Jesu Kriste—Moromiwa yo Mogolo Kudu
Jesu Kriste—Moromiwa yo Mogolo Kudu
“Ke nna moemedi yo a tšwago go yena, gomme yena Yoo o nthomile.”—JOH. 7:29.
1, 2. Moromiwa ke’ng, gomme ke mang yo a ka bitšwago Moromiwa yo mogolo kudu?
KE’NG seo o se naganago ge o e-kwa lentšu “moromiwa”? Ba bangwe ba nagana ka baromiwa ba Bojakane, bao bontši bja bona ba tsena-tsenago ditabeng tša dipolitiki le tša boiphedišo tša dinaga tšeo ba hlankelago go tšona. Lega go le bjalo, bjalo ka yo mongwe wa Dihlatse tša Jehofa, mohlomongwe o nagana ka baromiwa bao ba rongwago ke Sehlopha se Bušago gore ba ye go bolela ditaba tše dibotse dinageng tše di fapa-fapanego go dikologa lefase. (Mat. 24:14) Ka ntle le boithati, baromiwa ba ba gafa nako ya bona le maiteko modirong o hlomphegago wa go thuša batho go batamela kgaufsi le Jehofa Modimo le go ba le tswalano e bohlokwa kudu le yena.—Jak. 4:8.
2 Mantšu “moromiwa” le “baromiwa” ga a tšwelele ditemaneng tša mangwalo ka go New World Translation of the Holy Scriptures. Lega go le bjalo, Baefeso 4:11 mongwalong wa tlase wa NW e šišinya gore lentšu la Segerika leo le fetoletšwego e le “baebangedi” le ka fetolelwa gape e le “baromiwa.” Jehofa ke Moebangedi yo mogolo kudu, eupša a ka se ke a bitšwa Moromiwa yo mogolo, ka gobane ga go motho yo a mo romilego. Lega go le bjalo, Jesu Kriste o boletše mabapi le Tatagwe wa legodimong gore: “Ke nna moemedi yo a tšwago go yena, gomme yena Yoo o nthomile.” (Joh. 7:29) Ge a be a bontšha lerato la gagwe le legolo la go rata lefase la batho, Jehofa o ile a romela lefaseng Morwa wa gagwe yo a tswetšego a nnoši. (Joh. 3:16) Jesu a ka bitšwa Moromiwa yo mogolo kudu, Moromiwa yo a phalago bohle, ka gobane lebaka le lengwe leo ka lona a ilego a romelwa lefaseng e be e le go ‘hlatsela therešo.’ (Joh. 18:37) O ile a atlega ka botlalo go tsebatšeng ditaba tše dibotse tša Mmušo, gomme re sa dutše re holwa ke tirelo ya gagwe. Ka mohlala, re ka diriša mekgwa ya gagwe ya go ruta bodireding bja rena, go sa šetšwe gore re abetšwe go hlankela re le baromiwa goba go se bjalo.
3. Re tla ahla-ahla dipotšišo dife?
3 Tema e kgathwago ke Jesu bjalo ka mogoeledi wa Mmušo e rotoša dipotšišo tše bjalo ka tše: Jesu o ile a lebeletšana le eng mo lefaseng? Ke ka baka la’ng a be a atlega go ruteng? Le gona ke’ng seo se ilego sa dira gore bodiredi bja gagwe bo atlege?
Moya wa Boikgafo Tikologong e Mpsha
4-6. Jesu o ile a lebeletšana le go dira diphetogo dife ge a be a rometšwe mo lefaseng?
4 Baromiwa ba mehleng yeno le Bakriste ba bangwe bao ba hudugelago mafelong ao go ona go nyakegago bagoeledi ba bantši ba Mmušo ba ka swanelwa ke go tlwaelana le maemo a bophelo ao a lego ka tlasana ga ao ba bego ba a tlwaetše. Eupša go be go tloga go e-na le phapano e kgolo kudu maemong a Jesu a go phela mo lefaseng le a go phela legodimong, moo a bego a phela le Tatagwe magareng ga dibopiwa tša barongwa tšeo di bego di hlankela Jehofa ka maikemišetšo a mabotse. (Jobo 1:6; 2:1) E be e le mo go fapanego gakaakang go phela le batho ba sebe lefaseng le gobogilego! (Mar. 7:20-23) Jesu o ile a ba a swanelwa ke go swaragana le ngangišano yeo e bego e le gona magareng ga barutiwa ba gagwe. (Luka 20:46; 22:24) Ke therešo gore o ile a swaragana ka mo go phethagetšego le selo se sengwe le se sengwe seo a ilego a lebeletšana le sona mo lefaseng.
