Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Diciembre de 2014

¿Tikpatioita tlen yotikseli?

¿Tikpatioita tlen yotikseli?

“Tejwah [. . .] otikselijkeh Iespíritu Dios, para matikajsikamatikah nochi tlan Dios itech iteiknomatilis otechtliokoli.” (1 COR. 2:12)

1. ¿Tlen mokuayejyekoaj tlaltikpaktlakamej itech tlen kipiaj?

MIAKEJ tlaltikpaktlakamej okachi kipatioitaj itlaj ijkuak ayakmo kipiaj. ¿Ijkon yomitspanok? Ualeua amo tikpatioitaj tlen tikpiaj. Se neskayotl, ijkuak ikaj moskaltia iuan ikalchanejkauan tlen kipiaj miak tomin uelis amo kipatioita tlen kipia. Sekimej telpokamej amo kuali yikimatij ken mopanoltiskej, ik non, amo kajsikamatij tlen okachi ipati itech innemilis.

2, 3. 1) ¿Tlen moneki kichiuaskej telpokamej? 2) ¿Tlen techpaleuis ma tikitakan tlen okachi ipati?

2 Tla tikpia kanaj 20 xiuitl, ¿tlen okachi tikpatioita? Axkan miakej tlaltikpaktlakamej san kintekipachoa kipiaskej miak tlamantli: ken kitlaniskej miak tomin, kipiaskej se kali ueyi uan tlamantli tlen okachi yankuik. Pero amo kipatioitaj mouikaskej iuan toTajtsin Dios. Teyolkoko pampa miakej amo kintekipachoa. Tla otimoskalti iuan motatajuan tlen kichiuaj ken Cristo, moneki tikpatioitas tetliokolil espiritual tlen omitsmakakej (Mat. 5:3). Tla amo tikpatioitas, uelis titlajyouis.

3 Pero amo moneki ijkon mitspanos. ¿Tlen uelis tikchiuas? Ma tikinmitakan sekimej neskayomej tlen  kinpaleuis telpokamej uan nochtin akinmej tikchiuaj ken Cristo ma tikpatioitakan totetliokolil espiritual.

AMO OKIPATIOITAKEJ INTETLIOKOLIL ESPIRITUAL

4. ¿Tlen kijtoa 1 Samuel 8:1-5 itech ikoneuan Samuel?

4 Biblia tlajtoa itech sekimej tlaltikpaktlakamej tlen amo okipatioitakej intetliokolil espiritual. Ijkon okinpanok ikoneuan teotlajtoki Samuel, akin opejki kitekichiuilia Jehová ijkuak okatka konetl uan nochipa okatka yolmelajki (1 Sam. 12:1-5). Samuel okinmakak se kuali neskayotl ikoneuan akinmej omotokayotiayaj, Joel uan Abías, pero yejuan amo okipatioitakej uan omochijkej amo yolkualmej. Amo okatkaj ken intajtsin pampa yejuan “amo okichiuayaj ken kijtoa tlanauatil” (xiktlajtolti 1 Samuel 8:1-5).

5, 6. ¿Tlen okichijkej ikoneuan Josías uan iixui?

5 Ijkon okinpanok ikalchanejkauan Josías akin okatka kuali itekipanojka Jehová. Ijkuak okajsikej amochtli kanin kajki Tlanauatil, Josías okikak tlen ompa okijtoaya uan san niman omochijchika kintlakamatis itlanauatiluan Jehová. Okipojpolo nochi tlen opouiaya itech teotsitsintin uan itech tetlajchiuilistli uan okiyolchika nochi altepetl ma kintlakamatikan itlanauatiluan Jehová (2 Rey. 22:8; 23:2, 3, 12-15, 24, 25). ¡Ikoneuan okiselijkej kuali tetliokolil espiritual! Eyi ikoneuan uan se iixui omochijkej ueyi tekiuajkej, pero nion se amo okipatioitak tetliokolil tlen okiselijkej.

6 Josías okitlali ueyi tekiua Jehoacaz, pero “ye opejki kichiua tlen amo kuali iixpan Jehová”. San eyi metstli okatka tekiua uan faraón tlen ochantiaya Egipto okikitski, okitsak uan ompa omikik (2 Rey. 23:31-34). Satepan Jehoiaquim opejki tlanauatia, otlanauati once xiuitl. Pero noijki amo okipatioitak tlen itajtsin okimachti. Jehoiaquim omochi amo yolkuali, uan Jeremías okijto: “Kitokaskej ken kitoka se burro” (Jer. 22:17-19). Ikoneuan Josías, Sedequías uan iixui akin omotokayotiaya Joaquín, nion se amo okatka yolkuali uan amo okichijkej ken Josías (2 Rey. 24:8, 9, 18, 19).

