Ge go Tshwenyega ka Ponagalo go Fetoga Sehlobaetši

BONTŠI bja rena ge re itebelela seiponeng, re bona dikarolo tšeo re ikwago eka di be di ka kaonefatšwa. Ka gona re beakanya diaparo tša rena lefsa gotee le go ikama gape goba go tlola ditlolo tša go ikgabiša ke moka ra tšwela pele ka mešomo ya rena ya letšatši. Go tshwenyega mo go bjalo ka ponagalo ya rena ke ga tlhago le mo go swanetšego. Eupša batho ba bangwe ba tshwenyega ka mo go feteletšego ka ponagalo ya bona, gomme se se tšweletša boemo bjoo dingaka di bo tšeago e le bolwetši (bjoo bo bitšwago body dysmorphic disorder goba BDD).

The Merck Manual of Diagnosis and Therapy e hlalosa BDD e le “go tshwenyega mo go feteletšego ka gore motho o na le bosodi ponagalong ya gagwe mo go bakago kgateletšego e kgolo goba mo go šitišanago le mediro ya tša leago, mošomo goba mahlakore a mangwe a bohlokwa bophelong.” * Ka ge batho bao ba nago le boemo bjo ba ka akanya gore ba na le bosodi bjo itšego goba ba godiša phošo e nyenyane ka mo go feteletšego, tsela yeo ba itebelelago ka yona le yona e ile ya bitšwa bokobo bjo bo akanywago.

Moprofesara J. Kevin Thompson wa Yunibesithi ya Florida Borwa kua United States o bolela gore mohlomongwe BDD e hwetšwa ka sewelo, e bile “mohlomongwe e kgoma tekanyo ya magareng ga 1.0-2.0% ya baagi ka kakaretšo le 10-15% ya bao ba swerwego ke malwetši a monagano gomme ba alafša ba sa robale sepetlele.” Lega go le bjalo, o oketša ka gore: “Banyakišiši ba bangwe ba dumela gore palo ya balwetši ba e a oketšega, ka ge mekgwa ya go hlahloba e kaonefala tabeng ya go lemoga bothata gotee le tabeng ya ge batho ba thoma go tshwenyega kudu ka tsela e hlobaetšago ka ponagalo.” Gaešita le ge boemo bjo bo ka kgoma batho ba nywaga ka moka, gantši bo thoma go bao ba lego nywageng ya mahlalagadi. Ge e le ka batho ba bagolo, go bonagala bo kgoma banna le basadi ka go lekana. Se se fapane kudu le mathata a go ja, ao a tlwaelegilego kudu gare ga basadi.

Go tshwenyega ka ponagalo ka mo go feteletšego mo go gobatšago le mo go tlwaelegilego bathong bao ba nago le BDD gantši go lebiša go itlhahlobeng  seiponeng ka tsela e feteletšego e sa laolegego, le gona mabakeng a mangwe go lebiša tabeng ya go ipea lekatana. Merck Manual e bolela gore se sebe le go feta, “kgateletšego le go šitišwa bophelong mo go sepedišanago le bolwetši bjo go ka dira gore motho a robale sepetlele gantši gotee le go itshwara ka tsela ya go nyaka go ipolaya.” Ga go makatše gore ba bangwe bao ba lego boemong bjo ba tsoma go kaonefatša ponagalo ka go buiwa. Dr. Katharine Phillips yo a ngwadilego puku ye e bolelago ka BDD o re: “Gantši ga nke ke kgothaletša seo.” O hlalosa gore: “Go buiwa ga go lokišege, gomme batho ba bantši bao ba nago le BDD ka morago ga go buiwa, gantši ba nagana gore ga se gwa ba šomela le gatee.” *

Ka dinako tše dingwe, BDD e bonagala motho e sa le yo monyenyane kudu. George Street Journal * e bega ka mošemanyana wa nywaga e tshela “yo a bego a dumela gore meno a gagwe ke a maserolwana, o ‘nonne’ dimpa le gore moriri wa gagwe o be o sa kamege. Ga go le bjo tee bja ‘bosodi’ bja gagwe bjo bjoo bo bego bo bonwa ke batho. O be a kama moriri wa gagwe ka poratšhe lebaka la mo e nyakilego go ba iri mesong e mengwe le e mengwe, gomme ge a be a sa kgone go o dira gore o lebelelege ka tsela e ‘swanetšego,’ o be a hloma hlogo ka meetseng gomme a thomološa fase go o kama, e lego seo gantši se bego se mo dira gore a šalele sekolong.” Ka letšatši le lengwe ge a fihla ofising ya ngaka, o ile a ba a inama gore a ipone tšhiping e phadimago ya setulo.

