1, 2. Us kwɛstyɔn yu fɔ aks yusɛf? Wetin mek dis impɔtant?

FRƆM we yu dɔn de stɔdi di Baybul, yu dɔn lan se bɔku pipul dɛn we kin tɔk se dɛn de wɔship Gɔd nɔ de rili tich ɛn du tin dɛn we Gɔd lɛk. (Sɛkɛn Lɛta Fɔ Kɔrint 6:​17) Na dat mek Jiova tɛl wi se mek wi kɔmɔt insay lay lay rilijɔn we na “Babilɔn . . . we ɔlman no [“Babilɔn di Gret,” NW].” (Rɛvɛleshɔn 18:​2, 4) Wetin yu go du? Wi ɔl gɛt fɔ disayd fɔ wisɛf ɛn wi fɔ aks wisɛf dis kwɛstyɔn, ‘A rili want fɔ wɔship Gɔd di we aw i want mi fɔ wɔship am, ɔ a jɔs want fɔ wɔship am di we aw a bin dɔn de wɔship am?’

² If yu bin dɔn kɔmɔt na lay lay rilijɔn ɔ rayt lɛta se yu nɔ de wit dɛn igen, na fayn tin yu dɔn du. Bɔt insay wi at sɔm tin dɛn de we dɛn kin du na lay lay rilijɔn we wi go stil lɛk fɔ du. Lɛ wi tɔk bɔt sɔm tin dɛn we dɛn de du ɛn wetin mek i rili impɔtant fɔ mek wi si dɛn di we aw Jiova de si dɛn.

3. (a) Wetin mek sɔm kin si am se i nɔ izi fɔ lɛf fɔ yuz aydɔl we dɛn de wɔship? (b) Wetin di Baybul se bɔt aydɔl wɔship?

³ Fɔ lɔng tɛm, sɔm pipul dɛn dɔn de yuz aydɔl dɛn ɛn ɔda tin dɛn na dɛn os fɔ wɔship Gɔd. If na so yu bin de du, yu go si am se i strenj ɔ i ivin bad fɔ wɔship Gɔd if wi nɔ de yuz dɛn tin dɛn de. Bɔt mɛmba se Jiova de tich wi aw fɔ wɔship am. Ɛn di Baybul tɛl wi klia wan se Jiova nɔ want wi fɔ yuz aydɔl dɛn we wi de wɔship  am.—Rid Ɛksodɔs 20:​4, 5; Sam 115:​4-8; Ayzaya 42:​8; Jɔn In Fɔs Lɛta 5:​21.

4. (a) Wetin mek wi nɔ fɔ wɔship di wan dɛn we dɔn day? (b) Wetin mek Jiova bin tɛl in pipul dɛn se dɛn nɔ fɔ tray fɔ tɔk to pɔsin we dɔn day?

⁴ Sɔm pipul dɛn de yuz dɛn trɛnk ɛn spɛn bɔku tɛm fɔ tray fɔ du wetin di wan dɛn we dɔn day want. Dɛn kin ivin wɔship dɛn. Bɔt wi dɔn lan se di wan dɛn we dɔn day nɔ ebul fɔ ɛp wi ɔ du wi bad. Dɛn nɔ de liv ɔdasay. I nɔ rili fayn fɔ tray fɔ tɔk to dɛn bikɔs ɛni mɛsej we kin tan lɛk se na frɔm dɛn i kɔmɔt, kin rili kɔmɔt frɔm di dɛbul dɛn. Na dat mek Jiova bin tɛl di Izrɛlayt dɛn se dɛn nɔ fɔ tray fɔ tɔk to dayman ɛn dɛn nɔ fɔ gɛt ɛnitin fɔ du wit dɛbul biznɛs.—Ditarɔnɔmi 18:​10-12; luk Ɛndnot 26 na pej 221 ɛn Ɛndnot 31 na pej 223.

5. Wetin go ɛp yu fɔ lɛf fɔ yuz aydɔl fɔ wɔship Gɔd ɛn fɔ lɛf fɔ wɔship di wan dɛn we dɔn day?

⁵ Wetin go ɛp yu fɔ lɛf fɔ yuz aydɔl fɔ wɔship Gɔd ɔ fɔ lɛf fɔ wɔship di wan dɛn we dɔn day? Yu nid fɔ rid di Baybul ɛn tek tɛm tink gud wan bɔt aw Jiova si dɛn tin dɛn de. I rili “et” dɛn tin dɛn de. (Ditarɔnɔmi 27:​15) Pre to Jiova ɛvride fɔ mek i ɛp yu fɔ si dɛn tin dɛn de di we aw i de si dɛn ɛn fɔ mek yu wɔship am di we aw i want. (Ayzaya 55:​9) Yu fɔ biliv se Jiova go gi yu di trɛnk we yu nid fɔ pul yu an pan ɛnitin we gɛt fɔ du wit lay lay wɔship.

