Mehla ya Bofelo​—Ke Moka go tla Direga’ng ka Morago?

BATHO ba bangwe ba a tšhoga ge ba nagana ka ‘mehla ya bofelo.’ (2 Timotheo 3:1) Seo ba naganago ka sona ke dinako tše di hlobaetšago. Ka gona, ke ka baka la’ng batho ba bantši go theoša le nywaga ba be ba fagahletše dinako tše? Ka gobane mehla ya bofelo e bontšha gape gore go na le mehla e kaone yeo e sa tlago.

Ka mohlala, mohlomphegi Isaac Newton o be a kgodišegile gore mehla ya bofelo e be e tla feleletša ka ngwaga o mofsa wa khutšo le katlego tša lefase ka bophara ka tlase ga Pušo ya Nywaga e Sekete ya Mmušo wa Modimo. O boletše gore boporofeta bja Mika 4:3 gotee le bja Jesaya 2:4, bo tla phethagala ka nako yeo, ge bo bolela gore: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”

Ge Jesu a be a bolela ka mehla ya bofelo, o ile a tutueletša balatedi ba gagwe go ba le pono e nepagetšego. Ka morago ga go bolela ka mathata, dipelaelo le poifo yeo e bego e tla ba gona nakong ya masetla-pelo a magolo, o itše: “Ge dilo tše di thoma go direga, gona le inamologe le emišetše dihlogo tša lena godimo, gobane topollo ya lena e a batamela.” (Luka 21:28) Go lopollwa go eng?

Seo Modimo a se Holofetšago

Dintwa, dintwa tša selegae, bosenyi, bošoro le tlala ke dilo tše mmalwa gare ga tšeo di tshwenyago batho lehono gomme di dira gore batho ba bantši ba phele ka poifo. Na o ile wa kgongwa ke selo le ge e le sefe sa dilo tše? Ka gona ela hloko seo Modimo a se holofetšago:

“Xo se xokae e mobe ó tlo ba a ile . . . Ba bolêta e tlo ba bôná beng ba naxa; ba tlo thaba ka botlalô bya moláô.”—Psalme 37:10, 11.

“Sethšaba sa-ka se tlo dula maxaeng a moláô, nywakong e bôtêxaxo madulong a xo iketla.”—Jesaya 32:18.

“Mo-fediša-dintwa xo fihla mafelong a lefase, Mo-rôbaka-mará, Mo-thokxamarumô, Mo-thšuma-dikôtsê-ka-mollô!”—Psalme 46:9.

“Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.”—Mika 4:4.

“Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Psalme 72:16.

“Xe e le eo a kwaxo nna, ó tlo dula a iketla, ó ikaxêla à sa šie kotsi.”—Diema 1:33.

 Gaešita le ge re dula moo maemo a bophelo a bonagalago a kgahliša, ka moka ga rena re lebeletšane le bolwetši le lehu. Dilo tše le tšona di tla ba di se gona lefaseng le lefsa la Modimo. Ka gona, re ka lebelela pele go tlo bona baratiwa ba rena gape bao ba hwilego. Ela hloko se se latelago:

“Mo xo ba ba axilexo fá xo ka se bê le e a rexo: Ke a babya!”—Jesaya 33:24.

“[Modimo] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

“Lehu le tla fedišwa e le lenaba la mafelelo.”—1 Bakorinthe 15:26.

“Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Jesu] gomme ba tšwa.”—Johane 5:28, 29.

Moapostola Petro o akareditše dilo tše ka moka gabotse ge a be a ngwala gore: “Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” (2 Petro 3:13) E le gore go be le toko lefaseng ka bophara, go tla nyakega gore go fedišwe motho le ge e le ofe yo a tlago go šitiša boemo bjoo. Go tla nyakega gore go fedišwe le ditšhaba tše di lego gona lehono, tšeo di bakago dikgohlano le tšhollo ya madi ka go etiša dikgahlego tša tšona pele ka boithati. Mebušo ka moka ya lefase e tla tšeelwa legato ke pušo ya Mmušo wa Modimo ka tlase ga Kriste. Re kgonthišetšwa mabapi le pušo yeo gore: “Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe, ké wa xo tlo tia, le wa xo thêkxwa ka molaò le ka tokô, byale le mehleng ya neng le neng. Tšeo di tlo dirwa ke xo pelofala xa Morèna wa mašaba.”—Jesaya 9:6.

O ka thabela ditebelelo tše, ka gobane Beibele e re kgonthišetša gore: ‘Thato ya Modimo ke gore mehuta yohle ya batho e phološwe gomme e fihle tsebong e nepagetšego ya therešo.’ (1 Timotheo 2:4) O se ke wa dika-dika. Hwetša tsebo yeo e bolelago bophelo bjo bo sa felego. (Johane 17:3) Thoma ka go ikgokaganya le bagatiši ba makasine wo gomme o kgopele thuto e sa lefelelwego ya legae ya Beibele.

[Diswantšho go letlakala 24, 25]

O ka fagahlela go tlo phela ka mo go sa felego ka khutšo o phethagetše mmeleng Paradeiseng e tlago mo lefaseng