Xikita nochi

Tlen kiualika

Pampa timomakixtiskej moneki san sekan ma tiyetokan

Pampa timomakixtiskej moneki san sekan ma tiyetokan

“Tinochteh titeaxkawah itech ikuerpo Cristo.” (EFES. 4:25)

1, 2. ¿Ken kineki toTajtsin Dios ma tikueyichiuakan?

TLA titelpochtli uan tiitlaixpanti Jehová, uelis tikneltokas Jehová sapanoa mitspatioita. Itech miakej uejueyij altepemej sejse xiuitl moapolaktiaj miakej telpokamej uan ichpokamej. ¡Melauak techyolpaktia tikinmitaskej noijki kinekij kitekichiuiliskej Jehová!

2 Uelis mitspaktia tiyetos iuan oksekimej telpokamej. Nochtin techpaktia kuali timouikaskej iuan akinmej noijki ken tejuan. Pero toTajtsin Dios kineki nochtin san sekan ma tikueyichiuakan, maski sekimej telpokamej uan oksekimej amo. Tlatitlanil Pablo okijto toTajtsin Dios “kineki mamomakixtikah nochteh [tlaltikpaktlakamej] iwa makixmatikah tlan milák” (1 Tim. 2:3, 4). Uan itech Apocalipsis 7:9 kijtoa kiueyichiuaj Jehová “senmiaktikeh tlaltikpaktlakah [...]; yejwah owalajkeh ik nochteh tlalmeh itech nin tlaltíkpaktli, de nochi familiajteh, iwa de nochi altepemeh non tlatlamantli otlachixtokah iwa tlatlamantli intlajtol okipiayah”.

3, 4. 1) ¿Axkan tlen kichiuaj miakej telpokamej? 2) Ken kijtoa Efesios 4:25, ¿ken moneki tikinmitaskej tokniuan?

3 ¡Melauak tlatlamantli tlen kichiuaj telpokamej tlen kiueyichiuaj  Jehová uan akinmej amo! Akinmej amo kiueyichiuaj Jehová san yejuan moyolpaktiaj uan kichiuaj tlen kinekij. Uan noijki akinmej momachtiaj kijtoaj axkan telpokamej okachi amo motekipachoaj itech oksekimej. Ika ken motlakentiaj uan ken tlajtoaj kiteititiaj amo kintlakaitaj akinmej okachi kipiaj xiuitl.

4 Uan nin san kanin tikitaj. Ik non, telpokamej tlen kinekij kiyolpaktiskej Jehová moneki amo ijkon kichiuaskej. Pero nin yiuejkika mochijtok pampa itech achto siglo, tlatitlanil Pablo okinmilui tokniuan amo ma kichiuakan ijkon pampa yokinmijtlakojtoka. Ye okijto “kinyakantok akimeh amo kitlakitah Dios” (xiktlajtolti Efesios 2:1-3). Techyolpaktia tikmatiskej telpokamej amo ijkon kichiuaj uan tekitij inmiuan nochtin tokniuan itech tlanechikol. Ika innemilis kiteititiaj kajsikamatij tlen Pablo okinmilui “tinochteh titeaxkawah itech ikuerpo Cristo” (Efes. 4:25). Ken ayakmo miak poliui pampa ma tlami nochi tlen amo kuali, okachi moneki san sekan ma tiyetokan inmiuan tokniuan. Ma tikitakan seki neskayomej tlen tikinmajsij itech Biblia tlen techmachtiaj moneki san sekan tiyetoskej.

SAN SEKAN OKATKAJ

5, 6. ¿Tlen techmachtia neskayotl itech Lot uan iichpokauan tlen san sekan okatkaj?

5 Yiuejkika Jehová okinmalui itekipanojkauan ijkuak san sekan okatkaj. Axkan, itekipanojkauan Jehová uelis timomachtiskej miak tlamantli itech ninmej neskayomej. Achto ma tikitakan tlen okipanok Lot.

6 Lot uan ikalchanejkauan uelis mikiskiaj, pampa Sodoma kanin ochantiayaj kipojpoloskiaj. Ik non, sekimej ángeles okiluijkej ma kisakan uan ma cholokan itech tepemej. Okiluijkej ma cholo pampa uelis momakixtiskia (Gén. 19:12-22). Lot otetlakamatki, uan ome iichpokauan okitlakamatkej uan noijki okiskej. Pero ijkuak Lot okinmilui akinmej yetoskiaj imonuan omonekiaya kisaskej itech altepetl, yejuan san ouetskakej. Ik non, yejuan omikej (Gén. 19:14). San Lot uan iichpokauan omomakixtijkej.

7. ¿Ken okinpaleui Jehová akinmej okiskej itech altepetl Egipto pampa san sekan ma yetokan?