6. Wetin mek dɛn bin pik Disɛmba 25 as di de we dɛn de sɛlibret Jizɔs in batde?

⁶ Di ɔlide we kɔmɔn ɔlsay na di wɔl na Krismas, ɛn bɔku pipul dɛn tink se na de fɔ sɛlibret di tɛm we Jizɔs  bɔn. Bɔt fɔ tru, Krismas gɛt sɔntin fɔ du wit lay lay wɔship. Dɛn bin rayt insay wan buk se na Disɛmba 25 di pegan pipul dɛn na Rom bin de sɛlibret di san in batde. Di bigman dɛn na di chɔch bin want mek mɔ pegan dɛn bi Kristian, so pan ɔl we Jizɔs nɔ bin bɔn Disɛmba 25, dɛn bin stil disayd fɔ sɛlibret Jizɔs in batde da de de. (Lyuk 2:​8-12) Jizɔs in disaypul dɛn nɔ bin de sɛlibret Krismas. Wan buk bin tɔk se ivin afta 200 ia we dɛn bɔn Jizɔs, “nɔbɔdi nɔ bin no ɛn bɔku pipul dɛn nɔ bin bisin bɔt di rayt tɛm we Jizɔs bin rili bɔn.” (Sacred Origins of Profound Things) Dɛn bin bigin fɔ sɛlibret Krismas afta lɔng lɔng tɛm we Jizɔs bin dɔn liv na dis wɔl.

7. Wetin mek tru Kristian dɛn nɔ de sɛlibret Krismas?

⁷ Bɔku pipul dɛn no bɔt di lay lay say usay Krismas kɔmɔt ɛn di tin dɛn we dɛn de du, lɛk fɔ mek pati ɛn fɔ gi gift. Fɔ ɛgzampul, insay Ingland ɛn sɔm say dɛn na Amɛrika, tɛm bin de we dɛn nɔ bin de gri fɔ mek dɛn sɛlibret Krismas bikɔs na pegan dɛn bin bigin fɔ sɛlibret am. Dɛn bin de pɔnish ɛnibɔdi we bin de sɛlibret am. Bɔt smɔl smɔl pipul dɛn bin bigin fɔ sɛlibret Krismas bak. Bɔt wetin mek tru Kristian dɛn nɔ de sɛlibret Krismas? Na bikɔs dɛn want fɔ du wetin Gɔd want pan ɛnitin we dɛn de du.

8, 9. Wetin mek di Kristian dɛn we bin de trade nɔ bin de sɛlibret batde?

⁸ Ɔda tin we kɔmɔn we bɔku pipul dɛn de sɛlibret na dɛn batde. Yu tink se Kristian dɛn fɔ sɛlibret batde? Di wan dɛn nɔmɔ we sɛlibret dɛn batde we di Baybul tɔk bɔt na pipul dɛn we nɔ bin de wɔship Jiova. (Jɛnɛsis 40:​20; Mak 6:​21) Dɛn bin de sɛlibret batde dɛn fɔ ɔnɔ  lay lay gɔd dɛn. Na dat mek di Kristian dɛn we bin de trade bin de si am se “fɔ sɛlibret pɔsin in batde na tin we pegan dɛn bin de du.”—The World Book Encyclopedia.

⁹ Di Roman ɛn Grik pipul dɛn we bin de trade trade bin biliv se wan spirit kin de we dɛn de bɔn ɛnibɔdi ɛn da spirit de go protɛkt di pɔsin we i de alayf. Insay wan buk we gɛt di taytul The Lore of Birthdays, dɛn bin rayt se: “Dis spirit bin gɛt majik biznɛs wit di gɔd we bin bɔn di sem de we dɛn bɔn di pɔsin.”

10. Wetin mek Kristian dɛn tide nɔ fɔ sɛlibret batde?

¹⁰ Yu tink se Jiova want fɔ mek wi put an pan sɛlibreshɔn dɛn we gɛt fɔ du wit lay lay rilijɔn? (Ayzaya 65:​11, 12) Nɔ, i nɔ want wi fɔ du dat. Na dat mek wi nɔ fɔ sɛlibret batde ɔ ɛni ɔda ɔlide we gɛt sɔntin fɔ du wit lay lay rilijɔn.

