Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA ILƐVIN

Wetin Mek Pipul dɛn De Sɔfa?

Wetin Mek Pipul dɛn De Sɔfa?

1, 2. Us kwɛstyɔn bɔku pipul dɛn kin aks?

BƆKU bɔku wata pwɛl wan vilej. Wan man faya pipul dɛn na chɔch wit gɔn, ɛn i wund ɛn kil bɔku pipul dɛn. Wan sik we dɛn kɔl kansa kil wan uman we gɛt fayv pikin dɛn.

2 We bad bad tin dɛn lɛk di wan dɛn we wi dɔn tɔk bɔt apin, bɔku pipul dɛn kin aks se, “Wetin mek?” Bɔku pipul dɛn kin aks wetin mek di wɔl ful-ɔp wit bad at, ɛn wetin mek pipul dɛn de sɔfa? Yu dɔn ɛva tink bɔt dat?

3, 4. (a) Us kwɛstyɔn dɛn Abakɔk bin aks? (b) Aw Jiova bin ansa am?

3 Insay di Baybul, wi lan se pipul dɛn we bin gɛt strɔng fet pan Gɔd kin aks dɛn kayn kwɛstyɔn dɛn de. Fɔ ɛgzampul, di prɔfɛt Abakɔk bin aks Jiova se: “Wetin mek yu de mek a de si we bad bad tin dɛn de apin? Ɛn wetin mek yu de alaw pipul dɛn fɔ trit dɛn kɔmpin bad? Wetin mek pipul dɛn de fɛt-fɛt ɛn pwɛl pwɛl tin dɛn? Ɛn wetin mek plaba ɛn kɔnfyushɔn de ɔlsay?”—Abakɔk 1:​3, NW.

4 Insay Abakɔk 2:​2, 3, Gɔd bin ansa Abakɔk ɛn prɔmis fɔ sɔlv di prɔblɛm. Jiova rili lɛk pipul dɛn. Di Baybul se: “I bisin bɔt [wi].” (Pita In Fɔs Lɛta 5:​7NW) Infakt, Gɔd de sɔri fɔ pipul dɛn we de sɔfa pas aw wi de sɔri fɔ dɛn. (Ayzaya 55:​8, 9) So naw, mek wi tɔk bɔt di kwɛstyɔn we se, Wetin mek pipul dɛn de sɔfa na di wɔl?

 WETIN MEK PIPUL DƐN DE SƆFA?

5. Wetin bɔku bigman dɛn we de bifo pan Gɔd biznɛs kin tɔk we pipul dɛn de sɔfa? Wetin di Baybul se?

5 Pastɔ dɛn, fada dɛn, ɛn bigman dɛn we de bifo pan Gɔd biznɛs kin tɔk se di sɔfa we pipul dɛn de sɔfa na Gɔd dɔn mak am. Sɔm pipul dɛn kin se ɛnitin we de apin to pɔsin, lɛk we bad bad tin dɛn kin apin, na sɔntin we Gɔd kin dɔn tɔk se go apin, ɛn wi nɔ go ɛva ebul fɔ ɔndastand wetin mek dat de apin. Ɔda wan dɛn kin se pipul dɛn, lɛk smɔl pikin dɛn, kin day so dat dɛn go de wit Gɔd na ɛvin. Bɔt dat nɔto tru. Jiova nɔ de ɛva mek bad tin dɛn apin. Di Baybul se: “Rɔb yu mɔt na grɔn bifo yu se PAPA GƆD go du bad, ɛn rɔb yu mɔt na grɔn bifo yu se di Ɔlmayti go du rɔŋ tin!”—Job 34:​10.

6. Wetin mek bɔku pipul dɛn de blem Gɔd fɔ ɔl di tin dɛn we de mek pipul dɛn de sɔfa na di wɔl?

6 Bɔku pipul dɛn de blem Gɔd fɔ ɔl di bɔku tin dɛn we de mek pipul dɛn de sɔfa na di wɔl, bikɔs dɛn tink se na Gɔd de rul di wɔl. Bɔt as wi bin dɔn lan na Chapta 3, di pɔsin we de rul di wɔl na Setan.