7 Ma tikitakan okse neskayotl. Ijkuak israelitas okiskej itech altepetl Egipto, amo sejse oyajki kanin okinek. Uan ijkuak Moisés okimela ima pampa Jehová uelis kitlajkoxeloskia ueyi atl, amo san ye opanok nion opanokej san sekimej israelitas. Ken tikmatij nochi altepetl okipanoui ueyi atl uan Jehová okinmakixti (Éx. 14:21, 22, 29, 30). Nochtin san sekan okatkaj, noijki akinmej amo israelitas tlen okipejpenkej yaskej inmiuan israelitas (Éx. 12:38). ¿Timokuayejyekoaj telpokamej oksekan onemiayaj noso omoxelojkej itech altepetl? Tla ijkon kichiuaskiaj, Jehová amo uelis kinmakixtiskia (1 Cor. 10:1).

8. Ijkuak otlanauatijtoka Jehosafat, ¿ken okiteititijkej san sekan okatkaj?

8 Ijkuak okatka ueyi tekiua Jehosafat, ialtepe toTajtsin Dios okixkomakak se ueyi altepetl. Seki uejueyij altepemej uan miakej tlaltikpaktlakamej okinekiayaj kixkomakaskej altepetl (2 Crón. 20:1, 2). ¿Tlen okichijkej itekipanojkauan toTajtsin Dios? Amo omokuayejyekojkej moteuiskej, okachi kuali, otlaneltokakej itech Jehová (xiktlajtolti 2 Crónicas 20:3, 4). Yejuan amo okitemojkej okse tlamantli momakixtiskej, ken sejse yejuan kinpaktiskia. Biblia kijtoa “nochtin judíos omoketokaj iixpan Jehová, noijki ikoneuan  uan insiuauan” (2 Crón. 20:13). Nochtin otetlakamatkej, telpokamej uan oksekimej okitlakamatkej Jehová uan ika miak tlaneltokilistli okiselijkej itlayekanalis. Ik non, Jehová okinmalui uan amo itlaj okinpanok (2 Crón. 20:20-27). ¡Se kuali neskayotl itech ken moneki tikixkomakaskej ouijkayotl!

9. ¿Tlen techmachtiaj tokniuan itech achto siglo?

9 Itech achto siglo tokniuan noijki okiteititijkej san sekan okatkaj. Se neskayotl, ijkuak miakej judíos uan akinmej amo judíos, “nochteh omochijchikawayah iwa okichiwayah tlan n tlatematiltijkeh okinmachtiayah, omoyekwikayah, omotiotsajtsiliayah iwa omoololoayah para kisepankuaskeh n paj” (Hech. 2:42). Uan omotak san sekan okatkaj ijkuak opejkej kintlajyouiltiaj, pampa nochtin san sekan omomaluiayaj (Hech. 4:23, 24). ¿Tikajsikamatij? Ijkuak titlajyouijtoskej moneki san sekan ma tiyetokan.

IJKUAK YIAJSITIUITS ITONAL JEHOVÁ SAN SEKAN MA TIYETOKAN

10. ¿Keman monekis okachi san sekan ma tiyetokan?

10 Yiajsitiuits tonal keman okachi titlajyouiskej. Teotlajtojki Joel okijto “nin tonal tlayoas uan temomojtis” (Joel 2:1, 2; Sof. 1:14). Ijkuakon ialtepe toTajtsin Dios moneki okachi san sekan ma yetokan. Ma tikilnamikikan tlen okijto Jesús: “Tla n tlakah de se país pewas momijmiktiskeh san yejwah, non país pojpoliwis” (Mat. 12:25).

11. ¿Tlen techmachtia Salmo 122:3, 4? (Xikita tlaixkopinal tlen ika peua tlamachtil.)

11 Ayakmo miak poliui, ijkuak peuas tlamis nochi tlen amo kuali, tejuan moneki okachi san sekan ma tiyetokan. Moneki san sekan ma tiyetokan ijkon ken amo uejka okatkaj kalmej itech Jerusalén. Kalmej sapanoa opepechitokaj, ik non, salmista okijto Jerusalén okichijchijkej ken se altepetl tlen san sekan kajki. Ik non, israelitas uelis mopaleuiskiaj uan san sekan yetoskiaj. Ninmej kalmej okilnamiktiayaj salmista ken altepetl san sekan okatkaj ijkuak omonechikoayaj pampa kiueyichiuaskej Jehová (xiktlajtolti Salmo 122:3, 4). Axkan uan noijki ijkuak peuas tlamis nochi tlen amo kuali, moneki nochtin tejuan san sekan ma tiyetokan.

