Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA SƐVINTIN

Na Big Big Ɔnɔ fɔ Pre

Na Big Big Ɔnɔ fɔ Pre

Di Wan we “mek ɛvin ɛn di wanol wɔl” want fɔ yɛri wi prea dɛn.—Sam 115:​15

1, 2. Wetin mek yu tink se prea na spɛshal gift? Wetin mek wi nid fɔ no wetin di Baybul tich bɔt prea?

WE WI luk ɔl di tin dɛn we de na di skay lɛk di mun, di san, ɛn di sta dɛn, wi go si se di wɔl rili smɔl. We Jiova wach di wɔl, ɔl di neshɔn dɛn jɔs tan lɛk wan drɔp wata na bɔkɛt. (Sam 115:​15; Ayzaya 40:​15) Pan ɔl we wi smɔl we dɛn kɔmpia wi to ɔda tin dɛn we Jiova mek, Sam 145:​18, 19 se: “PAPA GƆD [“Jiova,” NW] rɛdi fɔ ɛp ɔl udat kɔl am fɔ ɛp dɛn, mɔ so, dɛn wan we de kɔl am wit ɔl dɛn at.” Dat na wɔndaful tin! Jiova, di Ɔlmayti we mek ɔltin, want fɔ kam nia wi, ɛn i want fɔ lisin to wi prea dɛn. Fɔ tru, prea na spɛshal gift we Jiova dɔn gi wi ɔl ɛn dat na big big ɔnɔ.

2 We wi pre to Jiova di we aw i want, na dat nɔmɔ go mek i lisin to wi. Aw wi go ebul fɔ du dat? Lɛ wi si wetin di Baybul se bɔt prea.

WETIN MEK WI FƆ PRE TO JIOVA?

3. Wetin mek yu fɔ pre to Jiova?

3 Jiova want yu fɔ pre ɔ tɔk to am. Aw wi no dat? Duya rid Lɛta Fɔ Filipay 4:​6, 7Tink bɔt dis inviteshɔn. Di Wan we de rul di wan ol wɔl rili bisin bɔt yu ɛn i want mek yu tɛl am bɔt aw yu de fil ɛn di prɔblɛm dɛn we yu gɛt.

4. We yu de pre to Jiova ɔltɛm, aw dat go mek yu padi biznɛs wit am tayt mɔ ɛn mɔ?

 4 Prea de ɛp wi fɔ gɛt tayt padi biznɛs wit Jiova. We padi dɛn kin tɔk to dɛnsɛf ɔltɛm bɔt wetin dɛn de tink, wetin de mɔna dɛn, ɛn aw dɛn de fil, dɛn padi biznɛs de tayt mɔ ɛn mɔ. Na di sem tin de apin we wi de pre to Jiova. Jiova dɔn yuz di Baybul fɔ sho wi aw i de tink, aw i de fil, ɛn wetin i gɛt fɔ du tumara bambay. We yu de tɔk to am ɔltɛm, yu kin ivin tɛl am bɔt aw yu rili de fil insay yu at. As yu de du dat, yu padi biznɛs wit Jiova go de tayt mɔ ɛn mɔ.—Jems 4:​8.

WETIN WI FƆ DU FƆ MEK GƆD YƐRI WI PREA?

5. Aw wi kam fɔ no se Jiova nɔ de lisin to ɔl prea?

5 Yu tink se Jiova de lisin to ɔl prea? Nɔ, i nɔ de lisin to ɔl prea. Insay prɔfɛt Ayzaya in tɛm, Jiova bin tɛl di Izrɛlayt dɛn se: “I lɛk we una pre bɔku bɔku  prea a nɔ go lisin; na so so blɔd de na una an.” (Ayzaya 1:​15) So if wi nɔ tek tɛm, wi go de du tin dɛn we go pul wi kɔmɔt nia Jiova, ɛn we go mek i nɔ lisin to wi prea.

6. Wetin mek i rili impɔtant fɔ gɛt fet? Aw yu go sho se yu gɛt fet?

6 If wi want mek Jiova lisin to wi prea, wi fɔ gɛt fet pan am. (Mak 11:​24) Di apɔsul Pɔl bin se: “If pɔsin nɔ gɛt fet, i nɔ go ebul fɔ du wetin Gɔd want fayn fayn wan; ɛnibɔdi we want kam to Gɔd fɔ biliv se i de, ɛn i go blɛs di wan dɛn we de tray tranga wan fɔ no am.” (Di Ibru Pipul Dɛn 11:​6) Bɔt i nɔ du fɔ mek wi jɔs se wi gɛt fet pan Gɔd. Wi nid fɔ rili sho dat bay we wi de obe Jiova ɛvride.—Rid Jems 2:​26.

