Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Diciembre de 2014

 TLAMACHTIL TLEN IKA PEUA | UELIS TIMOUIKAS IUAN TOTAJTSIN DIOS

¿Kuali timouika iuan toTajtsin Dios?

¿Kuali timouika iuan toTajtsin Dios?

“Kuali timouikas iuan toTajtsin Dios kichiua kuali xiyeto. Tikmachilia nochipa kinektok mitspaleuis uan kineki kuali xiyeto.” (CHRISTOPHER, SE TELPOCHTLI TLEN CHANTI ITECH ALTEPETL GHANA)

“ToTajtsin Dios mitsita ijkuak timoyolkokoa, uan sapanoa mitstlasojtla ken amo otimokuayejyekoaya.” (HANNAH, SE TAKOTSIN TLEN KIPIA 13 XIUITL UAN TLEN CHANTI ITECH ALTEPETL ESTADOS UNIDOS)

“Nikmatis toTajtsin Dios nechita ken iyolikni kichiua kuali ma nimomachili. Kuali iuan nimouikas non tlen okachi ipati itech nonemilis.” (GINA, SE SIUATL TLEN KIPIA 45 XIUITL UAN TLEN CHANTI ITECH ALTEPETL JAMAICA)

Amo san Christopher, Hannah uan Gina ijkon mokuayejyekoaj. Miakej tlaltikpaktlakamej kineltokaj toTajtsin Dios kinmita ken inyolikniuan. ¿Uan tejuatsin? ¿Tikmachilia timotokia itech toTajtsin Dios? ¿Mitspaktiskia kuali iuan timouikas noso okachi kuali iuan timouikas? Uelis timotlajtlania: “¿Se tlaltikpaktlakatl ken ne uelis kuali mouikas iuan toTajtsin Dios akin kipia sapanoa miak chikaualistli?”.

UELIS TIMOUIKAS IUAN TOTAJTSIN DIOS

Biblia techyekiluia uelis kuali timouikaskej iuan toTajtsin Dios akin oKichijchi nochi. Se neskayotl, itech Isaías 41:8 kijtoa toTajtsin Dios okijto Abrahán okatka ‘iyolikni’. Xikita noijki tlen techyoleua ma tikchiuakan Santiago 4:8: “Xiwalmijkuanikah [ximotokikan] inawak Dios, iwa Ye mijkuanis [motokis] nomonawak”. Nochi nin techmachtia uelis timouikaskej iuan toTajtsin Dios. Pero ¿ken uelis timotokis itech tla amo ueli tikitaj?

Achto ma tikitakan ken uelis kuali peuas timouikaskej iuan ikaj. Ijkuak yikin moixmatij, sejse moneki kijtos ken itoka. Tla okachi mouikaj, peua motlapouiaj tlen mokuayejyekoaj uan tlen kimachiliaj, kichiua ma mochiuakan yoliknimej. Okachi kuali mouikaj ijkuak sejse mopaleuiaj. Noijki ijkon techpanoa iuan toTajtsin Dios. Okachi kuali ma timomachtikan nin tlamantli.