Yobo 9:1-35
9 Yobo wakandamuna ne:
2 “Mu bulelela, ndi mumanye ne: bidi nanku.
Kadi mmunyi mudi muntu ufuafua eu mua kubinga yeye tshilumbu ne Nzambi?+
3 Muntu yeye musue kuelangana Nende,*+Yeye au kena mua kuandamuna lukonko nansha lumue lua mu nkonko Yende tshinunu to.
4 Yeye udi ne meji mu muoyo ne bukole bua bungi.+
Nnganyi udi mua kumukandamena kayi upeta njiwu?+
5 Udi usemeja* mikuna kakuyi muntu udi umanya bualu ebu;Udi uyitonkola mu tshiji tshiende.
6 Udi unyukula buloba, ubumbusha muaba wabu,Bifikisha makunji abu ku dizakala.+
7 Udi utumina dîba dîyi bua kadikenkiNe ujika butoke bua mitoto;+
8 Yeye nkayende udi ubalula diulu,+Ne udi wendela pa mutu pa mavuala male a mbuu.+
9 Wakenza bisumbu bia mitoto bia Asha,* Kezila,* ne Kima,*+Ne bisumbu bia mitoto bidi muulu ku sud;*
10 Udi wenza malu manene adi kaayi kulondolola,+Malu a dikema adi bungi kabuyi kubala.+
11 Udi upitshila pabuipi nanyi, tshiena mua kumumona;Udi umpita, kadi tshiena mmujingulula.
12 Padiye udiapula tshintu, nnganyi udi mua kumukandamena?
Nnganyi udi mua kumuambila ne: ‘Tshiudi wenza ntshinyi?’+
13 Nzambi kakukanda tshiji tshiende to;+Nansha bambuluishi ba Lahaba*+ nebamuinamine.
14 Kadi anu meme? Pandi mmuandamuna,Ndi ne bua kusungula mêyi anyi bimpe bua kuelangana nende!
15 Nansha bu meme mubinge, tshivua mua kumuandamuna to.+
Mvua anu mua kulomba mulumbuluishi wanyi* luse.
16 Meme mumubikile, neangandamune anyi?
Tshiena ngitabuja ne: neateleje dîyi dianyi to,
17 Bualu yeye udi unzaza ne tshipepele tshikole,Uvudija mputa yanyi kakuyi bualu.+
18 Kena undekela bua meme kueyela to;Yeye udi utungunuka ne kunguwuja ne bintu bia bululu.
19 Bikalabi bua bukole, yeye ke muena makanda.+
Bikalabi bua kulumbuluisha kuakane, udi wamba ne: ‘Nnganyi udi mua kundumbuluisha?’*
20 Bu meme mubinge, mukana muanyi muine muvua mua kumpisha;Nansha meme mulame muoyo wanyi mutoke,* yeye neangambe ne: ndi mupile.*
21 Nansha meme mulame muoyo wanyi mutoke,* tshiena ne dishindika bua bualu buanyi to;*Tshiena musue* muoyo undi nawu.
22 Bionso bidi muomumue. Ke bualu kayi ndi ngamba ne:‘Yeye udi ubutula badi kabayi ne bualu* ne babi muomumue.’
23 Bikala dipasalala dia mâyi dia tshintuluntulu dikebesha lufu lua tshimpitshimpi,Yeye udi useka dishikila dia badi kabayi ne bualu.
24 Buloba mbufidibue kudi muntu mubi;+Yeye udi ubuikila mêsu* a balumbuluishi babu.
Bikalaye kayi yeye, kadi nnganyi?
25 Nunku, matuku anyi adi ne lubilu kupita munyemi wa lubilu;+Adi anyema lubilu kaayi amona bualu buimpe.
26 Adi afinunuka bu matu a malenge,Bu mikanku idi ipueka lubilu bua kubakula tshiakudia tshiayi.
27 Meme muambe ne: ‘Nempue didilakana dianyi muoyo,Nenkudimune tshilunji tshianyi ne nensangale,’
28 Nengikale anu ne buôwa bua bionso bidi binsama,+Ne ndi mumanye ne: kuakumbala bu udi kayi ne bualu to.
29 Ndi mua kubadibua bu mupile.*
Nunku, bua tshinyi ndi mua kuluangana bua patupu?+
30 Meme muowe mâyi a neje idi yenguluka,Ne mutokeshe bianza bianyimu buanga bua nsabanga,*+
31 Dîba adi neungele mu tshina,Bifikisha too ne bilamba bianyi meme muine ku dinkina.
32 Bualu yeye kena muntu bu mundi bua meme kumuandamuna,Bua tuetu kuya nende bonso ku tshilumbuluidi to.+
33 Kakuena muntu wa kukosa nsambu* pankatshi petu,Udi mua kuikala mulumbuluishi wetu* to.
34 Yeye mulekele kuntuta,*Ne kayi ulekela buôwa bukole bua bualu buende buntshinyisha,+
35 Dîba adi nengakule nende tshiyi ne buôwa,Bualu ki mbuôwa butu bunsaka bua kuakula to.
Mamanyisha
^ Anyi “kuya Nende ku tshilumbu.”
^ Anyi “umbusha.”
^ Pamuapa ntshisumbu tshia mitoto tshia Urse Munene.
^ Ku mua.: “nzubu ya munda ya ku sud.”
^ Pamuapa mmitoto ya Tshidimina nzaji idi mu tshisumbu tshia mitoto tshia Taureau (Ngombe).
^ Pamuapa ntshisumbu tshia mitoto tshia Orion.
^ Pamuapa nnyama munene wa mu mbuu.
^ Anyi pamuapa: “muluishi wanyi udi nanyi ku tshilumbuluidi.”
^ Ku mua.: “kumbikidisha?”
^ Anyi “Nansha meme tshiyi ne bualu.”
^ Ku mua.: “mukonyangale.”
^ Anyi “Nansha meme tshiyi ne bualu.”
^ Anyi “tshiena mumanye anyima wanyi to.”
^ Anyi “Ndi mpepeja; Ndi mbenga.”
^ Anyi “badi balama muoyo mutoke.”
^ Ku mua.: “ku mêsu.”
^ Ku mua.: “muntu mubi.”
^ Anyi “binshidimba.”
^ Anyi “Kakuena mutuangaji.”
^ Ku mua.: “kuteka tshianza tshiende pa mutu petu babidi.”
^ Ku mua.: “mumbushe mutshi wende pambidi panyi.”
