Yobo 36:1-33
-
Elihu udi utumbisha bunene bua Nzambi budi kabuyi kulondolola (1-33)
36 Elihu wakatungunuka, wamba ne:
2 “Ikala nanyi lutulu ndambu pantshidi ngakula,Bualu ntshidi ne mêyi a kuakula bua bualu bua Nzambi.
3 Nengakule malu onso a bualu bundi mumanye,Nengambe mudi Mufuki wanyi+ ne buakane.
4 Bulelela, mêyi anyi ki nga dishima to;Yeye udi ne dimanya dipuangane+ udi muaba eu kumpala kuenu.
5 Bushuwa, Nzambi udi ne bukole,+ ne katu ubenga muntu nansha umue;Mmunene mu bukole buende bua dijingulula dia malu.*
6 Kakulama mioyo ya bantu babi to,+Kadi udi upesha bakengi kulumbuluisha kuakane.+
7 Kena umbusha mêsu ende kudi bantu bakane;+Udi ubateka mu nkuasa ya bukalenge+ ne bakalenge,* ne badi batumbishibua bua kashidi.
8 Kadi bikalabu basuikibue nkanuNe bakuatshibue mu mionji ya dikenga,
9 Udi ubasokoluela malu adibu benze,Dishipa diabu dia mikenji dikebesha kudi lutambishi luabu.
10 Udi ujikula matshi abu bua bumvue mubelu,Ne ubambila bua kumbuka ku dienza dia malu mabi.+
11 Bobu bamutumikile ne bamuenzele mudimu,Nebalale matuku abu onso a muoyo bikale ne diakalengele,Ne bidimu biabu nebikale bia disanka.+
12 Kadi bobu kabayi batumikile, nebajimine ku muele wa mvita,*+Ne nebafue kabayi ne dimanya.
13 Badi babenge Nzambi* mu muoyo wabu nebalame tshiji.
Kabena badila bakeba diambuluisha nansha padiye ubasuika.
14 Badi bafua* patshidibu bansonga,+Bapitshishila* matuku abu a muoyo munkatshi mua bandumba balume ba ku ntempelo.+
15 Kadi Nzambi* udi usungila bakengi padibu mu dikenga diabu;Udi ujikula ditshi diabu padibu bakengeshibua.
16 Udi ukumbusha ku dikenga didi diamba kudituta,+Uya nebe muaba mualabale udi kawuyi mufimpakane,+Ne biakudia bia manyi biteka pa mêsa ebe bu busambi.+
17 Nunku neusanke bua dilumbuluisha dia bantu babi,+Pikalabu bakose tshilumbu ne balonde kulumbuluisha kuakane.
18 Kadi udimuke bua luonji kalukufikishi ku muoyo mubi,*+Ne kuitabi bua mbuejilu munene akupambuishe to.
19 Muadi webe bua kulomba diambuluishaAnyi diditatshisha diebe dikole nebikuepule ku dikenga anyi?+
20 Kujingi bua butuku buile,Padi bantu bajimina pa miaba yabu nansha.
21 Udimuke bua kunyemenyi ku dienza dia malu mabi,Usungula bualu ebu pamutu pa dikenga.+
22 Mona! Nzambi mmutumbishibue mu bukole buende;Mmulongeshi kayi udi bu yeye?
23 Nnganyi udi muludike* njila wende,+Peshi mumuambile ne: ‘Tshiudi muenze ntshibi’?+
24 Uvuluke bua kutumbisha mudimu wende+Udi bantu bimbile misambu.+
25 Bantu bonso mbawumone,Muntu ufuafua udi utangidila ku bule.
26 Eyowa, Nzambi mmunene kupita mutudi mua kumanya;+Bungi bua bidimu biende mbukole mua kubujingulula.*+
27 Udi ukoka mamata a mâyi muulu;+Adi afumina ku dibungi akuatakana alua mvula;
28 Pashishe matutu adi amuitshikija;+Adi alokela bantu.
29 Muntu udiku mua kujingulula bitatutatu bia matutu,Mukungulu udi ufumina mu ntenta wende* anyi?+
30 Tangila mudiye utangalaja mupenyi wende*+ pa mutu pendeNe ubuikila ndondo wa* mbuu.
31 Udi ukuatshisha* bukua bantu ne bintu ebi;Udi ubapesha biakudia bipite bungi.+
32 Udi ubuikila mupenyi ne bianza biende,Ne udi uwuludika bua ukume kudiwu ne bua kukuma.+
33 Dikubakuba diende didi diakula bua bualu buende,Nansha bimuna bidi bimanyisha udi ulua.*
Mamanyisha
^ Ku mua.: “muoyo.”
^ Anyi pamuapa: “Udi uteka bakalenge mu nkuasa.”
^ Anyi “ku tshia mvita (tshitubu basa).”
^ Anyi “batontolodi.”
^ Anyi “Anyima wabu udi ufua.”
^ Anyi pamuapa: “Bajikijila.”
^ Ku mua.: “Yeye.”
^ Anyi “dituta bikashi dia muoyo mubi.”
^ Anyi pamuapa: “mubipishe; mumulumbuluishe.”
^ Anyi “kabuena kubala.”
^ Ku mua.: “katanda kende.”
^ Ku mua.: “butoke buende.”
^ Ku mua.: “miji ya.”
^ Anyi pamuapa: “ulumbuluila.”
^ Anyi pamuapa: “tshidi tshilua.”
