye ɛya.”
^ Anzɛɛ “ɛnze nrɛlɛbɛ.”
^ Anzɛɛ “kenle ko ne ala.”
^ Hibulu aneɛ nu, “keda.”
^ Hibulu aneɛ nu, “bɛdabɛ mɔɔ bɛtu azondwolɛ nwo folɛ.”
^ Anzɛɛ “maa ɔyɛ basaa.”