Mehla ya Bofelo​—Bofelo bja Eng?

PAPADING ya kgwele ya maoto, ge mogaši wa papadi a re: “Ke nako ya dikgobalo,” seo se bolela gore papadi e ka fela ka nako le ge e le efe gomme go tla tsebatšwa sehlopha seo se fentšego, ke moka babogedi ba tla phatlalala. Eupša go thwe’ng ge e ba motho yo mongwe a re, “Re phela mehleng ya bofelo”? Seo se bolela’ng?

Dipolelwana ‘mehla ya bofelo’ le “lebaka la bofêlô” di be di dutše di dirišwa ka nako e telele. (2 Timotheo 3:1; Daniele 12:4) Nywageng ya ka godimo ga e 2 500 e fetilego, moporofeta Daniele o ile a bontšhwa dipono tša mebušo ya lefase le dintwa tšeo di bego di tla ba gona gare ga yona go fihla “lebakeng la bofêlô.” O ile a botšwa gore tlhaloso ya dipono tše e be e tla tsebja ka nako yeo. (Daniele 8:17, 19; 11:35, 40; 12:9) Le gona Daniele o ngwadile gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

Jesu Kriste o boletše ka “bofelo” ge a be a araba potšišo ya mabapi le “pontšho ya go ba gona ga [gagwe] le ya bofelo bja tshepedišo ya dilo.” (Mateo 24:3-42) Go bonala Daniele le Jesu ba be ba bolela ka nako ya makgaola-kgang—phetogo e kgolo yeo e bego e tla kgoma batho bao ba phelago le bao ba kilego ba phela lefaseng. Daniele o ngwadile ka go fedišwa ga mebušo ka moka ya lefase. Jesu o boletše ka “bofelo bja tshepedišo ya dilo.”

Na o swanetše go kgomega ka se? Ee. Batho ka moka ba swanetše go kgomega, ka ge ka moka ga rena re akaretšwa. Lega go le bjalo, ba bantši ba tšea taba ye gabohwefo. Beibele e boletše e sa le pele gore: “Mehleng ya bofelo go tla tla bakweri ka dikwero tša bona, ba yago ka dikganyogo tša bona ba re: ‘Go ba gona mo ga gagwe mo go holofeditšwego go kae? Ruri, ga e sa le go tloga letšatšing leo bo-rakgolokhukhu ba rena ba robetšego ka lona lehung, dilo tšohle di tšwela pele gabotse-botse go etša mathomong a tlholo.’” (2 Petro 3:3, 4) Ee, ba bangwe lehono ba nagana gore seo se diragetšego nakong e fetilego se tla direga gape le gore bophelo bo tla fo tšwela pele ka mo go sa felego ka tsela yeo re bo tsebago ka yona.

Na go na le bohlatse le ge e le bofe bjo bo bontšhago gore re phela nakong yeo Beibele e e bitšago gore ke mehla ya bofelo e le ka kgonthe? Anke re boneng.