Danyele 7:1-28
7 Mu mwaka mubajinji wa Beleshazale+ mulopwe wa Babiloni, Danyele wamona kilotwa ne bimonwa ku kamitwe paadi ulēle pa butanda bwandi.+ Penepo walemba kilotwa’kya;+ walemba mānga yonso ya myanda’ya.
2 Danyele wanena’mba:
“Nadi ntala mu bimonwa byami bufuku, na’mba ntale! mvula iná ya mūlu ijinya dijiba dikatampe.+
3 Kadi banyema baná bakatakata+ baabuka mu dijiba, nyema ense mwishile na bakwabo.
4 “Mubajinji wadi pamo bwa ntambo,+ kadi wadi na mapapa a mukebo.+ Natala kufika ne byatukwinwe mapapa andi, watululwa panshi, waimikilwa ku maulu andi abidi pamo bwa muntu, wapebwa ne mutyima wa muntu.
5 “Na’mba ntale! nyema mukwabo, wa bubidi, wadi pamo bwa uluse.+ Wadi wimanine mutamba umo, kadi wadi na mpamvu isatu mu kyakanwa kyandi ku meno andi; bamulombola’mba, ‘Imana, udye mwita mungimungi.’+
6 “Kupwa kino nadi ntala’nka kutala, na’mba ntale! nyema mukwabo wadi pamo bwa ngé,+ ino wadi na mapapa aná pa nyuma pamo bwa a kyoni. Kadi nyema’wa wadi na mitwe iná,+ wapebwa lupusa lwa kubikala.
7 “Kupwa kino nadi ntala’nka kutala mu bimonwa bya bufuku, namona nyema wa buná, uzakaja bya mwiko, ulenga moyo kadi mukomo bya malwa, wadi na meno makatampe a byuma. Wadi ubokota ne kuvingakanya, kadi wadi utyampakanya na maulu andi+ byobya bishala. Wadi mwishile na banyema bakwabo bamubadikidile, kadi wadi na masengo dikumi.
8 Ponadi mandaula masengo’a, tala! disengo dikwabo dityetye,+ dyamena mu bukata mwao, masengo asatu mabajinji atukunwa ku meso adyo. Kadi tala! ku dino disengo kwadi meso pamo bwa meso a muntu, kadi kwadi kyakanwa kīsamba bya kibengo.*+
9 “Nadi ntala’nka kutala kufika ne byatūdilwe mpona, Mukulu wa Mafuku+ nandi washikata.+ Bisandi byandi byadi bitōka pamo bwa mashika mekwate,+ kadi nywene ya ku mutwe wandi yadi pamo bwa myoya itōka. Lupona lwandi lwadi mimbi ya mudilo; matonto alo adi atēma mudilo.+
10 Kamunonga ka mudilo kadi kakuka, katamba ku meso andi.+ Tununu kanunu twadi tumwingidila, kadi tununu dikumi misunsa tununu dikumi twadi twimene ku meso andi.+ Kidye+ kyebunga, mikanda nayo yapūtulwa.
11 “Nadi ntala’nka kutala mu kine kitatyi’kya pa mwanda wa diwi dya binenwa bya kibengo* dyadi dinena disengo’dya;+ natala kufika ne byaipailwe nyema, umbidi wandi waonakanibwa kadi waletwa mwanda wa kusōkwa mu mudilo.
12 Ino banyema bakwabo’ba,+ buledi bwabo bwatalwilwe, kadi būmi bwabo bwalepejibwe kitatyi kimo ne kyaba kimo.
13 “Nadi ntala’nka mu bimonwa bya bufuku, na’mba ntale! muntu umo udi pamo bwa mwanā muntu+ wiya na makumbi a mūlu; wafika kudi Mukulu wa Mafuku,+ bamufwenya ku meso Andi.
14 Wapebwa buledi,+ bulēme,+ ne bulopwe, amba bantu, ne mizo, ne ndimi bamwingidile abo bonso.+ Buledi bwandi i buledi bwa nyeke, kebukapitepo, bulopwe bwandi nabo kebukonakanibwapo.+
15 “Ino ami, Danyele, mushipiditu wami wajingilwe munda mwami mwanda bimonwa bya ku kamitwe byaunzakeje.+
16 Nafwena kudi umo mu boba badi bemene kwine’kwa, namwipangula nshintulwilo minemine ya kino kintu. Penepo waunondolola ne kunombola nshintulwilo ya bino bintu.
17 “‘Bano banyema bakatakata, baná,+ i balopwe baná bakemana pa ntanda.+
18 Ino bajila ba Mwine Mukatakata Mwine+ bakatambula bulopwe,+ kadi bakayata bulopwe+ ke bwabo nyeke, bine, nyeke ne nyekeke.’
19 “Penepo nasaka kuyuka myanda mivule ya nyema wa buná, wadi mwishile na bakwabo; wadi uzakaja bya mwiko, wa meno a byuma ne māla a mukuba, kadi wadi ubokota ne kuvingakanya, utyampakanya na maulu andi+ byobya bishala;
20 ne myanda ya masengo dikumi+ adi ku mutwe wandi, ne disengo dikwabo dyamenene ino masengo asatu apona ku meso adyo,+ disengo dyadi na meso ne kyakanwa kīsamba bya kibengo,* kadi dyadi dimweka bu dikatampe kupita makwabo.
21 “Nadi ntala’nka kutala, namona dino disengo dilwa divita na bajila, dyebanekenya,+
22 kufika ne byaile Mukulu wa Mafuku+ wabingija bajila ba Mwine Mukatakata Mwine+ mu butyibi, kadi kitatyi kitungwe kyabwana kya bajila kuyata bulopwe ke bwabo.+
23 “Wanena namino amba: ‘Pa mwanda wa nyema wa buná, kudi bulopwe bwa buná bukekala’ko pa ntanda. Abo bukekala bwishile na malopwe makwabo onso, kadi bukabokota ntanda yonso, kwiityampakanya ne kwiivingakanya.+
24 Ino pa mwanda wa masengo dikumi, balopwe dikumi bakatamba ku bulopwe’bwa; kadi mulopwe mukwabo ukebalonda, aye ukekala mwishile na babajinji, kadi ukafwija balopwe basatu bumvu.+
25 Ukanenena Mwine wa Peulu Mwine+ bibi, kadi ukakambakanya nyeke bajila ba Mwine Mukatakata Mwine. Aye ukakimba kushinta bitatyi ne bijila, kadi bakamupebwa mu kuboko kwandi mu bula bwa kitatyi kimo, bitatyi, ne kipindi kya kitatyi.*+
26 Ino Kidye kyebunga, bamuyata buledi bwandi, mwanda wa kumukubija ne kumonakanya fututu.+
27 “‘Kadi bulopwe ne buledi ne bukatampe bwa malopwe adi munshi mwa madiulu onso, byapelwe bantu bajila ba Mwine Mukatakata Mwine.+ Bulopwe bwabo i bulopwe bwa nyeke+ kadi buledi bonso bukebengidila ne kwibakōkela.’
28 “Ino’i yo mfulo ya mwanda. Ino ami Danyele, milangwe yami yantuywile bininge, ebiya natōkoloka;* ino nalamine mwanda’wa mu mutyima wami.”