7, 8. Wetin mek pipul dɛn de sɔfa na di wɔl?

7 Di Baybul tɛl wi se na “Setan de rul di ol wɔl.” (Jɔn In Fɔs Lɛta 5:​19) Di wan we de rul di wɔl we na Setan, rili wayl ɛn i wikɛd. I de “mek di ol wɔl ful.” (Rɛvɛleshɔn 12:​9) Bɔku pipul dɛn de falamakata am. Ɛn dat na wan rizin we mek di wɔl ful-ɔp wit pipul dɛn we de lay, we nɔ lɛk dɛnsɛf, ɛn we wikɛd.

8 Ɔda rizin dɛn de we mek pipul dɛn de sɔfa na di wɔl. Afta we Adam ɛn Iv nɔ bin obe Gɔd, dat bin mek di pikin dɛn we dɛn bɔn bin gɛt sin. Ɛn bikɔs ɔlman dɔn gɛt sin, dis dɔn mek mɔtalman de mek dɛn  kɔmpin dɛn de sɔfa. Bɔku tɛm, dɛn kin want fɔ sho se dɛn impɔtant pas ɔda pipul dɛn. Dɛn kin fɛt dɛn kɔmpin dɛn, fɛt wɔ, ɛn dɛn kin tek advantej pan ɔda pipul dɛn. (Ɛkliziastis 4:​1; 8:​9) Sɔntɛnde, pipul dɛn kin sɔfa “bikɔs tin dɛn we wi nɔ no se go apin kin apin.” (Ɛkliziastis 9:​11, NW) We wi de na di rɔng ples di rɔng tɛm dat kin mek aksidɛnt ɛn ɔda bad tin dɛn apin to wi.

9. Wetin mek wi shɔ se Jiova gɛt gud rizin fɔ alaw mɔtalman fɔ kɔntinyu fɔ sɔfa?

9 Jiova nɔ de ɛva mek pipul dɛn sɔfa. Nɔto in fɔ blem fɔ di wɔ we pipul dɛn kin fɛt, we pipul dɛn de brok lɔ, ɛn we ɔda pipul dɛn nɔ de trit dɛn kɔmpin dɛn fayn. Nɔto Gɔd de mek bad bad tin dɛn de apin, tin dɛn lɛk atkwek, big big briz, ɛn flɔd. Bɔt yu go de wɔnda, ‘If Jiova gɛt pawa pas ɔlman na di wan ol wɔl, wetin mek i nɔ fɔ dɔn stɔp dɛn bad bad tin ya?’ Wi no se Gɔd rili bisin bɔt wi, so i go mɔs gɛt gud rizin we mek i de alaw mɔtalman fɔ kɔntinyu fɔ sɔfa.—Jɔn In Fɔs Lɛta 4:​8.

WETIN MEK GƆD DE ALAW MƆTALMAN FƆ SƆFA

10. Aw Setan bin chalenj Jiova?

10 Insay di gadin we bin de na Idɛn, Setan bin ful Adam ɛn Iv. Setan bin lay pan Gɔd se i nɔ sabi fɔ rul. I bin de tray fɔ tɔk se Gɔd de kip gud tin frɔm Adam ɛn Iv. Setan bin want mek dɛn biliv se i sabi rul pas Jiova ɛn dɛn nɔ nid Gɔd.—Jɛnɛsis 3:​2-5; luk Ɛndnot 27 na pej 222.

11. Us kwɛstyɔn wi nid fɔ ansa?

11 Adam ɛn Iv nɔ bin obe Jiova ɛn dɛn tɔn dɛn bak pan am. Dɛn bin tink se dɛn gɛt di rayt fɔ disayd fɔ  dɛnsɛf wetin rayt ɛn wetin rɔng. Aw Jiova go pruv se Adam ɛn Iv dɛn bin rɔng ɛn sho se i no wetin fayn fɔ wi?

