MWAHA WOOSOMIYA 52
Isiyani inhala unikavihera nakhalaka ni masukhuli?
“Unrihele nrinttyaa Yehova, ni uyova naarwa uwaakhela.”—ISAA. 55:22.
NCIPO 33 Meu Deus, Meu Amigo e Pai
NINHALA WIITTHUCANI? *
1. Isiyani inhala unikhumelelela nakhalaka ni masukhuli?
MAHUKU otheene anaanikhumelela masakha ni ninawiikurumica waanana ayo masakhaayo. Masi wakhalaka wiira niri ni masukhuli, unaarika venci waanana masankiho annikhumelela. Phimaana, nihaana niweheraka masukhuli khampa latarawu nopheela uninnyera ukhuluvela wihu, ulipa nrima wihu ni utteeliya urineehu. Ilivuru yo Miruku 24:10 ni niwehero naya ineera: “Wavololaka ukati wo masankiho, ikuru caa phinhala uthota.” Khweeliini, uvolola awula ukhala ni masukhuli pooti umaliha ikuru cimpheeleehu wiira nivilele marikariko o muukumini.
2. Citthuni cinnikhaliha ni masukhuli, ni isiyani ninhaleehu wiitthuca nhina ula mwahoola?
2 Cihaavo citthu cinci cinnikhaliha ni masukhuli. Nnyo pooti ukhala citthu cinvonyeehu, citthu cihinkhitiriihu upanka awula ikwerere inniwerya. Ciicammo, hiiva pooti ukhala ni masukhuli nlattu woohaakhela mumphwinkoni wa Yehova mirintti caapheeleehu wiira nivahaceriye awula nlattu woolalyeera ncoko waatthu ahinniviriyana. Nhina ula mwahoola, ninaahala woona citthu cinlamuliyeehu upanka wiira naanane masukhuliihu.
NAKHALAKA NI MASUKHULI NLATTU WO CITTHU CINVONYEEHU
3. Isiyani inhala unikavihera nakhalaka ni masukhuli nlattu wo citthu cinvonyeehu?
3 Hiiva pooti waakuva ukhala ni masukhuli nlattu wo citthu cinvonyeehu ni cihinkhitiriihu upanka. Atthunaka ninawancera wuupuwela wiira nlattu wo citthu cinvonyeehu, Yehova khanhala unihiya wiira nikele upeephoni. Wuupuwela commo unawoopiha. Vano, ninlamuliya uwehera cani citthu cinvonyeehu? Ibiiblya ineera wiira, unhiya Yesu Kristu paasi, “[apinaatamu] otheene ahottheka.” (Aroo. 3:23) Masi Mwaneene Ibiiblya, Yehova, khanweherera wiira nihivonye. Uhiya commo, uyo khanle Apaapeehu annifenta ni ampheela unikavihera. Yehova ciicammo naavilela. Uyo nawoona mananna cineekurumiceehu wiira nihipanke citthu cootakhala ni wiira nihitepe ukhala ni masukhuli. Khula ukati, Yehova naapheela unikavihera niiraati.—Aroo. 7:18, 19.
Yehova naacuwela citthu comaana cipankileehu khaalyi ni nanlelo cimpankeehu (Nwehe iparaagarafu 5) *
4-5. Isiyani inhimyaaya 1 Joau 3:19, 20 yaakavihenre asirokorihu eeli waanana masukhuli yaarinaaya?
4 Moone itthu yankhumelenle Deborah ni Maria. * Ukati Deborah waaryaawe mwanhima, amucyaawe yaanompanka ni yaanaamuulumela citthu caamoonihiiha ihaaya, ni waanaarika uttottopeliya wapuwani. Phimaana, uyo ahancera wiicoona ukhala ntthu oohiloka. Hataa avonyaka itthu yankaani paasi, uyo oopuwela wiira khiivo itthu yooloka yaapankaawe. Iyo ciicammo phi itthu yankhumelenle Maria. Amucyaawe ciicammo yaanompanka ni yaanaamuulumela citthu caamuulihiiha muru. Nlattu wo iyo, Maria kheecoona ukhalana ifayita. Hataa ukati waapattisiyaawe, uyo oopuwela wiira khawamphwanela ukhala Saahiti a Yehova.