12. ¿Ken uelis timomakixtiskej ijkuak kinekiskej kixpoloskej ialtepe toTajtsin Dios?

12 ¿Tleka moneki san sekan ma yetokan ijkuak peuas ouijkayotl? Itech Ezequiel tlakotonal 38 techiluia ‘Gog tlen uits itech tlali Magog’ kinekis kixpolos ialtepe toTajtsin Dios. Ijkuakon amo moneki timoxeloskej nion tiktemoskej ma techpaleuikan tlaltikpaktlakamej. Ijkuakon okachi monekis san sekan ma tiyetokan inmiuan tokniuan. Uan maski san sekan tiyetoskej inmiuan tokniuan, nin amo kijtosneki timomakixtiskej, pampa sejse moneki kiteititis tlaneltoka uan kitlakamati toTajtsin Dios. San momakixtiskej akinmej kiueyichiuaj Jehová (Joel 2:32; Mat. 28:20). Pero ¿tlen kinpanos akinmej moxeloskej itech ialtepe toTajtsin Dios uan kipejpenaskej okse ojtli? ¿Momakixtiskej? (Miq. 2:12.)

13. Ika nochi tlen yotimomachtijkej, ¿tlen moneki kichiuaskej telpokamej uan ichpokamej?

13 Telpokamej uan ichpokamej, ¿nankajsikamatij tleka amo kuali ximoxelokan, ken oksekimej telpokamej uan ichpokamej? Axkan okachi moneki san sekan ma tiyetokan. Nochtin moneki san sekan ma tiyetokan. Ik non, axkan moneki timochijchikauaskej pampa san sekan tiktekichiuiliskej Jehová uan uelis timomakixtiskej ijkuak kinekiskej kixpoloskej ialtepe Jehová.

 “TINOCHTEH TITEAXKAWAH ITECH IKUERPO CRISTO”

14, 15. 1) ¿Tleka axkan techmachtijtok Jehová? 2) ¿Tlen techiluia Jehová pampa san sekan ma tiyetokan inmiuan tokniuan?

14 Jehová techpaleuia pampa san sekan ma tiktekichiuilikan (Sof. 3:8, 9). Techyektlalijtok pampa tonal ijkuak mochiuas itlanekilis uan “kiseitilis nochi tlan onka [...] itech [...] Cristo” (xiktlajtolti Efesios 1:9, 10). Ye kineki kinsetilis nochtin itekipanojkauan tlen katej iluikak uan Tlaltikpak pampa ma kiueyichiuakan ken san se kalchanejke. Uan melauak kichiuas. Ik non, telpokamej uan ichpokamej, ¿nankitaj tleka miak ipati nanyetoskej san sekan iuan ialtepe Jehová?

15 Jehová yitechmachtijtok pampa axkan uan nochipa san sekan ma tiyetokan. Ik non, itech Biblia nochipa techiluia ma timomaluikan nochtin: “Ximotlasojtlakah non nochteh kemi nonmiknimeh”, “ximosepanyolchikawakah” uan “ximochikawakah” (1 Cor. 12:25; Rom. 12:10; 1 Tes. 4:18; 5:11). Jehová kimati titlajtlakolejkej, ik non, ualeua oui san sekan tiyetoskej inmiuan tokniuan. Ik non, techiluia: “Ximosepantlapojpolwikah” (Efes. 4:32).

16, 17. 1) ¿Tleka moneki nochipa ma timonechikokan? 2) ¿Tlen uelis momachtiskej telpokamej itech Jesús?

16 Ika nechikolmej Jehová noijki techpaleuia san sekan ma tiyetokan. Hebreos 10:24, 25 techilnamiktia moneki san sekan ma timonechikokan pampa “matimotlasojtlakah iwa matikchiwakah tlan kuali”. Pero noijki miak ipati tikmatiskej Jehová kineki ma timonechikokan pampa ma timoyolchikauakan ijkuak yiajsitiuits tonal ijkuak tlamis nochi tlen amo kuali.

17 Jesús se kuali neskayotl pampa okipatioitaya monechikos iuan altepetl. Ijkuak okipiaya 12 xiuitl, oyajki iuan itatajuan se ueyi nechikol tlen omochi itech teokali. Ijkuak yomokuepayaj inkalijtik, José uan María amo okajsiayaj, pero amo pampa oyajki iuan oksekimej telpokamej. Okajsikej omotlapouijtoka iuan akinmej otlamachtiayaj itech toTajtsin Dios itech teokali (Luc. 2:45-47).

18. ¿Ken tlapaleuiaj tlanechikolmej pampa san sekan ma tiyetokan?

