Akhucabange ngomma onethando olungisa umsanyanakhe bona aye esikolweni. Uyaqiniseka bona umsanyanakhe lo uhlambile nokuthi izambatho zakhe zihlwengile. Lokhu kwenza bona aphile kuhle begodu kutjengisa nabanye ukuthi ababelethi bakhe bayamtlhogomela, nathi uBabethu onethando uJehova ufuna sihlwengeke emzimbeni nendleleni esiziphatha ngayo. Ukuhlwengeka kusiza thina begodu kudumisa uZimu.

1. Singahlwengeka njani emzimbeni?

UJehova uthi: “Kufuze nicwengeke.” (1 Pitrosi 1:16) Ukucwengeka kuhlobene nokuhlwengeka emzimbeni nangokuziphatha. Singahlwengeka ngokuthi sihlambe qobe begodu sihlanze izambatho zethu, sihlwengise nalapha sihlala khona neenkoloyi zethu. Singasiza nekuhlwengiseni iWolo lethu lomBuso. Nasihlala sihlwengile emzimbeni, sidumisa uJehova.—2 Korinte 6:3, 4.

2. Bona sihlwengeke, ngimiphi imikghwa okufuze siyibalekele?

IBhayibheli lisikhuthaza bona ‘sizihlambulule kikho koke ukusilaphala kwenyama nokommoya.’ (2 Korinte 7:1) Lokhu kutjho bona kufuze sibalekele nanyana yini engalimaza imizimbethu namkha imikhumbulwethu. Esikucabangako kufuze kuthabise uJehova, ngalokho senza koke okusemandlenethu bona silahle imicabango engakalungi. (IRhubo 104:34) Silwela ukusebenzisa ikulumo ehlwengileko.—Funda kwebeKolose 3:8.

Yini enye engasisilaphaza emzimbeni namkha endleleni esiziphatha ngayo? Kunezinto ezingasilaphaza imizimbethu. Nje-ke akukafuzi sibheme igwayi namkha isineyifu namkha sisebenzise iindakamizwa ezingasisemthethweni. Nasigegeda izintwezi sizokuba nepilo ehle begodu sitjengisa nokuthi siyasihlonipha isipho esikuphila. Kufuze silwele ukuhlwengeka ngokokuziphatha ngokulwisana nemikghwa esilapheleko, kuhlanganisa ukuskomora nokubukela iinthombe zomseme ezisilapheleko. (IRhubo 119:37; Efesu 5:5) Kungaba budisi ukuhlula imikghwa le kodwana uJehova angasisiza siyihlule.—Funda u-Isaya 41:13.

 FUNDA NGOKUNGENELELEKO

3. Nasihlwengileko emzimbeni sidumisa uJehova

Nasifunda imithetho uJehova ayinikela ama-Israyeli, sikghona ukubona indlela okuqakatheke ngayo kuye bona sihlwengeke. Funda u-Eksodusi 19:10 no-30:17-19, bese nicoca ngemibuzo le:

• Amavesi la ayiveza njani indlela uJehova aqala ngayo ukuhlwengeka emzimbeni?

• Khuyini ongayenza qobe bona uhlale uhlwengile emzimbeni?

Ukuhlwengeka emzimbeni kutlhoga isikhathi nomzamo. Ukuhlwengeka emzimbeni akuyi ngokuthi sihlala kuphi, sinemali namkha siyazitlhagela. Dlala IVIDIYO, bese nicoca ngombuzo olandelako.

• Kubayini abantu esibatjhumayezako bazokuhlonipha uJehova khudlwana nababona izinto ezisizisebenzisako zihlwengile?

4. Hlula imikghwa emimbi

Nange ubhema iindakamizwa namkha uzisebenzisa ngendlela engakafaneli, uzokwazi ukuthi kubudisi kangangani ukuhlula umukghwa lo. Khuyini engakusiza? Cabanga ngokuthi umukghwa lo ukuthinta njani wena. Funda uMatewu 22:37-39, bese nicoca ngokuthi ukubhema namkha ukusebenzisa iindakamizwa ngendlela engakafaneli kunamuphi umphumela  . . .

• ebudlelwaneni bomuntu noJehova.

• emndenini womuntu nalabo atjhidelene nabo.

Yenza umzamo wokuhlula umukghwa omumbi. a Dlala IVIDIYO.

Funda kwebeFilipi 4:13, bese nicoca ngombuzo lo:

• Ukuthandaza qobe, ukufunda iBhayibheli nokuba khona qobe esifundweni kumupha njani umuntu amandla wokuhlula umukghwa omumbi?

 5. Yilwa nemicabango nemikghwa esilapheleko

Funda kwebeKolose 3:5, bese nicoca ngemibuzo le:

• Sazi njani bona ukubukela iinthombe zomseme ezisilapheleko, ukuthumelelana imilayezo yezomseme nokuskomora kusilaphele kuJehova?

• Ucabanga bona kufanele na ngoJehova ukulindela ukuthi sihlwengeke ngokuziphatha? Kubayini?

Funda ukuthi ungalwisana njani nemicabango esilapheleko. Dlala IVIDIYO.

UJesu wenza umfanekiso ukutjengisa ukuthi kufuze sizimisele ukwenza nanyana yini etlhogekako bona sihlale sihlwengile. Funda uMatewu 5:29, 30, bese nicoca ngombuzo lo:

• UJesu bekangatjho ukuthi kufuze sizilimaze kodwana bekatjho ukuthi kufuze sithathe igadango. Ngisiphi isiqunto umuntu angasithatha bona alise ukuba nemicabango esilapheleko? b

Nange ulwisana nemicabango esilapheleko, uJehova uyakubona okwenzako. Funda iRhubo 103:13, 14, bese nicoca ngombuzo lo:

• Nange ubhalelwa kuhlula umukghwa osilapheleko, umtlolo lo ungakukhuthaza njani bona uragele phambili ulwa?

ISIRHUNYEZO

Ngokuhlwengisa imizimbethu, imikhumbulwethu nendlela esiziphatha ngayo, sithabisa uJehova.

Buyekeza

• Kubayini kuqakathekile ukuhlwengeka?

• Ungahlwengeka njani emzimbeni?

• Khuyini esingayenza bona sihlale sinemicabango ehlwengileko begodu siziphathe ngendlela ehlwengileko?