Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Diciembre de 2014

¿Moneki okse tlamantli nimokuayejyekos?

¿Moneki okse tlamantli nimokuayejyekos?

SEKIMEJ tokniuan telpokamej kitatiuij se película. Miakej telpokamej yokitakej uan okinpakti. Ijkuak ajsij cine, itech tepamitl kitaj amamej kanin onka miakej teposmej tlen ika moteuiaj uan miakej ichpokamej tlen kipiaj san tepitsin intlaken. ¿Tlen kichiuaskej? ¿Kitaskej película?

Nin neskayotl techmachtia nochtin moneki tikpejpenaskej tlen tikchiuaskej, seki tlamantli tlen kuali techpaleuia itech totlaneltokilis uan pampa kuali ma timouikakan iuan Jehová, pero okseki amo techpaleuiaj. Ualeua tiknekij tikchiuaskej seki tlamantli, pero ijkuak kuali timokuayejyekoaj uelis ayakmo timokuayejyekoaj ken achto. ¿Kijtosneki nin amo kuali timokuayejyekoaj? ¿Noso uelis tikpatlaskej tlen timokuayejyekoaj?

KEMAN AMO KUALI ma tikpatlakan tlen timokuayejyekoaj

Otimotemakakej uan otimoapolaktijkej iixpan Jehová pampa tiktlasojtlaj. Otikiluijkej amo keman tikkauaskej uan amo tiknekij tikkauaskej. Pero Satanás akin techkokolia, kineki ma tikkauakan Jehová (Apoc. 12:17). Yotikpejpenkej tiktekichiuiliskej uan tiktlakamatiskej Jehová; tla tikpatlaj tlen tikneltokaj uelis timikiskej. ¡Nin sapanoa amo kuali!

Yikipia kanaj dos mil seiscientos xiuitl, Nabucodonosor ueyi tekiua itech altepetl Babilonia, okichijchi se ueyi tlaixkopinal ika oro uan otlanauati nochtin ma kiueyichiuakan. Akin amo kichiuaskia kitlamotlaskiaj ijtik se horno tlen sapanoa okatka totonik. Sadrac, Mesac uan Abednego okatkaj telpokamej uan okinekiayaj kiueyichiuaskej uan kitlakamatiskej Jehová. Ken amo omotlankuaketskej okintlamotlakej ijtik horno. Maski Jehová okinmakixti, yejuan okinekiayaj kitlakamatiskej Jehová maski mikiskiaj (Dan. 3:1-27).

Daniel noijki amo okika kiueyichiuas akin melauak toTajtsin Dios. Ye kuali okimatiaya tla okitayaj kitlatlaujtijtok toTajtsin Dios, kitlamotlaskiaj  itech koyoktli kanin okatkaj leones. Pero ye nochipa okitlatlaujti toTajtsin Dios eyi uelta itech se tonal ijkon ken okichiuaya. Pampa amo okika Jehová, ye okimakixti pampa amo ma kimiktikan leones (Dan. 6:1-27).

Axkan itekipanojkauan toTajtsin Dios noijki nochipa kitekichiuiliaj. Itech altepetl África, sekimej telpokamej tlen iTlaixpantijkauan Jehová uan tlen omomachtijtokaj itech se escuela, amo okinekej kiueyichiuaskej bandera tlen kipia non altepetl. Okinmiluijkej tla amo kiueyichiuaskiaj, ayakmo uelis momachtiskiaj ompa. Seki kauitl satepan akin okinyekanaya escuelas oyajki itech non altepetl, uan telpokamej okitlapouijkej ika miak tlakaitalistli uan yolchikaualistli tleka amo okiueyichiuayaj non bandera. Itech non tonal pampa tlayekapan tokniuan ueli momachtiaj uan ayakmo kinmiluiaj amo ma kitlakamatikan Jehová.

