Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Diciembre de 2014

¿Tikajsikamatij tlen kijtosneki?

¿Tikajsikamatij tlen kijtosneki?

“Jesús okinmajsikamatilti tlan okijtoaya itlajkuilol Dios.” (LUC. 24:45)

1, 2. ¿Ken okinyolchika Jesús imachtijkauan itech tonal ijkuak okiyolitijkej?

ITECH tonal ijkuak okiyolitijkej Jesús, ome imachtijkauan onejnentiayaj itech ojtli tlen oyaya Jerusalén tlen omokauaya uejka kanaj 11 kilómetros. Amo okimatiayaj Jesús okiyolitijkej, uan sapanoa omoyolkokoayaj pampa tlen opanok seki tonalmej achto. Pero, san niman, okinmonextili Jesús uan opejki nejnemi inmiuan uan opejki kinyolseuia. ¿Ken okichi? “Ijkuakó Jesús opé kinmajsikamatiltia itlajkuilol n Moisés iwa n profetas kan tlapoah de Ye.” (Luc. 24:13-15, 27.) ¡Melauak oyolpakej ijkuak okinyekmachti tlen kijtoa iTlajtol toTajtsin Dios! (Luc. 24:32.)

2 Non tiotlak ome imachtijkauan Jesús oyajkej Jerusalén. Ijkuak okinmitakej itlatitlaniluan Jesús okinmiluijkej tlen opanok uan ijkuak okintlapouijtokaj, Jesús okinmonextili nochtin akinmej ompa okatkaj. Itlatitlaniluan Jesús sapanoa omomojtijkej uan amo okineltokayaj kox melauak okatka Jesús akin okintlapouijtoka. Pero Biblia techiluia ken okinyolchika: “Ijkuakó n Jesús okinmajsikamatilti tlan okijtoaya itlajkuilol Dios” (Luc. 24:45).

3. 1) ¿Tlen uelis kichiuas ma timosotlauakan ijkuak titetlapouiaj? 2) ¿Tlen uelis techpaleuis pampa amo ma timosotlauakan?

3 Ualeua uelis timoyolkokoskej ken imachtijkauan Jesús.  Uelis chikauak tiktekichiuiliaj Jehová, pero san niman uelis timosotlauaskej pampa tlaltikpaktlakamej amo techkakij ijkuak tikintlapouiaj (1 Cor. 15:58). Uelis sekimej akinmej tikinmachtiaj ika Biblia uelis amo tikitaj ma moskalti intlaneltokilis, noso uelis techiluiskej ayakmo kinekij momachtiskej. ¿Tlen uelis tikchiuaskej pampa amo ma timosotlauakan ijkuak titetlapouiaj? Tla kuali tikajsikamatij tlen kijtosnekij neskayomej tlen okintekitilti Jesús, non uelis techpaleuis pampa amo ma timosotlauakan. Ma timomachtikan eyi neskayomej uan ma tikitakan tlen techmachtiaj.

AKIN TLATOKA UAN KOCHI

4. ¿Tlen kijtosneki neskayotl itech akin tlatoka uan kochi?

4 (Xiktlajtolti Marcos 4:26-29.) ¿Tlen kijtosneki neskayotl itech akin tlatoka uan kochi? Itech nin neskayotl akin tlatoka kineskayotia sejse akin tetlapouia itech Tekiuajkayotl. Xinachtli kineskayotia tetlapouilistli itech Tekiuajkayotl tlen kikakij tlaltikpaktlakamej akinmej yolkualmej. Akin tlatoka kichiua miak tlamantli, ‘kochi nochi yoali uan meua kualkan’. Uan noijki ijkuak ye tlatoka pampa uelis tlamochiuas moneki panos seki kauitl, itech nochi nin kauitl xinachtli “kisentoka moskaltijti” san ye iselti, ajachitsin uan achto seki tlamantli uan satepan okseki. Noijki ijkon ika totlaneltokilis, ajachitsin moskaltia uan achto mota itech se tlamantli uan satepan itech okseki tlamantli. Ijkuak ikaj mochikaua itlaneltokilis uan kijtoa kineki motemakas pampa kitekichiuilis toTajtsin Dios, kitemaka tlakilotl ijkuak motemaka iixpan Jehová uan moapolaktia.

5. ¿Tleka Jesús okijto neskayotl itech akin tlatoka uan kochi?