5 Waanookhalaru commo, ayo asirokorihwaayo khahiile unswalela Yehova. Kontha isiyani? Kontha yahonlompa Yehova cinene ni yahonhimyera citthu cotheene caahela isukhuli. (Isaa. 55:22) Ayo ciicammo yahiitthuca wiira Apaapeehu o wiirimu, Yehova, anaacuwela wiira citthu cinnikhumelela pooti unikhaliha ni masukhuli menci. Masi ayo ciicammo anawoona citthu comaana cirineehu wanrimani—makhalelo omaana arineehu atthuna hiiva nihincuweleleehu wiira nihaana.—Nsome 1 Joau 3:19, 20. *
6. Ntthu neekurumica wiira ahiye upanka itthu yoohiloka, nokhala cani avonyanihaka awula aturuwelaka upanka iyo itthwiiyo?
6 Pooti ukhala wiira ntthu nawiikurumica venci wiira ahiye upanka itthu yoohiloka. Masi uyo pooti uvonyaniha awula uturuwela upanka iyo itthwiiyo. Yankhumelelaka iyo, uyo pooti uvololaca. Khunnanara ukhala ni masukhuli nlattu woovara itampi. (2 Akor. 7:10) Masi khaninlamuliya utepa ukhala ooriipiya nrima, mpaka wuupuwela co: ‘Khiivo itthu yoolaka impankaka. Yehova khanhala ukilevelela-tho.’ Ayo moopuwelelwaayo khanakhala omaana ni pooti umwiiriha ntthu uhiya unswalela Yehova. Nhiliyale itthu inhimyaaya ilivuru yo Miruku 24:10—wiira nakhalaka ni masukhuli, ikuru cihu cinaahala uthota. Uhiya uvololaca, nlokihace makhalelweenyu; munlompe Yehova ni munlepele wiira ooleveleleni. (Isai. 1:18) Yehova oonaka wiira nyuuva khweeliini nhottharuwa, uyo naahala wuulevelelani. Ciicammo, nwuulumane mahumu. Ayo anaahala wuuviriyanani saana, ni wuukaviherani ulokihaca upatthaniinyu ni Yehova.—Tiya. 5:14, 15.
7. Nlattuni nihinlamuliyeehu utepa ukhala ni masukhuli wakhalaka wiira ihaavo itthu yoohiloka inaananeehu wiira nihiye upanka?
7 Humu mmoca o França neehaniya Jean-Luc, nowiirelaka co ale aneekurumica uhiya upanka itthu yoohiloka: “Ntthu Yehova nomoonaawe ukhala ooloka, khanakhala ule hinvonya, masi phuule nottharuwa ni neekurumica urukunusa makhalelwaawe.” (Aroo. 7:21-25) Phimaana, nhitepe ukhala ni masukhuli wakhala wiira ihaavo itthu yoohiloka inaananeenyu wiira nhiye upanka. Nhiliyale wiira hiiva naatthu oopahuwa, phimaana khaavo ntthu iriyariihu nokhitiri ukhalana meettelo ooloka uhoolo wa Yehova nlattu wo wiikurumica wawe. Otheene cihu ninaapheela uthoonyeriya maana oonironya a Nluku, anithoonyenryaawe ukati unvaherenryaawe Mwanawe wiira anoopole.—Efesu 1:7; 1 Jo. 4:10.