5 Jesu ga se a ka a fo thoma go bolela leleme la batho ka tsela ya mohlolo; o ile a ithuta lona e sa le lesea. Ruri e be e le phetogo e kgolo go tloga go neeng barongwa ditaelo legodimong! Ge a be a le lefaseng, Jesu o dirišitše bonyenyane le tee la “maleme a batho.” Le be le fapane kudu le ‘maleme a barongwa.’ (1 Bakor. 13:1) Lega go le bjalo, mabapi le mantšu a kgahlišago, ga go na motho yo a kilego a bolela go swana le Jesu.—Luka 4:22.
6 Ela hloko ditsela tše dingwe tšeo ka tšona maemo a Morwa wa Modimo a ilego a fetoga ka gona ge a be a tlile mo lefaseng. Gaešita le ge Jesu a sa ka a abela sebe go Adama, O ile a ba motho go swana le bao ka morago e bego e tla ba “bana babo,” goba balatedi ba tloditšwego. (Bala Baheberu 2:17, 18.) Bošegong bja mafelelo bja bophelo bja gagwe bja lefaseng, Jesu ga se a ka a kgopela Tatagwe wa legodimong gore a romele “dikgao tša madira tše fetago lesome-pedi tša barongwa.” Eupša nagana feela ka dibopiwa tša barongwa tšeo a bego a di laola bjalo ka Mikaele Morongwa yo Mogolo! (Mat. 26:53; Juda 9) Ee, Jesu o ile a dira mehlolo; lega go le bjalo, seo a se dirilego mo lefaseng e be e le se senyenyane kudu ge se bapetšwa le seo a bego a ka se dira legodimong.
7. Bajuda ba ile ba itshwara bjang ge e le mabapi le Molao?
7 Nakong ya ge e be e le “Lentšu” pele ga ge e e-ba motho, Jesu e ka ba e be e le Mmoleledi wa Modimo yo a bego a hlahla Baisiraele go phatša lešokeng. (Joh. 1:1; Ek. 23:20-23) Lega go le bjalo, ba be ba ‘amogetše Molao go etša ge o fetišeditšwe ka barongwa eupša ba se ke ba o boloka.’ (Dit. 7:53; Baheb. 2:2, 3) Ge e le gabotse, baetapele ba bodumedi ba Bajuda ba lekgolong la pele la nywaga ba paletšwe ke go lemoga seo se bolelwago ke Molao. Ka mohlala, ela hloko molao wa Sabatha. (Bala Mareka 3:4-6.) Bamangwalo le Bafarisei ba “hlokomologile ditaba tše boima tša Molao, e lego, toka le kgaugelo le potego.” (Mat. 23:23) Lega go le bjalo, Jesu ga se a ka a langwa gomme a tlogela go tsebatša therešo.
8. Ke ka baka la’ng Jesu a ka kgona go re thuša?
8 Jesu o be a e-na le moya wa boikgafo. O be a tutuetšwa ke go rata batho gomme a tloga a nyaka go ba thuša. Ga se a ka a lahlegelwa ke moya wa boebangedi. Le gona ka baka la go botegela ga gagwe Jehofa ge a be a sa le mo lefaseng, Jesu “o ile a ikarabela ka phološo ya ka mo go sa felego ya bohle bao ba mo kwago.” Go oketša moo, “ka ge yena a ile a tlaišega ge a be a lekwa, o kgona go thuša bao ba lekwago [go swana le rena].”—Baheb. 2:18; 5:8, 9.
O Tlwaeditšwe Gabotse Bjalo ka Morutiši
9, 10. Jesu o ile a hwetša tlwaetšo ya mohuta mang pele ga ge a ka romelwa lefaseng?
