Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA FƆTIN

Yu Famili Go Gɛt Gladi At

Yu Famili Go Gɛt Gladi At

1, 2. Wetin Jiova want fɔ di famili?

NA Jiova Gɔd mek di fɔs mared. Di Baybul tɛl wi se i mek di fɔs uman ɛn “i briŋ am kam to di man.” Adam bin rili gladi so i se: “Na pat pan man dɛn tek mek am.” (Jɛnɛsis 2:​22, 23) Dis de tɛl wi se Jiova want mared pipul dɛn fɔ gladi.

2 I sɔri fɔ no se bɔku pipul dɛn nɔ ɛva gɛt gladi at na dɛn famili. Bɔt di Baybul gɛt plɛnti advays dɛn we go ɛp ɔlman na di famili fɔ mek dɛn famili layf go bɛtɛ ɛn ɛnjɔy fɔ de togɛda.—Lyuk 11:​28.

WETIN GƆD WANT MAREDMAN DƐN FƆ DU?

3, 4. (a) Aw maredman fɔ trit in wɛf? (b) Wetin mek i impɔtant fɔ mek maredman ɛn mareduman dɛn fɔgiv dɛnsɛf?

3 Di Baybul se gud maredman fɔ trit in wɛf wit lɔv ɛn rɛspɛkt ɔltɛm. Duya rid Lɛta Fɔ Ɛfisɔs 5:​25-29 (NW). Maredman fɔ sho se i lɛk in wɛf ɔltɛm. Dɔn i fɔ protɛkt am, luk afta am ɛn nɔ du ɛnitin bad to am.

4 Bɔt wetin maredman go du we in wɛf mek mistek? Di Baybul tɛl maredman dɛn fɔ ‘kɔntinyu fɔ lɛk dɛn wɛf dɛn, dɛn nɔ fɔ dil traŋa wan wit dɛn.’ (Lɛta Fɔ Kɔlɔse 3:​19) Maredman dɛn, una mɛmba se unasɛf kin mek mistek dɛn. So if yu want Gɔd fɔ fɔgiv yu, yusɛf fɔ fɔgiv yu wɛf. (Matyu 6:​12, 14, 15) We maredman ɛn mareduman rɛdi fɔ fɔgiv dɛnsɛf, dat go ɛp dɛn fɔ gɛt gladi at na dɛn mared-os.

5. Wetin mek maredman fɔ sho ɔnɔ to in wɛf?

 5 Jiova want mek maredman sho ɔnɔ to in wɛf. Maredman fɔ tink gud wan bɔt di tin dɛn we in wɛf nid. Dis na tin we rili siriɔs. If maredman nɔ trit in wɛf fayn, Jiova nɔ go lisin to in prea dɛn. (Pita In Fɔs Lɛta 3:​7) Di tin we de mek pipul dɛn valyu to Jiova na we dɛn lɛk am. I nɔ lɛk man dɛn pas uman dɛn.

6. Wetin i min fɔ mek maredman ɛn mareduman “de lɛkɛ wan pɔsin”?

6 Jizɔs bin tɔk se maredman ɛn mareduman dɛn “nɔto tu pipul igen, dɛn tu dɔn de lɛkɛ wan pɔsin.” (Matyu 19:​6) Dɛn nɔ de kɔmɔt biɛn dɛnsɛf ɛn dɛn fɔ fetful to dɛnsɛf. (Prɔvabs 5:​15-21; Di Ibru Pipul Dɛn 13:​4) Maredman ɛn mareduman dɛn nɔ fɔ jɔs bisin bɔt dɛnsɛf nɔmɔ we i kam pan mami ɛn dadi biznɛs. (Fɔs Lɛta Fɔ Kɔrint 7:​3-5) Maredman fɔ mɛmba se “nɔbɔdi nɔ ɛva et in bɔdi, bɔt i de fid insɛf ɛn ol in bɔdi fayn.” So i fɔ lɛk ɛn ol in wɛf fayn. Mareduman want mek in man gud to am ɛn lɛk am pas ɛni ɔda tin.—Lɛta Fɔ Ɛfisɔs 5:​29.

WETIN GƆD WANT MAREDUMAN DƐN FƆ DU?

7. Wetin mek famili nid pɔsin fɔ de oba dɛn?

7 Ɔl famili nid pɔsin fɔ de oba dɛn, sɔmbɔdi we go gayd di famili so dat dɛn ɔl go wok togɛda fayn. Di Baybul na Fɔs Lɛta Fɔ Kɔrint 11:​3 se: “Na Krays de oba ɔlman, na di man de oba in wɛf, ɛn na Gɔd in wangren de oba Krays.”