7, 8. 1) ¿Ken okipolo itetliokolil espiritual Salomón? 2) ¿Tlen timomachtiaj itech akinmej amo okipatioitakej intetliokolil espiritual?

7 Salomón noijki okiseli se tetliokolil tlen okimakak itajtsin. Maski David okimachti Salomón ken kitlasojtlas Jehová, satepan amo okipatioitak itetliokolil. Biblia kijtoa: “Salomón yokipiaya miak xiuitl, uan isiuauan okichijkej iyolo ma kintekichiuili okseki teotsitsintin uan iyolo amo okatka ajsitok iuan Jehová ken iyolo itajtsin, David” (1 Rey. 11:4). Ik non, Jehová ayakmo okiseli Salomón.

8 Nochtin ninmej tlakamej uelis kitlasojtlaskiaj Jehová uan kichiuaskiaj tlen kuali, uan amo okichijkej. Pero Biblia tlajtoa itech oksekimej telpokamej tlen melauak okipatioitakej intetliokolil espiritual ijkon ken miakej telpokamej kichiuaj axkan. Ma tikitakan seki neskayomej tlen kinpaleuis telpokamej ijkon noijki ma kichiuakan.

OKIPATIOITAKEJ TLEN OKISELIJKEJ

9. ¿Tleka okiteititijkej se kuali neskayotl ikoneuan Noé? (Xikita tlaixkopinal tlen ika peua tlamachtil.)

9 Ikoneuan Noé okiteititijkej se kuali neskayotl. Okipaleuijkej intajtsin  okichijchijkej akali pampa ma momakixtikan tlaltikpaktlakamej. Yejuan okajsikamatkej omonekiaya kichiuaskej itlanekilis Jehová uan okipaleuijkej intajtsin. Uan ken kijtoa Biblia, okalakej itech akali ijkuak opejki atemi Tlaltikpak (Gén. 7:1, 7). ¿Tleka okichijkej? Génesis 7:3 kijtoa okinkalakijkej yolkamej itech akali “pampa ma yoltokan inkoneuan ipan nochi Tlaltikpak”. Uan tlaltikpaktlakamej noijki omomakixtijkej. Pampa ikoneuan Noé okipatioitakej intetliokolil espiritual, yejuan otlapaleuijkej pampa amo ma ixpoliuikan tlaltikpaktlakamej uan oksepa ma yeto ueyichiualistli tlen melauak itech nochi Tlaltikpak (Gén. 8:20; 9:18, 19).

10. ¿Ken okiteititijkej naui telpokamej melauak okipatioitayaj intetliokolil espiritual?

10 Miak xiuitl satepan, naui telpokamej okiteititijkej tlen okachi miak ipati. Hananías, Misael, Azarías uan Daniel okinuikakej Babilonia itech xiuitl 617 achto itech xiuitl 1. Okatkaj ixtlamatkej uan kuajkualtsitsintin uan uelis kichiuaskiaj ken akinmej ochantiayaj itech Babilonia. Pero amo ijkon okichijkej. Yejuan ika tlen okichijkej okiteititijkej okipatioitayaj intetliokolil espiritual tlen intatajuan okinmachtijkej. Uan Jehová sapanoa okinteochi pampa okipatioitakej tlen okinmakakej ijkuak okatkaj konemej (xiktlajtolti Daniel 1:8, 11-15, 20).

11. ¿Ken okinpaleui tlaltikpaktlakamej itetliokolil Jesús?

11 Jesús noijki se kuali neskayotl pampa noijki okiteititi okipatioitaya itetliokolil espiritual. Ye sapanoa miak tlamantli omomachti itech iTajtsin uan okinpatioitaya. Okiteititi ika tlen okijto: “Ne sanwel nikijtoa tlan Notajtsi Dios onechmachti” (Juan 8:28). Uan noijki okinekiaya oksekimej ma kimatikan tlen ye omomachti. Okinmilui tlaltikpaktlakamej: “Nikpia nitetlapowiti [...] n kualitlájtoli intech oksikimeh altepemeh, ken ika ye onechaltítlanki Dios” (Luc. 4:18, 43). Okinpaleui tlaltikpaktlakamej akinmej okikakej amo ma kichiuakan ken tlaltikpaktlakamej, pampa amo kipatioitaj kitekichiuiliskej toTajtsin Dios (Juan 15:19).

