Ihi ia Tokala ku Bhanga o Jikidistá Lelu?

O JIKIDISTÁ ja kidi lelu, kene mu di ta mu maka a jinguvulu. Mukonda diahi? Mukonda a kaiela o phangu ia Jezú. Muéne ua zuela ia lungu ni muéne: ‘Eme ki ngi bhange mbandu ia mundu.’ Ku mbandu ia akaiedi’ê, uambe: ‘Enu ki mu bhange mbandu ia mundu.’ (Nzuá 15:19; 17:14) Ijiia se mukonda diahi o Jikidistá ka tokala ku dita mu maka a jinguvulu.

1. O athu ka a bhange phala ku di tumina mudiâ. O Bibidia i zuela kuila o athu kala ni uhete ua ku di tumina mudiâ. O polofeta Jelemiia ua soneka: ‘O njila ienda o muthu ki iene bhu lukuaku lua muthu-muene mba muthu ki muéne uendesa o makanda mê.’—Jelemiia 10:23.

Mukonda o athu ka a bhange phala kuenda bhulu kála ki bhanga o jinjila, kienhiki ene ka a bhange phala ku di tumina kiambote mudiâ. Mu kuzuela ia lungu ni jinguvulu mu ku tumina, o mukua musoso David Fromkin, ua soneka: “O jinguvulu athu a ituxi, mu kiki ene a lueza, ka tena ku kumbidila o ikanenu ia bhanga. Ene ala ni kutena, maji ki kutena kua soko. (O maka a Unguvulu) Mukonda dia kiki, ki tu tokala ku diuana, kioso ki tu dimuna o Bibidia kuila ki tu tokala ku dielele ku muthu!—Jisálamu 146:3.

2. O jinzumbi ja phulu jala ni kutena kuavulu kua ku nganala. Kioso Satanaji kia bhana o unguvulu kua Jezú, muéne ka ditunu kuila Diabhu ua kexile ni kutena kua ku mu bhana o mautuminu oso a mundu. Maji mu kithangana kia mukuá Jezú uambe kuila Satanaji muéne, “o sobha ia mu tumina mu ngong’umu.” Mu ku bhita mivu, o poxolo Phaulu uambe kuila Satanaji muéne,  “o nzambi iaiibha ia mundu iú.” (Nzuá 14:30; 2 Kolindo 4:4) Phaulu ua sonekena o Jikidistá: “O kulua kuetu . . . ni ifuxi ia jinzumbi ja phulu ku ididi ia diulu.” (Efezo 6:12) O jinzumbi ja phulu, jene ji tumina o jinguvulu ja mundu iú. O kuila o kuijiia o kidi kiki, ki tena ku tu fidisa ku di ta mu maka a jinguvulu?

Xinganeka mu kifika kiki: Kála o ji baluku jofele mu kalunga a tena ku ji takujula ku mabhuku a makota, o mautuminu a jinguvulu, a mu a takujula uâ ku jinzumbi ja phulu. O endexi mu ji baluku, ka tena ku bhanga kima phala ku fidisa o mabhuku ku takujula o ji baluku, o jinguvulu ka tena ku lenga o jinzumbi ja phulu. O jinzumbi jiji, ki jene ngó mu funhisa o athu, maji ja mu bheka ué ‘o malamba mu ngongo.’ (Dijingunuinu 12:12) Muthu umoxi ngó ua tundu Satanaji ni madimonho mê, u tena ku zubha o malamba mu ngongo. O Muthu iú Jihova Nzambi.—Jisálamu 83:18; Jelemiia 10:7, 10.

3. O Jikidistá ja kidi a belesela ngó o Utuminu ua Nzambi. Jezú ni maxibulu mê ejidile kuila mu kithangana kia tokala, Nzambi ueji tumbika nguvulu ku diulu phala ku tumina o ixi ioso. O Bibidia i zuela kuila o unguvulu iú, o utuminu ua Nzambi, ni kuila o muthu a mu solo phala ku kala Sobha ni ku Tumina, Jezú Kristu. (Dijingunuinu 11:15) O Utuminu iú ua-nda bheka mabesá ku athu oso, kiene kia bhangesa Jezú ku boka “o njimbu Iambote ia Utuminu ua Nzambi.” (Luka 4:43) Jezú ua longo ué o maxibulu ku samba: “Utuminu ué uize.” Mukonda diahi? Mukonda bhu kaxi ka Utuminu iú, o vondadi ia Nzambi ene mu i bhanga ku diulu, a-nda i bhanga ué mu ixi.—Matesu 6:9, 10.

Mu kiki-phe ihi ia-nda bhita ni jinguvulu? O Bibidia i zuela kuila o jinguvulu “jiia mu nhunga ku jisobha mu ngongo ioso,” a-nda ji buika. (Dijingunuinu 16:14; 19:19-21) Se muthu u xikina kuila o Utuminu ua Nzambi ua-nda buika o jinguvulu, muéne ka-nda kala ku mbandu ia jinguvulu jiji. Sé muéne u bhanga kiki, kala ku mbandu ia Nzambi.

Mukonda dia ku kamba ku di ta mu maka a jinguvulu, o kuila kiki kilombolola kuma o Jikidistá ka mesena o mbote ia diembu mua tungu? O milongi ia-nda kaiela ia-nda tambuijila o kibhuidisu kiki.

[Kilombuelelu ku mbandu 6]

O Jimbangi ja Jihova a boka o Utuminu ua Nzambi, ka boka kuila o jinguvulu ene a-nda zubha o maka mu ngongo