Yoshua 13:1-33
13 Ebiya Yoshua wadi ke mununu wa myaka mingi.+ Penepa Yehova wamunena’mba: “Kodi mununu wa myaka mingi; ino kukishele kipindi kikatampe kya ntanda kya kuyata.*
2 Ino yo ntanda ikishele’ko:+ matanda onso a bene Fidishitia ne a bene Ngeshula bonso+
3 (tamba ku musapa wa Nile* udi kutunduka* kwa Edipito kukanda kufika ne ku mukalañano wa Ekalone dya kungala, yadi imonwa bu ntanda ya bene Kenani)+ kubadila’mo ne yoya ya bamfumu batano ba bene Fidishitia+—bene Ngaza, bene Ashedoda,+ bene Ashekelona,+ bene Ngata,+ ne bene Ekalone;+ yoya ya bene Avime+
4 dya kunshi; ntanda yonso ya bene Kenani; Meala wa bene Shidona,+ kufika ne ku Afeke dya ku mukalañano wa bene Amole;
5 ntanda ya bene Ngebale+ ne Lebanona ense dya kutunduka, tamba ku Bāla-Ngade dya munshi mwa Lūlu lwa Helemone kutūla ne ku Lebo-Hamata;*+
6 bekadi bonso ba mu ntanda ya ngulu tamba ku Lebanona+ kutūla ku Miselefote-Maimi;+ ne bene Shidona+ bonso. Nsa kwibapanga* ku meso a bene Isalela.+ Ufwaninwe’nka kupyanika’yo Isalela, monka monakusoñaninye.+
7 Shi ke pano ufwaninwe kwabanya ino ntanda bu bupyani ku bisaka kitema ne ku kipindi kya kisaka kya Manase.”+
8 Ino kipindi kikwabo kya kisaka, ne bene Lubeni ne bene Ngade bapyene bupyani bwabo bwebapele Mosesa bukila bwa Yodano bwa kutunduka, monka mwebapedile’bo Mosesa mwingidi wa Yehova:+
9 tamba ku Aloele+ udi kufulakufula kwa Musanza wa Alenona,*+ ne kibundi kidi mu bukata mwa musanza, ne dilungu dyonso dya pa mutenta* wa Medeba kufika ne ku Dibone;
10 ne bibundi byonso bya Mulopwe Shihone wa bene Amole, wadi ubikele mu Heshebone, kukanda kufika ne ku mukalañano wa bene Amone;+
11 kadi ne Ngileade ne ntanda ya bene Ngeshula ne ya bene Makati+ ne Lūlu lonso lwa Helemone ne Bashane+ ense kufika ne ku Saleka;+
12 ntanda yonso ya bulopwe bwa Oka mu Bashane, wadi ubikele mu Ashetalote ne mu Edelei. (Wadi umo wa mu ba mfulo ba ku bene Lefaime.)+ Mosesa webanekenye webapanga.*+
13 Ino bene Isalela kebapangilepo*+ bene Ngeshula ne bene Makati, mwanda Ngeshula ne Makati badi mu bukata mwa Isalela kufika ne dyalelo.
14 Enka kisaka kya bene Levi kete kyo kyakapelepo bupyani.+ Byamulambu byelwanga na mudilo kudi Yehova Leza wa Isalela bo bupyani bwabo,+ monka mwaebalaile’kyo.+
15 Penepa Mosesa wapa kisaka kya bene Lubeni bupyani mungya mafu abo,
16 ne ntanda yabo yadi ishilwila ku Aloele udi kufulakufula kwa Musanza wa Alenona,* ne kibundi kidi mu bukata mwa musanza, ne dilungu dyonso dya pa mutenta dya ku Medeba;
17 Heshebone ne bibundi byakyo byonso+ bya mu dilungu dya pa mutenta, Dibone, Bamote-Bāla, Bete-Bāla-Meone,+
18 Yahaza,+ Kedemote,+ Mefate,+
19 Kidiataimi, Sibema,+ ne Zelote-Shahale pa lūlu lwa mu musanza,*
20 Bete-Peole, matēlo a Pisika,+ Bete-Yeshimote,+
21 bibundi byonso bya mu dilungu dya pa mutenta, ne ntanda yonso ya bulopwe bwa Mulopwe Shihone wa bene Amole, wadi ubikele mu Heshebone.+ Mosesa wamunekenye+ pamo ne bamfumu ba bene Midyana, ba Evi, Lekema, Zula, Hula, ne Leba,+ babilolo* ba Shihone badi bashikata mu ntanda’ya.