9 Pele ga ge Bakriste ba mehleng yeno ba rongwa bjalo ka baromiwa, Sehlopha se Bušago se rulaganya gore ba tlwaetšwe. Na Jesu Kriste o ile a tlwaetšwa? Ee, eupša ga se a ka a tsena dikolo tša bo-rabi pele ga ge a ka tlotšwa e le Mesia; le gona ga se a ka a rutwa dinaong tša baetapele ba bangwe ba ba tumilego ba bodumedi. (Joh. 7:15; bapiša le Dit. 22:3.) Ka gona, ke ka baka la’ng Jesu a be a tloga a swanelega go ruta ka tsela ye?
10 Go sa šetšwe seo Jesu a ka bago a ithutile sona go mmagwe, Maria, le tatagwe yo e sego wa madi, Josefa, o hweditše tlwaetšo ya bodiredi Mothopong o phagamego. Jesu o boletše mabapi le se gore: “Ga se ka bolela ka la-ka, eupša Tate yo a nthomilego ka noši o nneile taelo mabapi le seo ge e le gabotse ke swanetšego go se bolela.” (Joh. 12:49) Ela hloko gore Morwa o be a neilwe ditaelo ka go lebanya mabapi le seo a swanetšego go se ruta. Pele ga ge a ka tla lefaseng, ka ntle le pelaelo Jesu o feditše nako e ntši a theeditše dithuto tša Tatagwe. Ke tlwaetšo efe e kaone go feta ye yeo a bego a ka e hwetša?
11. Jesu o ile a bonagatša boemo bja Tatagwe bja kgopolo ka batho go fihla bokgoleng bofe?
11 Go tloga nakong yeo a bopilwego ka yona, Morwa o be a e-na le tswalano ya kgaufsi le Tatagwe. Nakong ya go ba gona ga gagwe pele e e-ba motho, Jesu o be a lemoga boemo bja Modimo bja kgopolo mabapi le batho ka go lebelela kamoo Jehofa a dirišanago le bona ka gona. Lerato la Modimo go batho le ile la bonagatšwa ka Morwa go fihla bokgoleng bja gore a bolele bjalo ka bohlale bjo bo mothofaditšwego gore: “Kè kxahlwa ke bana ba batho.”—Die. 8:22, 31.
12, 13. (a) Jesu o ile a ithuta bjang ka go šetša tsela yeo Tatagwe a bego a dirišana le Baisiraele? (b) Jesu o dirišitše bjang tlwaetšo yeo a e hweditšego?
12 Tlwaetšo yeo Morwa a e hweditšego e be e akaretša gape le go šetša tsela yeo ka yona Tatagwe a bego a swaragana le maemo a thata. Ka mohlala, ela hloko ditirišano tša Jehofa le Baisiraele bao ba sa kwego. Nehemia 9:28 e re: “Ya re xe ba khutšišitšwe, ba buša ba Xo senyetša [Jehofa]; ’me Wa ba lahlêla matsoxong a manaba a bôná. Ya na ya re xe ba sokoloxa bà hlaboša mantšu bà Xo bitša, Wa ba kwa Ò le xodimong, Wa ba hlakodiša ka mabobo a maxolo ka mabaka a mantši.” Ka go šoma le Jehofa le go mo šetša, Jesu o ile a hlagolela kwelobohloko e swanago ka batho bao a bego a phela le bona.—Joh. 5:19.