12, 13. (a) Wetin mek Jiova nɔ bin dɔnawe wit di wan dɛn we bin tɔn dɛn bak pan am wantɛm wantɛm? (b) Wetin mek Jiova bin alaw Setan fɔ rul di wɔl ɛn wetin mek Jiova alaw mɔtalman fɔ kɔntrol dɛnsɛf?

12 Jiova nɔ bin dɔnawe wit Adam ɛn Iv wantɛm wantɛm. Bifo dat, i bin alaw dɛn fɔ bɔn pikin dɛn. Dɔn, Jiova bin mek am pɔsibul fɔ mek di pikin dɛn we Adam ɛn Iv dɛn bɔn disayd fɔ dɛnsɛf udat dɛn go want fɔ mek i rul dɛn. Jiova bin want fɔ mek pafɛkt pipul dɛn de ɔlsay na di wɔl, ɛn dat go apin no mata wetin di Dɛbul tray fɔ du.—Jɛnɛsis 1:​28; Ayzaya 55:​10, 11.

13 Setan bin chalenj Jiova bifo bɔku bɔku enjɛl dɛn. (Job 38:​7; Daniɛl 7:​10) So Jiova alaw Setan fɔ sho if wetin i bin tɔk na tru. Gɔd dɔn alaw mɔtalman bak fɔ gɛt dɛn yon gɔvmɛnt we Setan de kɔntrol, fɔ sho if dɛn go ebul fɔ rul dɛnsɛf fayn fayn wan ilɛksɛf I nɔ ɛp dɛn.

14. We Jiova alaw mɔtalman fɔ rul dɛnsɛf, wetin dat dɔn pruv?

14 Fɔ lɔng lɔng tɛm naw, mɔtalman dɛn dɔn tray fɔ rul dɛnsɛf bɔt dɛn nɔ ebul. Dis dɔn sho klia wan se Setan na layman. Mɔtalman rili nid Gɔd fɔ ɛp dɛn. Di prɔfɛt Jɛrimaya bin tɔk tru we i se: “PAPA GƆD [“Jiova,” NW], a no se wetin mɔtalman de du nɔ de nain yon an, ɛn mɔtalman nɔ ebul kɔntrol in yon layf ɔ dayrɛkt in stɛp dɛm.”—Jɛrimaya 10:​23.

WETIN MEK JIOVA DƆN WET FƆ LƆNG LƆNG TƐM?

15, 16. (a) Wetin mek Jiova dɔn alaw mɔtalman fɔ sɔfa fɔ lɔng lɔng tɛm? (b) Wetin mek Jiova nɔ sɔlv di prɔblɛm dɛn we Setan bin kɔz?

15 Wetin mek Jiova dɔn alaw mɔtalman fɔ kɔntinyu fɔ sɔfa fɔ lɔng lɔng tɛm? Wetin mek i nɔ de  stɔp dɛn bad bad tin dɛn we de apin? Ɔl dis tɛm we Jiova dɔn alaw Setan fɔ rul, dɔn sho klia wan se Setan dɔn fel. Mɔtalman dɔn gɛt ɔlkayn gɔvmɛnt, bɔt dɛn stil nɔ si bɛtɛ. Pan ɔl we dɛn dɔn go bifo pan sayɛns biznɛs, bɔku pipul dɛn nɔ de trit dɛn kɔmpin dɛn fayn, bɔku pipul dɛn de brok lɔ, ɛn wɔ dɔn bɔku pas aw i bin de bi trade. If Jiova nɔ rul wi, wi nɔ go ɛva ebul fɔ rul wisɛf fayn.

16 Bɔt Jiova nɔ sɔlv di prɔblɛm dɛn we Setan bin kɔz. If i du dat, i go min se i de sɔpɔt di rul we Setan de rul, ɛn Jiova nɔ go ɛva du dat. If Jiova du am, mɔtalman go biliv se dɛn ebul fɔ rul dɛnsɛf fayn fayn wan. Bɔt dat nɔto tru, ɛn Jiova nɔ go sɔpɔt dis kayn tin. I nɔ de ɛva lay.—Di Ibru Pipul Dɛn 6:​18.