8. Aw wɛf go sho se i rili rɛspɛkt in man?

8 Ɔl maredman dɛn kin mek mistek. Bɔt we mareduman sɔpɔt di tin dɛn we in man kin disayd  fɔ du ɛn i rɛdi fɔ wok togɛda wit am, ɔlman na di famili go bɛnifit. (Pita In Fɔs Lɛta 3:​1-6) Di Baybul se: “Ɔl mareduman fɔ rɛspɛkt in man.” (Lɛta Fɔ Ɛfisɔs 5:​33) Wetin uman fɔ du if in man nɔ de wɔship Jiova? Di uman stil nid fɔ sho se i rili gɛt rɛspɛkt fɔ am. Di Baybul se: “Una dɛn mareduman dɛn, una fɔ put unasɛf ɔnda una man dɛn, so dat if ɛniwan pan dɛn nɔ de du wetin Gɔd in wɔd se, dɛn go chenj bikɔs dɛn wɛf dɛn de biev fayn. Dɛn wɛf dɛn nɔ go nid fɔ tɔk natin sɛf, bikɔs dɛn go si se una de biev fayn ɛn una rili de sho rɛspɛkt.” (Pita In Fɔs Lɛta 3:​1, 2NW) Mareduman in gud ɛgzampul go ɛp in man fɔ ɔndastand ɛn sho rɛspɛkt fɔ wetin i biliv.

9. (a) Wetin mareduman go du if i nɔ gri wit in man pan sɔntin? (b) Wetin na di advays we Taytɔs 2:​4, 5 gi to mareduman dɛn?

9 Wetin mareduman go du if i nɔ gri wit in man pan sɔntin? I fɔ tɔk wetin i tink wit rɛspɛkt. Fɔ ɛgzampul, Sera bin se sɔntin we Ebraam nɔ bin lɛk,  bɔt Jiova bin tɛl Ebraam se: “Mek i du ɛnitin we Sera se.” (Jɛnɛsis 21:​9-12) I nɔ izi fɔ mek maredman we na Kristian disayd fɔ du sɔntin we de agens wetin di Baybul se, so in wɛf fɔ sɔpɔt am. (Di Apɔsul Dɛn Wok [Akt] 5:​29; Lɛta Fɔ Ɛfisɔs 5:​24, NW) Gud mareduman go kia fɔ in famili. (Rid Taytɔs 2:​4, 5.) We in man ɛn in pikin dɛn de si aw i de wok tranga wan fɔ dɛn, dɛn go lɛk ɛn rɛspɛkt am mɔ.—Prɔvabs 31:​10, 28.

Aw Sera sɛt fayn ɛgzampul fɔ mareduman dɛn?

10. Wetin di Baybul se bɔt fɔ pat ɛn fɔ dayvɔs?

10 Sɔntɛnde, maredman ɛn mareduman kin disayd kwik kwik wan fɔ pat ɔ dayvɔs. Bɔt di Baybul se “mareduman nɔ fɔ lɛf in man” ɛn “di man nɔ fɔ kɛr in wɛf go kot fɔ mek dɛn pat.” (Fɔs Lɛta Fɔ Kɔrint 7:​10, 11) Sɔm bad bad tin dɛn kin apin we go mek maredman ɛn in wɛf disayd fɔ pat, bɔt dis na siriɔs tin fɔ disayd. Wetin di Baybul se bɔt dayvɔs? Di Baybul sho se di wangren rizin fɔ dayvɔs na we di man ɔ di wɛf go du mami ɛn dadi biznɛs wit ɔda pɔsin we i nɔ mared to.—Matyu 19:​9.

WETIN GƆD WANT MAMA ƐN PAPA DƐN FƆ DU?

Jizɔs sɛt fayn ɛgzampul fɔ ɔlman na di famili

11. Wetin pikin dɛn want pas ɛni ɔda tin?

11 Mama ɛn papa dɛn fɔ spɛn bɔku tɛm wit dɛn pikin dɛn. Yu pikin dɛn nid yu, dɛn want mek yu tich dɛn bɔt Jiova pas ɛni ɔda tin.—Ditarɔnɔmi 6:​4-9.

12. Wetin mama ɛn papa dɛn fɔ du fɔ protɛkt dɛn pikin dɛn?

12 Setan in wɔl dɔn de wikɛd mɔ ɛn mɔ, ɛn sɔm pipul dɛn de we go want fɔ du bad bad tin dɛn to wi pikin dɛn, ɛn dɛn go ivin want fɔ du mami ɛn dadi biznɛs wit dɛn. Sɔm mama ɛn papa dɛn kin si am se i nɔ izi fɔ tɔk to dɛn pikin dɛn bɔt mami ɛn dadi  biznɛs. Bɔt mama ɛn papa dɛn nid fɔ wɔn dɛn pikin dɛn bɔt dɛn kayn pipul dɛn ya ɛn tich dɛn aw fɔ avɔyd dɛn. Mama ɛn papa dɛn, una fɔ protɛkt una pikin dɛn. *Pita In Fɔs Lɛta 5:​8.