18 Ken yotimomachtijkej, pampa san sekan ma tiyetokan moneki ma tikintlasojtlakan oksekimej uan noijki nochipa ma timonechikokan. Pero noijki uelis  timotlatlaujtiskej itech oksekimej tokniuan. Tikiluiskej Jehová ken tiknekij ma kinpaleui tokniuan tikteititiskej timotekipachoaj itech oksekimej. Uan nin amo san akinmej yikipiaj xiuitl moneki kichiuaskej. Tla titelpochtli, ximokuayejyeko kox timochijchikajtok pampa san sekan tiyetos iuan nochtin tokniuan itech tlanechikol. Tla tikchiua uelis tiyetos itech ialtepe Jehová, uan amo tiyetos iuan tlen kiyekantok Satanás.

Uelis timotlatlaujtiskej itech oksekimej tokniuan (Xikita párrafo 18)

MA TIKTEITITIKAN “TINOCHTEH TITEAXKAWAH ITECH IKUERPO CRISTO”

19-21. 1) ¿Tlen kiteititia iTlaixpantijkauan Jehová san sekan katej? Xikinmijto neskayomej. 2) ¿Tlen techmachtiaj tokniuan tlen tlapaleuiaj itech se tlaxixinilistli?

19 Ken kijtoa Romanos 12:5, axkan tiitekipanojkauan Jehová tikteititiaj san sekan tikatej. Uan nin motaj ijkuak mochiua se tlaxixinilistli. Itech metstli diciembre xiuitl 2011, opanok se ejekakiauitl tlen itoka tormenta tropical tlen sapanoa otlaxixini itech isla filipina de Mindanao. San itech se yoak kanaj cuarenta mil kalmej oijtlakauikej, miakej kalmej okatkaj inmiaxkauan tokniuan. Pero tokniuan akinmej kinyekanaj iTlaixpantijkauan Jehová okijtojkej: “Achto peuaskiaj tokniuan tlapaleuiskej, oksekimej tokniuan yokiualtitlankej tlen ika titlapaleuiskiaj”.

20 Itech ueyi altepetl Japón, otlalolinki uan tsunami okixixini seki altepetl uan tokniuan okipolojkej miak tlamantli. Sekimej sepa ayakmo itlaj okipiayaj. Yoshiko, se tokni oxixinki ikalijtik uan ikalijtik omokauaya kanaj 40 kilómetros pampa ajsis itech Kali kanin monechikoa. Ye kijtoa: “Sapanoa otechtlajtlachialti pampa mostlatika tokni akin tlayekanki itech circuito uan okse tokni otechtemotoj”. Tokni ixuetskatok okijto: “Sapanoa tikpatioitaj totlanechikol pampa techmaluia ma yeto chikauak totlaneltokilis. Noijki otechmakakej tlakemitl, zapatos uan tlen ijtik tikochiskej”. Se tokni tlen tlapaleuia okijto: “Tokniuan tlen chantij itech non ueyi altepetl san sekan okatkaj uan omopaleuiayaj. Noijki otlapaleuikoj tokniuan tlen chantij itech altepetl Estados Unidos. Ijkuak otikintlajtlanijkej tleka oualajkej pampa sapanoa uejka, yejuan okijtojkej: ‘Tejuan san sekan tikatej inmiuan tokniuan nikan Japón uan moneki tikinpaleuiskej’”. Melauak tiyolpakij pampa tikatej itech ialtepe Jehová tlen totech motekipachoa. Jehová melauak yolpaki pampa kinmita itekipanojkauan san sekan katej.

21 San sekan tiyetoskej techpaleuis ma tikixnamikikan san tlen ouijkayotl, noijki maski amo itlaj tikmatiskej itech tokniuan tlen chantij itech okseki ueueyij altepemej. Tla ijkon timokuayejyekoaj, techpaleuis ma tikixnamikikan san tlen ouijkayotl tikpiaskej achto tlamis tlen amo kuali. Fumiko, se tokni japonesa tlen omomakixti itech se chikauak ejekakiauitl noso tifón, kijtoa nin: “Amo kuali yitlamis. Moneki tikinpaleuiskej tokniuan hasta ijkuak ayakmo ma yeto tlaxixinilistli”.

22. ¿Ken techpaleuis tla san sekan tikatej?

22 Nochtin timochijchikauaj san sekan tiyetoskej maski yitikpiaj miak xiuitl noso amo, nin techpaleuiaj pampa timomakixtiskej ijkuak tlamis tlen amo kuali. Ijkon ken yiuejkika, toTajtsin Dios kimakixtis ialtepe (Is. 52:9, 10). Amo ma tikilkauakan uelis timomakixtiskej tla san sekan tiyetoskej iuan ialtepe Jehová. Noijki techpaleuis tla tikpatioitaj tlen yotikselijkej. Nin timomachtiskej chikome.