13 Jesu o ile a diriša tlwaetšo ye ge a be a dutše a dirišana le barutiwa ba gagwe ka kwelobohloko. Bošegong bja pele ga ge a ka hwa, baapostola ka moka bao a bego a tloga a ba rata ba ile “ba mo tlogela ba tšhaba.” (Mat. 26:56; Joh. 13:1) Moapostola Petro o ile a ba a latola Kriste ka makga a mararo! Lega go le bjalo, Jesu o ile a tlogela sebaka se bulegetše baapostola ba gagwe gore ba boele go yena. O boditše Petro gore: “Ke go lopetše gore tumelo ya gago e se ke ya fela; gomme wena, ge o šetše o boile o matlafatše bana beno.” (Luka 22:32) Isiraele ya moya e ile ya hlongwa ka katlego go “baapostola le baporofeta,” gomme mafsika a motheo a leboto la Jerusalema e Mpsha a na le maina a baapostola ba botegago ba 12 ba Kwana, Jesu Kriste. Go fihla le lehono, Bakriste ba tloditšwego gotee le bagwera ba bona bao ba ineetšego, e lego “dinku tše dingwe,” ba tšwela pele e le mokgatlo wa go tsebatša ka Mmušo ka tlase ga seatla se matla sa Modimo le boetapeleng bja Morwa wa gagwe yo a rategago.—Baef. 2:20; Joh. 10:16; Kut. 21:14.
Kamoo Jesu a Bego a Ruta ka Gona
14, 15. Tsela ya Jesu ya go ruta e be e fapana le ya bamangwalo le Bafarisei ka ditsela dife?
14 Jesu o ile a diriša tlwaetšo ya gagwe bjang ge a be a ruta balatedi ba gagwe? Ge re bapiša tsela ya Jesu ya go ruta le ya baetapele ba bodumedi ba Bajuda, re bona gabotse gore tsela ya Jesu ya go ruta e be e le ya maemo a godimo. Bamangwalo le Bafarisei ‘ba dirile lentšu la Modimo lefeela ka tlwaelo ya bona.’ Ka mo go fapanego, seo Jesu a bego a se bolela se be se sa tšwe go yena; o be a kgomarela lentšu la Modimo, goba molaetša. (Mat. 15:6; Joh. 14:10) Le rena re swanetše go dira bjalo.
15 Go na le selo se sengwe gape seo se dirilego gore Jesu e be yo a fapanego kudu le baetapele ba bodumedi. O boletše mabapi le bamangwalo le Bafarisei gore: “Dilo ka moka tše ba le botšago tšona le di dire gomme le di boloke, eupša le se ke la dira go ya ka ditiro tša bona, gobane ba a bolela fela ga ba dire.” (Mat. 23:3) Jesu o be a dira seo a bego a se ruta. Anke re ahla-ahleng mohlala wo o hlatselago gore se ke therešo.
16. Ke ka baka la’ng o ka bolela gore Jesu o be a phela ka go dumelelana le mantšu a gagwe ao a begilwego go Mateo 6:19-21?
16 Jesu o kgothaleditše barutiwa ba gagwe go “ipolokela . . . mahumo legodimong.” (Bala Mateo 6:19-21.) Na Jesu ka boyena o be a phela ka go dumelelana le keletšo yeo? Ee, ka gobane o be a ka bolela therešo mabapi le yena ka noši gore: “Diphukubje di na le matšaba le dinonyana tša legodimo di na le dihlaga, eupša Morwa wa motho ga a na mo a ka latšago hlogo ya gagwe gona.” (Luka 9:58) Jesu o be a phela bophelo bjo bonolo. O be a swaregile kudu ka go tsebatša ditaba tše dibotse tša Mmušo, gomme o ile a bonagatša seo se bolelwago ke go se be le dipelaelo tšeo di tlišwago ke go ipolokela mahumo lefaseng. Jesu o bontšhitše kamoo go lego kaone ka gona go ipolokela mahumo legodimong, “moo tshwele le ge e le ruse di sa jego, le moo mahodu a sa thubego a utswa.” Na o latela keletšo ya Jesu ya mabapi le go ipolokela mahumo legodimong?
Dika Tšeo di Bego di Dira Gore Jesu a Ratwe ke Batho
17. Ke dika dife tšeo di dirilego gore Jesu e be moebangedi yo a kgethegilego?
17 Ke dika dife tšeo di bego di dira gore Jesu e be moebangedi yo a kgethegilego? Se sengwe e be e le boemo bja gagwe bja kgopolo mabapi le batho bao a bego a ba thuša. Boikokobetšo, lerato le kwelobohloko di be di le gare ga dika tše dibotse tša Jehofa tšeo Jesu a di bonagaditšego. Ela hloko kamoo dika tše di dirilego gore Jesu a kgahle ba bantši ka gona.
