VAVA VEBWANGA SUMBULA, NANGA OKUKIYUVULANGA: ‘O NZAMBI AKWEYI KAKEDI?’ MUNA ZINGU KIAKU, NGA WABWILWA KALA DIAMBU DIAMPASI DIAFILA MU KUKIYUVULA KANA VO NZAMBI OKUVUANGA KIELEKA O MFUNU?

Nanga omonanga nze Sheila ozingilanga kuna Estados Unidos. Mase mandi minkwikizi mia dibundu bakala. Wavova vo: “Tuka muna kileke, yalongwanga vo Nzambi i Mvangi eto. Kansi, kiayibadikilanga ko vo i nkundi andi. Yazaya wo vo okumbonanga, kansi ku vala kaka. Kiakwikilanga ko vo Nzambi menga kekumbenganga, kansi kiakwikilanga mpe ko vo zola kekunzolanga.” Ekuma Sheila kakadila yo lukatikisu lwalu? Wavova vo: “Esi nzo eto mpasi zayingi banuananga zau, yamonanga vo Nzambi katusadisanga ko.”

Nze Sheila, nanga okwikilanga vo Nzambi una kikilu. Kansi, nanga okukiyuvulanga kana vo okuvuanga kieleka o mfunu. Yobi wa nkwa kwikizi, ona wakwikilanga muna nkuma ye ngangu za Mvangi, wakala mpe ye lukatikisu lwalu. (Yobi 2:3; 9:4) Vava Yobi kabwilwa ulolo wa sumbula, kakala ye vuvu ko vo e mpasi zandi zilenda fokoka. Muna kuma kiaki, wayuvula kwa Nzambi vo: “Nkia kum’oswekela ndose aku, yo kumbadikila vo i mbeni aku?”—Yobi 13:24.

Adieyi Nkand’a Nzambi uvovanga? Nga Nzambi i nkwa kuma muna sumbula ibwanga? Nga vena kikilu ye ziku kisonganga vo Nzambi ovuanga kieleka o wantu awonso o mfunu? Nga ovuanga konso muntu mu yeto o mfunu? Nga tulenda kikilu zaya kana vo Nzambi okutumonanga, okutubakulanga, okutuzolanga yo kutusadisa vava tukalanga mu mpasi?

Muna malongi melanda, tuvovela una o nsema usongelanga vo Nzambi okutuvuanga kieleka o mfunu. (Roma 1:20) Tubadika mpe dina Nkand’a Nzambi uvovanga mu kuma kia zola kwa Nzambi. Avo otomene ‘zaya Nzambi’ muna lusadisu lwa nsema ye Diambu diandi, okala kikilu ye ziku vo ‘mfunu kekuvuanga.’—1 Yoane 2:3; 1 Petelo 5:7.