1. Wetin mek wi fɔ lan bɔt di enjɛl dɛn?

JIOVA want wi fɔ no bɔt in famili. Di enjɛl dɛnsɛf de na Jiova in famili. Insay di Baybul, dɛn kɔl dɛn “PAPA GƆD in pikin dɛn.” (Job 38:​7) Wetin di enjɛl dɛn de du? Aw dɛn dɔn ɛp pipul dɛn trade? Yu tink se dɛn kin ɛp wi tide?—Luk Ɛndnot 8 na pej 210.

2. Usay di enjɛl dɛn kɔmɔt? Ɔmɔs enjɛl dɛn Gɔd mek?

² I fayn fɔ mek wi no usay di enjɛl dɛn kɔmɔt. Lɛta Fɔ Kɔlɔse 1:​16 tɛl wi se afta we Jiova mek Jizɔs, i “mek ɔltin we de na ɛvin ɛn na dis wɔl.” So dat min se na in mek di enjɛl dɛn bak. Ɔmɔs enjɛl dɛn Gɔd mek? Di Baybul se Gɔd mek bɔku bɔku enjɛl dɛn.—Sam 103:​20; Rɛvɛleshɔn 5:​11.

3. Wetin Job 38:​4-7 tɛl wi bɔt di enjɛl dɛn?

³ Di Baybul tɛl wi se Jiova mek di enjɛl dɛn bifo i mek di wɔl. Aw dɛn bin fil we dɛn si di wɔl? Di Baybul buk we nem Job tɛl wi se dɛn bin gladi. Dɛn bin gɛt wanwɔd we dɛn de sav Jiova togɛda lɛk famili.—Job 38:​4-7.

4. Aw wi no se di enjɛl dɛn bisin bɔt mɔtalman?

⁴ Enjɛl dɛn bisin bɔt mɔtalman dɛn ɔltɛm ɛn dɛn bisin bak bɔt wetin Gɔd want fɔ mɔtalman ɛn di wɔl. (Prɔvabs 8:​30, 31; Pita In Fɔs Lɛta 1:​11, 12) I go mɔs bi se dɛn at bin pwɛl we Adam ɛn Iv bin tɔn dɛn bak pan Jiova. Ɛn i go mɔs bi se dɛn at pwɛl pasmak we dɛn de  si se bɔku mɔtalman nɔ de obe Jiova tide. Bɔt dɛn kin gladi we pɔsin chenj ɛn kam bak to Gɔd. (Lyuk 15:​10) Di enjɛl dɛn rili bisin bɔt di wan dɛn we de sav Gɔd. Jiova de yuz in enjɛl dɛn fɔ ɛp ɛn protɛkt in savant dɛn na di wɔl. (Di Ibru Pipul Dɛn 1:​7, 14) Mek wi tɔk bɔt sɔm ɛgzampul dɛn.

5. Aw enjɛl dɛn bin ɛp Gɔd in savant dɛn trade?

 ⁵ Jiova bin sɛn tu enjɛl dɛn fɔ ɛp Lɔt ɛn in famili fɔ mek dɛn sev di tɛm we i bin de dɔnawe wit Sɔdɔm ɛn Gomɔra. (Jɛnɛsis 19:​15, 16) Afta lɔng tɛm pas, dɛn bin put Prɔfɛt Daniɛl na wan ol usay layɔn dɛn de, bɔt di layɔn dɛn nɔ du am natin bikɔs “PAPA GƆD sɛn in enjɛl kan lɔk di layɔn dɛn mɔt.” (Daniɛl 6:​22) Leta, we apɔsul Pita bin de na prizin, Jiova sɛn wan enjɛl fɔ fri am. (Di Apɔsul Dɛn Wok [Akt] 12:​6-11) Enjɛl dɛn bin ɛp Jizɔs bak di tɛm we i bin de na dis wɔl. Fɔ ɛgzampul, afta we Jizɔs baptayz, “enjɛl dɛn bin de ɛp am.” (Mak 1:​13) Jɔs bifo dɛn kil Jizɔs, wan enjɛl bin “kɔrej am.”—Lyuk 22:​43.