7. (a) Wetin mek wi fɔ put wisɛf dɔŋ ɛn sho rɛspɛkt we wi de pre to Jiova? (b) Aw wi go sho se wi ɔnɛs we wi de pre?

7 We wi de pre to Jiova, wi fɔ sho rɛspɛkt ɛn wi fɔ put wisɛf dɔŋ. Wetin mek? If wi de tɔk to kiŋ ɔ prɛsidɛnt, wi go tɔk to am wit rɛspɛkt. Jiova na di Ɔlmayti Gɔd, so yu nɔ tink se wi fɔ sho am mɔ rɛspɛkt ɛn put wisɛf dɔŋ we wi de tɔk to am? (Jɛnɛsis 17:​1; Sam 138:​6) We wi de pre to Jiova wi fɔ ɔnɛs ɛn wi fɔ tɛl am wetin de na wi at; wi nɔ fɔ jɔs de se di sem tin ɔltɛm.—Matyu 6:​7, 8.

8. We wi pre bɔt sɔntin, wetin bak wi fɔ du?

8 We wi de pre bɔt sɔntin, wi fɔ du ɔl wetin wi ebul fɔ wok fɔ wetin wi de pre fɔ. Fɔ ɛgzampul, if wi pre to Jiova fɔ wetin wi nid fɔ di de, wi nɔ fɔ lezi ɛn tink se Jiova go gi wi ɔltin we i bi se wi ebul fɔ wok fɔ gɛt wetin wi want. Wi fɔ wok tranga wan ɛn gri fɔ tek ɛni wok we wi ebul fɔ du. (Matyu 6:​11; Sɛkɛn  Lɛta Fɔ Tɛsalonayka 3:​10) Ɔ if wi pre to Jiova fɔ mek i ɛp wi fɔ stɔp fɔ du sɔntin we bad, wi fɔ avɔyd ɛnitin we go mek wi want fɔ du bad. (Lɛta Fɔ Kɔlɔse 3:​5) Lɛ wi tɔk bɔt sɔm kwɛstyɔn dɛn we pipul dɛn kin aks bɔt prea.

SƆM KWƐSTYƆN DƐN WE PIPUL DƐN KIN AKS BƆT PREA

9. Udat wi fɔ pre to? Wetin Jɔn 14:​6 tich wi bɔt prea?

9 Udat wi fɔ pre to? Jizɔs bin tich in disaypul dɛn fɔ pre to “Papa Gɔd we de na ɛvin.” (Matyu 6:​9) I tɛl dɛn bak se: “Mi na di rod we fɔ pas go to Gɔd, na mi de gi pipul di tru layf; nɔbɔdi nɔ go kam to mi Papa pas di pɔsin pas tru mi.” (Jɔn 14:​6) So na to Jiova nɔmɔ wi fɔ pre ɛn wi fɔ pas di prea tru Jizɔs. Wetin i min fɔ pre tru Jizɔs? Fɔ mek Jiova go ansa wi prea dɛn, wi fɔ sho se wi rɛspɛkt di spɛshal wok we i dɔn gi Jizɔs. As wi bin dɔn lan, Jizɔs bin kam na di wɔl fɔ sev wi frɔm sin ɛn day. (Jɔn 3:​16; Lɛta Fɔ Rom 5:​12) Jiova dɔn pik Jizɔs as di Ay Prist ɛn Jɔj.—Jɔn 5:​22; Di Ibru Pipul Dɛn 6:​20.

Yu kin pre ɛnitɛm

10. Wi nid fɔ mek ɛni spɛshal we we wi de pre? Ɛksplen.

10 Wi nid fɔ mek ɛni spɛshal we we wi de pre? Nɔ, Jiova nɔ tɛl wi fɔ nil dɔŋ, sidɔm, ɔ tinap we wi de pre. Di Baybul tich wi se wi kin mek ɛni we aw wi want wans wi sho rɛspɛkt we wi de tɔk to Jiova. (Fɔs Kronikul 17:​16; Nɛimaya 8:​6; Daniɛl 6:​10; Mak 11:​25) We wi de pre, nɔto di spɛshal we aw wi mek impɔtant to Jiova, bɔt wetin impɔtant na we wi de tɔk to am di rayt we. Wi kin pre lawd wan ɔ kwayɛt wan ilɛk usay wi de ɔ wi kin pre santɛm, nɛt, ɔ ɛni  ɔda tɛm. We wi de pre to Jiova, wi fɔ biliv se i go yɛri wi ivin we nɔbɔdi nɔ yɛri.—Nɛimaya 2:​1-6.