O se ke wa Dumelela Lefase le Laola Kgopolo ya Gago

Dipapatšo tša dimakasine tša pampiri e phadimago, dikuranta le thelebišene di kgobelela batho ka diswantšho tša leemo le lebotse. Tsela yeo babapatši ba beago ditaba ka yona ke e bonolo e rego: Tšweletša leemo le itšego e le lona leo le swanetšego, ke moo batho ba tla kgaoganago le tšhelete ya bona yeo ba e šometšego ka thata bakeng sa gore ba fihlelele ponagalo yeo. Se se ka tlaleletšago go seo e ka ba kgateletšo ya dithaka yeo mohlomongwe e sepedišanago le dipolelo tša go se naganele tša ba lapa le bagwera, gomme ga se mo go makatšago gore batho ba bangwe ba thoma go se be le pono e tsepamego mabapi le ponagalo ya bona. * Ke therešo gore pono e sa tsepamago e ka ba yeo e fapanego kudu le tšharakano e hlobaetšago ya monagano.

Ga se ga tlhago e bile ga se therešo go nagana gore ge o se botsana goba o sa lebelelege, ba bangwe ba ka se bontšhe kgahlego go wena. Gantši batho ga ba kgethe bagwera go ya ka ponagalo ya bona. Ke therešo gore ponagalo e ka ba e le selo se se bonwago pele, eupša semelo, ditekanyetšo tša boitshwaro le melao ke tšona tlemo ya kgonthe ya segwera. Yo mongwe le yo mongwe wa rena o swana le puku ka tsela e itšego—e ka no ba le letlakala la ka ntle leo le gogelago, eupša ge e ba dikagare tša yona di sa kgahliše, babadi ba tla kgaotša ka pela go e bala. Lega go le bjalo, go sa šetšwe letlakala la ka ntle, ge e ba puku e le e kgahlišago, batho ba tla dulela go e bala. Ka gona ke ka baka la’ng o sa lebiše tlhokomelo dikeng tša gago bjalo ka motho? Seo ke se Lentšu la Modimo, Beibele, le go kgothaletšago gore o se dire.—Diema 11:22; Ba-Kolose 3:8; 1 Petro 3:3, 4.

Go bolela therešo, ponagalo ya rena e a fetoga ge re dutše re gola. Ge e ba bophelo, segwera le lethabo di be di ithekgile ka ponagalo e botsana ya bofseng, gona re be re tla ba le bokamoso bjo bo nyamišago gakaakang! Lega go le bjalo, boemo bja rena e ka ba bjo bo fapanego kudu. Seo se kgonega bjang?

Botse Bjoo bo tla Dulelago sa Ruri

Diema 16:31 e re: “Hlôxô-pududu ké ’ala sa bothšephi; se hwetšwa tseleng ya xo loka.” Mahlong a Jehofa Modimo—le mahlong a bohle bao ba nago le pono e swanago le ya gagwe—batho bao ba tšofalelago tirelong ya Modimo ba dula ba kgahliša. Ge e le gabotse, ka baka la pego ya bona ya phišego le boineelo bja bona go Modimo, dihlogo tša bona tše pududu di swantšhwa le go amogela seala. Batho ba bjalo bao ba tšeelwago godimo ba swanelwa ke gore re ba rate le go ba hlompha ka mo go tseneletšego.—Lefitiko 19:32.

Go oketša moo, Jehofa lefaseng la gagwe le lefsa le le tlago leo a le holofeditšego, o tla dirolla mafelelo ao sebe se se abetšwego se bilego le ona go babotegi ba gagwe ka moka, ba ba tšofetšego le ba banyenyane. Ge letšatši le lengwe le le lengwe le feta, ba tla bona le go kwa mebele ya bona e kaonefala go fihlela ge mafelelong ba phethagala ka mo go feletšego mmeleng. (Jobo 33:25; Kutollo 21:3, 4) Seo ke tebelelo a kgahlišago gakaakang! Na o tla rata go ba gare ga bona? Ge e ba go le bjalo, gona katanela go lebiša tlhokomelo botseng bjoo e tlogago e le bja bohlokwa, gomme o se ke wa dumelela kgopolo e sa rego selo le e sehlogo ya lefase e laola kgopolo ya gago. Ka go dira bjalo, o tla ba motho yo a thabilego kudu le yo a kgahlišago kudu.—Diema 31:30.

[Mengwalo ya ka tlase]