Ma tikitakan tlen okipanok Joseph. Isiua okipiaya cáncer uan seki kauitl satepan omikik. Ikalchanejkauan Joseph okinekiayaj kitokaskej ken okijtoaya Joseph. Pero ikalchanejkauan isiua akinmej amo okatkaj iTlaixpantijkauan Jehová okinekiayaj kichiuaskej tlen amo kipaktia toTajtsin Dios. Joseph kijtoa: “Ken ne amo oniknekiaya okinmiluijkej nokoneuan, pero yejuan noijki okijtojkej amo. Itech tokalijtik ikalchanejkauan noijki okinekiayaj kichiuaskej tlen amo kineki toTajtsin Dios. Pero onikinmilui tla okinekiayaj kichiuaskej uelis kichiuaskiaj, pero amo itech nokalijtik. Okimatiayaj tejuan uan nosiua amo ijkon otikneltokayaj. Satepan chikauak otimotlapouijkej okichijkej itech okse kali.

”Ijkuak okachi onitlajyouijtokaj oniktlatlaujti Jehová pampa ma techpaleui uan ma tikintlakamatikan itlanauatiluan. Ye okikak tlen otiktlajtlanilijkej uan otechpaleui pampa amo ma tikkauakan maski sapanoa otitlajyouijkej.” Nion Joseph nion ikoneuan omokuayejyekojkej kipatlaskej tlen kineltokaj uan amo kitlakamatiskej Jehová.

KEMAN UELIS tikpatlaskej tlen timokuayejyekoaj

Seki kauitl satepan ijkuak omochi Pascua itech xiuitl 32, se siuatl tlen ochantiaya fenicia omotoki itech Jesús ijkuak ye okatka Sidón uan okilui ma kikixtili amo kuali ejekatl tlen okipiaya itakotsin. Achto, Jesús amo okinankili uan okinmilui imachtijkauan: “Dios onechaltítlanki sanwel manikimpalewiki n tlakah de Israel non moixpolojtinemih kemi ichkameh”. Ken siuatl amo oyajki, Jesús okijto: “Amo kuali se kinkixtilis intlakual n pípilteh iwa makinmakakah n chichimeh”. Pero ika miak tlaneltokalistli siuatl okijto: “Milák tlan tikijtoa Noteko, asta n chichimeh kikuah n kamapáyaxtli non wetsi itlampa mesa keman tlakuajtokeh intekowajkeh”. Jesús okinankili nin siuatl uan okipajti itakotsin (Mat. 15:21-28).

Okichi ijkon ken Jehová, akin kipatla tlen mokuayejyekoa ijkuak moneki ijkon kichiuas. Se neskayotl, ijkuak israelitas ika oro okichijchijkej se becerro, toTajtsin Dios kinmixpoloskia, pero okipatlak tlen okinekiaya kichiuas pampa Moisés okitlatlaujti amo ma kinmixpolo israelitas (Éx. 32:7-14).

Tlatitlanil Pablo noijki okichi ken Jehová uan Jesús. Seki kauitl ye amo okitaya kuali ma kiuikakan Juan Marcos pampa ma kinpaleui, pampa se tonal ye okinkajte. Pero satepan okitak okipatlak inemilis uan opejki tekiti chikauak. Ik non, okilui Timoteo: “Xiktemo n Marcos iwa mowa xikwalika ijkuak tiwits, porke ye weletis nechpalewis itech noteki” (2 Tim. 4:11).

¿Uan tejuan? Uelis ualeua tikitaj moneki tikpatlaskej tlen timokuayejyekoaj ijkon ken kichiua toTajtsin Dios akin tetlasojtla. Se neskayotl, uelis tikpatlaskej ken tikinmitaj oksekimej tokniuan. Tla Jehová uan Jesús, akinmej amo kipiaj tlajtlakoli, okichijkej, ¿amo moneki tejuan tikpatlaskej ken  tikinmitaj oksekimej tla tikitaj kipatlaj innemilis?

Ualeua moneki tikpatlaskej tlen timokuayejyekoaj itech toteki itech tekiuajkayotl. Sekimej akinmej yiuejkika momachtiaj Biblia uan momachtiaj touan amo kinekij moapolaktiskej. Sekimej tokniuan akinmej tetlapouiaj amo kinekij tekitiskej ken precursores, maski uelis kichiuaskej. Uan oksekimej tokniuan amo mochijchikauaj pampa kiseliskej okseki tekitl itech tlanechikol (1 Tim. 3:1). ¿Noijki ijkon tikchiua? Xikilnamiki, Jehová kineki ximochijchikaua pampa tikpias nin tekitl. Ik non, ¿tleka amo tikpatla tlen timokuayejyekoa uan timochijchikaua pampa okachi tiktekichiuilis Jehová uan tikinpaleuis oksekimej tlaltikpaktlakamej?