18. Ke ka baka la’ng go ka thwe Jesu o be a ikokobeditše?
18 Ka ge a be a amogetše kabelo ya gore a tle lefaseng, Jesu “o ile a itlhohlora a ba ka sebopego sa mohlanka a swana le batho.” (Bafil. 2:7) Yeo e be e le pontšho ya boikokobetšo. Go feta moo, Jesu o be a sa tšeele batho fase. O be a se na boemo bja kgopolo bja gore, ‘Ke tšwa legodimong, ka gona le swanetše go ntheetša.’ Ka go se swane le bo-mesia ba maaka ba mma-ka-ipea, Jesu o be a sa letše phalafala mabapi le boemo bja gagwe bjalo ka Mesia wa kgonthe. Ka dinako tše dingwe o be a botša batho gore ba se ke ba botša ba bangwe gore ke yena mang goba gore o dirile eng. (Mat. 12:15-21) Jesu o be a nyaka gore batho ba itirele phetho ya go mo latela motheong wa seo bona ka noši ba se bonego. Barutiwa ba gagwe ba be ba šegofaditšwe e le ruri gore Morena wa bona o be a se a lebelela gore ba be bjalo ka barongwa bao ba phethagetšego bao a bego a tlwaelane le bona legodimong!
19, 20. Lerato le kwelobohloko di tutueleditše Jesu bjang go thuša batho?
19 Jesu Kriste le yena o bontšhitše lerato—seka se segolo sa Tatagwe wa legodimong. (1 Joh. 4:8) Jesu o be a tutuetšwa ke lerato go ruta batheetši ba gagwe. Ka mohlala, ela hloko tsela yeo a bego a ikwa ka yona ka mmuši yo mongwe wa lesogana. (Bala Mareka 10:17-22.) Jesu o ile “a kwa a mo rata” e bile a nyaka go mo thuša, eupša mmuši wa lesogana ga se a ka a tlogela dilo tše dintši tšeo a bego a e-na le tšona gore a tle a be molatedi wa Kriste.
20 Se sengwe sa dika tše di rategago tša Jesu e be e le kwelobohloko. Ka go swana le batho ka moka bao ba sa phethagalago, bao ba ilego ba arabela thutong ya gagwe ba be ba imelwa ke mathata. Ka ge a be a lemoga se, Jesu o ile a ba ruta ka kwelobohloko le lešoko. Ka mohlala: Lebakeng le lengwe, Jesu le baapostola ba gagwe ba be ba swaregile kudu moo e lego gore ba be ba se na le nako ya go ja. Lega go le bjalo, Jesu o ile a arabela bjang ge a be a bona lešaba le kgobokane? “A le šokela, gobane le be le le bjalo ka dinku tše di se nago modiši. A thoma go le ruta dilo tše dintši.” (Mar. 6:34) Jesu o ile a lemoga go šokiša ga batho ba lefelong leo a bego a le go lona gomme a ikgafa ka go ba ruta le go dira mehlolo bakeng sa go ba hola. Ba bangwe ba ile ba kgahlwa ke dika tša gagwe tše dibotse, ba kgongwa ke mantšu a gagwe gomme ba ba barutiwa ba gagwe.
21. Ke’ng seo re tlago go se ahla-ahla sehlogong se se latelago?
21 Go na le mo gontši kudu moo re ka ithutago gona mabapi le bodiredi bja Jesu bja lefaseng, go etša ge sehlogo se se latelago se tla bontšha. Ke ditsela dife tše dingwe tšeo ka tšona re ka ekišago Jesu Kriste, Moromiwa yo Mogolo kudu?
O be o tla Araba Bjang?
• Jesu o hweditše tlwaetšo efe pele ga ge a ka tla lefaseng?
• Ke bjang tsela ya Jesu ya go ruta e bego e phala ya bamangwalo le Bafarisei?
• Ke dika dife tšeo di bego di dira gore batho ba rate Jesu?
[Dipotšišo tša Thuto]
[Seswantšho go letlakala 15]
Jesu o rutile mašaba bjang?