Yoshua 4:1-24
-
Mabwe a kwikala bu kivulukilo (1-24)
4 Papwile’tu muzo onso kwabuka Yodano, Yehova wanena Yoshua amba:
2 “Sela bana-balume 12 mu bantu, mwana-mulume umo ku kisaka ne kisaka,+
3 wibasoñanye amba: ‘Boyai mabwe 12 mu bukata bwa Yodano, popa padi pemene maulu a babitobo,+ mwiaselei ne kwiatūla pa kifuko pomukalāla bufuku.’”+
4 Ebiya Yoshua waita bana-balume 12 baatongele mu bene Isalela, mwana-mulume umo ku kisaka ne kisaka,
5 kadi Yoshua webanena’mba: “Pitai kumeso kwa Sanduku wa Yehova Leza wenu mu bukata bwa Yodano, muntu ense ufwaninwe kusela dibwe pa kipuji kyandi, mungya bungi bwa bisaka bya bene Isalela,
6 akekala bu kiyukeno mu bukata mwenu. Shi benu bana* bakemwipangule mwenda mafuku amba, ‘Kyomutūdīle ano mabwe pano i kika?’+
7 mufwaninwe kwibalondolola’mba: ‘I mwanda wa mema a Yodano aimikilwe kumeso kwa sanduku+ wa kipwano kya Yehova. Sanduku pa kwabuka Yodano, mema a Yodano aimikilwe. Ano mabwe akekala bu kivulukilo* kya myaka na myaka ku bantu ba Isalela.’”+
8 Penepo bene Isalela balongela monka mwasoñaninye’kyo Yoshua. Baboya mabwe 12 mu bukata bwa Yodano monka mobalombwedile’kyo Yoshua kudi Yehova, kukwatañana na bungi bwa bisaka bya bene Isalela. Beaselela pa kifuko pobadi ba kulāla bufuku, beatūla ponka.
9 Yoshua nandi watentakanya mabwe 12 pamo mu bukata bwa Yodano pa kifuko padi patyimpile maulu a babitobo badi baselele sanduku wa kipwano,+ kadi mabwe’a akidi’po kufika ne dyalelo.
10 Babitobo badi baselele Sanduku bashele bemene mu bukata bwa Yodano enka ne byapwile Yoshua kulombola bantu bintu byonso byamusoñenye Yehova, kukwatañana na byonso byobasoñenye Yoshua kudi Mosesa. Mu kitatyi kyonso’kya, bantu badi babuka bukidibukidi.
11 Bantu bonso pa kupwa’tu kwabuka, Sanduku wa Yehova ne babitobo nabo baabuka ku meso a bantu.+
12 Ne bene Lubeni, ne bene Ngade, ne kipindi kya kisaka kya Manase baabuka baenda mu mulongo wa bulwi+ kumeso kwa bene Isalela bakwabo, monka mwebalombwedile’kyo Mosesa.+
13 Kintu kya basola 40 000 belumbile byabulwi baabuka ku meso a Yehova mu malungu a Yediko mudi zolē.
14 Mu dine difuku’dya Yehova wazunzula Yoshua ku meso a Isalela yense,+ kadi bamulēmeka bininge* mu mafuku onso a būmi bwandi, monka mobadi balēmekēle Mosesa bininge.+
15 Kupwa Yehova wanena Yoshua amba:
16 “Nena babitobo baselele sanduku+ wa Bukamoni babuke mu Yodano.”
17 Ponkapo Yoshua wasoñanya babitobo amba: “Abukai mu Yodano.”
18 Babitobo badi baselele sanduku+ wa kipwano kya Yehova pa kwabuka mu bukata bwa Yodano ne binyantyilo bya maulu a babitobo pa kunyata pa nshi myūmu, mema a Yodano ashilula monka kukuka mulungu ayula ne pa milomo+ moadi ayudīle dibajinji.
19 Penepo bantu baabuka Yodano mu difuku dya dikumi dya kweji mubajinji batūla nkambi ku Ngilengale+ ku mukalañano wa kutunduka kwa Yediko.
20 Ino mabwe 12 obaselele mu Yodano’a, Yoshua weatentakanya pamo ku Ngilengale.+
21 Kupwa wanena bene Isalela amba: “Shi mwenda mafuku benu bana abaipangula bashabo amba, ‘Le ano mabwe ashintulula bika?’+
22 mufwaninwe kushintulwila benu bana’mba: ‘Isalela waabukile Yodano pa nshi myūmu+
23 paumije Yehova Leza wenu mema a Yodano ku meso abo enka ne byotwaabukile’ye, monka mwālongēle Yehova Leza wenu pa Dijiba Dityila pawaumije’dyo ku meso etu enka ne byotwaabukile’dyo.+
24 Walongele namino mwanda wa bantu bonso ba pa ntanda bayuke mukomene kuboko kwa Yehova+ ne mwanda wa nenu mutyine Yehova Leza wenu mafuku onso.’”
Kunshi kwa Dyani
^ Kishima pa kishima i, “bana bana-balume.”
^ Nansha’mba “kya kuvuluja.”
^ Kishima pa kishima i, “bamutyina.”