5 ¿Tleka Jesús okitekitilti nin neskayotl? Pampa tikajsikamatiskej, Jehová akin kichiua ma mochikaua intlaneltokilis tlaltikpaktlakamej yolkualmej uan akinmej kuali kiseliaj tetlapouilistli (Hech. 13:48; 1 Cor. 3:7). Tejuan titlatokaj uan titlatekij, pero amo uelis tikchiuaskej ma moskalti totoka. Ijkon ken tlakatl tlen okijto Jesús itech neskayotl, tejuan amo tikmatij ken moskaltia. Miak uelta moskaltia uan amo tikitaj, pampa tikchiuaj totekij. Pero, seki kauitl satepan xinachtli itech Tekiuajkayotl uelis kitemakas tlakilotl: se yankuik tokni tlen uelis techpaleuis itech toteki (Juan 4:36-38).

6. ¿Tlen moneki tikajsikamatiskej itech intlaneltokilis akinmej tikinmachtiaj?

6 ¿Tlen techmachtia nin neskayotl? Achto techmachtia tejuan amo uelis tikijtoskej ken tiknekij ma mochikaua itlaneltokilis akin tikmachtiaj ika Biblia. Tikmatiskej tlen uelis tikchiuaskej techpaleuis pampa amo tikinchiualtiskej akinmej tikinmachtiaj ma moapolaktikan. Timochijchikauaj pampa tikpaleuiskej, pero ye kipejpenas kox motemakas iixpan toTajtsin Dios. Motemakas ijkuak ika nochi iyolo kiteititis kitlasojtla toTajtsin Dios (Sal. 51:12; 54:6; 110:3).

7, 8. 1) ¿Tlen okseki tlamantli techmachtia neskayotl itech akin tlatoka uan kochi? Xikijto se neskayotl. 2) ¿Tlen techmachtia nin neskayotl itech Jehová uan Jesús?

7 Ome, tikajsikamatiskej tlen techmachtia nin neskayotl techpaleuia pampa amo ma timosotlauakan tla tikitaj akinmej tikinmachtiaj amo mochikaua intlaneltokilis. Amo moneki timosotlauaskej (Sant. 5:7, 8). Tla sapanoa yotimochijchikajkej pero xinachtli amo kitemaka tlakilotl, nin amo kijtosneki amo kuali titlamachtiaj. Jehová san kichiua ma moskalti xinachtli itech inyolo akinmej yolyamankej uan tlen kinekij kipatlaskej innemilis  (Mat. 13:23). Ik non, amo moneki timokuayejyekoskej motas kox kuali titetlapouiaj noso amo ijkuak miakej mochiuaskej tokniuan. Jehová amo techixkomaka pampa ken tikinpaleuiaj tlaltikpaktlakamej, okachi kuali ye kichiua pampa kox melauak tiktekichiuiliaj uan amo tikkauaj (xiktlajtolti Lucas 10:17-20 uan 1 Corintios 3:8).

8 Eyi, amo nochipa tikitaj ken kipatlaj innemilis tlaltikpaktlakamej. Se neskayotl, se misionero okinmachtiaya se tlakatl uan isiua, ijkuak yejuan okiluijkej tokni okinekiayaj tetlapouiskej ye okinmilui omonekiaya ayakmo tlachichinaskej. Sapanoa omotlajtlachialti ijkuak okiluijkej yokipiaya miakej metstli ayakmo okichiuayaj. ¿Tleka okikajkej? Omomachtijkej Jehová amo kipaktia akinmej kipiaj ome inmixko uan ye uelis kinmitaskia tla otlachichinayaj. Ik non, yejuan omonekiaya kipejpenaskej tlen kichiuaskej: tlachichinaskiaj iixpan tokni noso ayakmo tlachichinaskiaj. Tlasojtlalistli tlen opejkej kipialiaj Jehová okichi ma kinekikan kichiuaskej tlen kuali. Maski misionero amo okitak, omoskalti intlaneltokilis.

SE MICHAYATL

9. ¿Tlen kijtosneki neskayotl itech michayatl?