8. Phaapani anhala unilipiha nakhalaka ni masukhuli?
8 Mayamunneehu ni asirokorihu o wanlokoni pooti unilipiha. Ayo pooti univiriyana saana ukati unompheeleehu ntthu oohala unhimyera itthu inniira ni pooti unihimyera moolumo anhala unimaaliha ni unilipiha. (Miru. 12:25; 1 Atesal. 5:14) Nrokorihu mmoca o Nigéria neehaniya Joy neekurumica waanana masukhuli, neera co: “Ahiri mayamunnaaka ni asirokoraka o wanlokoni, kaahala umalela vayi mi? Mananna cinkilipihaaya anthoonyera wiira Yehova nawaakhula mavekelwaaka. Ayo ahokiitthuciha wiira ni miiva ciicammo kaalipihe akhwaaka ari ni masukhuli.” Masi nihaana nuupuwelaka wiira ikwaha cikiina, mayamunneehu khancuwela ukati umpheeleehu ulipihiya. Phimaana, atthunaka nihaana nirwaaka umuulumana munna ookhomaala wiira ninhimyere itthu inniira.
NAKHALAKA NI MASUKHULI NLATTU WOOWERYAACIYA
9. Moolumo ari nhina Isaalimu 41:3 ni 94:19 annilipiha cani?
9 Nlepele ukaviheriya ni Yehova. Nakhalaka niikwerere ni venci-venci nakhalaka ukati mwinci niwerennyaka, hiiva pooti ukhala ni masukhuli. Ninaacuwela wiira Yehova khanaavoniha atthu mahukwaala. Masi uyo naanimaaliha ni naanivaha ikuru cimpheeleehu wiira nikhitiri uvilela. (Nsome Isaalimu 41:3; 94:19. *) Wootakihera, uyo pooti waakurumica mayamunneehu o wanlokoni wiira anikavihere uvara miteko cikiina co wapuwani awula wiira anithumele citthu cimpheeleehu. Uyo pooti uwiiriha mayamunna wiira alompe nkhayi ni hiiva. Awula Yehova pooti unikavihera wuupuwela iparakha coohoolo cihimiye mbiiblyani, toko iparakha inweherereehu uhoolo yoophwanya ukumi woohimala ni ukhala woohiweryaaciya.—Aroo. 15:4.
10. Isiyani yankavihenre Isang wiira akhitiri umaliha masukhuli yaarinaawe?
10 Isang, nokhala u Nigéria, ahaapanka asitente ni meetiku aheera wiira uyo khaahala weetta-tho. Isang neera: “Wahokiwerya nrima cinene ni kahokhala ni masukhuli menci.” Niireke uyo ahokhitiri umaliha masukhuli yaarinaawe? Iyee! Isiyani yankavihenre? Isang naattonka co: “Mi naamwaaraka khaninhiya unlompa Yehova ni usoma Nuulumo nawe. Hiiva ciicammo niholakela uhoolelihera wuupuwela iparakha cirineehu, toko niweherero noorwaa ukhala wapeephoni ikhuluvelihilyaawe Nluku.”
Hataa naale anweryaaciya pooti waatteela nrima nlattu wo wiikurumica ulalyeera (Nwehe iparaagarafu 11-13)
11. Isiyani yankavihenre Cindy ukhala ootteeliya hataa awerennyaka?
11 Cindy, nokhala u México, yahokela unwerya iretta yuulupale. Isiyani yankavihenre uvilela? Ukati waavahaciyaawe mirette usipiritaali, uyo aholakela ulalyeera khula nihuku. Uyo hantikha co: “Upanka iyo wahokikavihera utepa uwuupuwela akhwaaka ni uhikhala kuupuwelaka wooperariya waka ni iretta yaakiwerya. Mi kaapankaka co: Ukati woowuulumana mameetiku, kaanawaakoha wakhala wiira amucyaaya uwaani yahaavo salaama. Vano, kaanawaakoha isiyani iwiirihile uthanla uyo nteko woorikooyo. Kapankaka commo, khawaakirika uthanla mwaha waahala waacivela. Mameetiku enci yahokiirela wiira waanaarika nretta waakoha isalaama. Ni yahokisukhuru nlattu miiva woowacera makhalelwaaya. Mameetiku akhwaawe mpaka yahokivaha nummeru naya no telefooni. Waanookhalaru ukati woorika cinene, Yehova ahokitteeliha nrima venci niinanna yahaawehereraaka!”—Miru. 15:15.