6. (a) Aw wi no se enjɛl dɛn de ɛp Gɔd in pipul dɛn tide? (b) Us kwɛstyɔn dɛn wi de kam gɛt ansa to?

⁶ Tide, enjɛl dɛn nɔ de apia to mɔtalman dɛn igen. Bɔt stil, Gɔd de yuz enjɛl dɛn fɔ ɛp in savant dɛn. Di Baybul se Jiova in ‘enjɛl de rawnd udat rɛspɛkt am ɛn dɛn wan we de fred am. I de pul dɛn pan trɔbul.’ (Sam 34:​7) Wetin mek wi nid pɔsin fɔ protɛkt wi? Na bikɔs wi gɛt pawaful ɛnimi dɛn we want fɔ du wi bad. Udat na dɛn ɛnimi ya? Usay dɛn kɔmɔt? Aw dɛn de tray fɔ du wi bad? Fɔ ansa dɛn kwɛstyɔn ya, lɛ wi tɔk bɔt wetin apin jɔs afta Gɔd mek Adam ɛn Iv.

7. Wetin mek Setan de tray fɔ ful pipul dɛn?

⁷ Wi lan na Chapta 3 se wan enjɛl bin tɔn in bak pan Gɔd ɛn i bin want fɔ rul ɔda pipul dɛn. Di Baybul kɔl da enjɛl de Setan ɛn Dɛbul. (Rɛvɛleshɔn 12:​9) Setan want mek ɔda pipul dɛn tɔn dɛn bak pan Gɔd. I bin ebul fɔ ful Iv, ɛn frɔm da tɛm de, i dɔn ful bɔku  pipul dɛn. Bɔt sɔm pipul dɛn lɛk Ebɛl, Inɔk, ɛn Noa bin kɔntinyu fɔ du wetin Jiova want.—Di Ibru Pipul Dɛn 11:​4, 5, 7.

8. (a) Aw sɔm enjɛl dɛn bin tɔn to dɛbul dɛn? (b) Wetin di dɛbul dɛn bin du fɔ mek dɛn nɔ day di tɛm we di Ebi Ebi Ren bin kam?

⁸ Insay Noa in tɛm, sɔm enjɛl dɛn bin tɔn dɛn bak pan Gɔd ɛn lɛf dɛn ples na ɛvin fɔ liv lɛk mɔtalman dɛn na dis wɔl. Wetin mek? Di Baybul tɛl wi se dɛn bin want fɔ gɛt wɛf dɛn. (Rid Jɛnɛsis 6:​2.) Bɔt i bin rɔng fɔ mek enjɛl dɛn du dat. (Jud In Lɛta 6) Jɔs lɛk dɛn wikɛd enjɛl dɛn de, bɔku pipul dɛn da tɛm de bin kɔrɔpt ɛn lɛk fɛt-fɛt. Ɛn dat bin mek Jiova disayd fɔ yuz Ebi Ebi Ren fɔ dɔnawe wit ɔl dɛn wikɛd mɔtalman dɛn de. Bɔt i bin sev in fetful savant dɛn. (Jɛnɛsis 7:​17, 23) Di wikɛd enjɛl dɛn bin go bak na ɛvin so dat dɛn nɔ go day. Di Baybul kɔl dɛn enjɛl dɛn de dɛbul dɛn. Dɛn bin disayd fɔ jɔyn Setan fɔ tɔn dɛn bak pan Gɔd, ɛn Setan bin bi dɛn rula.—Matyu 9:​34.

9. (a) Wetin apin to di dɛbul dɛn we dɛn go bak na ɛvin? (b) Wetin wi de kam tɔk bɔt?

⁹ Bikɔs di dɛbul dɛn bin tɔn dɛn bak pan Jiova, dat bin mek i nɔ alaw dɛn fɔ jɔyn in famili igen. (Pita In Sɛkɔn Lɛta 2:​4, NW) Di dɛbul dɛn nɔ ebul chenj to mɔtalman igen, bɔt dɛn stil “de mek di ol wɔl ful.” (Rɛvɛleshɔn 12:​9; Jɔn In Fɔs Lɛta 5:​19) Mek wi lan bɔt aw dɛn de ful bɔku bɔku pipul dɛn tide.—Rid Sɛkɛn Lɛta Fɔ Kɔrint 2:​11.