Ualeua, tikpatlaskej tlen timokuayejyekoaj kiteititia ixtlamatilistli

Se tokni siuatl tlen itoka Ella kijtoa ken kita tekitl tlen kichiua itech Kali kanin kinyekanaj iTlaixpantijkauan Jehová itech altepetl África: “Ijkuak oniajsik Betel, amo onikmatiaya kox nimokauaskia miak kauitl. Oniknekiaya niktekichiuilis Jehová ika nochi nonemilis, pero noijki sapanoa oniknekiaya niyetos inmiuan nokalchanejkauan. Achto sapanoa onikinmilnamikiaya... Pero akin iuan onichantiaya sapanoa onechpaleui, ik non, onikpejpenki nimokauas Betel. Axkan yinikpia majtlaktli xiuitl itech Betel, uan nikneki nimokauas miak xiuitl pampa nikinpaleuis tokniuan”.

KEMA MONEKI tikpatlaskej tlen timokuayejyekoaj

¿Tikilnamiki tlen okipanok Caín ijkuak opejki kichauatilia iikni uan sapanoa okualanki? Jehová okitak sapanoa okualanki uan uelis kichiuaskia itlaj amo kuali, ik non, okilui amo ma kualani tla okinekiaya ma kiseli Jehová. Okilui uelis tlajtlakolchiuaskia.  Caín uelis kipatlaskia tlen omokuayejyekoaya, pero amo okinek kitlakamatis tlen okilui toTajtsin Dios. Uan sapanoa amo kuali tlen okichi pampa okimikti iikni uan ye akin achto otemikti (Gén. 4:2-8).

¿Tlen panoskia tla Caín kipatlaskia tlen omokuayejyekoaya?

Tlen okipanok ueyi tekiua Uzías noijki techmachtia se tlamantli tlen miak ipati. Maski achto okichi tlen kuali iixpan Jehová uan kuali iuan omouikaya, satepan opejki moueyineki. Tlapoualistli techiluia okalak itech teokali uan okitemakak kopali, maski nin tlamantli san uelis kichiuaskiaj teopixkej. Uan ijkuak teopixkej okiluijkej amo ma kichiua, amo otetlakamatki uan okichi tlen omokuayejyekoaya. Ye okualanki uan amo okintlakamatki teopixkej. ¿Tlen okipanok? Jehová okitlajyouilti ika kokolistli tlen itoka lepra (2 Crón. 26:3-5, 16-20).

Ninmej neskayomej techmachtiaj ualeua moneki ma tikpatlakan tlen timokuayejyekoaj. Ma tikitakan tlen okipanok Joachim, akin omoapolakti itech xiuitl 1955 pero okikixtijkej itech tlanechikol itech xiuitl 1978. Kanaj 20 xiuitl satepan okiteititi omoyolkuepki uan oksepa omochi iTlaixpantijka Jehová. Ayamo kipia miak xiuitl, se tlayekanki itech tlanechikol okitlajtlani tleka ouejka pampa oksepa mochiuas iTlaixpantijka Jehová. Joachim okijto: “Onimoyolkokoaya uan sapanoa onimoueyinekiaya. Sapanoa nechyolkokoa pampa amo san niman onikpatlak tlen onimokuayejyekoaya. Itech nochi nonmej xiuitl, onikmatiaya iTlaixpantijkauan Jehová otlamachtiayaj tlen melauak”. Joachim okajsikamatki omonekiaya moyolkuepas uan okipatlak tlen omokuayejyekoaya.

Ualeua tejuan noijki moneki tikpatlaskej tlen timokuayejyekoaj uan ken tikchiuaj seki tlamantli. Ik non, ma tikchiuakan pampa uelis tikyolpaktiskej Jehová (Sal. 34:8).