Lusengomono kwa Yoane 11:1-19
11 Yavewa e tutu dina nze nkau,*+ yavoveswa vo: “Telama wateza e nzo avauka a tempelo a Nzambi ye ziku ye awana besambilanga mo.
2 Kansi e yanzala kina kuna mbazi a nzo avauka a tempelo, yambula kio, kutezi kio ko, e kuma kadi kiavewa kwa zula, bediatakesa mbanz’avauka+ muna tambi yau mu ngonde 42.+
3 Ituma mbangi zame zole basakula mu 1.260 ma lumbu, bevuata ngoto.”
4 E mbangi zazi zisunzulanga nti miole mia olive+ ye zangikilwa yole ya minda+ itelamene vana ndose a Mfumu a nza.+
5 Avo muntu ozolele kubamwesa e mpasi, tiya tuvaika muna nua miau yo bomona mbeni zau. Avo muntu ozolele kubamwesa e mpasi, i wau wuwu kafwete vondelwa.
6 Bena ye wisa kia kanga e zulu+ kimana e mvula zalembi noka+ muna lumbu ina besakulanga, bena ye wisa kia kitula o maza se menga+ yo mwesa nza e mpasi muna vuku ya mpila mu mpila konso ntangwa bazolele.
7 Vava bemana sia umbangi wau, e bulu kiansisi kina kitombokele muna mbilu, kikubanuanisa, kikubasunda yo kubavonda.+
8 Mavimbu mau mekala muna nzila zampwena za mbanza yanene, iyikilwanga muna kimwanda vo Sodoma ye Engipito, i kûna kwavondelwa Mfumu au vana nti.
9 Nkangu ye makanda ye ndinga ye zula betala mavimbu mau mu lumbu tatu ye ndambu,+ ke beyambula ko vo mavimbu mau masiwa muna ziami.
10 Awana bena ova nza beyangalala mu kuma kiau yo kemba, betwikaziana tukau, e kuma kadi e ngunza zazi zau zole zamwesanga awana bena ova nza e mpasi.
11 Vava kiviokele lumbu tatu ye ndambu, o mwand’a moyo utukidi kwa Nzambi ukotele muna mavimbu,+ batelamene muna malu mau, awana babamwene babakamene kwa wonga wayingi.
12 Bawidi nding’a ngolo tuka kuna zulu, ibavovese vo: “Nutomboka oku.” Batombokele kuna zulu muna tuti, bamonekene kwa mbeni zau.
13 Muna ntangwa yayina vakedi nzakama yangolo ya ntoto, e tini kia kumi kia mbanza kibwidi; 7.000 ma wantu bavondwa kwa nzakam’a ntoto, awana basidi bamwene wonga yo vana nkembo kwa Nzambi a zulu.
14 E vonza kiazole+ kiviokele. Tala! E vonza kiatatu nzaki kikwizanga.
15 E mbasi ina ya nsambwadi isikidi e mpungi andi.+ Kuna zulu kukedi ndinga zangolo, zivovele vo: “E kintinu kia nza kikitukidi se Kintinu kia Mfumu eto+ ye kia Kuswa kiandi,*+ oyala se ntinu yamu mvu ya mvu.”+
16 Akuluntu 24+ ana bakedi bavuanda vana kunda yau ya kimfumu vana ntadisi a Nzambi bafukamene yo bukika e ndose zau yo sambila Nzambi,
17 oku vo: “Tutondele, e Yave* wa Nzambi, Mpungu-ngolo, ndiona wina,+ ndiona wakala, e kuma kadi obongele nkum’aku wanene, oyantikidi yala nze ntinu.+
18 Kansi e zula yafunga o makasi, o makasi maku mayiza, e ntangwa yasikidiswa mpe yayiza mu fundisa mafwa yo senda+ ntaudi zaku angunza+ ye avauki ye awana bevuminanga nkumbu aku, akete ye anene, yo fwasa awana befwasanga e nza.”+
19 E nzo avauka a tempelo a Nzambi kuna zulu yaziuka, e nkel’a kangu diandi imonekene muna nzo avauk’a tempelo andi.+ Vakedi nsemo ye ndinga ye miandazi* ye nzakam’a ntoto ye mvul’a matadi yangolo.
