Yobo 39:1-30
39 “Udi mumanye tshikondo tshitu mbuji ya ku mikuna ilela+ anyi?
Ukadi mutangile bimpe ngulungu padiyi ilela bana bayi anyi?+
2 Utu ubala ngondo idiyi ne bua kukumbaja anyi?
Utu mumanye tshikondo tshituyi ilela anyi?
3 Idi ipuekelela panshi padiyi ilela bana bayi,Kudinyenga kuayi kua pa kulela kudi kujika.
4 Bana bayi badi bapeta bukole, bakolela mu mpata mualabale;Badi bapatuka ne kabena bapingana kudiyi.
5 Nnganyi uvua mulekelele mpunda wa tshisuku?*+Nnganyi uvua musulule mionji ya mpunda wa tshisuku?
6 Ndi muvuije mpata wa tshipela nzubu wendeNe buloba bua mukele muaba wende wa kusombela.
7 Udi useka mitoyi mikole ya mu tshimenga;Kena umvua mbila ya musaki wa nyama.
8 Udi utambakana pa mikuna, ukeba muaba wa kudiila,Wenda ukeba tshisonsa tshionso tshibishi.
9 Ngombe wa tshisuku udi mua kuitaba bua kukuenzela mudimu anyi?+
Nealale butuku mu tshikumbi* tshiebe anyi?
10 Neusuike ngombe wa tshisuku ne muonji bua ele mabula anyi?Peshi neakulonde bua kubundulula* mu tshibandabanda anyi?
11 Neweyemene bukole buende bua bungiNe umulekela wenza mudimu webe mukole anyi?
12 Neumutekemene bua kuluaye ne bia pa madimi* biebe anyi?Neabisangishe muaba webe wa kubishipuila anyi?
13 Mapuapua a nyunyi wa mfiondo adi apapala ne disanka,Kadi nsongo ya mapuapua ende ne masala ende bidi mua kutembangana ne bia kasonga nyunyi anyi?+
14 Bualu udi ushiya mayi ende mu buloba,Ne ualama ne luya mu lupuishi.
15 Yeye udi upua muoyo ne: dikasa didi mua kuazaza,Peshi ne: nyama wa tshisuku udi mua kuadiata.
16 Udi wenzela bana bende malu ne tshikisu, anu bu badi kabayi bende;+Kena utshina ne: mudimu wende mukole udi mua kulua tshianana to.
17 Bualu Nzambi mmumupale* mejiNe ki mmumupeshe tshitupa tshia lungenyi to.
18 Kadi padiye ujuka ne ututa mapuapua ende,Udi useka kabalu ne mukendeshi.
19 Wewe ke udi mupeshe kabalu bukole buaku anyi?+
Utu uvuadika nshingu waku musalala udi upepa anyi?
20 Udi mua kukenzeja bua kutumpika bu mpasu anyi?
Kupemba kuaku kua dikema kudi kuenza buôwa.+
21 Kadi katua bikono biaku panshi mu tshibandabanda, katunka ne bukole buonso;+Kadi kaditua mu mvita lubilu.*+
22 Kadi kaseka buôwa ne kakena katshina tshintu nansha tshimue.+
Kakena kapingana tshianyima bua muele wa mvita.
23 Nsapu wa mikete udi udila padiye udikuma pambidi paku,Difuma dinene ne dikese adi apita lubilu.
24 Kadi kazakala kazuka, kadiela kumpala lubilu,*Kakena mua kushala kimane padiku* kumvua muadi wa mpungi.
25 Padi mpungi udila, kadi kamba ne: ‘Ale!’
Kadi kumvuila mupuya wa mvita ku buleNe kumvua mbila ya tumanda ne tshikemu tshia mvita.+
26 Nku lungenyi luebe kudi nyunyi wa mvulu ubuuka muulu,Mubalule mapuapua ende mutangile ku sud anyi?
27 Peshi nku dîyi diebe kudi nyunyi wa mukanku ubanda muulu+Ne wenzela disua diende muulu mule,+
28 Ulala butuku pa lubuebue,Musombele muaba wende wa kusokomena pa mukuna wa dibue* anyi?
29 Udi ukeba tshiakudia muikale kuoku aku;+Mêsu ende adi amona kule menemene.
30 Bana bende badi banua mashi;Muaba wonso udi bitalu, kuoku aku nkudiye.”+
Mamanyisha
^ Anyi “Onagre.”
^ Anyi “tshidiilu.”
^ Anyi “kusekununa ne bikasu.”
^ Ku mua.: “mamiinu.”
^ Ku mua.: “mumufikishe ku dipua muoyo.”
^ Ku mua.: “Kadi kapatuka bua kusambakena ne bia mvita.”
^ Ku mua.: “kamina buloba.”
^ Anyi pamuapa: “Kakena kitabuja bua.”
^ Ku mua.: “pa dînu dia dibue dinene.”