9 (Xiktlajtolti Mateo 13:47-50.) ¿Tlen kijtosneki neskayotl itech michayatl? Jesús okineskayoti ijkuak tikkajkauaj se michayatl itech aueyatl ken ijkuak tikintlapouiaj nochtin tlaltikpaktlakamej itech Tekiuajkayotl. Ijkon ken se michayatl kinkitskia miakej michimej tlen tlatlamantli, tetlapouilistli kinyoltilana miakej tlatlamantli tlaltikpaktlakamej (Is. 60:5). Sejse xiuitl itech ueyi nechikolmej uan ijkuak tikilnamikij iCena toTeko techititia ken melauak ijkon. Sekimej akinmej kineskayotiaj michimej yolkualmej, ik non, satepan mochiuaj tokniuan. Pero oksekimej amo okachi yolkualmej, uan Jehová amo kinselia.

Ijkuak tiktlajtoltiskej Mateo 13:47-50. . .

10. ¿Tleka Jesús okitekitilti neskayotl itech michayatl?

10 ¿Tleka Jesús okitekitilti nin neskayotl? Ijkuak kinxexeloaj michimej tlen moijtoa itech neskayotl, amo kijtosneki tonal keman kipojpoloskej nochi tlen amo kuali, nin kijtosneki tlen panoa itech itlamian tonalmej. Jesús okijto amo nochtin tlen kinpaktia tlen melauak kiseliaj Jehová. Miakej monechikoaj touan uan noijki tikinmachtiaj ika Biblia, pero amo kinekij motemakaskej iixpan Jehová (1 Rey. 18:21). Oksekimej ayakmo monechikoaj touan. Noijki sekimej telpokamej okinmachtijkej itlanauatiluan Jehová, pero amo kitlasojtlaj Jehová. Maski san tlen panos, Jesús okijto sejse moneki kipejpenas tlen kichiuas. Akinmej kipejpenaskej kichiuaskej tlen kuali yetoskej itech nochi tlamantli tlen ipati tlen onka itech Tlaltikpak (Ageo 2:7; nota).

. . . ma timokuayejyekokan ken mochiua axkan

11, 12. 1) ¿Ken techpaleuia neskayotl itech michayatl? 2) ¿Tlen techmachtia nin neskayotl itech Jehová uan Jesús?

11 ¿Ken techpaleuia neskayotl itech michayatl? Tikajsikamatiskej tlen techmachtia nin neskayotl, techpaleuis pampa amo okachi ma timotekipachokan nion ma timoyolkokokan tla akin tikmachtiaj noso se tokone amo kiselia tlen melauak. Non se tlamantli tlen tejuan amo uelis tikchiuaskej, maski sapanoa timochijchikauaskej. Amo uelis mouikas iuan Jehová san pampa opejki momachtia Biblia noso san pampa itatajuan okimachtijkej tlen melauak. Pampa Jehová kinkixtis itech ialtepe akinmej amo kinekij kiseliskej iTekiuajkayo.

Sekimej tlen kinekij kimatiskej tlen melauak motokiskej itech Jehová (Xikinmita párrafos 9 a 12)

 12 ¿Kijtosneki nin akinmej omoxelojkej itech ialtepe Jehová ayakmo kinkauiliskej ma mokuepakan? Noso tla ikaj ayamo moapolaktia, ¿kijtosneki amo yolkuali? Amo. Yejuan uelis mokuepaskej keman kinekiskej, tla ayamo kipojpoloa nochi tlen amo kuali. Nin ken tla Jehová kinmiluiskia: “Nouan ximokuepakan, uan ne namouan nimokuepas” (Mal. 3:7). Jesús noijki okijto nin tlamantli ika okse neskayotl, itech telpochtli non okauilti itomin (xiktlajtolti Lucas 15:11-32).

TELPOCHTLI NON OKAUILTI ITOMIN

13. ¿Tlen kijtosneki neskayotl itech telpochtli non okauilti itomin?

13 ¿Tlen kijtosneki neskayotl itech telpochtli non okauilti itomin? Itech nin neskayotl teta akin tetlasojtla ye toTajtsin Jehová. Telpochtli tlen okitlajtlanki tlen kimakaskiaj uan san okauilti itomin, nin kineskayotia akinmej moxeloaj itech ialtepe Jehová. Ijkuak ijkon kichiuaj ken yaskiaj uejka, itech tlen kiyekantok Satanás uan tlen kajki uejka itech Jehová (Efes. 4:18; Col. 1:21). Pero seki kauitl satepan, sekimej kuali mokuayejyekoaj uan mochijchikauaj oksepa mokuepaskej itech ialtepe Jehová. Ye kintlapojpoluia, pampa yolyamankej uan moyolkuepaj (Is. 44:22; 1 Ped. 2:25).