12-13. Mayamunneehu ni asirokorihu akiina anwerennya ankhitiri cani ulalyeera, ni isiyani inaakhumelela nlattu wo wiikurumica waya?
12 Atthu anweryaaciya pooti ukhala ni masukhuli nlattu woohikhitiri uvara cinene nteko woolalyeera. Hataa ukhalaka commo, enci anwerennya anaakhitiri ulalyeera ni mananna makhwaawe. U Estados Unidos, arokorihu amoca yeehaniya Laurel yahokhala myaakha 37 anaataleliye mmaakinani yaakavihera umumula. Ayo ciicammo yahaakela iretta yowiipa ineehaniya cancro, yahooperariya ikwaha cinci ni cahaawerya iretta cikhwaawe. Masi ayo masakhaayo khayaahiihile arokorihu ulalyeera. Ayo yaanawaalalyeera mameetiku ni ananteko oosipiritaali akhwaawe yaawa uwannyaya. Nlattu woopanka commo, isiyani yaakhumelenle arokorihu? Ayo ahaakavihera wiitthuca ikhweeli atthu 17! *
13 Humu mmoca nokhala u França neehaniya Richard, nawaavaha nruku womaana ale ahinkhitiri ukhuma wapuwani waya. Uyo neera co: “Mi kinwiirela ayo mayamunnaayo wiira yeese ilivuru cihu nipuro nowoonya ninviravira atthu. Atthu anvira atthunaka anaahala woona ni upheela ucuwela mwaha unoolumaaya nnyo ilivurunnyo. Upanka commo pooti waakurumica mayamunneehu ahirina mananna ookhuma wapuwani waya wiira arwee ulalyeera mmawaani.” Ale ahinkhitiri ulalyeera mmawaani pooti ciicammo ulalyeera yavarelaka nteko iwarakha awula telefooni.
NAKHALAKA NI MASUKHULI NLATTU WOOHAAKHELA NRINTTI WANLOKONI
14. Isiyani mwene Davidi yaapankilyaawe inreera hiiva utakiha?
14 Nlattu woohikhitiri uvara citthu cikiina nooluvalaka, nlattu woowerennya ni nlattu wo citthu cikiina, atthunaka khaninhala uvahaceriya nteko awula nrintti waapheeleehu ukhalana wanlokoni wihu awula wasirikwiitu wihu. Wakhala wiira iyo phi itthu innikhumelela, ntakihero na mwene Davidi pooti unikavihera venci. Davidi aanaapheela cinene uteka itempulu ya Yehova. Masi wahoolo, uyo ahohimeriya wiira khaahala ukhalana iyo iparakheeyo. Waahookhalaru commo, uyo ahonkavihera venci ule aathanliye ni Nluku wiira avare uyo ntekooyo. Davidi mpaka ahovaha micanko wiira akavihere nteko wooteka itempulu ya Yehova. Khweeliini, unaareera cinene untakiha Davidi!—2 Sam. 7:12, 13; 1 Ikor. 29:1, 3-5.
15. Munna Hugues aakhitinri cani umaliha masukhulyaawe?
15 Munna mmoca nokhala u França neehaniya Hugues, ahohiya ukhala humu o wanlokoni nlattu wooweryaaciya. Uyo khaakhitiri uvara hataa citthu cankaani co wapuwani. Uyo hantikha: “Wiipaceroni, kahokhala ooriipiya nrima venci ni kahiicoona uhikhalana ifayita. Masi wahoolo, kahoona wiira kahaana kikupaliki wiira citthu cikiina akinhala ukhitiri uvara. Nlattu woopanka commo, mi kahokhala ootteeliya ni nteko waakhitiryaaka unvarela Yehova. Ni akimpheela uhiya wiikurumica. Toko Gideau wamoca naalopwanaawe 300—yeekurumicile hataa yoocyaaka—mi akinhala uhiya wiikurumica!”—Masuw. 8:4.
