Yobo 33:1-33
33 “Kadi mpindieu, Yobo, umvua koku mêyi anyi;Teleja malu onso andi ngamba.
2 Tangila koku! Ndi ne bua kukangula mukana muanyi;Ludimi luanyi* ludi ne bua kuakula.
3 Mêyi anyi adi amanyisha bululame bua muoyo wanyi,+Ne mishiku yanyi idi yamba mu bulelela malu andi mumanye.
4 Nyuma wa Nzambi wakamfuka,+Ne mupuya wa Wa Bukole Buonso wakamvuija ne muoyo.+
5 Ngandamuna ni udi mua kukokesha;Akula mêyi a kudibingisha nawu kumpala kuanyi; dilongolola.
6 Mona! Kumpala kua Nzambi mulelela ndi anu bu wewe;Bavua bamfumbe panyi ne diima.+
7 Nunku, buôwa bua bualu buanyi kabukuzakeji to,Ne difinakaja didi difumina kundi kadikupitshi bukole to.
8 Kadi wewe wakakula mu matshi anyi,Eyowa, mvua ntungunuka ne kuteleja mêyi aa:
9 ‘Ndi mukezuke, tshiyi nshipa mikenji;+Ndi mukezuke, tshiyi ne kalema.+
10 Kadi Nzambi udi ukeba malu a kunduishila;Udi ungangata meme bu muena lukuna wende.+
11 Udi wela makasa anyi mu bikunyi;Udi ukonkonona njila yanyi yonso.’+
12 Kadi kuena mubinge paudi wamba nanku to, nunku nenkuandamune ne:
Nzambi mmunene bikole kupita muntu ufuafua.+
13 Bua tshinyi udi umubanda Yeye?+
Mbua muvuaye kayi muandamune mêyi ebe onso anyi?+
14 Bualu Nzambi udi wakula musangu wa kumpala ne musangu muibidi,Kadi muntu nansha umue kena uteya ntema,
15 Mu tshilota, mu tshikena kumona tshia butuku,+Padi tulu tukole tukuata bantu,Padibu balale pa malalu abu.
16 Dîba adi yeye udi ukangula matshi abu+Ne ufunda* mêyi ende pambidi pabu,
17 Bua kumbusha muntu ku dienza dia malu mabi+Ne bua kukuba muntu ku lutambishi.+
18 Nzambi udi wepula anyima* wende ku dijimba,*+Muoyo wende ku dibutuka ku muele wa mvita.*
19 Muntu udi kabidi ubedibua pa bulalu buende kudi bidi bimusamaNe kudi dikenga dia mifuba yende didi kadiyi dijika,
20 Bimufikisha yeye muine* ku dikina mampa,Ne ku dibenga too ne biakudia bimpe.+
21 Misunyi yende idi umueneka ku mêsu minyane bikole,Ne mifuba yende ivua misokome idi mpindieu midisunge.*
22 Anyima* wende udi usemena pabuipi ne dijimba,*Muoyo wende udi usemena pabuipi ne badi balua ne lufu.
23 Bikalaku mutuadi wa mukenji* buende yeye,Muakuidi umue munkatshi mua tshinunu,Bua kuambila muntu tshidi tshilulame,
24 Dîba adi Nzambi udi umuleja luse, wamba ne:‘Muepula, kapueki mu dijimba* to!+
Ndi mupete tshintu tshia kumupikula natshi!+
25 Musunyi wa pambidi pende ulue mupiamupia kupita* wa ku buana;+Apingane ku matuku a makanda a ku bunsonga buende.’+
26 Neatendekene Nzambi+ wamuitaba,Neamone mpala Wende ne mbila ya disanka,Ne Yeye neapingajilule buakane Buende kudi muntu ufuafua.
27 Muntu au neamanyishe* bantu ne:‘Ndi muenze mpekatu+ nemukonyangaje malu makane,Kadi tshivua mupete tshivua tshinkumbanyine* to.
28 Yeye mmukuule anyima* wanyi bua kapueki mu dijimba,*+Ne muoyo wanyi newumone butoke.’
29 Bushuwa, Nzambi udi wenza malu onso aaMisangu ibidi, misangu isatu, bua muntu,
30 Bua kumupatula* mu dijimba,*Bua atokeshibue ne butoke bua muoyo.+
31 Teya ntema, Yobo! Nteleja!
Shala mupuwe, nentungunuke ne kuakula.
32 Wewe ne bualu bua kuamba, ungandamune.
Wakule, bualu ndi musue kuleja muudi mubinge.
33 Biwikala kuyi ne tshia kuamba, unteleje;Shala mupuwe, meme nenkulongeshe meji.”
Mamanyisha
^ Ku mua.: “Ludimi luanyi pamue ne tshilakalaka tshianyi.”
^ Ku mua.: “utua tshitampi pa.”
^ Anyi “muoyo.”
^ Anyi “lukita.”
^ Anyi “ku tshia mvita (tshitubu basa).”
^ Ku mua.: “Bifikisha anyima wende.”
^ Anyi “mishale patoke.”
^ Anyi “muoyo.”
^ Anyi “lukita.”
^ Anyi “muanjelu.”
^ Anyi “lukita.”
^ Anyi “ne makanda a mubidi kupita.”
^ Ku mua.: “neimbile.”
^ Anyi pamuapa: “Ne kabivua bingambuluishe to.”
^ Anyi “muoyo.”
^ Anyi “lukita.”
^ Anyi “kupatula anyima wende.”
^ Anyi “lukita.”
