Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Diciembre de 2014

 TLAMACHTIL TLEN IKA PEUA | UELIS TIMOUIKAS IUAN TOTAJTSIN DIOS

¿Tikmati tlen itoka toTajtsin Dios?

¿Tikmati tlen itoka toTajtsin Dios?

¿Uelis tikpias se moyolikni uan amo tikmatis tlen itoka? Amo. Ken okijto Irina tlen chanti itech altepetl Bulgaria: “Amo uelis timouikas iuan toTajtsin Dios, tla amo tikmati tlen itoka”. Ken yotimomachtijkej, toTajtsin Dios kineki itech ma timotokikan. Ik non, itech Biblia techiluia tlen itoka. Ye techiluia: “Ne niJehová. Ijkon notoka” (Isaías 42:8).

Itech Biblia toTajtsin Dios techiluia itoka: “Ne niJehová. Ijkon notoka” (Isaías 42:8)

Pero ¿melauak kipatioita toTajtsin Dios ma tikmatikan tlen itoka uan ijkon ma tiknotsakan? Ximokuayejyeko: tokayotl tlen kipia toTajtsin Dios —tlen moijkuiloa ika naui letras hebreas tlen moixmati ken Tetragrámaton— tikajsij kanaj 7,000 veces itech Escrituras Hebreas, tlen noijki moixmatij ken Antiguo Testamento. Amo onka okse tokayotl tlen noijki moijtoa ken nin. Nin techmachtia Jehová kineki ma tikmatikan itoka uan ijkon ma tiknotsakan. *

Ijkuak ome tlaltikpaktlakamej yikin moixmatij, san niman kijtoaj tlen intoka. ¿Tikmati tlen itoka toTajtsin Dios?

Ken toTajtsin Dios chipauak noso santo uan kipia sapanoa miak chikaualistli, miakej kineltokaj amo kuali kichijtokej tla kitekitiltiaj nin tokayotl. Amo kuali yetoskia tla amo kuali tiktekitiltiaj nin tokayotl, ijkon ken amo tikchiuaskiaj iuan se toyolikni. Pero amo tlajtlakoli tla kuali tiktekitiltiaj, Jehová kineki itekipanojkauan ma kiueyichiuakan nin tokayotl uan ma kitematiltikan (Salmo 69:30, 31; 96:2, 8). Xikilnamiki Jesús okinmilui imachtijkauan ma kitlatlaujtikan toTajtsin Dios: “Totajtsi Dios non timoitstika ilwikak, nochipa makiyektenewakah motoka”. Tiyekteneua noso tikueyichiua itoka ijkuak tiktematiltiaj, uan non okachi techtokia iuan toTajtsin Dios (Mateo 6:9).

Biblia techiluia toTajtsin Dios kinkaki akinmej kitlakaitaj itoka (Malaquías 3:16). Nochtin akinmej kitlakaitaj nin tokayotl, Jehová kinmiluia: “Nikmaluis pampa kimati tlen notoka. Ye nechnotsas uan ne niknankilis. Niyetos iuan ijkuak tlajyouijtos” (Salmo 91:14, 15). Nochi nin techmachtia tla tiknekij timouikaskej iuan toTajtsin Dios, moneki ma tikmatikan tlen itoka uan ijkon ma tiknotsakan.

^ párr. 4 Techyolkokoa tikmatiskej, pero miakej akinmej kitlajtolkuepaj Biblia kipatlaj nin tokayotl ika tlajtolmej “toTeko”, “toTajtsin” noso “Dios”. Tla tikneki tikmatis okachi itech nin tokayotl uelis tikitas amochtli ¿Tlen melauak tlamachtia Biblia? itech páginas 195 a 197, nin amochtli kichijchiuaj iTlaixpantijkauan Jehová.