16. Isiyani ineetthuceehu noopuwelaka ntakihero no malayikha?
16 Malayikha ookhuluvelya anaavaha ntakihero nomaana nooreera hiiva utthara. Ikwaha imoca, Yehova aholepela malayikha wiira ahimye mananna oohala unthepya mwene oohinamaana Akabi. Malayikha menci yahovaha miruku. Masi Nluku aathanlile nruku waavahilyaaya nlayikha nimoca paasi. (1 Mam. 22:19-22) Niireke malayikha makiinaayo yahonyoonyiya nlattu wo iyo, ni wuupuwela co: ‘Kirihakacile ukatyaaka mahala, kivahaka nruku uhivareliye nteko’? Unawoonannya wiira mena! Khweeliini, malayikha anawiiyeviha ni ukati wotheene ampheela unttitthimiha Yehova!—Masuw. 13:16-18; Apoka. 19:10.
17. Nakhalaka ni masukhuli nlattu woohaakhela nrintti wanlokoni, isiyani ninlamuliyeehu upanka?
17 Nhiliyale nrintti muulupale urineenyu wookhala Saahiti a Yehova ni woolalyeera ihapari co Umwene. Mirintti cinaakheleehu mumphwinkoni wa Yehova cinaawa ni cinaavira. Masi nnyo mirinttinnyo kahi phinookhalihani ntthu ofayita uhoolo wa Yehova. Itthu imwiiriha ntthu ukhalana ifayita uhoolo wa Yehova, ukhanle wiiyeviha ni ukupali wiira citthu cikiina khanhala ukhitiri upanka. Phimaana, munlompe Yehova ni munlepele wiira ookavihereni uhihiya wiiyeviha. Nwuupuwele atthu enci yaari owiiyeviha anoolumiya mbiiblyani. Nlakele wiikurumica waapankela citthu mayamunneenyu o wanlokoni.—Isaa. 138:6; 1 Pet. 5:5.
NAKHALAKA NI MASUKHULI NLATTU WOOLALYEERA NCOKO WAATTHU AHIMPHEELA UNIVIRIYANA
18-19. Isiyani inhala wuukaviherani uhihiya ukhala ootteeliya, hataa mwalalyeeraka ncoko waatthu ahimpheela wuuviriyanani?
18 Nhopaca ukhala ni masukhuli nlattu woolalyeera ncoko waatthu oohipheela wuuviriyanani? Awula nlattu woolalyeera ncoko woorika waaphwanya atthu mmawaani? Wakhala wiira iyo phi itthu inookhumelelani, isiyani inlamuliyeenyu upanka wiira utteeliya winyu uhimale ni wiira ntepe ukhala ootteeliya? Ikwaaturu “ Isiyani inhala wuukaviherani utepa ukhala ootteeliya wuulalyeerani?”, inaahimya citthu cinhala wuukaviherani. Ciicammo, nihaana niweheraka ratta nteko woolalyeera. Toko cani?
19 Nhiliyale wiira itthu yuulupale inniiriha ulalyeera ukhanle waacuweliha atthu ncina na Yehova ni Umwennyaawe. Yesu ahohimya wiira atthu vakaani paahi paahala utthara iphiro inrweeha wuukumini. (Mat. 7:13, 14) Narwaaka wuulalyeerani, hiiva ninaakhalana iparakha yoovara nteko nkhayi ni Yehova, Yesu ni malayikha. (Mat. 28:19, 20; 1 Akor. 3:9; Apoka. 14:6, 7) Yehova nowaavya atthu ampheela unswalela. (Joau 6:44) Ntthu haakhelenle ratta ihapari cinlalyeereehu, pooti upheelaka uviriyana saana ukati nkiina unhaleehu unlalyeera.