11. Wetin mek sɔm pipul dɛn kin sɛlibret ɔlide dɛn? Wetin fɔ impɔtant to yu pas ɛni ɔda tin?

¹¹ Sɔm pipul dɛn no se Krismas ɛn ɔda ɔlide dɛn kɔmɔt frɔm lay lay rilijɔn bɔt dɛn stil de sɛlibret dɛn. Dɛn jɔs fil se ɔlide tɛm dɛn na fayn tɛm fɔ ebul fɔ kip kɔmpin wit dɛn famili. Na da we de yu de fil? I nɔ bad fɔ mek yu spɛn tɛm wit yu famili. Na Jiova mek di famili ɛn i want wi fɔ gɛt tayt padi biznɛs wit am. (Lɛta Fɔ Ɛfisɔs 3:​14, 15) So wi nid fɔ tray tranga wan fɔ gɛt tayt padi biznɛs wit Jiova pas fɔ du wetin wi fambul dɛn want bay we wi de sɛlibret ɔlide dɛn we de na lay lay rilijɔn. Na dat mek di apɔsul Pɔl bin se wi fɔ “tray fɔ lan wetin di Masta want [wi] fɔ du.”—Lɛta Fɔ Ɛfisɔs 5:​10.

12. Wetin go mek ɔlide nɔ fayn na Jiova in yay?

 ¹² Bɔku pipul dɛn fil se di say we ɔlide kɔmɔt nɔ rili impɔtant, bɔt nɔto da we de Jiova de fil. I nɔ de gladi fɔ ɔlide dɛn we kɔmɔt frɔm lay lay wɔship ɔ we de put mɔtalman ɔ di tin dɛn we tinap fɔ di kɔntri, bifo. Fɔ ɛgzampul, di Ijipshian dɛn bin gɛt bɔku sɛlibreshɔn dɛn fɔ dɛn lay lay gɔd dɛn. Afta we di Izrɛlayt dɛn kɔmɔt na Ijipt, dɛn bin tek wan pan dɛn pegan sɛlibreshɔn dɛn ɛn dɛn bin de kɔl am “sɛlibreshɔn fɔ ɔna PAPA GƆD [“Jiova,” NW].” Bɔt Jiova bin pɔnish dɛn fɔ we dɛn bin du dat. (Ɛksodɔs 32:​2-10) As di prɔfɛt Ayzaya bin se, wi nɔ fɔ “tɔch natin we dɔti.”—Rid Ayzaya 52:​11.

13. Us kwɛstyɔn dɛn yu go tink bɔt we yu disayd nɔ fɔ sɛlibret ɔlide dɛn?

¹³ We yu disayd fɔ lɛf fɔ sɛlibret ɔlide dɛn, sɔntɛm yu go gɛt bɔku kwɛstyɔn dɛn. Fɔ ɛgzampul: Wetin a go du if mi wokmet aks mi wetin mek a nɔ de sɛlibret Krismas wit dɛn? Wetin a go du if sɔmbɔdi gi mi Krismas gift? Wetin a go du if mi man ɔ mi wɛf want fɔ mek a sɛlibret ɔlide? Wetin a go du fɔ mek mi pikin dɛn nɔ fil bad bikɔs wi nɔ de sɛlibret ɔlide ɔ dɛn batde?

14, 15. Wetin yu go du if sɔmbɔdi grit yu lɛk aw dɛn kin grit insay ɔlide tɛm ɔ gi yu gift?

¹⁴ I impɔtant fɔ mek yu tink gud wan we yu de disayd wetin fɔ se ɛn wetin fɔ du ɛnitɛm we sɔntin apin. Fɔ ɛgzampul, if dɛn grit yu lɛk aw dɛn kin grit insay ɔlide tɛm, yu nɔ nid fɔ mek lɛk se yu nɔ yɛri dɛn. Yu kin jɔs se, “Tɛnki.” Bɔt sɔntɛnde sɔm pipul dɛn go  lɛk fɔ no mɔ, yu go disayd fɔ tɛl dɛn wetin mek yu nɔ de sɛlibret ɔlide dɛn. Bɔt tek tɛm tɔk to dɛn fayn ɛn tɔk wit rɛspɛkt ɔltɛm. Di Baybul se: “We [yu] de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk ɛn we go mek dɛn want fɔ yɛri mɔ.” (Lɛta Fɔ Kɔlɔsse 4:​6) Sɔntɛm yu go tɛl dɛn se yu kin gladi fɔ spɛn tɛm wit dɛn ɛn fɔ gi gift dɛn bɔt yu disayd nɔ fɔ du dat jɔs bikɔs na ɔlide.