¿TIKPATIOITAJ TLEN YOTIKSELIJKEJ?

12. 1) ¿Ken kinpanotok telpokamej ijkon ken Timoteo? 2) ¿Tlen uelis motlajtlaniskej telpokamej tlen kichiuaj ken Cristo?

12 Tla motatajuan kitlasojtlaj Jehová, yotikseli se tetliokolil espiritual. Uan Biblia tlajtoa itech Timoteo uan uelis mitspanotok ken ye okipanok (xiktlajtolti 2 Timoteo 3:14-17). Motatajuan omitsmachtijkej itech akin melauak toTajtsin Dios uan ken uelis tikyolpaktis. Uan opejki mitsmachtiaj ijkuak otikatka ok tikonetl uan non nimitspaleuia “mitsixtlamachtis iwa mitsmakixtis ken titlaneltoka itech Cristo Jesús” uan ‘kuali ximoixtlamachti’ pampa tiktekichiuilis toTajtsin Dios. ¿Tiktlasojkamati tlen otikseli? Ximokuayejyeko itech nin tlamantli. Uan ximotlajtlani: “¿Ken nimomachilia pampa nipoui inmiuan iTlaixpantijkauan Jehová akinmej yolmelajkej? ¿Niyolpaki pampa nipoui itech akinmej amo miakej iyolikniuan toTajtsin Dios? ¿Nikpatioita tlen melauak?”.

¿Kuali timomachilia pampa tipoui inmiuan iTlaixpantijkauan Jehová akinmej yolmelajkej? (Xikinmita párrafos 9, 10, uan 12)

13, 14. 1) ¿Tlen kinpanoa sekimej telpokamej tlen kichiuaj ken Cristo? 2) ¿Uan tleka moneki ma mochijchikauakan? Xikijto se neskayotl.

13 Miakej telpokamej amo kitaj  okse tlamantli ken tlanauatia Satanás, uan okse tlamantli ken Jehová techmaluia pampa amo ma techijtlako tlen Satanás kinauatia. Sekimej kinekij kichiuaskej ken kichiuaj tlaltikpaktlakamej. ¿Te tlen timokuayejyekoa? ¿Timotlamotlaskia iyekapan se carro pampa tikitas kox mitskojkos noso kox uelis mitsmiktis? ¡Amo! Amo moneki ma techijtlako tlen kichiuaj tlaltikpaktlakamej pampa tikmatiskej kox titlajyouiskej (1 Ped. 4:4).

14 Gener, se telpochtli tlen chanti Asia, omoskalti iuan itatajuan tlen kichiuaj ken Cristo uan omoapolakti ijkuak okipiaya 12 xiuitl. Pero ijkuak omoskalti opejki kipaktia tlen kichiuaj tlaltikpaktlakamej. Ye kijtoa: “Oniknekiaya noselti ‘nimonauatis’ ijkon ken kichiuaj tlaltikpaktlakamej”. Opejki kipia ome ixko uan ijkuak okipiaya 15 xiuitl, yokichiuaya ijkon ken iyolikniuan otlauanaya uan yotlajtoaya pitsotik ken yejuan. Omauiltiaya itech billares uan yiyoak oajsiaya ikalijtik uan okintekitiltiaya videojuegos kanin sapanoa moteuiaj. Satepan okitak amo okiyolpaktiaya nochi tlen okichiuaya, omomachiliaya amo itlaj okipiaya. Axkan ken oksepa kajki itech tlanechikol, Gener kijtoa: “Ok nikmachilia oui nikixnamikis tlamantli tlen kichiuaj tlaltikpaktlakamej, pero niktekichiuilis Jehová se tlateochiualistli uan non nechpaleuia ma nimochijchikaua”.

15. ¿Tlen moneki mokuayejyekoskej akinmej intatajuan amo kichiuaj ken Cristo?

