E nkubika ya Nações Unidas, ikasakesanga wantu awonso kimana basalaziananga, zitisa nswa wa wantu yo tanina e kalu kia wantu. Ekuma? Maher Nasser wavova muna nkand’andi, UN Chronicle vo: “O safuka kwa kalu kia wantu, umpumbulu, kondwa kwa unsongi, ulolo wa wantu beyalukanga, nsoki, yimbevo isambukilanga ye mambu mankaka mampasi, mawonso mama mevangamanga mu nza yawonso.”

Wantu ankaka nkutu bavova vo luyalu lwa nz’amvimba tuvuidi o mfunu. Akaka muna wantu ana bavova diambu diadi i nkwa ndongota ye poeta, Dante Alighieri wa musi Italia ye nlongi wa fisica Albert Einstein. Dante wavova vo luvuvamu mu nza ke lulendi zingila ko mu kuma kia tuyalu twavambana. Wayika mvovo mia Yesu vava kavova vo: “Konso kintinu kiavambana, bwa kibwa.”—Luka 11:17.

Kuna mfoko a Vit’Anzole ya Nz’Amvimba ina yasadila bomba atômica zole, ke vavioka kolo ko Albert Einstein wasoneka nkanda kwa Assembleia Geral das Nações Unidas. Wavova vo: “E Nações Unidas ifwete vanga diambu mu nzaki yo sikidisa luyalu lwa nz’amvimba lulenda twasa lutaninu mu nza yawonso.”

Nga ayadi muna luyalu lwalu lwa nkuma, badi kala se akwa ziku, akwa ngangu ye wantu ambote? Yovo badi kala ye fu yambi ina ayadi bena yau? E yuvu yayi ikutusungamesanga mvovo mia Lorde Acton wa nzingudi a lusansu wa musi Grã-Bretanha ona wavova vo: “E wisa wantu kibebesanga; e wisa kiayingi kilutidi o bebesa.”

Ozevo, o wantu muna kala ye luvuvamu, yeto awonso tufwete kala mu kintwadi. Kansi, adieyi tufwete vanga muna lungisa e kani diadi? Nga ediadi dilendakana? Bibila kisonganga vo e diambu diadi divangama. Aweyi divangamena? Ke luyalu lwa wantu ko lwa nz’amvimba lulenda twasa e nsobani zazi, kadi ayadi badi kala mu luyalu lwalu ke ansongi ko. Kansi, luyalu lwa Nzambi kaka luvanga e nsobani zazi. O luyalu lwalu lusonga vo o Mvangi yandi kaka una ye wisa kia yala wantu. Kansi nki i luyalu lwalu? Bibila kivovanga vo i “Kintinu kia Nzambi.”—Luka 4:43.

Yesu Kristu wayindulanga Kintinu kia Nzambi vava kalonga e sambu kitomene zayakana vo Sambu kia Se dieto. Wavova vo: ‘Yambula Kintinu kiaku kiza. O luzolo lwaku lwavangama ova ntoto.’ (Matai 6:9, 10) Kieleka, Kintinu kia Nzambi kaka kivanga luzolo lwa Nzambi vava ntoto, ke wantu ko bena vo akwa loko ana bezolanga kaka tambula e wisa.

E Kintinu kia Nzambi kiyikilwanga mpe vo “Kintinu kia zulu.” (Matai 5:3) Ekuma? Kadi tuka kuna zulu kiyadila o ntoto. Yindula e diambu diadi. Luyalu lwalu ke luvava ko vo wantu bafuta e mpaku kimana lwasala. Yindula luvevoko bekala lwau awana beyalwa kwa Kintinu kiaki.

Konso “kintinu” kifwete kala ye ntinu yovo ntinu-ankento. E Kintinu kia Nzambi mpe kina ye Ntinu, Yesu Kristu. Nzambi yandi kibeni wamvana e wisa. Bibila kivovanga mu kuma kia Yesu vo:

• “O luyalu lukala vana mavembo mandi. O wokela kwa luyalu lwandi, . . . ke kukala nsuka ko.”—Yesaya 9:6, 7.

•   “Oveno e wisa, nkembo ye kintinu mpasi vo nkangu, zula ye ndinga zawonso zansadila. E kintinu kiandi . . . ke kisuka ko.”—Daniele 7:14.

• “E kintinu kia nza kikitukidi se Kintinu kia Mfumu eto [Nzambi] ye kia Kuswa [Kristu] kiandi.”—Lusengomono 11:15.

Muna lungisa e mvovo mia sambu kia Yesu, e Kintinu kia Nzambi kivanga mawonso mana Nzambi kakana mu kuma kia ntoto. Vava Kintinu kiaki kiayala ntoto, wantu awonso belongwa una bafwete lunga-lungila ntoto kimana wakituka se fulu kiakondwa usafu yo zala ye mioyo.

Vana ntandu, e Kintinu kia Nzambi kilonga awana beyalwa. Wantu awonso belongoka nkanikinu miau mimosi. Ke vekala ntantani ko ngatu mpambani. Muna Yesaya 11:9 tutanganga vo: “Ke bevanga mbi ko ngatu fwasa konso lekwa . . . kadi e nza izala kieleka yo zayi wa Yave wauna o maza mefukilanga kalunga.”

Awonso bezingila ova ntoto, betatidila luvuvamu, ediadi ke dilendi vangama ko muna nkubika ya Nações Unidas. Muna Nkunga 37:11 tutanganga vo: “Bezingila muna luvuvamu ye kiese kiayingi.” Ke kolo ko, e mvovo nze “nsoki,” “usafu,” “usukami” ye “vita,” ke miwakana diaka ko muna moko ya wantu. Kansi, nkia ntangwa e Kintinu kia Nzambi kiyantika yala e nza yawonso? Aweyi diambu diadi divangamena? Yambula twazaya e mvutu.