10. Aw di dɛbul dɛn de ful pipul dɛn?

¹⁰ Di dɛbul dɛn de yuz difrɛn difrɛn we dɛn fɔ ful pipul dɛn. We pipul dɛn want fɔ tɔk to di dɛbul  dɛn, dɛn kin du am fes-to-fes ɔ yuz wich dɔktɔ ɔ mɛrɛsinman. We wi gɛt ɛnitin fɔ du wit di dɛbul dɛn, dɛn kɔl dat juju biznɛs ɔ lukin-grɔn. Di Baybul tɛl wi se wi nɔ fɔ gɛt ɛnitin fɔ du wit dɛbul biznɛs. (Lɛta Fɔ Galeshya 5:​19-21) Wetin mek? Jɔs lɛk aw ɔntinman kin yuz trap fɔ kech animal dɛn, na so bak di dɛbul dɛn gɛt difrɛn difrɛn we dɛn fɔ ful pipul dɛn ɛn kɔntrol dɛn.—Luk Ɛndnot 26 na pej 221.

11. Wetin na lukin-grɔn? Wetin mek wi nɔ fɔ put an pan am?

¹¹ Wan pan di trap dɛn we di dɛbul dɛn de yuz na lukin-grɔn. Dat na we pɔsin de yuz di dɛbul dɛn pawa fɔ tray fɔ no bɔt tumara bambay ɔ bɔt tin we dɛn nɔ no. Fɔ ɛgzampul, sɔmbɔdi go tray fɔ du dis we i go to mɛrɛsinman fɔ lɛ i tɛl am wetin go apin tumara bambay, ɔ we sɔmbɔdi we i lɛk day, ɔ we i sik, ɔ if sɔmbɔdi dɔn tif sɔntin, ɔ if dɛn lay pan am se in na wichman. Bɔku pipul dɛn tink se dɛn tin ya nɔ bad. Bɔt dɛn rili bad. Fɔ ɛgzampul, di Baybul ɛp wi fɔ no se di wan dɛn we de tɛl pipul dɛn bɔt wetin go apin tumara bambay de wok togɛda wit di dɛbul dɛn. Insay Di Apɔsul Dɛn Wok [Akt] 16:​16-18, di Baybul se wan “titi bin gɛt dɛbul we bin de mek i ebul tɛl pipul wetin go bi.” We apɔsul Pɔl pul di dɛbul kɔmɔt insay di titi, i nɔ bin ebul igen fɔ tɛl pipul dɛn wetin go apin tumara bambay.

12. (a) Wetin mek i rili bad fɔ tray fɔ tɔk to di wan dɛn we dɔn day? (b) Wetin mek Gɔd in savant dɛn nɔ de put an pan ɛnitin we gɛt fɔ du wit di dɛbul dɛn?