15 Sekimej telpokamej tlen katej itech tlanechikol intatajuan amo kichiuaj ken Cristo. Tla te ijkon mitspanotok, tikpia se tlateochiualistli tikixmatis uan tiktekichiuilis akin oTechchijchi. Onka sapanoa miakej tlaltikpaktlakamej, pero itech 1,000 tlaltikpaktlakamej san se kixmati tlen melauak itech Biblia. ¡Uan te ompa tika! Melauak se tlateochiualistli pampa Jehová otechyoltilanki uan techmatiltia tlen melauak itech Biblia (Juan 6:44, 45). Melauak tiyolpakij pampa tikixmatij tlen melauak (xiktlajtolti 1 Corintios 2:12). Gener kijtoa: “Niuiuiyoka ijkuak nimokuayejyekoa. ¿Akin ne pampa notech ma tlachia  Jehová akin Ueyi Tekiua itech nochi semanauak?” (Sal. 8:4). Okse tokni siuatl akin noijki ompa chanti kijtoa: “Tla se akin omomachtiaya kuali momachilia ijkuak kilnamiki akin okimachtiaya, ¡tikpia se ueyi tetliokolil pampa mitsixmati Jehová akin okachi Ueyi Tlamachtia!”.

¿TLEN TIKCHIUAS?

16. ¿Tlen uelis kichiuaskej telpokamej uan ichpokamej?

16 Melauak kualtsin pampa amo miakej kipejpenaj kipiaskej kuali innemilis. ¿Timochijchikauas nochipa ijkon tiyetos? Tla ijkon tikchiuas, tiyetos inmiuan tokniuan tlen amo kikauaj toTajtsin Dios. Nin sapanoa okachi kuali, pampa miakej telpokamej amo kinekij kipiaskej kuali innemilis uan amo itlaj kuali kichiaj pampa nochi tlen onka itech nin Tlaltikpak pojpoliuis (2 Cor. 4:3, 4).

17-19. ¿Tlen mitspaleuis pampa kuali ximomachili?

17 Oui amo tiyetoskej ken oksekimej, pero okachi kuali. Ximokuayejyeko itech nin neskayotl, akin mauiltia itech Juegos Olímpicos. Tla omauilti itech non, ye amo okichiuaya ken oksekimej tlen inmiuan omomachtiaya. Pampa omomachtiaya ken mauiltis, amo okichi okseki tlamantli uan okichi tlen okinekiaya.

18 Miakej amo mokuayejyekoaj tlen uelis kinpanos satepan ika nochi tlen kichiuaj. Pero tla timokuayejyekos itech non uan amo tikchiuas ken kichiuaj tlaltikpaktlakamej, amo timoyolpaktis ika tlen uelis mitsijtlakos uan noijki kijtlakos motlaneltokilis, uelis ‘tikpias n nemílistli non ayik tlami’ (1 Tim. 6:19). Tokni tlen itech otimotlapouijkej kijtoa: “Tla tikpaleuis tlen tikneltoka, satepan kuali timomachilis. Tikteititis tikpia chikaualistli pampa tikixtopeuas tlen kinauatia Satanás. Yetoskia ken Jehová mitsixuetskilijtoskia uan motech moueyineki. Kuali timomachilis pampa amo tikchiua ken oksekimej tlatikpaktlakamej”.

19 Amo ipati timokuayejyekojtos itech tlen tikneki tikpias axkan (Ecl. 9:2, 10). Tla tikajsikamatij tleka tiyoltokej uan tikmatij Jehová techmakas nochi tlen amo keman tlamis, ¿amo melauak moneki ayakmo ma tinemikan ken nemij “akimeh amo kineltokah Dios”? Tla tikpejpenas tlen okachi kuali, tiyolpakis itech monemilis (Efes. 4:17; Mal. 3:18).

20, 21. 1) ¿Tleka techpaleuis ma tikpejpenakan tlen kuali? 2) ¿Tlen kichia Jehová ma tikchiuakan?

20 Tla tikpejpenaskej tlen okachi kuali, tiyolpakiskej axkan uan techpaleuis pampa tiyolpakiskej nochipa itech yankuik tlali. Amo ueli timokuayejyekoaj keski tlateochiualismej tikinseliskej (Mat. 5:5; 19:29; 25:34). Pero amo san tikinseliskej, Jehová kineki itlaj ma tikchiuakan (xiktlajtolti 1 Juan 5:3, 4). Tlen okachi kuali, nochipa ma tiktekichiuilikan Jehová.

21 ¡Miak tlamantli yotechmakak Jehová! Tikpiaj tlamatilistli itech Biblia, tikajsikamatij tlen melauak itech toTajtsin Dios uan itech itlanekilis. Tikpiaj itoka uan tikatej tiiTlaixpantijkauan. Uan toTajtsin Dios kijtoa nochipa touan yetos (Sal. 118:7). Telpokamej uan akinmej yitikpiaj miak xiuitl ma tikpatioitakan totetliokolil espiritual uan ika nochi toyolo “matikweyilikah Totajtsi Dios nochipa” (Rom. 11:33-36; Sal. 33:12).