20. Ilivuru ya Jeremiya 20:8, 9 innikavihera manannani wiira naanane oovololaca?
20 Ntakihero na porofeeta Jeremiya ninaaniitthuciha citthu cinci. Atthu o ncoko waarumiyaawe ulalyeera khayaatthuna unviriyana. Ayo atthwaayo yaanonveehaca ni yaanontarawaca “nihuku notheene.” (Nsome Jeremiya 20:8, 9. *) Uyo ahokhala ni masukhili menci mpaka ahuupuwela uhiya nteko woolalyeera. Masi uyo khaahiile. Kontha isiyani? Kontha “nuulumo na Yehova” naari khampa mooro mmirimani wawe, ni uyo khaakhitiri uvithavitha. Iyo phi itthu inniirannyeela nakhalanaka nuulumo na Nluku wanrimani wihu. Ni wiira nikhitiri iyo, nihaana nisomaka Ibiiblya khula nihuku ni wuupuwela insomeehu. Napankaka commo, ninaahala wincerera utteeliya wihu ni nteko woolalyeera unaahala unikhumela saana.—Jer. 15:16.
21. Isiyani ninlamuliyeehu upanka wiira nikhitiri umaliha masukhuliihu?
21 Deborah, romoliye wiipaceroni, neera: “Uvololaca ikhanle itapha yuulupale Sotwani invarelaawe nteko wiira anikhitiri.” Masi itapha ca Sotwani khacinakhala itthu nalattanihaka niikuru cirinaawe Yehova. Phimaana, wakhala wiira ihaavo itthu inoovololihani awula inookhalihani isukhuli, munlepele Yehova wiira ookavihereni. Uyo naahala wuukaviherani uhitepa ukhala ni masukhuli nlattu wo citthu cinvonyeenyu ni cihinkhitiriinyu upanka. Naahala wuukaviherani mwawerennyaka. Naahala wuulipihani wakhala wiira uhaavo nrintti awula nteko wo wanlokoni wowuucivelani uhivahaceriyeenyu. Uyo naahala wuukaviherani uwehera ratta nteko woolalyeera. Munlompe Yehova ni munhimyere citthu cotheene cinoohelani isukhuli. Uyo naahala wuukaviherani umaliha masukhuliinyu!
NCIPO 41 “Ouve a Minha Oração”
^ par. 5 Imaara ikhwaawe, otheene cihu ninaakhalaka ni masukhuli. Ula mwahoola unaahala uthoonyera citthu ninlamuliyeehu upanka nakhalaka ni masukhuli. Ni toko cinhaleehu woona, Yehova naahala unikavihera waanana masukhuliihu.
^ par. 4 Macina makiina ahaakakhanihiya.
^ par. 5 1 Joau 3:19 Coo, phinhaleehu ucuwela wiira nineettela ikhweeli ni ninaahala umaaliha nrimeehu uhoolo wawe 20 khula ukati nrimeehu unhalaaya unihukhumu wiira nihovonya, kontha Nluku muulupale uvikana nrimeehu ni uyo naacuwela citthu cotheene.
^ par. 9 Isaalimu 41:3 Yehova naahala ummaaliha wankorini woowerennya. Ukati unwerennyaawe, unaahala unwacera saana. 94:19 Ukati masukhulyaaka utepalyaaya winciva, weeva uhokipisiha nrima ni uhokimaaliha.
^ par. 12 Nsome ihantisi yaarokorihu Laurel Nisbet nhina irevista Despertai! 22 yo Janeiro yo 1993.
^ par. 20 Jeremiya 20:8 Kontha khula ukati kinoolumaaka, kihaana kikhuwaka, kiiraka: “Ikhirini ni ihasara!” Nlattu wo nuulumo na Yehova akinreera uruwaniya ni utarawaciya ncuwa notheene. 9 Vano mi kiheera: “Akinhala umuuluma-tho, ni akinhala ulalyeera-tho ncina nawe.” Masi, nuulumo nawe nihokhala khampa mooro woopharela wanrimani waka, mmakhuvani waka; kahoocyaa umaalana, akaakhitinri-tho uvithavitha.
^ par. 72 ILATARATO: Arokorihu ari ni masukhuli, masi ayo anawuupuwela nteko unvarenlyaaya Yehova khalayi ni anaalompa. Ayo anaakupali wiira Nluku khaliyanle nteko unvarenlyaaya ni khanliyala nteko nanlelo unonvarelaaya.