11. Wetin na sɔm tin dɛn we wi kin pre to Jiova fɔ?

11 Wetin wi fɔ pre fɔ? Wi kin pre fɔ ɛnitin we Jiova go gladi fɔ. Di Baybul se we “wi aks am fɔ ɛnitin, i go yɛri wi ɛn gi wi, if na dat in want.” (Jɔn In Fɔs Lɛta 5:​14) Yu tink se wi fɔ pre bɔt tin dɛn we de apin to wi? Yɛs. We wi de pre to Jiova, i fɔ tan lɛk se wi de tɔk to wi tayt padi. Wi kin tɛl Jiova ɛnitin we de na wi maynd ɛn we de na wi at. (Sam 62:​8) Wi kin pre to am fɔ mek i gi wi in oli spirit we gɛt pawa fɔ mek i ɛp wi fɔ du wetin rayt. (Lyuk 11:​13) Wi kin aks Jiova bak fɔ mek i gi wi sɛns fɔ disayd fɔ du di rayt tin, ɛn wi kin pre fɔ mek wi gɛt trɛnk fɔ bia ɛni prɔblɛm. (Jems 1:​5) Wi fɔ aks Jiova fɔ mek i fɔgiv wi sin dɛn. (Lɛta Fɔ Ɛfisɔs 1:​3, 7) Wi fɔ pre bak fɔ ɔda pipul dɛn, wi fɔ pre fɔ wi famili, ɛn wi brɔda ɛn sista dɛn na di kɔngrigeshɔn.—Di Apɔsul Dɛn Wok [Akt] 12:​5; Lɛta Fɔ Kɔlɔse 4:​12.

12. Wetin fɔ impɔtant mɔ to wi we wi de pre?

12 Wetin fɔ impɔtant mɔ to wi we wi de pre? Na Jiova ɛn wetin i want fɔ impɔtant to wi. Wi fɔ tɛl am tɛnki wit ɔl wi at fɔ ɔltin we i dɔn du fɔ wi. (Fɔs Kronikul 29:​10-13) Wi no dat bikɔs we Jizɔs bin de na di wɔl, i bin tich in disaypul dɛn aw fɔ pre. (Rid Matyu 6:​9-13.) I bin se dɛn fɔ pre fɔs fɔ mek dɛn ɔnɔ Gɔd in nem, dat min se, dɛn fɔ trit Gɔd in nem as sɔntin we oli. Dɔn, Jizɔs bin sho dɛn se dɛn fɔ pre fɔ Gɔd in Kiŋdɔm fɔ kam ɛn fɔ mek wetin Jiova want bi na di wɔl. Jizɔs bin se wi fɔ pre fɔ  tin dɛn we wi nid afta wi dɔn pre fɔ di tin dɛn we rili impɔtant. We wi put Jiova ɛn wetin i want fɔs, wi de sho wetin impɔtant to wi.

13. Aw lɔng wi fɔ pre?

13 Aw lɔng wi fɔ pre? Di Baybul nɔ tɛl wi. Wi kin pre lɔng wan ɔ wi kin pre shɔt wan, i lɛf to wetin de apin to wi. Fɔ ɛgzampul, wi kin pre shɔt wan bifo wi it bɔt wi kin pre lɔng wan we wi de tɛl Jiova tɛnki  ɔ we wi de tɛl am bɔt wetin de mɔna wi. (Fɔs Samiɛl 1:​12, 15) Wi nɔ fɔ pre lɔng lɔng wan jɔs bikɔs wi want fɔ blɔf ɔda pipul dɛn lɛk aw sɔm pipul dɛn bin de du insay Jizɔs in tɛm. (Lyuk 20:​46, 47) Dɛn kayn prea dɛn de nɔ kin mek Jiova gladi. Di tin we impɔtant to Jiova na we wi de pre to am frɔm wi at.

14. Ɔmɔs tɛm wi fɔ pre? Wetin dis tich wi bɔt Jiova?

14 Ɔmɔs tɛm wi fɔ pre? Jiova tɛl wi fɔ de tɔk to am ɔltɛm. Di Baybul se wi fɔ de “pre,” wi nɔ fɔ “taya fɔ pre,” ɛn wi fɔ “de pre ɔltɛm.” (Matyu 26:​41; Lɛta Fɔ Rom 12:​12; Fɔs Lɛta Fɔ Tɛsalonayka 5:​17) Jiova rɛdi fɔ lisin to wi prea ɔltɛm. Wi kin tɛl am tɛnki ɛnide fɔ di lɛk we i lɛk wi ɛn di gud we i de du to wi. Wi kin  aks Jiova bak fɔ gayd wi, gi wi trɛnk, ɛn kɔrej wi. If wi rili valyu di ɔnɔ we wi gɛt fɔ pre to Jiova, wi go yuz ɛni chans we wi gɛt fɔ tɔk to am.