13. Aw mama ɛn papa dɛn fɔ tich dɛn pikin dɛn?

13 Mama ɛn papa dɛn gɛt di wok fɔ tich dɛn pikin dɛn aw fɔ biev. Aw yu go tich yu pikin dɛn? Yu pikin dɛn nid trenin, bɔt if nid de fɔ kɔrɛkt dɛn yu nɔ fɔ ɛva trit dɛn bad. (Jɛrimaya 30:​11) So nɔ ɛva kɔrɛkt  yu pikin dɛn we yu vɛks. Yu nɔ go want mek yu wɔd tan lɛk sɔntin we “kin kɔt shap lɛk sɔd” ɛn we go mek dɛn fil bad bɔt dɛnsɛf. (Prɔvabs 12:​18) Tich yu pikin dɛn fɔ ɔndastand wetin mek dɛn nid fɔ de obe.—Lɛta Fɔ Ɛfisɔs 6:​4; Di Ibru Pipul Dɛn 12:​9-11; luk Ɛndnot 30 na pej 223.

WETIN GƆD WANT PIKIN DƐN FƆ DU?

14, 15. Wetin mek pikin dɛn fɔ obe dɛn mama ɛn papa dɛn?

14 Jizɔs bin de obe in Papa ɔltɛm, ivin we i nɔ izi. (Lyuk 22:​42; Jɔn 8:​28, 29) Ɛn Jiova want mek pikin dɛn obe dɛn mama ɛn papa dɛn.—Lɛta Fɔ Ɛfisɔs 6:​1-3.

15 Pikin dɛn, ivin if una fil se i at fɔ obe una mama ɛn papa dɛn, mɛmba se we una obe, Jiova ɛn una mama ɛn papa dɛn go gladi fɔ una. *Prɔvabs 1:​8; 6:​20; 23:​22-25.

Wetin go ɛp yɔŋ wan dɛn fɔ fetful we dɛn tɛmt dɛn fɔ du bad tin?

16. (a) Aw Setan kin tray fɔ tɛmt yɔŋ pipul dɛn fɔ du bad tin? (b) Wetin mek i rili impɔtant fɔ pik padi dɛn we lɛk Jiova?

16 Setan kin yuz yu padi dɛn ɛn ɔda yɔŋ pipul dɛn fɔ tɛmt yu fɔ du bad tin. I no se i nɔ go izi fɔ mek yu tinap tranga wan. Fɔ ɛgzampul, Jekɔb in gyal pikin we nem Dayna bin gɛt padi dɛn we nɔ lɛk Jiova. Dis bin mek in ɛn in famili gɛt big trɔbul. (Jɛnɛsis 34:​1, 2) If yu padi dɛn nɔ lɛk Jiova, dɛn go tɛmt yu fɔ du sɔntin we Jiova et. Dis go mek yu, yu famili, ɛn Gɔd in at pwɛl. (Prɔvabs 17:​21, 25) Na dat mek i rili impɔtant fɔ mek yu fɛn padi dɛn we lɛk Jiova.—Fɔs Lɛta Fɔ Kɔrint 15:​33.

 YU FAMILI GO GƐT GLADI AT

17. Us wok ɔlman na di famili gɛt?

17 We ɔlman na di famili de du wetin Gɔd tɛl dɛn, dɛn go avɔyd trɔbul ɛn bɔku prɔblɛm dɛn. So if yu na maredman, lɛk yu wɛf ɛn trit am wit lɔv. If yu na mareduman, sho rɛspɛkt ɛn put yusɛf ɔnda yu man ɛn falamakata di ɛgzampul we Prɔvabs 31:​10-31 tɔk bɔt mareduman. If yu na mama ɔ papa, tich yu pikin fɔ lɛk Gɔd. (Prɔvabs 22:​6) If yu na papa, protɛkt yu famili ɛn mek shɔ se “ɔltin de go fayn” na yu os. (Fɔs Lɛta To Timoti 3:​4, 5; 5:​8, NW) Pikin dɛn, una fɔ obe una mama ɛn papa dɛn. (Lɛta Fɔ Kɔlɔse 3:​20) Mɛmba se ɔlman na di famili kin mek mistek, so una put unasɛf dɔŋ ɛn una go de fɔgiv unasɛf. Di Baybul gɛt advays dɛn we Jiova gi to ɔlman na di famili.

^ par. 12 Yu go no mɔ bɔt aw fɔ protɛkt yu pikin dɛn insay chapta 32 na di buk we nem Lan Frɔm di Gret Ticha. Na Jiova Witnɛs dɛn mek am.

^ par. 15 Pikin nɔ fɔ obe in mama ɛn papa dɛn if dɛn want am fɔ du sɔntin we de agens Gɔd in lɔ.—Di Apɔsul Dɛn Wok [Akt] 5:​29.