17, 18. Wetin Jiova go du bɔt ɔl di prɔblɛm dɛn we Setan dɔn kɔz?

17 Fɔ se Jiova go sɔlv ɔl di prɔblɛm dɛn we Setan ɛn mɔtalman dɔn kɔz? Yɛs! Natin nɔ de we Gɔd nɔ ebul fɔ du. Jiova no di tɛm we i go gi ansa to ɔl di chalenj dɛn we Setan bin dɔn chalenj am. Dɔn Jiova go mek di wɔl bi Paradays, jɔs lɛk aw i bin want am. Ɔl di wan dɛn we “dɔn day” go gɛt layf bak. (Jɔn 5:​28, 29) Pipul dɛn nɔ go ɛva sik ɔ day. Jizɔs go sɔlv ɔl di prɔblɛm dɛn we Setan bin dɔn kɔz. Jiova go yuz Jizɔs fɔ “pwɛl Setan in wok.” (Jɔn In Fɔs Lɛta 3:​8) Wi fɔ tɛl Jiova tɛnki bikɔs i dɔn peshɛnt wit wi fɔ sɔm tɛm naw, so dat wi go kam fɔ no am ɛn disayd fɔ mek i rul wi. (Rid Pita In Sɛkɔn Lɛta 3:​9, 10, NW.) Ivin we wi de sɔfa, Jiova de ɛp wi fɔ bia.—Jɔn 4:​23; rid Fɔs Lɛta Fɔ Kɔrint 10:​13.

18 Jiova nɔ de fos wi fɔ mek wi chuz am fɔ bi  wi Rula. Jiova dɔn gi mɔtalman wan gift we na di fridɔm fɔ disayd fɔ dɛnsɛf. Mek wi tɔk bɔt wetin dis fayn fayn gift min to wi.

AW YU GO YUZ DI GIFT WE JIOVA GI WI?

19. Us wɔndaful gift Jiova dɔn gi wi? Wetin mek wi fɔ tɛl am tɛnki fɔ dis gift?

19 Di wɔndaful gift we Jiova gi wi, dat na di fridɔm we wi gɛt fɔ disayd fɔ wisɛf mek wi difrɛn frɔm animal dɛn. Na di sɛns nɔmɔ we dɛn gɛt na de ɛp dɛn fɔ du tin, bɔt wi gɛt di fridɔm fɔ disayd aw wi want fɔ liv wi layf ɛn if wi want fɔ sav Jiova. (Prɔvabs 30:​24) Dɔn wi nɔ tan lɛk mashin dɛn we de du di tin dɛn nɔmɔ we dɛn mek dɛn fɔ du. Wi gɛt di fridɔm fɔ disayd udat dɛn wi want fɔ bi wi padi, udat wi want fɔ bi, ɛn wetin wi want du wit wi layf. Jiova jɔs want wi fɔ ɛnjɔy layf.

20, 21. Wetin na di bɛst tin we yu go disayd fɔ du naw?

20 Jiova want mek wi lɛk am. (Matyu 22:​37, 38) I tan lɛk papa we kin gladi we in pikin tɛl am frɔm in at se “A lɛk yu,” ɛn nɔto bikɔs dɛn fos am fɔ tɔk so. Jiova dɔn gi wi di fridɔm fɔ disayd if wi go want fɔ sav am ɔ wi nɔ go sav am. Setan, Adam, ɛn Iv bin disayd nɔ fɔ sav Jiova. Aw yu go yuz di gift we yu gɛt?

21 Yuz yu fridɔm fɔ sav Jiova. Bɔku bɔku pipul dɛn bak dɔn disayd fɔ mek Gɔd gladi ɛn tɔn dɛn bak pan Setan. (Prɔvabs 27:​11) Wetin yu fɔ du naw so dat yu go de we Gɔd in nyu wɔl go dɔn pul ɔl di tin dɛn we de mek wi sɔfa? Di nɛks chapta go ansa da kwɛstyɔn de.