15. Wetin mek wi fɔ se “emɛn” we wi dɔn fɔ pre?

15 Wetin mek wi fɔ se “emɛn” we wi dɔn fɔ pre? Di wɔd “emɛn” min “fɔ tru” ɔ “lɛ i bi so.” We wi se emɛn wi de sho se wi min wetin wi tɔk we wi de pre, ɛn i de sho se wi ɔnɛs. (Sam 41:​13) Di Baybul tɛl wi se i fayn fɔ se “emɛn,” lawd wan ɔ wi kin tɔk am na wi at we ɔda pɔsin de pre. Dat de sho se wi gri wit wetin di pɔsin dɔn tɔk.—Fɔs Kronikul 16:​36; Fɔs Lɛta Fɔ Kɔrint 14:​16, NW.

AW GƆD DE ANSA WI PREA DƐN?

16. Yu tink se Jiova de rili ansa wi prea dɛn? Ɛksplen.

16 Yu tink se Jiova de rili ansa wi prea dɛn? Yɛs, i de ansa wi prea. Di Baybul kɔl am di wan “we de ansa wi prea.” (Sam 65:​2) Jiova de yɛri ɛn ansa bɔku pipul dɛn we de pre to am frɔm dɛn at, ɛn i de du dat difrɛn difrɛn we dɛn.

17. Aw Jiova de yuz enjɛl dɛn ɛn in savant dɛn we de na di wɔl fɔ ansa wi prea dɛn?

17 Jiova de yuz enjɛl dɛn ɛn in savant dɛn we de na di wɔl fɔ ansa wi prea dɛn. (Di Ibru Pipul Dɛn 1:​13, 14) Bɔku ɛgzampul dɛn de we sho se Jiova Witnɛs dɛn dɔn go fɛn sɔm pipul dɛn jɔs afta we dɛn dɔn fɔ pre fɔ mek dɛn go ebul ɔndastand di Baybul. Di Baybul sho se di enjɛl dɛnsɛf de ɛp fɔ tɛl pipul dɛn di “gud nyuz” ɔlsay na di wɔl. (Rid Rɛvɛleshɔn 14:​6.) Apat frɔm dat, bɔku pan wi dɔn pre to Jiova bɔt wan patikyula prɔblɛm we wi gɛt ɔ sɔntin we wi  nid ɛn i dɔn yuz wi Kristian brɔda ɔ sista fɔ ɛp wi.—Prɔvabs 12:​25; Jems 2:​16.

Jiova de yuz ɔda Kristian dɛn fɔ ansa wi prea dɛn

18. Aw Jiova de yuz in oli spirit ɛn di Baybul fɔ ansa wi prea dɛn?

18 Jiova de yuz in oli spirit fɔ ansa wi prea dɛn. We wi pre to Jiova fɔ ɛp wi fɔ bia wit wi prɔblɛm, i kin yuz in oli spirit fɔ gayd wi ɛn fɔ gi wi trɛnk. (Sɛkɛn Lɛta Fɔ Kɔrint 4:​7) Jiova de yuz di Baybul bak fɔ ansa wi prea dɛn ɛn fɔ ɛp wi fɔ disayd fɔ du di rayt tin. We wi rid di Baybul, wi go si skripchɔ dɛn we go ɛp wi. Jiova kin mek pɔsin we de gi kɔmɛnt na mitin tɔk sɔntin we wi nid fɔ yɛri. Ɔ i kin mek wan ɛlda na di kɔngrigeshɔn sho wi sɔntin na di Baybul we go ɛp wi.—Lɛta Fɔ Galeshya 6:​1.

19. Wetin mek i kin tan lɛk se Jiova nɔ ansa wi prea dɛn?

19 Bɔt sɔntɛnde, wi go de wɔnda, ‘Wetin mek Jiova nɔ ansa wi prea yet?’ Mɛmba se i no ustɛm ɛn aw fɔ ansa wi prea dɛn. I no wetin wi nid. Wi go nid fɔ kɔntinyu fɔ de pre fɔ sho se wi rili min wetin wi de tɛl Jiova ɛn fɔ sho am bak se wi rili gɛt fet pan am. (Lyuk 11:​5-10) Sɔntɛnde, Jiova kin ansa wi prea dɛn di we aw wi nɔ tink se i go ansa dɛn. Fɔ ɛgzampul, sɔntɛm wi go dɔn pre bɔt sɔntin we de mɔna wi bɔt Jiova nɔ pul di prɔblɛm pan wi, bifo dat, i gi wi trɛnk fɔ ebul fɔ bia wetin de apin to wi.—Rid Lɛta Fɔ Filipay 4:​13, NW.

20. Wetin mek wi fɔ de pre to Jiova ɔltɛm?

20 Na big big ɔnɔ wi gɛt fɔ de pre to Jiova! Wi fɔ biliv se i go lisin to wi. (Sam 145:​18) We wi de pre to Jiova ɔltɛm wit ɔl wi at, dat de mek wi padi biznɛs wit am tayt.