Еҥ-влак дене таҥастарымаште Иисус мландыште илымыж деч ончыч каваште суксо семын илен (Иоаннын 8:23). Эн ончыч Иегова тудым, а вара мо уло, чылажымат ыштен. Иисус Юмылан чыла молыжым ышташ полшен. Иегова тудым веле шке ыштен. Садлан кӧра Библийыште Иисусым Юмын «Ик Шкет Эргыже» манын лӱмдымӧ (Иоаннын 1:14). Тыгак, Иисусым «Шомак» манме, вет тудын гоч Юмо еҥ-влак дене мутланен. (Колоссян-влаклан 1:15, 16 лудын лекса.)

Юмо шке Эргыжын илышыжым кава гыч Мария лӱман ӱдырын кӧргышкыжӧ кусарен. Тыгела, Иисус айдеме ача деч шочын огыл (Лукан 1:30—35). Иисус мландыш толын: 1) Юмо нерген чыным каласкалаш, 2) кузе нелылык годымат Юмын эрыкшым шукташ примерым ончыкташ, да 3) шке языкдыме илышыж дене чыла еҥым тӱлен налаш. (Матфейын 20:28 лудын лекса.)

Тӱлен налмаш — тиде айдемым колымаш деч утарашлан тӱлымӧ ак (Исход 21:29, 30). Юмо еҥ-влаклан колымым да шоҥгеммым шонен огыл. Ме тидым кушеч палена? Юмо икымше айдемылан, Адамлан, тыгай шижтарымашым пуэн: тудо языкым ышта гын, кола. Тыгела, Адам языкым огеш ыште ыле гын, нигунамат ок коло ыле (Тӱҥалтыш 2:16, 17; 5:5). Библий дене келшышын, колымаш Адам гоч тӱняшке «толын». Адамын языкше чыла тукымжылан куснен, а язык  дене пырля — колымаш. Сандене Адам деч куснышо колымаш деч утарашлан мемнам тӱлен налаш кӱлеш. (Римлян-влаклан 5:12; 6:23 лудын лекса.)

Мемнам колымаш деч кӧ тӱлен налын кертеш? Колымеке, айдеме шке языкшылан веле акым тӱла. Ик языкан еҥат весыштын языклан акым тӱлен огеш керт. (Псалом 48:8—10 лудын лекса.)

Мемнан дене таҥастарымаште Иисус языкдыме айдеме лийын. Сандене тудлан шке языкше верч колаш огеш кӱл ыле, вет тудо нигунамат языкым ыштен огыл. Иисус вес еҥ-влакын языкышт верч колен. Мемнан верч колаш манын, Юмо шке Эргыжым мландыш колтен. Тыге Юмо айдеме тукымым кугу йӧратымыжым ончыктен. Иисусат мемнам йӧратымым ончыктен. Тудо Ачажым колыштын да мемнан языкна верч шке илышыжым пуэн. (Иоаннын 3:16; Римлян-влаклан 5:18, 19 лудын лекса.)

«Молан Иисус колен?» видеороликым ончалза.

Иисус мландыште илымыж годым черле-влакым паремден, колышо-влакым ылыжтен да эҥгекыш логалше-влаклан полшен. Тыге Иисус ончыктен, мом тудо Юмым колыштшо-влаклан ончыкылыкышто ышта (Матфейын 15:30, 31; Иоаннын 5:28). Кунам Иисус колен, Юмо тудым ылыжтен да тудлан шӱлыш капым пуэн (1 Петрын 3:18). Вара Иисус Юмын пурла могырышкыжо шинчын да жапым, кунам Ачаже тудлан уло мландым вуйлаташ властьым пуа, вучаш тӱҥалын (Еврей-влаклан 10:12, 13). Кызыт Иисус каваште Кугыжа семын вуйлата, а тудын почеш кайыше-влак уло мланде мучко поро уверым каласкалат. (Лукан 1:32, 33; Матфейын 24:14 лудын лекса.)

Вашке Иисус Кугыжа семын властьшым кучылтын, чыла орлыкым да осал еҥ-влакым пытара. Кӧ Иисуслан ӱшана да тудым колыштеш, чыланат рай мландыште курымеш илаш тӱҥалыт. (Псалом 36:9—11 лудын лекса.)