¹² Di dɛbul dɛn kin yuz ɔda trap fɔ ful pipul dɛn. Dɛn de tray fɔ mek wi biliv se i pɔsibul fɔ tɔk to dayman ɛn di wan dɛn we dɔn day stil de alayf  sɔnsay ɛn dɛn kin tɔk to wi ɔ du bad to wi. Fɔ ɛgzampul, sɔmbɔdi we in padi ɔ fambul dɔn day go go to jujuman we se i de tɔk to pɔsin we dɔn day. Di jujuman go tɛl di pɔsin sɔntin bɔt in tayt padi ɔ fambul we dɔn day, ɛn ivin falamakata di dayman in vɔys. (Fɔs Samiɛl 28:​3-19) Bɔku tin dɛn we pipul dɛn kin du we pɔsin day de sho bak se dɛn biliv se dayman dɛn stil de alayf sɔnsay. Tin dɛn lɛk, di tin dɛn we dɛn kin du pan bɛrin, fɔ de mek program ɛni ia fɔ pɔsin we dɔn day, fɔ pul sara fɔ di wan dɛn we dɔn day, fɔ mek sɛrimɔni fɔ uman we i man dɔn day ɔ fɔ mek wekin. We Kristian dɛn nɔ gri fɔ jɔyn pan dɛn sɛrimɔni dɛn ya, dɛn fambul dɛn ɔ di wan dɛn we dɛn ɔl de na di sem vilej go tɔk bad bɔt dɛn, kɔs dɛn, ɔ dɛn nɔ go gɛt ɛnitin fɔ du wit dɛn. Bɔt Kristian dɛn no se di wan dɛn we dɔn day nɔ de liv ɛni ɔdasay. I nɔ pɔsibul fɔ tɔk to dɛn, ɛn dɛn nɔ go ebul fɔ du wi bad. (Sam 115:​17) Yu gɛt fɔ rili tek tɛm. Nɔ ɛva tray fɔ tɔk to pɔsin we dɔn day ɔ di dɛbul dɛn ɛn nɔ ɛva put an pan sɛrimɔni dɛn we gɛt sɔntin fɔ du wit di dɛbul dɛn.—Rid Ditarɔnɔmi 18:​10, 11; Ayzaya 8:​19.

13. Wetin bɔku pipul dɛn we bin de fred di dɛbul dɛn dɔn ebul fɔ du?

¹³ Nɔto ful nɔmɔ di dɛbul dɛn kin ful pipul dɛn, bɔt dɛn kin mek dɛn fred bak. Tide, Setan ɛn in dɛbul dɛn no se “na smɔl tɛm” nɔmɔ lɛf fɔ mek Gɔd pul dɛn kɔmɔt na di wɔl, so dɛn veks bad bad wan. (Rɛvɛleshɔn 12:​12, 17) Bɔt bɔku pipul dɛn we bin de fred di dɛbul dɛn nɔ de fred dɛn igen. Wetin ɛp dɛn fɔ lɛf fɔ fred di dɛbul dɛn?

14. Lɛk di Kristian dɛn we bin de insay di apɔsul dɛn tɛm, aw wi go fri wisɛf frɔm di dɛbul dɛn?

¹⁴ Di Baybul tɛl wi wetin fɔ du we go mek di dɛbul dɛn nɔ ebul wi ɛn aw wi go fri wisɛf frɔm dɛn. Fɔ ɛgzampul, sɔm pipul dɛn we bin de na Ɛfisɔs bin de tɔk wit dɛbul dɛn bifo dɛn kam fɔ lan di trut. Aw dɛn bin fri dɛnsɛf? Di Baybul se: “Plɛnti pan dɛn pipul we bin de ple majik briŋ dɛn majik buk wan ples ɛn bɔn dɛn mek ɔlman si.” (Di Apɔsul Dɛn Wok [Akt] 19:​19) Bikɔs dɛn bin want fɔ bi Kristian dɛn, dɛn bin pwɛl ɔl dɛn majik buk dɛn. Na dat wisɛf nid fɔ du tide. Ɔl udat want fɔ sav Jiova nid fɔ pwɛl ɔ dɔnawe wit ɛnitin we gɛt sɔntin fɔ du wit di dɛbul dɛn. Tin dɛn lɛk, buk dɛn, magazin dɛn, fim dɛn, myuzik, gem dɛn, ɛn ivin posta dɛn we gɛt sɔntin fɔ du wit majik, ɔ dɛbul dɛn. Wi fɔ pwɛl ɔ trowe dɛn ivin if wi lɛk dɛn ɔ wi tink se dɛn nɔ bad. Wi fɔ dɔnawe wit ɛnitin bak we pipul dɛn kin wɛr fɔ protɛkt dɛnsɛf fɔ mek bad tin nɔ mit dɛn.—Fɔs Lɛta Fɔ Kɔrint 10:​21.