14. ¿Tleka Jesús okitekitilti neskayotl itech telpochtli non okauilti itomin?

14 ¿Tleka Jesús okitekitilti nin neskayotl? Pampa techititis ika miak tlasojtlalistli ken Jehová kineki akinmej omoxelojkej itech ma mokuepakan. Itech neskayotl, teta kichia ikone ma mokuepa. Ijkuak okitak oualaya uan maski ok uejka, san niman omotlalo pampa kinamikiti. Nin neskayotl sapanoa kinpaleuis akinmej omoxelojkej itech Jehová san niman ma mokuepakan. Uelis moyolkokoaj noso pinauaj uan uelis kitaskej sapanoa oui mokuepaskej itech ialtepe Jehová. Pero miak ipati ma mochijchikauakan, pampa ijkuak mokuepaskej noijki ángeles yolpakiskej (Luc. 15:7).

15, 16. 1) ¿Tlen techmachtia neskayotl itech telpochtli non okauilti itomin? Xikinmijto seki neskayomej. 2) ¿Tlen techmachtia nin neskayotl itech Jehová uan Jesús?

15 ¿Ken techpaleuia nin neskayotl? Techpaleuia pampa ma tikchiuakan ken Jehová. Amo tiknekij timomachiliskej sapanoa tiyolmelauakej uan amo tikinseliskej akinmej otlajtlakolchijkej  uan omoyolkuepkej. Tla ijkon tikchiuaj, ayakmo yetos chikauak totlaneltokilis (Ecl. 7:16). Noijki techmachtia akin omoxelo itech Jehová moneki tikitaskej ken se ichkatsin non opoliuik uan amo ken ikaj akin ayakmo uelis moyektlalis (Sal. 119:176). Tla tikajsij ikaj akin omoxelo itech ialtepe Jehová pero amo okikixtijkej, ¿tikpaleuiskej ika tlasojtlalistli pampa ma mokuepa? ¿San niman tikinmiluiskej tokniuan tlayekankej pampa noijki ma kipaleuikan? Tikinmiluiskej tla tiknekij tikchiuaskej ijkon ken neskayotl tlen techmachtia Jesús ika telpochtli non okauilti itomin.

16 Sekimej telpokamej ken neskayotl tlen otimomachtijkej kitlasojkamatiliaj Jehová pampa kintlasojtla uan noijki pampa tlanechikol ika miak tlasojtlalistli kinpaleuia. Se tokni tlen okikixtijkej itech tlanechikol uan tlen ouejka veinticinco xiuitl okijto: “Tonal ijkuak oksepa onechselijkej oniyolpakik miak pampa onikmachili ken Jehová kuali onechseli (Hech. 3:19). Nochtin onechpaleuijkej uan nochtin kiteititiaj melauak nechtlasojtlaj. Axkan nikpia se kuali kalchanejke espiritual”. Se ichpochtli tlen omoxelo itech Jehová kanaj makuili xiuitl okijto: “Amo nikmati ken nikijtos ken sapanoa onechtlasojtlajkej ijkon ken okijto Jesús. Niyetos itech ialtepe Jehová sapanoa miak ipati”.

17, 18. 1) ¿Tlen techmachtiaj eyi neskayomej tlen axkan otimomachtijkej? 2) ¿Tlen moneki tikchiuaskej?

17 ¿Tlen techmachtiaj ninmej neskayomej? Achto, tejuan amo uelis tikijtoskej ken tiknekij ikaj ma mochikaua itlaneltokilis. Nin san kijtos Jehová. Ome, amo tikchiaskej nochtin akinmej monechikoaj touan noso tikinmachtiaj ma kichiuakan tlen melauak. Saiktlami, moneki titlaneltokaskej akinmej omoxelojkej itech Jehová uelis mokuepaskej itech tlen melauak. Uan tla mokuepaj, moneki tikinseliskej ken Jehová kinselia.

18 Sejse tejuan ma kitemo tlamatilistli, ajsikamatilistli uan ixtlamatilistli. Ijkuak tikintlajtoltiskej neskayomej tlen okinmijto Jesús, ma timotlajtlanikan tlen kijtosnekij, tleka ijkuilitokej itech Biblia, ken uelis techpaleuiskej, tlen techmachtiaj uan tlen techmachtiaj itech Jehová uan Jesús. Ijkon kuali tikajsikamatiskej tlen okijto ueyi Tlamachti Jesús.