¹⁵ Wetin yu fɔ du if sɔmbɔdi gi yu gift? Di Baybul nɔ gi wi lɔ dɛn, bɔt i jɔs se wi fɔ gɛt klin kɔnshɛns. (Fɔs Lɛta To Timoti 1:​18, 19) Sɔntɛm di pɔsin we de gi yu di gift nɔ no se yu nɔ de sɛlibret ɔlide. Ɔ sɔntɛm i go se, “A no se yu nɔ de sɛlibret ɔlide, bɔt stil a want fɔ gi yu dis.” Da tɛm de, yu go disayd if yu go tek di gift ɔ yu nɔ go tek am. Bɔt ɛnitin we yu go disayd fɔ du, mek shɔ se yu gɛt klin kɔnshɛns. Wi nɔ go want fɔ du ɛnitin we go afɛkt wi padi biznɛs wit Jiova.

16. Wetin yu fɔ du if yu famili want fɔ sɛlibret ɛni ɔlide?

¹⁶ Wetin yu go du if yu famili want fɔ sɛlibret wan patikyula ɔlide? Yu nɔ nid fɔ agyu wit dɛn. Mɛmba se, dɛn gɛt di rayt fɔ disayd wetin dɛn want fɔ du. Tɔk fayn to dɛn ɛn rɛspɛkt wetin dɛn disayd fɔ du fɔ sɛlibret ɔlide jɔs lɛk aw yu want dɛn fɔ rɛspɛkt wetin yu disayd fɔ du. (Rid Matyu 7:​12.) Bɔt if yu famili want mek yu spɛn tɛm wit dɛn ɔlide tɛm, wetin yu fɔ du? Bifo yu disayd wetin fɔ du, na fɔ pre to Jiova fɔ mek i ɛp yu fɔ disayd fɔ du di rayt tin. Tink bɔt di tin we de apin, ɛn rid mɔ bɔt am. Mɛmba se yu want fɔ mek Jiova gladi ɔltɛm.

17. Wetin yu go du fɔ ɛp yu pikin dɛn fɔ mek dɛn nɔ fil se dɛn nɔ de ɛnjɔy we ɔda pipul dɛn de sɛlibret ɔlide?

 ¹⁷ Wetin yu fɔ du fɔ ɛp yu pikin dɛn we dɛn de si ɔda pipul dɛn de sɛlibret ɔlide dɛn? Wɛl, sɔntɛnde i go fayn fɔ lɛ yu du spɛshal tin fɔ dɛn. Yu kin gi dɛn gift dɛn fɔ sɔprayz dɛn. Wan pan di bɛst gift dɛn we yu go gi yu pikin dɛn na we yu spɛn tɛm wit dɛn ɛn sho dɛn se yu lɛk dɛn.

18. Wetin mek wi fɔ de go mitin?

¹⁸ Fɔ mek Jiova go gladi, wi nid fɔ lɛf lay lay rilijɔn ɛn ɛni ɔlide ɔ tin dɛn we dɛn kin du we gɛt sɔntin fɔ du wit lay lay rilijɔn. Bɔt wi nid fɔ wɔship Gɔd di rayt we. Aw wi go du dat? Wan impɔtant tin we go ɛp wi na we wi de go di mitin dɛn ɔltɛm. (Rid Di Ibru Pipul Dɛn 10:​24, 25.) Dis go ɛp wi fɔ wɔship Gɔd di rayt we. (Sam 22:​22; 122:​1) Wi kin ɛnkɔrej wisɛf we wi kin go mitin.—Lɛta Fɔ Rom 1:​12.

19. Wetin mek i impɔtant fɔ tɛl ɔda pipul dɛn bɔt di tru tin dɛn we yu de lan na di Baybul?

¹⁹ Wan ɔda we aw yu go wɔship Gɔd di rayt we, na bay we yu de tɛl ɔda pipul dɛn bɔt di tin dɛn we yu de lan frɔm di Baybul. Bɔku pipul dɛn kin fil bad bɔt di bad bad tin dɛn we de apin na di wɔl. Sɔntɛm yu sabi pɔsin we de fil da sem we de. Tɛl dɛn bɔt di wɔndaful op fɔ tumara bambay. As yu de go di mitin dɛn ɛn de tɛl ɔda pipul dɛn bɔt di tru tin dɛn we de na di Baybul, yu go kam fɔ si se yu nɔ go want fɔ gɛt ɛnitin fɔ du wit lay lay rilijɔn ɛn di tin dɛn we dɛn de du. Yu go gladi ɛn Jiova go rili blɛs di tray we yu de tray fɔ wɔship am di rayt we.—Malakay 3:​10.