15. Wetin bak wi nid fɔ du so dat Setan ɛn in dɛbul dɛn nɔ go ebul wi?

¹⁵ Afta sɔm ia bin dɔn pas we di pipul dɛn na Ɛfisɔs bin dɔnawe wit dɛn majik buk dɛn, di apɔsul Pɔl bin tɔk se dɛn stil gɛt fɔ “fɛt” “di wikɛd spirit dɛn.” (Lɛta Fɔ Ɛfisɔs 6:​12, NW) Pan ɔl we dɛn bin dɔn bɔn dɛn buk dɛn, di dɛbul dɛn bin stil de tray fɔ du dɛn bad. So wetin bak dɛn bin nid fɔ du? Pɔl bin tɛl dɛn se: “Una shild na fɔ biliv [“gɛt fet,” NW] pan di Masta. Dis shild ya go mek dɛn ɔt aro we Setan de shut, nɔ du una natin.” (Lɛta Fɔ Ɛfisɔs 6:​16) Jɔs lɛk we shild de protɛkt sojaman we i de fɛt wɔ, na so wi fet go protɛkt wi. If wi biliv tranga wan se  Jiova go protɛkt wi, Setan ɛn in dɛbul dɛn nɔ go ebul wi.—Matyu 17:​20.

16. Wetin go mek wi gɛt mɔ fet pan Jiova?

¹⁶ Wetin go mek wi gɛt mɔ fet pan Jiova? Wi fɔ rid di Baybul ɛnide ɛn abop pan Jiova fɔ protɛkt wi. If wi rili abop pan Jiova, Setan ɛn in dɛbul dɛn nɔ go ebul fɔ du ɛni bad tin to wi.—Jɔn In Fɔs Lɛta 5:​5.

17. Wetin bak go mek di dɛbul dɛn nɔ ebul wi?

¹⁷ Wetin bak di Kristian dɛn na Ɛfisɔs bin nid fɔ du? Ɛfisɔs na siti usay juju biznɛs bin bɔku. So Pɔl bin tɛl dɛn se: “Una fɔ pre ɔltɛm.” (Lɛta Fɔ Ɛfisɔs 6:​18) Dɛn fɔ de pre to Jiova mek i protɛkt dɛn ɔltɛm. We wi? Juju biznɛs bɔku insay di wɔl we wi de tide. So wisɛf nid fɔ de pre to Jiova lɛ i protɛkt wi ɛn wi fɔ yuz in nem we wi de pre. (Rid Prɔvabs 18:​10, NW.) If wi kɔntinyu fɔ pre to Jiova mek i sev wi na Setan in an, Jiova go ansa wi pre.—Sam 145:​19; Matyu 6:​13.

18, 19. (a) Aw wi go ebul fɔ win di fɛt agens Setan ɛn in dɛbul dɛn? (b) Us kwɛstyɔn we wi go gɛt ansa to na di nɛks chapta?

¹⁸ If wi pwɛl ɔ dɔnawe wit ɛnitin we gɛt sɔntin fɔ du wit di dɛbul dɛn ɛn abop pan Jiova fɔ protɛkt wi, Setan ɛn in Dɛbul dɛn nɔ go ebul du wi natin. Wi nɔ nid fɔ fred dɛn. (Rid Jems 4:​7, 8.) Jiova gɛt pawa pas di dɛbul dɛn fa fawe. Insay Noa in tɛm, Jiova bin pɔnish dɛn, ɛn tumara bambay i go dɔnawe wit dɛn. (Jud In Lɛta 6) Mɛmba se nɔto wi wangren de fɛt. Jiova de yuz in enjɛl dɛn fɔ protɛkt wi. (Sɛkɛn Kiŋ 6:​15-17) Wi fɔ gɛt op se Jiova go mek wi win di fɛt agens Setan ɛn in dɛbul dɛn.—Pita In Fɔs Lɛta 5:​6, 7; Pita In Sɛkɛn Lɛta 2:​9.

¹⁹ If Setan ɛn in dɛbul dɛn de mek wi de sɔfa, wetin mek Gɔd nɔ dɔnawe wit dɛn yet? Wi go gɛt di ansa to dis kwɛstyɔn na di nɛks chapta.