22 Balame+ mwanā Beole, mbuki,+ i umo waipailwe na bene Isalela ku kipete pamo na boba bakwabo batapilwe.
23 Mukalo wa bene Lubeni wadi ku Yodano; kadi ino ntanda yo yadi bupyani bwa bene Lubeni mungya mafu abo, pamo ne bibundi ne bīkalo byabo.
24 Kupwa Mosesa wapa kisaka kya Ngade bupyani, bene Ngade mungya mafu abo,
25 kadi mu ntanda yabo mubadilwa ne Yazele+ ne bibundi byonso bya Ngileade ne kipindi kya ntanda ya bene Amone+ kufika ne ku Aloele witadidile na Laba;+
26 ne tamba ku Heshebone+ kutūla ne ku Lamata-Mizipe ne Betonime, ne kutamba ku Mahanaimi+ kutūla ne ku mukalañano wa Debile;
27 ne mu musanza,* Bete-Halama, ne Bete-Nimela,+ ne Sukote,+ ne Zafone, ntanda ya bulopwe yadi ishele’ko ya Mulopwe Shihone wa Heshebone,+ ne Yodano bu mukalañano tamba ku mfulo ya kunshi kwa Dijiba dya Kinelete*+ dya bukila bwa Yodano bwa kutunduka.
28 Buno bo bupyani bwa bene Ngade mungya mafu abo, pamo ne bibundi ne bīkalo byabo.
29 Kupwa Mosesa wapa kipindi kya kisaka kya Manase bupyani, ke kipindi kya kisaka kya Manase mungya mafu abo kadi.+
30 Ne kadi ntanda yabo yadi ishilwila ku Mahanaimi+ kubadila’mo ne Bashane ense, ntanda yonso ya bulopwe bwa Mulopwe Oka wa Bashane, ne tubundi tonso twa mapema twa Yaila+ mu Bashane, bibundi 60.
31 Ne kipindi kya Ngileade, ne Ashetalote, ne Edelei,+ bibundi bya ntanda ya bulopwe bwa Oka mu Bashane, byaendele ku bana ba Makile mwanā Manase, ke ku kipindi kya bana ba Makile+ mungya mafu abo kadi.
32 Buno bo bupyani bwebapele Mosesa mu dilungu dya Moabu mudi zolē bobwa bukila bwa Yodano, kutunduka kwa Yediko.+
33 Ino Mosesa kapelepo kisaka kya bene Levi bupyani.+ Yehova Leza wa Isalela ye bupyani bwabo, monka mwaebalaile’kyo.+
Kunshi kwa Dyani
^ Nansha’mba “kya kunekenya.”
^ Nansha’mba “tamba ku Shihole.”
^ Kishima pa kishima i, “kampalampala.”
^ Nansha’mba “kibelo kya Hamata.”
^ Nansha’mba “kwibatalula.”
^ Nansha’mba “Kinekaneka kya Alenona.”
^ Nansha’mba “nzaba ya peulu.”
^ Nansha’mba “webatalula.”
^ Nansha’mba “kebatalwilepo.”
^ Nansha’mba “Kinekaneka kya Alenona.”
^ Nansha’mba “dilungu dya musanza.”
^ Ko kunena’mba, balopwe batādilwe na Shihone.
^ Nansha’mba “dilungu dya musanza.”
^ Ko kunena’mba, dijiba dya Ngenesaleta, nansha’mba Dijiba dya Ngadilea.
