Yoshua 3:1-17
-
Isalela waabuka Yodano (1-17)
3 Ebiya Yoshua wabūka lubanga futwi, aye ne bene Isalela* bonso bataluka mu Shityime+ bafika ku Yodano. Balāla konka kumeso kwa kwabuka.
2 Kupwa kwa mafuku asatu, bemaniji+ bapita mu nkambi monso
3 basoñanya bantu amba: “Pomusa kumona’tu sanduku wa kipwano kya Yehova Leza wenu uselelwe na babitobo bene Levi,+ mufwaninwe kutaluka pa kifuko kyenu kemumulonda.
4 Ino mufwaninwe kumushila kyaba, kintu kya maboko 2 000;* kemukimufwenai kubwipi nansha dimo, pa kusaka’mba muyuke dishinda dya kwenda, mwanda kashā kemwapityile mu dino dishinda.”
5 Ebiya Yoshua wanena bantu amba: “Mwipandulei,+ mwanda kesha Yehova usa kulonga bintu bya kutendelwa mu bukata mwenu.”+
6 Kupwa Yoshua wanena babitobo amba: “Selai sanduku+ wa kipwano mupite kumeso kwa bantu.” Penepa nabo basela sanduku wa kipwano batangidila bantu kumeso.
7 Ebiya Yehova wanena Yoshua amba: “Dyalelo nsa kushilula kukuzunzula ku meso a Isalela ense,+ mwanda wa bayuke amba nsa kwikala nobe’nka+ monadi ngikadile na Mosesa.+
8 Ufwaninwe kupa babitobo baselele sanduku wa kipwano uno musoñanya’mba: ‘Shi mubafika’tu ku milomo ya mema a Yodano, mufwaninwe kwimana mu Yodano.’”+
9 Kadi Yoshua wanena bene Isalela amba: “Fwenai pabwipi muteje binenwa bya Yehova Leza wenu.”
10 Yoshua wanena monka’mba: “Pa kino musa kuyuka’mba Leza mūmi udi mu bukata mwenu,+ kadi amba binebine ukapanga ku meso enu bene Kenani, bene Hiti, bene Hivi, bene Pedizi, bene Ngilangashi, bene Amole ne bene Yebushi.+
11 Talai! Sanduku wa kipwano kya Mfumu wa ntanda yonso yeu upita mu Yodano ku meso enu.
12 Shi ke pano selai bana-balume 12 ba mu bisaka bya Isalela, muntu umo ku kisaka ne kisaka,+
13 kadi babitobo baselele Sanduku wa Yehova, Mfumu wa ntanda yonso, pobanyanta’tu binyantyilo bya maulu abo mu mema a Yodano, mema a Yodano atamba kungala akemikwa kadi akemana bwa mumba.”*+
14 Penepo kitatyi kyatalukile bantu mu mapema abo kumeso’tu kwa kwabuka Yodano, babitobo badi baselele sanduku+ wa kipwano batangidile bantu kumeso.
15 Boba badi baselele Sanduku pobafikile’tu ku Yodano, babitobo badi baselele Sanduku pa kunyanta’tu maulu abo ku milomo ya mema (mwanda mema a Yodano adi mayule kupita ne pa mungo+ mafuku onso a mwangulo),
16 mema adi atamba kungala aimana nkū. Aimana pamo bwa mumba* kulampe mpata ku Adama, kibundi kidi kubwipi na Zaletane, papo mema adi atūkila mu Dijiba dya Alaba, Dijiba dya Mwepo,* nao auma. Aimikilwe, penepa bantu baabukila kampalampala na Yediko.
17 Babitobo badi baselele sanduku wa kipwano kya Yehova pobadi bakimene nkū pa nshi myūmu+ mu bukata bwa Yodano, Isalela yense waabuka pa nshi myūmu+ kufika ne byapwile muzo onso kwabuka Yodano.
Kunshi kwa Dyani
^ Kishima pa kishima i, “bana ba Isalela.”
^ Kintu kya mametele 890 (mayo 2 920). Tala Mbwejo B14.
^ Nansha’mba “lubumbu.”
^ Nansha’mba “lubumbu.”
^ Ko kunena’mba, Dijiba Difwe.
